1 Tamuwen 15 - Ala Wone Peenok Peebi Mbanak

Aakumi Amalek mendek inom wim nambureegwaarak wone

¹ Ne ambi paga at Tamuwen nen Tawun yoge, “At Aliku ALA apuri Iterali inowe kendagembogut logorak amburu eerogo mippagakit nduk, Aliku ALA nen an aret nappani wagagerak me, yogondak Aliku ALA nen wone yokkege yi, konengge logot o.

² At Aliku Omaawi Lombok ALA nen ari logonet, It aakumi Iterali o Metit nen wundi wogwe me, aakumi Amalek mendek nen inaru non mbambiyareegwaarak nogo paga an nen yogondak onggo aaninggin inoba piyaagin me,

³ it Amalek mendek tebenogo piinok, inamindik-inamendek wonage nogo, abok aret yigirik-noonom eerogo punuk, aap inom, kumi inom, inapurilogwe inom, awo ngget ndarak inom, inaanggumi tapi-ndomba inom, unta-keledai inom, ambiriluk ambi teppuurak lek tigitogon aret inoorogo piyaawak, yegerak o.”

⁴ Yoge mbareegi, at Tawun nen awuri ineegin warak nogo woraawak nduk, inayonggo piyareegerak o Telayim kuwak ari wogo mbareegwa, it Iterali ineegin wonok iniyok paga nugwi ti, dua ratus ribu aret linggininake, ndi, it Yekura mendek sepuluh ribu aret linggininake, eereegerak.

⁵ Ti eeke nagagerik, at Tawun awuri nogo inom aap Amalek iname kota tu nggelo'me time enaa'nari nogogwaarak.

⁶ Nogo nogogwaarik, at Tawun nogo nen it aakumi Keni mendek yorage logonet, “Nit Iterali mendek o Metit nen wundi wogwe me, kit Keni mendek nen nit Iterali mendek ninabuwa nen wo'ninabeegutak me, it Amalek inoorit nogo logonet, kit kinom kinoorukwak, it Amalek mendek wonogwe me, mbo piinok, o yime nen wundi nanip o.” Yorage mbareegi, it Amalek inenggela'me nen wundi nogogwaarak.

⁷ Wundi nogo mbareegwa, at Tawun awuri inom nen it aakumi Amalek mendek inom wim perenggologo logonet, o Kawila nen inoorit nok o Tiyut pa'nggwe nen oonegen wundi wage menggim o Metit kuli piya nogogwaarak.

⁸ At Tawun awuri inom nen Amalek mendek inoorit nogo logonet, aap Amalek mendek inowe endagembogut Agak nogo eenik ngge-ngge aret pigaganeegwaarak kwe, at apuri Amalek mendek nogo abok aret inawooluwak paga inoorogo piyareegwaarak.

⁹ Piigo nogogwaarik, aap Amalek inowe endagembogut Agak nogo eenik teppugwi, tapi-ndomba abe mendek inom, inaagalogwe piirigalo mendek inom, “Yi abeme, inooriyak lek o,” yinuk, ineenik teppiigo logonet, mbi inikime waka'lek ineebenowak ko aago kenok, tigitogon aret inookwi, eereegwaarak.

Aliku ALA nen Tawun endagembogut logorak eebi mbareegerak wone

¹⁰ Ti'nuk, at Aliku ALA nen Tamuwen yoge logonet,

¹¹ “At Tawun nogo, Yogop eeke logot o, yogirak nogo, eeka'lek an mbo paninuk, alik eekerak paga, At endagembogut logorak nanonduk mippigirak o? yinuk, niniki wakkolage agarik o.” Yoge mbareegi, at Tamuwen nogo iniki puru ari logonet, oonikiya oone nggwok paga Aliku ALA yoge kagak, o aret weereegerak.

¹² Ko'lu o kuubondendok at Tamuwen nogo Tawun imbirak lambuniyak nduk, pekka nage mbareegi, aap ambi nen at yoge logonet, “At Tawun nogo o Karemen time at eekerak endage ki logowak nen yugum logonogo patiyak nduk, nage nagaarik, logonogo patinuk, yogondak o Nggilagan nagaarak o,” yoreegerak.

¹³ Yoreegerak at Tamuwen nogo Tawun imbirak lambuni nage mbareegi, at Tawun nen Tamuwen yoge, “At Aliku ALA nen, Togop eeru, yo'negerak nogo ndak-ndak aret eekirak me, at Aliku ALA ale'nggen koba logowak o.”

¹⁴ Yoge mbareegi, at Tamuwen nen yoge logonet, “Wone yugu abu ndak-ndak aret eekirak yagandak kwe, kambin-ndomba inom, tapi-lembu inom, inoone yogwe naruk konengge ti nonggop o?”

¹⁵ Yoge mbareegi, Tawun nen onggo yoge logonet, “An nawuri nen it Amalek mendek inaanggumi ndomba inom, tapi inom, abu obeelom kero, at Aliku kogoba Ala ake warogo wogoriyak nduk, ineenik wogonako logonet, ineebe apit aret mondok lek eerogo piigaarak o.”

¹⁶ Yoge nogo at Tamuwen konengge nagagerik, Tawun yoge logonet, “Koone puk aru! Oonikiya paga at Aliku ALA wone yo'negerak nogo yokkiri o.” Yoge mbareegi, “Yu o,” yoreegerak.

¹⁷ Yoge mbareegi, Tamuwen nen yoge logonet, “An aap abu meek o, mbake keegak, aakumi Iterali inanebunu lombok inowe agagindak nogo lek a? Togop mbake keegak kwe, at Aliku ALA nen aakumi Iterali inowe kendagembogut logonok nduk, kat aret leenogo pagage mbareegi, amburu eeppagareegwaarak o.

¹⁸ Amburu eerogo mippagago mbareegwa, Aliku ALA nen kat yokkege logonet, It aakumi Amalek inobaabut maluk mendek ti, kinom wim nambuke logonet, ineebe mondok pup eerogo inoori nak o, yinuk, nappagagerak nogo lek a?

¹⁹ Nappagagerak wagaarak aret kwe, at Aliku ALA nen yokkegerak nogo nonggop nduk, eerulik mbo pegendak? Kat nonggop nduk Aliku ALA enegen kagak, maluk eeke logonet, kugun waganggendak?”

²⁰ Yoge mbareegi, at Tawun ari logonet, “Aliku ALA nen, Eeriyak, yo'negerak nogo ndak-ndak aret eekirak o. Eeke logonet, it aakumi Amalek mendek abok aret inoorogo piinok, aap Amalek inowe endagembogut Agak nogo perak, pigagangge nagarik, wonok wagarak o.

²¹ Wonok wagarak kwe, it nawuri nen perak, inaanggumi kugun yumbunik nogo apit aret inooko logonet, we tapi-ndomba obeelom kero, o Nggilagan paga at Aliku kogoba Ala ake warogo wogoriyak nduk, wogoren wagaarak o.”

²² Yoge mbareegi, at Tamuwen nen wone onggo yoge logonet, “Kambin-ndomba Aliku ALA ake warogo kani kunggwi inom, We iniki ale'nggen mbaruwak nduk, wogogwi inom, Ti Aliku ALA inikilom nggwok mbake, Ndi, at oone konembunuk eekwi ti, inikilom mbuuluk mbake, Eeke menggerak mbaken? Kambin-ndomba warogo ALA wogogwi ti, op aret kwe, At oone konembunuk ndak-ndak eekwi ti perak, mondok iya lombok o. Ndi, kambin-ndomba ngguunok amok warak ti, obeelom aret kwe, At oone liippunuk, ndak-ndak eekwi ti perak, abu alik mondok iya lombok aret o.

²³ Aliku ALA yegetak, Neebi o, yinuk, mbo pugwi nogo ti, Aap tili pagangga inowagam nogwe iinok, Maluk eekwi nogo ndak-ndak aret o. Ndi, iniki wogoppatit nogwe nogo ti, Ala obaane'me kugiwak ayuk wukwi iinok, Maluk eekwi ndak-ndak aret o. Togop aret me, Kat nen Aliku ALA oone liirogon eerulik mbo pegendak ti paga Kat aakumi inowe kendagembogut wonage nogo Aliku ALA nen lek eerogo pagagi o,” yinuk, yoreegerak.

²⁴ Yoge mbareegi, at Tawun nogo nen Tamuwen yoge logonet, “An abet aret maluk eekirak o. Aliku ALA nen, Yogop eeru o, yinuk, yo'negerak nogo inom, nogoba kat nen yo'negendak nogo inom, taganogo pege nagarik, an nawuri ineebe paga nagabiti nen inoone yo'negaarak nogo konembunuk, eekirak o.

²⁵ Togop aret kwe, Nomaluk ti, lek eerogo panu o, nogoba. Lek eerogo pangge kenok, an Aliku ALA alut eerikit nduk nimbirak niyokan o Nggilagan nawok o.”

²⁶ Yoreegerak kwe, at Tamuwen nen Tawun yoge, “Kat Aliku ALA oone mbo pegendak paga at Aliku ALA nen aakumi Iterali inowe kendagembogut logorak lek mbo pagagerak me, kat an nimbirak noorak mondok lek o,” yoreegerak.

²⁷ Yoge nagagerik, ena logurogon naakit nduk eeke me, at Tawun nogo nen Tamuwen ayum pigagangge mbareegi, aret nibik yereegerak.

²⁸ Nibik ari mbareegi, Tamuwen nen at yoge, “Eekerak ti kokwak, o yogondak yi paga aret at Aliku ALA nen kat kendagembogut logonet, aakumi Iterali kabu'me piinok wonage nogo ndinogo koreeluk aap obeelom kenok wogogerak o.

²⁹ At abu tiyanak Iterali inogoba ti, aakumi iniki koonggaatak nogo alik age kenok alik ambi koonggo mengga kwak lek me, at oone pilit ari, at koonggetak alik age kenok, alik ambi koongge, mondok eekeelik o,” yoreegerak.

³⁰ Yoge mbareegi, at Tawun nen onggo yoge logonet, “An abet aret maluk eekirak kwe, napuri Iterali mendek inoweewi inenggaanom paga inom, aakumi Iterali abok inenggaanom paga inom, nendage op wonage neyaawak nen, at Aliku kogoba Ala alut eeruwok nduk, nimbirak nawok o, nogoba.”

³¹ Yoge mbareegi, at Tamuwen nogo Tawun imbirak o Nggilagan nogome nogo nogogwaarik, at Tawun nogo time Aliku ALA alut eereegerak.

³² Eeke mbareegi, at Tamuwen nen, “Aap Amalek mendek inowe endagembogut Agak ti, wonok woraanip o.” Yorage mbareegi, aap Agak nogo nen iniki koongge logonet, “Nooriyak niniki aaninggin wonagarak nogo lek aret agaarak kagi,” yinuk, iniki teeluk aret Tamuwen owagam wagagerak kwe,

³³ Tamuwen nen ari logonet, “Kat kawooluwak paga it kumi inooke logonet, inaagalogwe a'nggan waganogo piyareegindak ti kokwak, Yi kumi ndi kumi inenggela'me nen kat kagalo alik aagaluk ambi lek aret kaagun o.” Yoge nagagerik, Tamuwen nen aap Agak nogo Aliku ALA enggaanom paga o Nggilagan time aret warogo pereegerak.

³⁴ Warogo pege nagagerik, Tamuwen nogo o Arama nage, ndi, at Tawun nogo ame o Nggibeya nage, eereegwaarak.

³⁵ Ne ti kuli nen at Tamuwen nogo Tawun imbirak lambungga'lek logonet, abuwa nen le ari kagak, at Tamuwen nogo kambuurak eyom aret panggoni nagagerak. Ndi, at Aliku ALA nen aap Tawun Iterali inowe endagembogut logorak, “Nonggop nduk mippigi?” yinuk, iniki wakkolage nagagerak.