1 Tamuwen 30 - Ala Wone Peenok Peebi Mbanak

Ndawut nen it Amalek mendek pup eerogo piyareegerak wone

¹ Nogo mbere yegak at Ndawut awuri inom o Tikalak nogwe iigak, it aap Amalek mendek a'nggan wogonaka nen o karume nggwok nenaarak o ame pa'nggwe inom, o Tikalak inom, oonda mbanogo inooko logonet, o Tikalak tebenogo piinok, inawi kani mbelanogo piyareegwaarak.

² Kani mbelanogo piinok, kumi inanggok inom, tawe inom, ambiriluk ambi inoorulik tigitogon aret kugun wogoren nogogwaarak.

^3-5 Ndi, at Ndawut awuri inom o Tikalak unggwi nogo nogogwaarik, it aakumi Amalek mendek nen inawi kani pugwi, inakuwi inapurilogwe wologwe-komologwe inom kugun wogonakwi, ndi, Ndawut akuwi mbere ambi Akinowam o Yiteren mendek inom, ambi kwe Abigayin aap Naban awi Karemen mendek togwe pereegerak nogo inom, kugun wogonakwi, ee'nuk, nogogwaarak inigen kogo nogogwaarik, inoone nggwok paga leenggu mban maako logonet, inomaawi lek aganabeegerak me, le peebi yuurak meek aret agagerak.

⁶ It Ndawut awuri nogo inakuwi inapurilogwe wologwe-komologwe wogoren nogogwaarak paga inanini agaket yogo logonet, Ndawut nogo yugum paga wariyak nduk koonggwi iinok, at Ndawut nogo iniki piirik agagerak kwe, at iniki Aliku ogoba Ala oba panggombunuk mondok nu'lek aret wonagagerak.

⁷ At Ndawut iniki nu'lek wonage logonet, Akimelek aput Ala unde Abiyatat nogo yoge logonet, “Yum agale warak epod nogo wonok niri omok o.” Yoreegerak wonok iri wage mbareegi,

⁸ Ndawut nen Aliku ALA yoge, “It aap a'nggan wogonaka nen ninakuwi-ninapuri wogoren nagaarak nogo ti, muguren na ilik? Ndi, muguren nage neenok, ninom lambunugun ilik?” Yoge mbareegi, Ala nen wone onggo yoge, “Muguren nak o. Muguren nage logomenggendik, kinom abuk a'nuk, ndiniren woraamunggun me, nak o,” yoreegerak.

^9-10 Yoge mbareegi, at Ndawut awuri enam ratus nogo inom, niyo Mbetot aa'nggi paga ari nogo nogogwaarik, awuri eegu dua ratus nogo inowak lobak yereegerak me, niyo wunda noorak meek aganake mbareegi, taati iigak, eegu empat ratus nogo mban niyo Mbetot mbanogo pegak wunda nogo nogogwaarik, nok-nok aret muguren nogogwaarak.

^11-12 Nogo logonet, at Ndawut awuri inom aap Metit mendek ambi karume time mbi inom, niyo inom, nengga'lek nogo kenagan yereegerak inom lambunggo nogogwaarik, eyo wuli anggen longgo warak mbanak inom, anggur anggen woloonak longgo warak mbere inom, niyo inom, wogoreegwaarak nengge nagagerik, enegen awi yakkolagagerak.

^13-14 Enegen awi yakkolage mbareegi, Ndawut nen at yoge, “Kat ngga nen wagan? Ndi, kogoba ta?” Yoge mbareegi, at aap nogo nen, “An aap Metit mendek aret me, aakumi Amalek mendek inayeloman minggirak o. Nit karume o nggwok nenaarak o ame pa'nggwe aakumi Kereti mendek wonogwe me inom, Yekura wonogwe me inom, it aap Kalep apuri wiganak inanggween o ame pa'nggwe wonogwe me inom, inawinda mbambunuk, inamindik-inamendek waganggo logonet, o Tikalak inom abok aret inawi kani mbelanogo piigoorak o. Piigo nogoorik, wogwe me, niinggiluk an andi ee'nake mbaki, nogoba nen mbo paninuk, mbaganggerak yime agarik o.”

¹⁵ Yoge mbareegi, Ndawut nen aap nogo yoge, “Kat nen an wo'neren it aap a'nggan wogonaka nagaarak wonogwe me time pani noorak op ilik?” Yoge mbareegi, aap nogo nen, “An op aret pagi noorak me, kat nen an nooke, ndi, an neebe waganogo nogoba eenggime pani nage, Eerigin lek, abet mbarikit nen Ala owak mbanogo kumbuk mbanu o,” yoreegerak.

¹⁶ Yoreegerak owak mbangge mbareegi, at aap nogo nen Ndawut awuri inom wogoren it aap Pilitin mendek inawi inom, Yekura mendek inawi inom, kani mbelanogo piinok, inamendek mondok iya kugun wonok nogogwaarak nogo, ale'nggen nen o karume time yagabit eeppunuk, laago lako nogogwaarik, nonggo logonet, ndawi wakwi me piya nagagerak.

¹⁷ Piya nage mbareegi, o ndonggo agan nage kagak, at Ndawut awuri inom nen it Amalek mendek nogo inoba kwi'nogo nogogwaarik, inoorit nogwe iigak, ko'lu o aret kiip ari nagagerak. Ndi, it aakumi apit aret inookwi iigak kwe, it aap tawe Amalek mendek ineebe empat ratus nogo mban unta paga yarugu mbaganit nogogwaarak.

^18-20 Mbaganggwi iigak, at Ndawut awuri inom nen it aakumi Amalek mendek nen Ndawut akuwi mbere inom, aap inanggok kumi inanggok inom, wologwe-komologwe tawe inom, yi mendek ndi mendek inom, yi mendek ndi mendek mbuuluk a, nggwok a, kugun wogoneegwaarak nogo, ambiriluk ambi kobak arulik tigitogon aret ineenggime nen ndinogo wogonake nagagerik, at awuri nen kambin-ndomba inom, tapi-lembu inom, inaa'nduk piyareegerak wogoren wogo logonet, “Ndawut aanggumi kugun wogo nogo yi o,” agan,

²¹ at Ndawut nen at awuri ineebe dua ratus inowak lobak yogo mbareegwa, niyo Mbetot aa'nggi paga piinok nogogwaarak nogo wonogwe me iya wogwe iigak, it nogo nen Ndawut awuri inom keyage wappiyoorak nduk, wunggo mbareegwa, at Ndawut awuri inom lambuni wogo nogogwaarik, “Nawuri wa,” yinuk, keyage wappiyareegerak.

²² Keyage wappiige mbareegi, it Ndawut awuri inom nogogwaarak nogo, eegu inobaabut maluk inogogun ambik nogo nen yogo logonet, “It aap ninom noolik nogo yi mendek ndi mendek kugun wonok wogoorak yi, ambi wogoroorak lek o. Ata, inakuwi inapurilogwe ti mban aret ko'nok nawak o.”

²³ Yereegwaarak kwe, at Ndawut nen wone onggo yorage logonet, “Ti yogotak kwe, lek o, nawuri! At Aliku ALA nen ninarum wonage logonet, ninooriyak nduk wagaarak nogo waganogo nineenggime pinanggerak me, at Aliku ALA nen wo'niragaarak wonok wogoorak yi, kit yogotak nogo togop eeriyak lek o.

²⁴ It wim eeri nogwe inom, inamendek arum wonogwe inom, ndak-ndak aret me, kugun wogo nogo ndak-ndak aret tumbukkoloorak me, kit yogotak ti, aap ta nen kinoone konenigin? Lek aret o,” yinuk, yoragagerak.

²⁵ Ndi, at Ndawut wone yoragagerak nogo ti, it aakumi Iterali nen mondok eeko logowak nduk, lengganogo pereegerak me, nok-nok, yogondak kuli eekwi wonogwe aret o.

Kugun wogo nogo it Yekura inoweewi paga nappiyareegerak wone

²⁶ At Ndawut nogo o Tikalak unggwi wage nagagerik, at oreewi aap Yekura mendek inoweewi nogo kugun wogo ando wogora nawak nduk, nappiige logonet, “At Aliku ALA awim Amalek mendek inagugun wogo yi, kit aret kolaabagip nduk, nappinagi wagi o,” yinuk,

²⁷ aap Yekura inoweewi o Mbeten wonogwe inom, karume o nggwok nenaarak o ame pa'nggwe o Aramot wonogwe inom, Yatit wonogwe inom,

²⁸ Arowet wonogwe inom, Tipomot wonogwe inom, Etemowa wonogwe inom,

²⁹ Arakan wonogwe inom, it aakumi Yeramen mendek inawi kota-kota wonogwe inom, it aakumi Keni mendek inawi kota-kota wonogwe inom,

³⁰ o Korama wonogwe inom, Mboratan wonogwe inom, Atak wonogwe inom,

³¹ Keboron wonogwe inom, yi o ndi o at Ndawut awuri inom nugu nogogwam time abok aret kolaawak nduk, nappiinet nagagerak.