1 Peterut 3 - Ala Wone Peenok Peebi Mbanak

Aap inakuwi inom logonet, eeko logorak wone

^1-2 “Kit aakumi inayeloman nen kinogobamini inoone liirogon konenggo logonip o,” yinuk, yokkiragarak nogo ndak-ndak, kit kumi kunduk kinogonggelomini inabu'me logonet, inoone liirogon konenggo logonip o. Kit Ala kinagabiti eeppunuk, kinobaabut obeelom logonet, kinogonggelomini inabuwa nen kinigen tebenak nugwi kiigo logomenggaarik, it kinogonggelomini ando iniki awo abet mbaka'lek nogo nen, “An ninom Yetut mugurok naakit,” mbaruwak nduk, inoone yokkirogwe iinok, kit nen wone onggo ambi yoraga'lek, we, “E o,” yinuk, liirogon eeko logonip o.

³ It aakumi nen, “Kwe yi, kigirikwe togon o,” yuwak nduk, kinagabolo paga mban ogobakkigikkologo logonet, kineeruwak abe mbininggologwe, kinarenggen-kinagiinggen laambu yikkologwe, kinagali-kinayum abe kigirikwe yirikkologwe, ti mban eeko logogup o.

⁴ Ata, kumi inobaabut abu yanggonak iniki kwi'ndak nogo, alik ogolik mondok porogo wonogwe iinok, at Ala nen, “Kwe yi, ia o!” yinuk, iniki kundugu eeginake menggerak me, kit kinobaabut togop aret logonip o.

⁵ It kumi aa'nduk iniki Ala oba panggombunuk at oone liirogon mugurok nogo nogogwaarak nogo ti, aakumi nen, “Kumi yi kigirikwe togon o,” yuwak nduk, inagabolo mban ogobakkigikkologo logolik o. Ata, it togon togop aret inogonggelomini inabu'me logonet, inoone liirogon aret konenggo nogogwaarak me,

⁶ at kwe Tara nogo nen Abarakam oone ari kenok, “E o, nogoba,” yinuk, yanggonak mban eeke nagagerak nogo ndak-ndak, kit kumi o yogondak wonogwe yi, kinagabiti lek obeelom mban eerit nogwe kiinok, at Tara owowologwe kit aret logomunggup o.

⁷ Togop me, yogondak kit aap kinakuwi warak nen eeko logorak ambi yokkira o. It kumi ineebe ndeyak inomaawi lek wonogwe me, kinakuwi kinom logonet, inabuwa mba'nuk yeenggwaarogwe, ndi, kiniki ogoorak logonet, kinom tamban eeriyak meek eekkinake kero, “Ala ninabuwa nen nineenik mondok logorak mendek ninakuwi ninom ndak-ndak unde eeppinanigin o,” yinuk, obeelom eeppiigwi, eeko logonip o.

Obeelom wone yorogwe paga andi-pandi eeppinaniyak wone

^8-12 At Ala nen ari logonet, “Kit kineenik logorak kinikilom mbakwi, Nit obeelom aret wonogwe me, li a'nuk, kambuurak op aret, mbakwi, Eekwi ti, Taamini nen togop mbako ogotik? Togop aret mbakwi kiinok, Kinoone maluk mendek kinambe paga wunabi wogwe, Wone pilit kinamili irip paga wonok nugwi, Eekwi kiyo, Tum liirogon wakkologwe, Maluk mendek mbo punuk, obeelom mendek kenok mban eerit nugwi, Nonggop agago niniki ambit lambunik logorak koonggwi, Abu koombunuk, ti aret kinomaawirogon mugurok nogwe, Eeko logonip o. Aap iniki koonak menggaarak nogo, Ala enegen wogoren nege, Tamban eekwi iinok, at aruk liirogon konengge, Eeke menggerak kwe, Aap maluk eeko menggaarak perak, Ala enggaawak omaawi paga lek eerogo piige menggerak o,” yinuk, yereegerak liiru mbanak ndak-ndak, kit togon Ala ale'nggen kinoba pinagakit nduk, kinayonggo pinagareegerak me, kit nen maluk onggo-onggo eekwi, ambi nen ambi meek eeppegak eekwi, eeko logogup o. Ata, it maluk eeppinagagwi nogo obeelom eeppiigo logonet, kinom kiniki ambit eeppunuk wone mbanggwi, kiniki eyak wat-wat eekkologwe, nore-kore yogwe, nabuwa-kabuwa mbakwi, kiniki tebenak nugwi, eeko logonip o, yinuk, eeko logorak irip paga ambi yokkiraakit mbakirak nogo ti aret yokkiragi o.

¹³ Kit kiniki aganggen kerek togon obeelom eerit nugwi kiinok, ta nen maluk eeppinagarak mbakop?

¹⁴ Togop eekulik kwe, kit obeelom wone yoranet nugwi kiigak andi-pandi eerogo pinagagwi iinok, “Nonggop nduk eeppinanugwi?” yinuk, kinagabiti nen kiniki piirik eerugup o. Ata, “Ala ale'nggen ninoba pinanigin o,” yinuk, kiniki ale'nggen paga waganggo logonip o.

¹⁵ “Keritut ti, nit ninowe aret logowak o,” yinuk, alik leenogo punuk, at mban oone konenggo logonip o. Ndi, kit kiniki lunik wonogwe nogo, it aakumi nen, “Yo'niraanip o,” yinuk, kin wokkiigwi iinok, kiniki abe paga kinoone yanggorogon onggo yoroorak nduk, wone koonogo punuk logonip o.

¹⁶ Kit Keritut kinom kunik logonet, obeelom eerit nogwe kiigak, it miyuk-meya eerogo pinagagwi nogo nen, kit obeelom mban eerit nogwe paga, “Ia!” yinuk, inagabiti mbarugun me, kiniki maluk ambi abe'naga'lek kiniki obeelom paga kinoone yanggorogon yorogo logonip o.

¹⁷ Kit maluk eerit nogwe paga andi-pandi kinoba pinagagwi iinok ti, alom kit kinobaalombok eerumonggotak paga eeppinagagun me, ti iya lek o. Ata, Ala iniki mbareegerak paga eerit nogwe kiigak, andi-pandi kinoba pinagagwi iinok ti perak, iya aret o.

¹⁸ Nit maluk eekwi nogo abok aret lek eerogo pikit nduk, at Keritut ne ambit paga aret kambeegerak. At maluk eekeelik obeelom mban eeke menggerak nogo nen, nit obeelom eekwi lek maluk mban eekwi nogo, Ala abu'me pinanikit nduk at eebe aap aret age mbareegi, warogo pereegwaarak nit ninake aret kambeegerak kwe, Aberiniki nen eenik agago mippereegerak.

¹⁹ At mippereegerak Aberiniki nogo nen aret maan it aakumi kambeegwaarak inogoma keele maarak negen o apit me wonogwe me, wone obeelom wone yora nagagerak.

²⁰ Obeelom wone yora nagagerak nogo ti, aap Nu nen maan aa'nduk it aakumi Ala wone yorage kagak, taganogo mbo pogo mbareegwa, Ala nen, “Mbet-mbet inoorikit,” mbareegerak kwe, aap Nu nogo o awo wuke kenok, iniki yanggo yinuk, tokkage kagak, o nogo wuke mbareegi, aap Nu apuri inom ineebe 8 mban unggwogogwaarak nogo, niyo nen wogoren laganeegerak paga inagap ndake logonet, it ando apit niyo ndonggoninabeegerak inogoma keele maarak o apit me wonogwe me, wone obeelom wone yora nagagerak nogo it aret o.

²¹ Ndi, it ineebe 8 niyo ndonggoninake kero, niyo nen wogoren laganeegerak paga inagap ndareegerak nogo ndak-ndak, nit yogondak niyome wuppinanugwi paga ninagap ndake ti, we ninagabolo mili kenok, koo'ninabuwak nduk, eekwi lek o. Ata, nit nen Ala yogo logonet, “An pilit lek, abet aret yiluk-maluk mbo pigirak me, kat kabu'me logokit o,” yinuk, Ala enggaanom paganggwi niinok, niyome aret wuppinanugwi, ndi, at Yetut Keritut eenik eerogo mippereegerak paga ninagap ndake menggerak ndak-ndak, niyome nen pilanogo mippinanugwi, eeko menggaarak o.

²² At Yetut Keritut nogo ogoba Ala nen eenik eerogo mippege mbareegi, it malayikat inom, it o oolo ya'i menggaarak Tile inom, yi kugi ndi kugi inom, abok aret at abu'me logowak nduk, tebenogo piige nagagerik, yogondak mbogut paga ogoba Ala eenggi abe'nggan paga kwi'nari laganeegerak wonage agaarik o.