1 Tamuwen 24 - Ala Wone Peenok Peebi Mbanak

Ndawut nen Tawun warulik teppereegerak wone

¹ At Tawun nogo aap Pilitin mendek inom wim nambuppunuk, ame wage mbareegi, aap ambi nen at yoge logonet, “At Ndawut o En-Nggeri karume time wonage o.”

² Yoge mbareegi, at Ndawut awuri inom kwaaginabit nawok nduk, at Tawun nen aap Iterali mendek ineebe tiga ribu kuli leenogo wogonake nagagerik, wogoren puut endage Kambin Nggwiya Nugu Menggam, time wonogwe iyo, kwaaginabi nogogwaarak.

³ Puut paga ndomba anggenogo wurik me taati ndoome ambi wonage me, at Ndawut awuri inom ndoome time ari unggunuk, ilin me wonogwe iigak, at Tawun omayo mbooniyak nduk, unggwi nage nagagerik, mboongge me,

⁴ at Ndawut awuri nogo nen at yogwi, “At Aliku ALA nen, Kawim eeppuurak mbakendak nogo eeppege logonok nduk, keenggime pagagin o, yereegerak nogo yogondak nanonggwan yi aret aga o.” Yogo mbareegwa, Ndawut nogo mbawok aret Tawun wonage me wage nagagerik, ayum abo irip mbanogo waganeegerak.

⁵ Mbanogo waganeegerak ti paga at Ndawut iniki aaninggin age mbareegi,

⁶ awuri yorage logonet, “An nogoba yi, at Aliku ALA nen leenogo pege mbareegi, amburu eeppereegerak me, Aliku ALA nen leenogo mippereegerak kagak, an neenggi teeluk a'nuk, maluk eeppuurak mbake neyo, Aliku ALA nen non mbannake logowak o,” yinuk, yoragagerak.

⁷ Wone ti yoragagerak paga at awuri nogo nen Tawun warulik teppereegwaarak. Teppogo mbareegwa, at Tawun nogo ndoome nen wundi wage nagagerik, nagagerak.

⁸ Nage kagak, at Ndawut ndoome nen wundi wage nagagerik, oone nggwok paga Tawun yoge logonet, “Nogoba kendagembogut wae.” Yoge mbareegi, Tawun nen enegen ambo'me logurogon na'nari wage mbareegi, at Ndawut nen nggween paga wanduk yinuk, ayuk wureegerak.

⁹ Ayuk wuke nagagerik, Tawun yoge logonet, “Ndawut nen maluk eeppagarak ari o, yinuk, aakumi nen yokkugwi nogo, nonggop nduk konengge agandik?

¹⁰ Kat yogondak aret ndoome wonage keegak, at Aliku ALA nen kat keebe an neenggime panege mbaki, nawuri nen, Yogondak aret waru ubi! yo'nogo mbaka, an nen it yorage logonet, At Aliku ALA nen amburu eerogo mippereegerak me, neenggi teeluk a'nuk, nogoba wariyak lek o, yinuk, teppagagirak ti, keenu aru o.

¹¹ Kooka'lek teppagage logonet, kayum irip mban mbuuluk mbanogo waganggirak neenggime wonage yi, pekket o, nogoba. An tebenogo pagakit nduk, koone taganit nage, an maluk eeppagage, eekirak noba wonage lek yum yi paga keenu aru o. Kat perak, an nooriyak nduk, mu'neren-ma'neren nege menggendak ti,

¹² An maluk a, kat maluk a, at Aliku ALA nen mban ninowak loonigin o. Kat maluk eeppanege menggendak ti, onggo an neenggi paga nen maluk eeppagagin lek o. Ata, Aliku ALA nen aret eeppagage logogin o.

¹³ It aap inanggok nen wone laarogo yogo logonet, It aap maluk eeka nogo nen maluk aret eeko menggaarak o, yinuk, yogo menggaarak nogo ndak-ndak an nen neenggi teeluk a'nuk, kat maluk eeppagagin lek o.

¹⁴ An nggeewo kanggetak kwak, inabi pogom wonage neegak, kat aap Iterali inowe kendagembogut, ta kimbirak wim namburiyak nduk, wundi wage, aap ta mugurok-magarok nege, eeke agandik?

¹⁵ At Aliku ALA nen ninowak loongge, nawone mbanogo punuk onggo ndak-ndak eeppinanege, naana'le mbangge logonet, kat keenggime nen ndinogo nagap ndake, eeke logowak o,” yinuk, yoreegerak.

¹⁶ At Ndawut nen wone nogo abok aret Tawun yoge mbareegi, at Tawun nen, “Kat naput Ndawut koone aret a?” Ari nagagerik, le oone nggwok paga yereegerak.

¹⁷ Le ari nagagerik, Tawun nen Ndawut yoge logonet, “Kat nen abu obeelom mban eeppangge keegak, an yi, maluk lombok aret eekkabit nege me, kat abu obeelom aret keegak, an perak, maluk aret kagi o.

^18-19 Aap inawim inom lambunggwi kenok ti, abu teppiigulik mondok aret inooko menggaarak kwe, at Aliku ALA nen neebe waganogo kat keenggime pagagerak kwe, an noorulik, Obeelom aret eeppagagirak, yogondak yo'negendak nogo ti, abet aret o. Abet aret me, kat yogondak eeppanegendak onggo at Aliku ALA nen aret wokkege logogin o.

²⁰ Ndi, kat abet aret aakumi Iterali inowe kendagembogut age, ndi, aakumi Iterali kabu'me piirogo mondok nu'lek aret wonage, eeke logomunggun nogo, an neenu aret me,

²¹ kat nen an napuri wigannaremenggaarak nogo, inenggaawak lek eerogo piige, ndi, an nowe-nawot inenggela'me nendage ki logorak nogo, lek eerogo pege, Eerigin lek o, yinuk, at Aliku ALA owak mbanogo yo'niru o.”

²² Yoge mbareegi, at Ndawut nen, “Op aret yagan o,” yinuk, Ala owak mbaneegerak. Mbangge mbareegi, Tawun nogo ame iyokan wage kagak, at Ndawut awuri inom iniyokan yugum pak wurogo pereegim nogome aret unggwi nogogwaarak.