1 Tamuwen 13 - Ala Wone Peenok Peebi Mbanak

Tamuwen nen Tawun aruk wareegerak wone

¹ At Tawun nogo ndarak kagak tahun 30 eeppunuk, inowe endagembogut mippereegwaarak wone lengganogo yorage kagak, tahun mbere eereegerak.

² Eeppunuk, at Tawun nen aakumi Iterali inenggela'me nen aap ineebe tiga ribu leeninake nagagerik, ineebe dua ribu kuli, at inom o Mbeten puut nggelok-nggobok me inom, o Mikamat inom, nogome wonogwe, ndi, it ineebe seribu ti, aput Yonatan inom aap Mbeniyamin wonogo menggam o Nggibeya nogome nogwe, eekwi iigak, it aakumi eegu nogo iname lombok nappiyareegerak.

³ Ti'nuk, at Yonatan nogo nen aap Pilitin mendek ineegin warak ando o Nggeba time wonogwe me, inoba kwi'nage logonet, inooreegerak. Inooreegerak wone nogo it Pilitin mendek inaruk konenggo mbareegwa, Tawun nen yi o ndi o aakumi Iterali wonogwe me, oone nggwok eeka trompet nogo oone eerit nawak nduk, yoragagerak oone eerit nogo logonet, “Kit Iterali mendek abok aret kinaruk logonip o.

⁴ At Tawun nen aakumi Pilitin mendek ineegin warak ando inooke paga nit Iterali mendek abok aret ninendage maluk eerogo nggelenogo pinanegerak me, ninoori wogwe iyo, nit apit aret Tawun ninom o Nggilagan nogome kuwak eeri nawok o,” yoranet nogo mbareegwa, konenggo nogogwaarik, it abok aret kuwak ari nogogwaarak.

⁵ Kuwak ari nogwe iigak, it aap Pilitin mendek nogo Iterali inom wim namburiyak nduk, kuwak eeppogo nogogwaarik, ineebe tiga ribu nggweendo wim eeka ogobakkigirik paga laganggwi, aap ineebe enam ribu kuda amborowak paga kwi'nogwe, it ineegin warak ineebe mbini niyo ambet paga wonage menggi kwak iniyok paga nogwe, eeko nogogwaarik, o Mbet-Awen oonegen wundi wage menggim pa'nggwe o Mikamat taa'nogo aret inawooliya wukkola wogogwaarak.

⁶ Wukkola wogo mbareegwa, it Iterali nen inigen iigo nogogwaarik, “It nen abu kup mbanninaburak eekwi me, nonggop eeruwi o?” yinuk, iniki ma'nogo nogogwaarik, mbaganit ndoome inom, yugum enoona inom, puut abu'me inom, mbuun ambena inom, niyo nggween kabunik me inom, kumaa'narit nogogwaarak.

⁷ Ndi, it Iberani mendek eegu mbaganit niyo Yoraran enebaga wunda nanuk, o Nggat inom, o Nggileyat inom, kumaa'narit nogogwaarak. At Tawun nogo o Nggilagan wonage me, it at inom wonogwe nogo inagabiti nen inaganak nugirage nagagerak.

⁸ At Tawun nogo Tamuwen woroorak yereegerak nogo wage kero nduk, ne 7 paga tokkagagerak mendek, Tamuwen nogo o Nggilagan waga'lek mbareegi, Tawun awuri eegu at Tawun teppunuk, ambit nggigik mbaganggo mbareegwa,

⁹ at Tawun nen it yorage, “Kit Ala ake warogo kani kuniyak mendek inom, Ala ninom lambunik logowok nduk, ake warogo wogoriyak mendek inom, wonok niri woraanip o.” Yoragagerak nogo pi wogo mbareegwa, Ala ake warogo kani kuneegerak.

¹⁰ Awo kungge nagagerik, wonage me, Tamuwen nogo nage mbareegi, at Tawun nen keyage wappikit nduk ka wage me,

¹¹ at Tamuwen nen yoge logonet, “Kat nano eekendak o?” Yoge mbareegi, at Tawun nen onggo yoge logonet, “It aap Pilitin mendek nogo o Mikamat nogome kuwak ari wogwe, ndi, an nawuri nogo ambit nggigik mbaganit nogwe, eekwi iige, ndi, kat woroorak yagandak nogo paga waga'lek keege, eeke nagarik,

¹² an niniki mbake logonet, At Aliku ALA nen nabuwa mba'nuk, yeenggwa niruwak nduk, awo yoga'lek neegak, it aakumi Pilitin mendek nogo, an o Nggilagan wonage me, noba kwi'nari wogwe iyo, nagabiti mbake kwe kagak, nogogumbuk aret Aliku ALA ake warogo kani kunggirak o.”

¹³ Yoge mbareegi, at Tamuwen nen at Tawun yoge logonet, “Kat aap wirogon aret eekendak keegi o. At Aliku kogoba Ala nen wone lengganogo yokkegerak nogo aret liirogon ee'netak nen, aakumi Iterali inowe kendagembogut mondok-mondok inarum logonok nduk, koonogo paganetak kwe,

¹⁴ Aliku ALA nen wone lengganogo yokkegerak nogo liirogon eerulik me, yogondak aakumi Iterali inowe kendagembogut ambinom inarum logomunggun lek o. Ata, aap alik ambi Aliku ALA iniki mbake ndak-ndak eeke menggerak kero, at apuri inarum logowak nduk, leenogo mippigin o,” yoreegerak.

¹⁵ Yoge nagagerik, at Tamuwen nogo o Nggilagan mbo punuk, nugwa aakumi Mbeniyamin mendek inanggween paga o Nggibeya nogome unggwi nagagerak. Unggwi nage kagak, at Tawun nogo, “Nawuri mande iyaamun?” yinuk, eenggi linggininake nagagerik, ineebe enam ratus negen aret wonogwe iyareegerak

Iterali ineegin-inomaale lek wonogogwaarak wone

¹⁶ Ndi, it aap Pilitin mendek nogo o Mikamat nogome inawooliya wuppatinuk wonogwe iigak, at Tawun awuri inom, aput Yonatan inom, aakumi Mbeniyamin mendek inanggween paga o Nggeba nogome inawooliya wuppatinuk wonogogwaarak.

¹⁷ Wuppatinuk wonogwe ti eyom paga it aap Pilitin mendek abera'lek me aakumi inamendek ndingga ineebe kenagan aago inawooliyana nen wundi woraanuk, ambi aago o Tiyuwan yaga'lelo Opara pa'nggwe wogwe,

¹⁸ ambi aago o Mbet-Koron pa'nggwe nogwe, ndi, ambi aago karume nogo menggam o Teboyim kobappaga nakkagak nggween kuli paga time pa'nggwe wogwe, eereegwaarak.

¹⁹ It aakumi Pilitin mendek nen, “It Iterali nogo mbuti wooluwak mendek inom, mbuti maale mendek inom, ogobakkigikkologo logukwak, aap mbuti paga yi mendek ndi mendek ogobakkigika kinenggela'me logorak mage o.” Yorogo nogogwaarak me, aap ti mendek inenggela'me wonogwe lek iinok,

²⁰ it Iterali mendek abok nen mbuti tege inom, yeguwok inom, yembuti inom, paloowi inom, engget ogobakkigiriraawak nduk, it aap Pilitin mendek inowagam wonok nogo nogogwaarak.

²¹ Wonok nogo nogogwaarik, mbuti tege inom, yeguwok inom, engget ogobakkigirirogwe onggo ti, wu mbuti perak onggo nggwok mbere pugwi, ndi, nggween tege inom, yembuti inom, lembu teega irip mbuti ogobakkigirik inom, engget ogobakkigirirogwe onggo ti, mbuti perak onggo nggwok ambit aret pugwi, eeko nogogwaarak.

²² Togop aret me, wim nambukwi ti eyom paga mbuti wooluwak inom, mbuti maale inom, Tawun awuri inom wonogwe nogo, ineenggime lek iigak kwe, Tawun aput Yonatan imbirak mban ineenggime porogo wonogogwaarak.

Yonatan nen Pilitin mendek inom wim eereegerak wone

²³ Porogo wonogwe iigak, it Iterali mendek wogwe iyo, it Pilitin mendek puut o Mikamat aanenggen me time tum wako nogogwaarak.