1 Tamuwen 19 - Ala Wone Peenok Peebi Mbanak

Tawun nen Ndawut mugurok-magarok eerit nege nagagerak wone

¹ At Tawun aput Yonatan inom, awuri inom yabu eeko menggaarak nogo inom, abok aret nen Ndawut mondok warogo puwak nduk, Tawun nen yoragagerak kwe, at Tawun aput Yonatan perak, Ndawut iniki kunik lombok wonagagerak me,

² Ndawut kurumbi yoge logonet, “An nogoba Tawun nen kat kooriyak nduk, wakkanet nege me liippu o.” Yoge nagagerik, “Kat ko'lu kuubondendok o nobarak me nogome kumaa'nari nanuk, wonage me,

³ an nogoba nimbirak kat kumaarak wonage me taati ari woraanuk, kat nano eeppagarak mbakerak nogo ari kenok, an nen yokkege neyaamunggun o.”

⁴ Yoge nagagerik, Yonatan nogo nen Ndawut ake wone koonogo at ogoba endagembogut Tawun yoge logonet, “Nogoba o. Kat nen kayeloman Ndawut maluk eeppuurak ti mage o. At nen kat maluk ambi eeppagageelik, kake abu obeelom mban eeppagage menggerak nogo lek a?

⁵ At Ndawut nen aap Pilitin mendek Nggoliyat nogo, wake logonet, at iniki mondok nggaruk togon, Nooruwak, mbake nagagerik, wareegerak paga at Aliku ALA nen nit Iterali mendek abok aret nineegin tiyak yuwak nduk, eeppinaneegerak nogo, kat togon kenegen kage nagagindik, kale'nggen mbareegindak kwe, Ndawut maluk eerulik ugun wonage kagak, alom nano eekerak paga wariyak ari agandik?” yinuk, yoreegerak.

⁶ Yoge mbareegi, at Tawun nogo aput Yonatan nen wone yoreegerak nogo konengge nagagerik, ari logonet, “At eenik menggerak Aliku ALA endage paga an Ndawut warigin lek o,” yinuk, wone kumbuk mbaneegerak.

⁷ Kumbuk mbangge mbareegi, at Yonatan nen Ndawut wiireegerak wage mbareegi, wone ogoba imbirak mbaneegwaarak nogo abok aret mbininogo yoge nagagerik, Ndawut nogo wonok Tawun owagam pi wage mbareegi, at Ndawut nen Tawun ake aa'nduk eeke nagagerak nogo ndak-ndak aret eeke nagagerak.

⁸ Ti'nuk, aakumi Pilitin mendek nogo inom wim nggagambunuk, at Ndawut nen wundi nage nagagerik, inoba kwi'na'nuk, mondok alik negen inoorit nage mbareegi, it Pilitin mendek nogo kole mbaganit nogogwaarak.

⁹ Ne ambi paga at Tawun nogo awooluwak eenggime oome kwi'ndak wonage kagak, Ndawut nen nggitat negen kecapi eeke wonage me, at Aliku ALA nen kugi maluk mendek nappi wagagerak Tawun inikime lik ari mbareegi,

¹⁰ at Tawun nen awooluwak paga Ndawut kobat imbirak polok togon wariyak nduk eereegerak mendek, Ndawut melak togon woppake kagak, wooluwak nogo kobat kundugu age mbareegi, Ndawut nogo oonikiya ti eyom aret kole mbaganeegerak.

¹¹ Mbagangge mbareegi, ko'lu kuubondendok wariyak nduk, Ndawut nogo ame wonage kero, lomboppi nawak nduk, Tawun nen awuri nappiyareegerak lomboppi nogo mbareegwa, at Ndawut akwe Mikan nogo nen ogonggelo yoge, “Kat oonikiya yi paga mbaganumunggun lek kenok, ko'lu kuubondendok mondok koori woraagun o,” yoreegerak.

¹² Yoge nagagerik, at Mikan nen Ndawut nogo pugagi ambe mbanak me wumbege mbareegi, at Ndawut nogo wundi nage nagagerik, we kurik me aret mbaganeegerak.

¹³ Mbagangge kagak, at kwe Mikan nogo nen Ala obaane'me it ayuk wuko menggaarak ogut aago ambi waganogo at Ndawut nogo yege menggim nogome aret wimbege nagagerik, kambin eeruwak yonggologo anep mbambunuk, nogoyum waganogo lenggembereegerak.

¹⁴ Lenggembunuk wonage me, at Tawun nen Ndawut pigoorak nduk, awuri nappiyareegerak yori nogo mbareegwa, at kwe Mikan nogo nen, “At andi eekerak wonage o,” yoragagerak.

¹⁵ Yorage mbareegi, it iniyokan Tawun yori wogo mbareegwa, at Tawun nogo nen it yorage, “Kit nogo logomonggotik, at eebe wonage kenok, an nen warikit nduk, at eebe ndoonak nogo yege menggerak inom enaani aret piyaninuk woro o.”

¹⁶ Yorage mbareegi, it nogo, nogo nogogwaarik, oome unggunuk, Ala obaane'me it ayuk wuko menggaarak ogut aago inom, kambin eeruwak anep mbanak nogo inom, at Ndawut nogo yege menggim nogome wonage kogogwaarak.

¹⁷ Kogo nogogwaarik, Tawun nogo yori wogo mbareegwa, at Tawun nen Mikan yoge, “Kat nen an nawim nogo mbaganuwak nduk, wumbege nagandik, kat nonggop nduk koone pilit kogoba an nambokan laganggendak o?” Yoge mbareegi, at kwe Mikan nogo nen at Tawun yoge, “At Ndawut nen ari logonet, An nen kat kooriyak, nomba'nuk, pippanogo agandik? Naakit nduk, teppanu o, yo'nege mbaki, aret wumbigirak o,” yoreegerak.

¹⁸ Ndi, at Ndawut nogo, we kurik me aret mbaganit Tamuwen ame o Arama nogome unggwi wage nagagerik, Tawun nen at eeppereegerak nogo abok aret mbininogo Tamuwen yoreegerak. Yoge mbareegi, at Tamuwen imbirak o Nayot nogo nogogwaarik, time aret wonogogwaarak.

¹⁹ Time ari nogogwaarak wonogwe me, aakumi nen Tawun yogo logonet, “Ndawut nogo o Arama korotok Nayot time wonage o,” yoreegwaarak.

²⁰ Yogo mbareegwa, at Tawun nen Ndawut pigoorak nduk, aap nappiya wagagerak kwe, aap Ala nen yorage kagak yoraga mendek time kuwak eeppiinok, at Tamuwen nen inowe a'nuk, Ala wone yorage inigen kogo mbareegwa, at Tawun awuri nappiya wagagerak nogo Ala Aberiniki inoba age mbareegi, it kunduk, Ala nen yorage kagak yoraga negen a'nuk, inom aret yogo nogogwaarak.

²¹ Yogwe nogo at Tawun yogo mbareegwa, at awuri ambinom nappiya wagagerak kwe, it nogo kunduk, Ala nen yorage kagak yoraga negen a'nuk, inom yogo mbareegwa, ti'nuk peebi, at awuri ne mbere paga nappiinok ambinom nappiya wagagerak nogo, togop mban aret Ala nen yorage kagak yoraga negen a'nuk, yogo nogogwaarak.

²² Eeko mbareegwa, at Tawun nogo eebe ndunik aret o Arama wagagerak. Wage nagagerik, niyo nggween kole kabunik me o Teku time ari woraanuk, it aakumi time yorage, “Tamuwen Ndawut imbirak nggeeme wonogwe o?” Yorage mbareegi, it nen yogo logonet, “O Arama koorok Nayot time wonogwe o,” yoreegwaarak.

²³ Yogo mbareegwa, o Arama koorok Nayot time naakit nduk nage me, Ala Aberiniki oba a'nuk, Ala nen yorage kagak yoraga negen a'nuk, Ala wone agan o Arama koorok Nayot time ari nagagerak.

²⁴ Time ari nage nagagerik, at Tawun nogo ayum nggurik-nggorok eerogo punuk, Tamuwen enggaanom paga it yogwe togop agan nggween paga ngginnari nanuk, ayum yirik lek o liingge inom, oonikiya inom, taati windak kagak, o weereegerak. Ti eereegerak paga it aakumi nen, “A puk! At Tawun nogo kunduk, Ala nen yorage kagak yoraga mendek agaarak mbakop?” yinuk, yogo nogogwaarak.