1 Peterut 5 - Ala Wone Peenok Peebi Mbanak

Ala andomba ndegeninako logorak wone

¹ Nowe-nawot o. Kit Ala apuri inenggela'me logonet inarum monggotak kwak, an togon Ala apuri inarum minggirak nen wone ambi yokkira o. At Keritut aaninggin-paaninggin oba pogo nogogwaarak nogo, an nenegen kagagirak me, peebi at pi wakwi iigak, woroorak eyom paga, “An togon tiyappani woraagin,” mbake logonet, “Wone eebe yokkiraakit,” mbakirak nogo liirogon konenggo logobagip nduk, yokkira o.

² Kit Ala apuri inarum logobagip nduk, mippinagareegerak nogo, “Kineebi,” mbako logonet, inarum logorak ti mage o. Ata, Ala iniki mbake ndak-ndak, “Inarum logokit,” mbako logonet, ndomba ndegeninako mengga kwak, Ala apuri ti, togop aret ndegeninako logonip o. Ndi, onggo koloorak paga mban kiniki lunik logonet, ndegeninako logorak ti mage mban. Ata, we kiniki ale'nggen paga aret ndegeninako logonip o.

³ Inarum logobagip nduk, unde eeppinagareegerak nogo inarum logonet, “An noone mban konenggo logonip o,” yinuk, kinoone omaawi paga yorogwe ti mage o. Ata, it Ala andomba nogo nen kit kinobaabut obeelom mban eerit nogwe nogo liippinaganuk, “At eeke ti, an ndak-ndak eeke logokit,” mbaruwak nduk eeko logonip.

⁴ Togop eekwi kiinok, nit ndomba ndegenninaka ninowe nogo, peebi wage logonet, “Kit abu obeelom eeko nogotak o,” yinuk, kinenggare-nggare mendaarak kiik ariyak lek mondok laambu logorak mendek yirippinagi woraagin o.

⁵ Togop me, kit aap tawe nen eeko logorak wone ambi yokkira o. Kinogobamini nen inoone yokkirogwe iinok, kinaruk liirogon konembunuk eeko logonip o. “It aakumi iniki wogoppako menggaarak kenok, Ala nen tebenogo piige menggerak kwe, Iniki tebenak wonogwe iinok perak, Inabuwa nen obeelom eeppiige menggerak o,” yinuk, yereegerak Ala wone liiru mbanak wonage me, kit abok aret kiniki tebenak logonet, yeenggwa-yeenggwa eeko logonip o.

⁶ At Ala nen, “Ne ti eyom paga tiyappiyaakit o,” yinuk, kooneegerak nogo a'me lik yi wage kenok, tiyappinagawak nduk, at omaawi ambik menggerak Ala nogo abu'me tebe yinuk, logonip o.

⁷ At Ala nen kinabuwa mbake menggerak me, kiniki piirik-paarik eekwi nogo abok aret paganogo at oba mban pogo logonip o.

⁸ Kit kinom ogoorak monggotak Tile nogo nen maluk eekkinabikit nduk, nggeewo anini warak pogom nibingginaburak eyak nde agan kwaakkinabit nege me, kit mondok kiniki warak a'nuk, kinagaket paga logonet, tum wakkologo logonip o.

⁹ Ndi, it kinoreewi yi awi ndi awi menggaarak kinom kiniki abet mbakwi nogo, andi-pandi kit eerogo pinagagwi ndak-ndak, it togon togop aret eeppiigwi nogo kineenu me, kit kiniki abet mba'nuk, kinogogumbuk mondok nu'lek logonet, Tile nen kiniki nggagani wage kero, mugogo nappogo logonip o.

¹⁰ At iniki kunik nen wo'nirage menggerak alom unde ninogoba Ala nogo nen Keritut ninom kunik wonogwe paga at tiyanak menggim nogome ninom ndak-ndak mondok-mondok tiyanak logowok nduk ninayonggo pereegerak me, ne ambiriluk ambi andi-pandi eerogo pinagagwi iinok, ninogoba Ala nen kinobaabut koonogo pinagage, kiniki nu'lek eerogo pinagage, kinomaawi agago pinagage, kinogogumbuk nu'lek logobagip nduk eerogo pinagage, eeke logogin me, kiniki kwi'ndak logonet, waganggo logonip o.

¹¹ At Ala ti, mondok-mondok ayuk warak logowak o, yinuk, abet aret yokkiragi o. Amin!

Irip paga keyage wappiyareegerak wone

¹² Wone yokkirage ti abok aret at iniki kunik nen obeelom eeppinanege menggerak Ala nogo nen an ndak-ndak eeppanege kagak paganogo yokkirage me, “Yi abet aret eeppinanege menggerak o,” yinuk, kiniki eyak wappinagawak nduk, at li'lak mban eerit nage kage minggirak ninore Tilat nogo nen yeenggwaanege kagak, liiru yi, we nggaruk togon mbanggirage kwe, wone yi ti, mondok iya me, porogo logonip o.

¹³ It kinoreewi Ala apuri o Mbaben mendek kunduk, Ala nen leenogo piyareegerak me, it nogo nen keyage wappinagagwi, ndi, an naput Marakut nogo nen kunduk keyage wappinagage, eeka o.

¹⁴ Kit-kit aret kiniki kunik paga keyage wat-wat yogo logonet, linggik-kambuk yogo logonip o. Ndi, kit Keritut kinom kunik wonogwe nogo abok aret kiniki ugun tayenak ale'nggen logobagip nduk, eeppinagage logogin o. Wa!