1 Tamuwen 3 - Ala Wone Peenok Peebi Mbanak

Aliku ALA nen Tamuwen wiireegerak wone

¹ At wulaga Tamuwen nogo awo tawe kagak, Eli abu'me logonet, Aliku ALA eyabu eeke nagagerak. At eyabu eeke ti eyom paga at Aliku ALA nen oone paga inom, inabinggaanggo paga inom, ne ambiriluk mban yorage nagagerak.

² Aap Eli nogo abu anggok enegen ogut agagerak me, ne ambi oonikiya paga nogo yege menggim nogome nogo yege,

³ ndi, at Tamuwen nogo Aliku ALA alut eeko menggam awooliya wurik aloobut mbanak menggim aken nggwe kagak endekem nggwe nogome ndi wunanak Ala awooliya wurik me eya eeka nogo, awo noguk yaga'lek kagak nogo yege, eekwi me,

⁴ at Aliku ALA nen Tamuwen wiireegerak. Wiige mbareegi, Tamuwen nen, “An yime agarik o, nogoba,” yinuk,

⁵ mi'nanuk, mbe agan Eli wonage me nage nagagerik, yoge logonet, “Kat wii'nege mbaken, wagarak yime agarik o, nogoba.” Yoge mbareegi, Eli nen, “Lek o, naput. An nen wiigirulik me, nogo yi nak o,” yoge mbareegi, Tamuwen iyokan nogo yi wagagerak.

^6-7 Nogo yege me, at Aliku ALA nen, “Tamuwen wae,” yinuk, ambinom wiige mbareegi, Tamuwen nogo mi'na'nuk, Eli wonage me nage nagagerik, yoge logonet, “Kat nen wii'nege mbaken, wagarak yime agarik o, nogoba.” Yoge mbareegi, at Eli nen, “Lek o, naput. An nen wiigirulik me, nogo yi nak o,” yoreegerak. Aliku ALA nen ti eyom kuli Tamuwen imbirak wone awo mbangga'lek wonagagerak me, at Tamuwen nogo, “Yi Aliku ALA nen aret yo'nege kagi,” mbaka'lek wonagagerak.

⁸ Aliku ALA nen wulaga Tamuwen ne mbere wiige nagagerik, ambinom wiige mbareegi, at Tamuwen nogo mi'na'nuk, aap Eli wonage me nage nagagerik, “Kat nen wii'nege mbaken, wagarak yime agarik o, nogoba.” Yoge mbareegi, ne kenagan yoreegerak ti paga at Eli nogo nen, “Wulaga yi, Aliku ALA nen aret wiige kagi o.”

⁹ Mbake nagagerik, Tamuwen nogo yoge, “Kiyokan nogo yi nak o. Ndi, nogo yege me, at ambinom wiigege kenok, kat nen, Kaliku nogoba ALA o. An kayeloman naruk konengge me, yo'niru o, yinuk, yorumunggun o.” Yoge mbareegi, at Tamuwen nogo, nogo yege menggim nogome nogo yi wagagerak.

¹⁰ Nogo yege me, at Aliku ALA time aret mi'nari wage nagagerik, yoge nogo ambinom yoge logonet, “Tamuwen wae! Tamuwen wae!” Yoge mbareegi, at Tamuwen nen, “An kayeloman konengge me, yo'niru o.”

¹¹ Yoge mbareegi, at Aliku ALA nen Tamuwen yoge, “An nen aakumi Iterali inenggela'me ambi eeriminggirak paga it aakumi abok aret inaruk konenggo logomenggaarik, pi wako logonet, iniki lek age iyaamunggun o.

^12-14 An nen Eli yoge logonet, Kapuri nogo nen Naliku ALA meek eerogo panugwi nogo, keenu aret kwe, inaruk waka'lek mbo piigendak ti paga kat kapuri wiganak kinom aaninggin mondok-mondok kinoba pinagage logogin o, yinuk, yoge nagagirik, wone ambi yoge logonet, Kat kapuri kinom maluk nggwok eekwi nogo lek aruwak nduk, ndomba warogo nake wo'niri wogwe, yi mendek ndi mendek we wo'niri wogwe, eerumonggotak kwe, kinomaluk ti, lek arigin lek mondok itok kinoba aret logogin o, yinuk, kumbuk mbanogo yoreegirak me, ti eyom paga, Kat kapuri togop eeppiyaagin o, yinuk, alom paga nen nok, irip paga Eli yoreegirak nogo abok aret eeppiyaagin o,” yinuk, Tamuwen yoreegerak.

¹⁵ Yoge mbareegi, Tamuwen ambinom nogo yege menggim windak wonage kagak, o weege mbareegi, Aliku ALA alut eeko menggam awooliya wurik me tungga paarogo punuk, Ala nen abinggaanggo paga yoreegerak nogo agabiti nen Eli yori naga'lek wonage me,

¹⁶ at Eli nen Tamuwen wiireegerak nage mbareegi, yoge logonet, “Naput wae.” Yoge mbareegi, at Tamuwen nen, “Yu o, nogoba.”

¹⁷ Yoge mbareegi, at Eli nen Tamuwen yoge logonet, “At Aliku ALA nen nano yokkegerak o? At wone yokkegerak nogo, ambi teppuurak lek apit aret yo'niru o. Ala nen yokkegerak kagak ambi yo'nega'lek teppege keenok, Ala nen onggo eeppagarak nogo ti, mondok iya tit eeppagage kaamunggun o.”

¹⁸ Yoge mbareegi, at Tamuwen nen wone nogo ambit-ambi teppuulik abok aret mbininogo Eli yoreegerak. Yoge mbareegi, at Eli nen, “At Aliku ALA aret me, at eeriyak op kage kenok mban aret eeruwak o,” yinuk, yoreegerak.

¹⁹ Ndi, Tamuwen nogo tawe age kagak Aliku ALA imbirak wonagagerak me, Ala nen yi wone ndi wone yegetak nogo mbo puulik li'luk aret eeke nagagerak.

²⁰ It aakumi Iterali o Ndan nen nok-nok, Mberetiyeba kuli wonogogwaarak nogo abok aret, “Aap Tamuwen nogo Aliku ALA nen yoge kagak yoraga logowak nduk, abet aret mippegerak kogo o,” yinuk, mbako nogogwaarak.

²¹ Ndi, at Aliku ALA nogo nen o Tilo taati eebe nikka wagak eeke logonet, Tamuwen imbirak wone mbanggo nogogwaarak paga, “Ala ndogop o,” yinuk, eenu agagerak o. Ndi, at Tamuwen wone ari nogo it aakumi Iterali mendek abok aret konenggo nogogwaarak.