1 Tamuwen 4 - Ala Wone Peenok Peebi Mbanak

Ala aloobut mbanak it Pilitin mendek nen ndineegwaarak wone

¹ Ne ti eyom paga it aap Iterali nen aakumi Pilitin inom wim namburuwok nduk, wundi nogo nogogwaarik, o Eben-Kayetet aret inawooliya wukkologwe, ndi, it Pilitin mendek nogo o Apek time aret inawooliya wukkologwe, eereegwaarak.

² Eeko nogogwaarik, it Pilitin mendek nen aap Iterali mendek inom perenggolaawok nduk, nappiya wogogwaarak inom wim nambuko logonet, it aap Iterali mendek tebenogo piinok, aap empat ribu negen aret wim tinime time inoorogo piyareegwaarak.

³ Inooko mbareegwa, it Iterali inawuri ineegin warak nogo iniyokan inawooliya wurik me wogo nogogwaarik, aap Iterali inoweewi it mban-mban yogo logonet, “It aap Pilitin mendek nen ninooruwak nduk, at Aliku ALA nen nonggop nduk teppinanegerak mbakop? Aliku ALA ninom logonet, ninawim ineenggime nen ndinninake logowak nduk, Aliku ALA aloobut mbanak wone yugu yonggolak o Tilo wonage nogo wa nawok o.”

⁴ Yogo nogogwaarik, at Ala aloobut mbanak irip-irip malayikat negen kerub ogut ogobakkigirik kagak, oolo time at Aliku Omaawi Lombok Menggerak ALA wone yugu yonggolak nogo aakumi Iterali nen wa nawak nduk, nappiigo mbareegwa, aap Eli apuri ineebe mbere, Kopini Pinekat imbirak nogo inom nen wonok wogogwaarak.

⁵ Aliku ALA aloobut mbanak wone yugu yonggolak nogo wonok inawooliya oore'nggam nogome unggwi wogo mbareegwa, aakumi Iterali nogo abok aret inale'nggen nen keekok piyanggogo mbareegwa, nggween apit nuk yereegerak.

⁶ Keekok piyanggogogwaarak nogo, it aap Pilitin mendek inaruk konenggo nogogwaarik, it mban-mban yogo logonet, “It aap Iberani mendek inawooliya oore'nggam nogome keekok yogwe ti, nonggop nduk, yogo agaarik o?” Yogo nogogwaarik, “Lek o. Aliku ALA aloobut mbanak nogo wonok Iterali inawooliya oore'nggam pi wogo nagaarik, yogo agaarik o,” yinuk,

⁷ yogwe nogo konembunuk, inagabiti nen yogo logonet, “It Iterali inagugiwak ambi inawooliya oore'nggam pi wagaarak wonage kenok, o maan nen nok-nok yogondak kuli togop eeka'lek aret wonagaarak kwe, yogondak eeke me, maluk eeppinanigin aret kogo o.

⁸ It inagugi omaawi mondok iya me, ineenggime nen ta nen ninagap ndarigin o. It aakumi Metit mendek o karume aaninggin-paaninggin inoba piyareegerak kambit nogo nogogwaarak nogo, inagugi ti nen aret inooke nagagerak me,

⁹ kit Pilitin mendek yi wae. Kit apit wakaa'ngget a'nuk, wim eeko logonip o. Togop eekwi lek kiinok, it Iberani mendek nit ninayeloman wonogogwaarak nogo pogom nit it inayeloman logukwak, wim abu wakaa'ngget a'nuk nambuko logonip o.”

¹⁰ Yogo nogogwaarik, it aakumi Iterali inom wim perenggologo logonet, mondok tebenogo piinok, it ineegin warak ineebe ambik lombok tiga puluh ribu aret inooko mbareegwa, aakumi Iterali ando nogo inalitik-inalitak iname lombok mbaganit wogwe iigak,

¹¹ Ala aloobut mbanak nogo ndinggologwe, ndi, it Eli apuri mbere, Kopini Pinekat imbirak inookwi, eereegwaarak.

Eli kambeegerak wone

¹² Eeko mbareegwa, ne ti eyom paga aap anebunu Mbeniyamin mendek ambi nen ayum nibinogo pege, anobak paga nggween labuk-mbabuk eerogo pege, ee'nuk, wim nambukwi me nen mbe agan o Tilo wage nagagerik,

^13-15 “Ndogop aret ninookaarak o,” yinuk, it aakumi o Tilo mendek wone mbininogo yorage mbareegi, it aakumi o tini time mendek abok aret yiyi-wowo yogo logonet, le yereegwaarak. Ndi, at Eli nogo ndarak kagak tahun 98 eeke nagagerik, enegen ogut yi mendek ndi mendek enegen koorak meek me, Ala aloobut mbanak ndinggologwe iyo, iniki aaninggin nen at ageyo ndoonak tu ambet paga kwi'ndak arum wonage me, it le yiyi-wowo yogwe nogo aruk konengge nagagerik, “Nanonduk le yiyi-wowo yogo agaarik o?” ari kagak, aap wone wonok wagagerak nogo Eli yorikit nduk mbe agan owagam wagagerak.

¹⁶ Owagam wage nagagerik, at nen Eli yoge logonet, “An yogondak yi aret wim nambukwi me nen mbaganit wagi o.” Yoge mbareegi, at Eli nen, “Nonggop age mbaki, wagan o, naput?”

¹⁷ Yoge mbareegi, aap wone wonok wagagerak nogo nen, “Lek o, nogoba. It aakumi Iterali nogo nen aap Pilitin mendek iinok, mbaganit wogwe iigak, nit aakumi Iterali mendek nogo apit aret ninooko logonet, kat kapuri Kopini Pinekat imbirak inookwi, ndi, Ala aloobut mbanak nogo ndinggwi, eekaarak o,” yinuk, yoreegerak.

¹⁸ Yoge mbareegi, at Eli nogo Ala aloobut mbanak ndineegwaarak nogo konengge nagagerik, at ageyo ndoonak tunggambe paga kwi'ndak wonage nogo, abut loguk togon wangge logonet, at aap anggok eebe kole aaninggin ambik me, uut koguk togon kambeegerak. At Eli nogo nen aakumi Iterali mendek inarum wonage logonet, inowak loongge kagak tahun 40 eereegerak.

Pinekat akwe kambeegerak wone

¹⁹ Ndi, at Eli ayinggelo Pinekat akwe nogo abila abu koorok nda'nariyak aret wonage me, Ala aloobut mbanak ndineegwaarak wone inom, ayinggelo Eli kambeegerak wone inom, at ogonggelo Pinekat wareegwaarak wone inom, aruk konengge nagagerik, iniki wakko'nok kambikit nduk, andi yagan wake logonet, aagaluk perak togon aret ndareegerak.

²⁰ Ndappunuk, kwe nogo abu kambuurak eeke kagak, it kumi elege ndaganaka nogo nen at yogo logonet, “Kagabiti arugun o. Kaagaluk aap aret ndakendak me,” yinuk, yoreegwaarak kwe, wone nogo liippege, onggo yorage, eeka'lek kangge logonet,

^21-22 “Ala aloobut mbanak ndinggwi, nayinggelo nogonggelo imbirak kanggwi, eekaarak me, Ala eya abinak aago Iterali inenggela'me wonage nogo lek aret aga o,” yinuk, aagaluk endage Ikabot toombunuk, “Ala aloobut mbanak ndinggaarak me, Ala eya abinak aago Iterali paga lek agaarak o,” ari nagagerik, aret kambeegerak.