1 Tamuwen 31 - Ala Wone Peenok Peebi Mbanak

Tawun apuri inom kambeegwaarak wone

¹ Ti eerit nogwe eyom paga aap Pilitin mendek nen puut Nggilobowa time aap Iterali mendek inom wim nambuko logonet, apit aret inookwi iigak, it Iterali mendek eegu nogo mbaganit wogogwaarak.

² Mbaganit wogwe me, it Pilitin mendek nen Tawun apuri inom muguren-magaren eerit wogo logonet, Tawun apuri Yonatan inom, Abinarap inom, Malikituwa inom, inoorogo piyareegwaarak.

³ Inooko mbareegwa, at Tawun awuri inom wim namburiyak abu aaninggin ambik aret aganabeegerak wonogwe iigak, at Tawun nogo mugurok maale paga eenik wim wareegwaarak.

⁴ Wako mbareegwa, at Tawun nen aap at eegin wonok nega nogo, yoge logonet, “It aakumi inagabolo mbana'lek Pilitin mendek yi nen wogo logomenggaarik, meek eerogo paninuk, nagabolo andi-pandi eerogo nookwi iyo, kat kawooluwak waganogo ndanuk togon noori mok o!” Yoreegerak kwe, at aap at eegin wonok nega nogo, agabiti nen wariyak eebi mbake mbareegi, at Tawun alik nen awooluwak yindumbunuk, at paga ndanunggola wambeegerak.

⁵ Ndi, aap Tawun eegin wonok nega nogo, Tawun kambeegerak enegen kage nagagerik, at kunduk awooluwak paga togop mban ndanunggola wambeegerak me, at Tawun kambeegerak wonage me taati imbirak aret kambeegerak.

⁶ At Tawun inom, apuri kenagan inom, awuri wim eeka abok aret inom, at eegin wonok nega nogo inom, ambugwi ne ambit ti eyom paga aret kambeegwaarak.

⁷ Ndi, it aakumi Iterali mendek o kobappaga wonogogwaarak nogo inom, yi Yoraran enebaga time wonogogwaarak nogo inom, it nogo nen at Tawun apuri inom kanggwi, ndi, it Iterali ineegin warak abok aret mbaganit nogwe, eekwi iigo nogogwaarik, inawi kota-kota mbo punuk mbaganggwi iigak, it aap Pilitin mendek nogo, o nogome aret tebenggola unggwi na'nuk, time aret wonogogwaarak.

⁸ Ndi, ko'lu it Pilitin mendek nen puut Nggilobowa time it Iterali mendek inoorak inamendek kolaawok nduk, wogo nogogwaarik, at Tawun inom, apuri kenagan inom, inoorak wonogwe iyareegwaarak.

⁹ Iigo nogogwaarik, at Tawun anobak mbanogo waganggwi, eegin-ombambile waganggwi, eeko nogogwaarik, Tawun apuri inom kambeegwaarak wone it aap Pilitin mendek wonogwe me yorogwe, ndi, inagugi eeko menggam nogome yorogwe, eeko logowak nduk, o lombok yonggo nappiinet nogogwaarak.

¹⁰ Ndi, Tawun eegin-ombambile inom wonok it inagugi endage Atitoret awi wurik me time pugwi, ndi, at Tawun eebe nogo o Mbet-Teyan time yagat pak wurik paga paku warogo nabembugwi, eereegwaarak.

¹¹ It Pilitin mendek nen Tawun eerogo pereegwaarak nogo, it aap o Yabeti-Nggileyat mendek nogo konenggo nogogwaarik,

¹² it aap wakaa'ngget pekkagak kero mban ko waka'lek oonikiya ti paga nok-nok, o Mbet-Teyan unggwi wogo nogogwaarik, at Tawun apuri inom ineebe yagat pak wurik paga paku warak wonogwe nogo wogonako nogogwaarik, iniyokan iname Yabeti piya nanuk, kani kuninabeegwaarak.

¹³ Kani kuninako nogogwaarik, inowak nogo waganogo o Yabeti eyo tamarika alom me time nggween kabunogo taambiinok, mbi nengga'lek inambe mage negen wonogwe iigak, nogo 7 aret yereegwaarak. 1