1 Tamuwen 1 - Ala Wone Peenok Peebi Mbanak

1 TAMUWEN WONE

Tamuwen nda'nagagerak wone

¹ Aap ambi anebunu Eparayim mendek endage Tup. Tup nen Toku ndake, Toku nen Eliku ndake, Eliku nen Yerokam ndake, ndi, at Yerokam nen aput endage Elakana aret ndake, eereegwaarak. At Elakana nogo awi o Eparayim nggelok-nggobok endage Aramatayim-Topim aret wonagagerak.

² Wonage logonet, at akuwi mbere wogonabeegerak me, kwe ambi endage Kana, ndi, ambi endage Penina aret wonogogwaarak. Wonogo logonet, at Penina nogo aagalogwe ndaganake nagagerak kwe, at Kana nogo perak, aagalogwe ndaganaka'lek aret wonagagerak.

³ Tahun ambi eekak paga aap Elakana nogo awi o Arama nen at Aliku Omaawi Lombok Menggerak ALA ake warogo wogoge logonet, endage tiyappege logokit nduk, aap Eli apuri mbere Kopini Pinekat imbirak Aliku ALA unde logonet, eeko menggam o Tilo time lagi wage nagagerak.

⁴ At Elakana nogo nen ambi warogo Ala wogoriyak eyom panggoni wage kenok, Ala ake pugu nogo wake nagaatik, mbanak ando akwe Penina aagalogwe aap inom, kumi inom, tumburirage logonet,

⁵ kwe Kana nogo perak, Aliku ALA nen ndariyak lek wubili agago pereegerak kagak kwe, iniki kundugu wonage me, mbanak nogo kumi mbere wogorogo mengga kwak nggwok aret wogoge nagagerak.

⁶ At kwe Kana nogo Aliku ALA nen ndariyak lek wubili agago pereegerak me, ndaka'lek kenok, Penina nen Kana iniki wakkolaawak nduk, eerogo pege nagagerak.

⁷ Tahun ambi eekak paga at Kana nogo, Aliku ALA alut eeko menggam awooliya wurik me wage nagaatik, at Penina nen kwe Kana nogo iniki wakkolaawak nduk, nabenak mban eerogo pege kenok, kwe Kana nogo le mban ari logonet, mbi nengga'lek kage nagaatik,

⁸ at ogonggelo Elakana nogo nen akwe Kana nogo yoge logonet, “Kat nonggop nduk mbi nengga'lek kiniki wakkolage logonet, le mban ari menggendak? An ta, meek, ndi, kaagalogwe 10 aap mban ndaganaburak kenok iya me nduk, ari menggendak?” yinuk, yoge nagagerak.

Kwe Kana Ala yoreegerak wone

⁹ Ne ambi paga it nogo o Tilo time, mbi inom, niyo inom, nonggo nogogwaarik, Ala unde Eli nogo at Aliku ALA awooliya wurik tunggambe paga kwi'ndak wonage kagak, at kwe Kana nogo mi'nanuk,

¹⁰ iniki abu puru yinuk, le ari logonet, Aliku ALA yoge,

¹¹ “Ai, nogoba. Kat Komaawi Lombok Menggendak Kaliku ALA aret me, kayeloman niniki tebenak wonage yi, liippanege, ndi, an kayeloman kee'nggot aga'lek abe'nake, eeke logomenggendik, naagaluk aap ambi wo'niru o. Wo'nege keenok, at eenik kagak eeruwak mbangga'lek mondok-mondok Kaliku ALA kake leenogo teppagagin o,” yinuk, wone abuk nggaruk togon kumbuk mbanogo Aliku ALA yoreegerak.

^12-13 At kwe Kana nogo oone lek we inikime nen mban Aliku ALA yoge logonet, tamban nggorek eereegerak. Eeke logonet, ambe puruk-lenggek ari at Eli nen liippege nagagerik, “Kwe yi, amburu nenok kumili kunggerak kagi,”

¹⁴ mbake nagagerik, yoge logonet, “Kat amburu kumili aganake nogo mendek nengge nagandik, kumili negen ari nogo ti, ne mande paga nengge logomunggun? Anggur amburu ti, ambinom nagun o.”

¹⁵ Yoge mbareegi, kwe nogo nen ari logonet, “Togop lek o, nogoba. An anggur amburu inom, amburu kumili aganaka inom, nenok ari lek o. Niniki abu puru agan unggwage logonet, niniki mbake nogo abok aret paganogo at Aliku ALA yoge me,

¹⁶ kayeloman an yi, Kwe yi maluk mendek nen ari o, yinuk, nombarugun o. An niniki aaninggin ndugu aago wonage kenok tamban eeke agarik o.”

¹⁷ Yoge mbareegi, at Eli nen, “Ti kenok op aret o. Kat nen Iterali inogoba Ala nen wo'niruwak, mba'nuk, yogendak nogo, wokkirigin aret me, kiniki teeluk obeelom paga aret kame nak o.”

¹⁸ Yoge mbareegi, kwe Kana nogo nen, “Kayeloman an aret me, nabuwa mbake logomunggun o,” yo'nuk, wundi nage nagagerik, mbi nengge, etenggen ogum aago wonagagerak nogo eya age, eereegerak.

Tamuwen nda'nage mbareegi, Ala wogoreegerak wone

¹⁹ Ko'lu o weege mbareegi, Elakana nogo akuwi apurilogwe inom ineenik ogo nogogwaarik, at Aliku ALA alut eeppunuk, iname o Arama time aret nogogwaarak. Nogo nogogwaarik, wonogwe me, Elakana nogo akwe Kana imbirak nogo yege mbareegi, kwe Kana tamban eereegerak nogo Aliku ALA abereegerak.

²⁰ Abeke mbareegi, logonuk negen kwe Kana nogo abila a'nuk, aagaluk aap aret ndake nagagerik, ari logonet, “An Aliku ALA nggino yogirak paga naagaluk wo'negerak me,” yinuk, endage Tamuwen aret tooneegerak.

²¹ Ndi, aap Elakana nogo akuwi inom tahun ambi eekak paga Aliku ALA ake warogo wogogo menggaarak nogo mendek warogo wogoge, ndi, wone nggaruk togon kumbuk mbanogo yoreegerak nogo ndak-ndak wogoge, eeriyak eyom panggoni wage mbareegi, o Tilo lagi noorak nduk pipuk eeko mbareegwa,

²² at Kana nogo nen ogonggelo Elakana yoge, “Peebi Tamuwen yilak mbambunuk, at Ala alut eeko menggam awooliya wurik me time mondok-mondok logowak nduk, an nen Aliku ALA ake leenogo pi noorak me, yogondak ninom nagin lek o.”

²³ Yoge mbareegi, at Elakana nen akwe nogo yoge logonet, “Kat eeriyak op mbakendak ti aret eeru o.” Yoge nagagerik, “Yilak mbaniyak tokkage keegak, Aliku ALA nen yokkegerak nogo ndak-ndak aret aruwak o.” Yoge nagagerik, at akwe-apuri ando nogo inom wogwe iigak, at Kana nogo oome logonet, aagaluk elak wogoge nagagerak. Ndi, yilak mbaniyak eyom panggoni wage mbareegi, yilak mbaneegerak.

²⁴ At Tamuwen nogo yilak mbambunuk, agalo kwe Kana nogo nen tapi ngguunok ndarak kagak tahun 3 eerak ambi wagangge, gandum anggen yigirik aaninggin 10 wakkagak wagangge, ndi, yiiwak ndomba agabolo ogobakkigirik paga anggur amburu toolak wagangge, eeke nagagerik, Tamuwen nogo eebe awo mbuuluk kagak wonok Aliku ALA alut eeko menggam awooliya wurik me o Tilo woraanuk,

²⁵ tapi nogo warogo Ala wogogo logonet, wulaga nogo aap Eli wogoruwok nduk, wonok wogo nogogwaarik,

²⁶ kwe Kana nogo nen Eli yogo logonet, “Nogoba o. Kwe ambi aa'nduk yime mi'ndak logonet, Aliku ALA yoge kenegen kagagindak nogo ti, keenik keegak aret eeke neyareegindak me, an aret abet nombaru o.

²⁷ Aliku ALA nen an naagaluk wo'niriyak nduk nggino yoreegirak a'me lik togon wo'negerak nogo wulaga yi aret o.

²⁸ Togop me, wulaga yi, kangga'lek eenik wonage logonet, mondok-mondok Aliku ALA ake leenak logowak nduk, wogoriyak mbakirak me, an yogondak Aliku ALA aret wogogi o,” yinuk, yoge mbareegi, inendobanggun yindumbunuk, Ala endage alut eereegwaarak.