1 Tamuwen 6 - Ala Wone Peenok Peebi Mbanak

Ala aloobut mbanak Iterali wonogwe me nappi wogogwaarak wone

¹ At Aliku ALA aloobut mbanak aakumi Pilitin iname wonage kagak, tut 7 penengge mbareegi,

² it aakumi Pilitin mendek nogo nen aap kugi unde inom, it tili pagangga inom, woraawak nduk, wiirogogwaarak wogo mbareegwa, yorogo logonet, “Aliku ALA aloobut mbanak yi, nonggop eeruwok o? Iyokan wonagagim nappuurak kenok, nonggop agago nappuurak, yo'niraanip o.”

³ Yorogo mbareegwa, it nen yorogo logonet, “Aakumi Iterali inogoba Ala aloobut mbanak ti, nappuurak kenok, we nappuurak lek o. Ata, wonok wogotak ti, maluk aret eekotak me, it inogoba ti nen, kinomaluk lek eerogo pinagawak nduk, onggo inom aret nappuurak o. Ti eekwi kiinok, andi eekkinake nogo lek age, ndi, at nen nanonduk aaninggin-paaninggin kinoba pinagage nogo kineenu ogwe, eerumunggup o.”

^4-5 Yorogo mbareegwa, it aakumi Pilitin mendek nen it yorogo logonet, “Maluk eeko nogoorak nogo, at nen lek eerogo pinanuwak nduk, nano mendek inom nappuwok o?” Yorogo mbareegwa, it aap nogo nen yorogo logonet, “Kit inom, kinogobamini aap inendagembogut nogo inom, ambugwi ndak-ndak kinawin piirik-kunik eekkinakerak me, kit kineebe inom, kinagugi inom, kinanggween inom, maluk eerogo pinagage yi, Iterali inogoba Ala ayuk wukwi kiinok, lek aruwak nduk, kinogobamini kinarum menggaarak ineengge ndak-ndak mbuti emas paga kinawin kumbi piirik ndak-ndak wakkagak 5 inom, ndi, ambeya nen kinanggween maluk eerogo pinagage nogo wakkagak 5 inom, ogobakkigirogo pinip o.

⁶ O maan aap Pirawun inom, it aakumi Metit mendek inom, iniki omaawi eeppunuk wonogogwaarak kokwak, kit nonggop nduk togop aret kiniki omaawi eeppunuk ogotik? It iniki omaawi wonogwe iinok, Iterali nappiya woraawak nduk, inogoba Ala nen andi-pandi mondok iya it Metit mendek inoba piyareegerak nogo lek a?

⁷ Togop aret eeppiyareegerak me, nggweendo ngget mendek ogobakkigirik inom, tapi kooli mbere inaagalogwe yilak awo nunggwi nogo nggweendo nikkenok nawak nduk, enggaanok paga keele awo yilunogo pega'lek inom, waganogo nggweendo nogo paga mbarenogo piinok, inaagalogwe waganogo anggenogona mambiigo logomonggotik,

⁸ Aliku ALA aloobut mbanak nogo waganogo nggweendo ogobakkigirik nogo paga kwippugwi, ndi, kinomaluk onggo puurak nduk, yi mendek ndi mendek mbuti emas paga ogobakkigirik at ake nappuurak nogo, peti ambi yonggologo punuk, inom kwippugwi, eeppunuk, it tapi inalik aret nawak nduk, nappiinok nogwe iigak,

⁹ kinigen wogonako logonip o. Tapi nogo nen nok-nok, wonok o Mbet-Temet wonagagim time pi nogwe iinok, Iterali inogoba Aliku ALA nogo nen aret andi-pandi ee'ninabuwak nduk, nappi wagaarak kagi, mbakwi, ndi, nggweendo ogobakkigirik nogo nok-nok, time nage lek kenok perak, andi ee'ninakerak nogo, at nen ee'ninabulik, we alik en ee'ninakerak aret kagi, mbakwi, eeruwok o,” yinuk, yorogogwaarak.

¹⁰ Yorogo mbareegwa, togop aret eeko logonet, tapi ineebe mbere nogo inaagalogwe anggenogona mambiinok, inagalomini ineebe waganogo nggweendo paga mbarembiigwi,

¹¹ Aliku ALA aloobut mbanak nogo nggweendo paga kwippugwi, inawin kumbi piirik ogut wakkagak aago nogo inom, ambeya ogut wakkagak mbuti emas paga ogobakkigirik nogo inom, peti enoona yonggologo punuk, nggweendo paga kwippugwi, eeppunuk, nappi wogogwaarak.

¹² Nappi wogo mbareegwa, tapi mbere nogo yinomo-nanomo yaga'lek inalik nen inoone “Mu,” agan o Mbet-Temet tu nggwok paga nok-nok, aret wogwe iigak, it Pilitin inoweewi inendagembogut 5 nogo, “Tu ngge paga nogwe iyaamun?” yinuk, inigen wogoren inambokan o Mbet-Temet kuli paga ari wogogwaarak.

¹³ Ari wogo mbareegwa, it aakumi Mbet-Temet mendek nogo nen o kobappaga time gandum anggen yugu mbanggwi me, inigen pila yogo nogogwaarik, Aliku ALA aloobut mbanak nogo wonok wogwe inigen kogo nogogwaarik, inale'nggen nggwok mbareegwaarak.

^14-15 Inale'nggen nggwok mbakwi wonogwe iigak, nggweendo wonok wogwe nogo aap ambi endage Yotuwa o Mbet-Temet mendek eyabume yugum nggwok lunik wonage me taa'nogo puk ari wogogwaarak. Puk ari wogo mbareegwa, it aakumi Lewi mendek nogo nen Aliku ALA aloobut mbanak inom, peti mbuti emas ogut wakkagak aago yonggolak inom, nggweendo paga nen waganogo yugum nggwok ogombaga kwippogo mbareegwa, ne ti paga aret it aakumi Mbet-Temet mendek inale'nggen nen tapi nogo Aliku ALA ake warogo kani kuniyak nduk, eyo nggweendo ogobakkigirik nogo kalik-kalok agago tapi mbere nogo Aliku ALA ake warogo taati aret kani kunggo logonet, alik ambinom ake warogo kani kuneegwaarak.

¹⁶ Aakumi Iterali mendek ti eekwi nogo it aap Pilitin mendek inendagembogut 5 nogo nen inigen iigo nogogwaarik, ti eyom paga aret iniyokan iname o Ekoron aret nogogwaarak.

¹⁷ It aakumi Pilitin mendek nen maluk eereegwaarak nogo Aliku ALA nen lek eerogo piyaawak nduk, inawin kumbi piirik ogut wakkagak agago mbuti emas paga ogobakkigireegwaarak nogo ti, aakumi ambi Atorot mendek, ambi Nggata mendek, ambi Atekelon mendek, ambi Nggat mendek, ndi, ambi Ekoron mendek, inake aret nappi wogwe,

¹⁸ ndi, mbuti emas paga ambeya ogut wakkagak ogobakkigireegwaarak nogo ti, it aap inendagembogut ineebe 5 o inalitak lombok unde menggam nogo owa'nagat wurik yaga'lelo lombok inom ndak-ndak inake ogobakkigirogo nappi wogwe, eereegwaarak. Ndi, wonok aap Mbet-Temet mendek endage Yotuwa eyabume yugum nggwok paga Aliku ALA aloobut mbanak kwippereegwam nogo ti, ineenu agak o yogondak wonage aret o.

¹⁹ It aap Mbet-Temet mendek ando nen Aliku ALA aloobut mbanak me nogome ina mannogo mbareegwa, Ala nen ineebe 70 aret inooreegerak. Inooke mbareegi, “At Aliku ALA nen abu iya lombok eeppinanegerak kogo o,” yinuk, leenggu maako nogogwaarak.

²⁰ Leenggu maako mbareegwa, it aap Mbet-Temet mendek nogo nen, “At Aliku ALA nogo ti, abu kikak nakeelik at Ala alik leenak menggerak me, ta nen at enggaanom paga eenik logorak mbakop? Meek aret me, Ala aloobut mbanak ti, nit wonogwe me yime logorak lek wonok nggeeme pi nawok o?”

²¹ Yogo nogogwaarik, it aakumi Kiriyat-Yeyarim mendek nogo wone agago nappiigo logonet, “Aliku ALA aloobut mbanak nogo it aap Pilitin mendek nen muk iyokan nappi wagaarak yime wonage me, kiname time pi namunggup nduk, wa woraanip o,” yinuk, yonggo nappiyareegwaarak.