1 Mbinineegwaarak 23 - Ala Wone Peenok Peebi Mbanak

Lewi mendek ineyabu eeko logorak puniragagerak wone

¹ At Ndawut nogo ndarak kagak tahun ambik eeppunuk, abu anggok age nagagerik, at obaane'me aakumi Iterali mendek inowe endagembogut logowak nduk, aput Talomo aret mippereegerak.

² At nen aakumi Iterali mendek inoweewi inom, it Ala unde inom, it Lewi mendek inom, abok aret kuwak eeginabeegerak.

³ Kuwak eeppiinok, it aap Lewi mendek ndarak tahun 30 nen agi nggwe eerak kero, ineenggi linggininabit nogo nogogwaarik, lambuk togon ineebe tiga puluh delapan ribu aret linggininabeegwaarak.

⁴ Lingginako mbareegwa, at Ndawut nen ari logonet, “It yi, ineebe dua puluh empat ribu Aliku ALA awi wukwi nogo inarum wakwi, ineebe enam ribu ti, ando yi mendek ndi mendek eekugak liiru mbanggwi, it ando aakumi inawone mbanogo inowak loonggwi, eeko logowak o.

⁵ Ndi, ineebe empat ribu ti, tu unggwogo menggam arum wakwi, ndi, ineebe empat ribu ti, Aliku ALA alut eeko logonet, ndawi tiyanggwi iigak, yi mendek ndi mendek oone eekak an nen pipuk eerogo pereegirak nogo woppunuk, eekwi, eeko logowak o,” yinuk, yoragagerak.

⁶ Ti eeke nagagerik, Ala awi wurik me eeko logorak at Ndawut nen aap Lewi mendek mogonogo piyareegerak nogo ti, at Lewi apuri Nggeroton inom, Kekat inom, Merari inom, nogo mugurok aret mogonogo piyareegerak.

At Nggeroton mendek ineyabu eeko logorak lingginabeegwaarak wone

⁷ At Nggeroton paga wiganak ti, Laran Timeyi imbirak aret.

⁸ At Laran nen apuri aap ndaganabeegerak ti, ineebe kenagan Yekiyen, Tetam, Yowen, aret me, it inowe ti, Yekiyen aret.

⁹ At Timeyi nen apuri aap ndaganabeegerak ti, kenagan aret me, inendage Telomit, Katiyen, Karan aret. It aap Laran apuri ndarak ndegek inoweewi ti, it aap ti aret.

¹⁰ At Timeyi nen apuri aap ndaganabeegerak ineebe 4 aret me, inendage Yakat, Tita, Yewuti, Mberiya aret.

¹¹ Manggu at Yakat nda'nage, ambo'me Tita nda'nage, eereegwaarak kwe, it Yewuti Mberiya imbirak inapuri aap ambik ndaganabulik me, “Inagunu ambit,” mba'nuk, ineyabu ambit eeko logowak nduk, ineebe lambuk togon ineenggi linggininabeegwaarak.

At Kekat mendek ineyabu eeko logorak linggininabeegwaarak wone

¹² At Kekat nen apuri aap ndaganabeegerak nogo ti, ineebe 4 me, inendage Amaram, Yitakat, Keboron, Utiyen aret.

¹³ At Amaram nen apuri aap ndaganabeegerak nogo ti, Karun Muta imbirak aret. At Karun apuri wiganak inom nen Ala awi wurik me yi mendek ndi mendek eekak alik leenak arum liirogon wonogwe, Aliku ALA enggaanom paga ake warogo wogogwi, Ala enggaanom paga aakumi inake eekwi, mondok-mondok Ala endage paga aakumi inale'nggen inoba piigwi, eeko logowak nduk, leenogo piyareegerak.

¹⁴ Ndi, at Ala wone liirogon eeka Muta nen apuri aap ndaganabeegerak nogo ti, “It Lewi mendek eegu ando aret o,” yinuk, inom lambunogo piinok, ineenggi lingginabeegwaarak.

¹⁵ At Muta nen apuri aap ndaganabeegerak ti, Nggeroton Eliyetet imbirak aret.

¹⁶ At Nggeroton paga wiganak ti, Tebuwen aret me, at mendek inowe at aret.

¹⁷ At Eliyetet aput ti, aap Erekabiya aret me, at mendek inowe at aret. At Eliyetet nogo ti, apuri aap ambinom ndaganabulik aap ambit Erekabiya aret ndareegerak me, at Erekabiya apuri perak, ambik aret ndaganabeegerak.

¹⁸ At Yitakat paga wiganak nogo ti, Telomit aret me, at mendek inowe at aret.

¹⁹ At Keboron nen apuri aap ndaganabeegerak ti, ineebe 4 aret me, manggu Yeriya, at ambo'me Amariya, at ambo'me Yakatiyen, at ambo'me Yekameyam, aret me, at Yeriya nogo ti, it inowe at aret.

²⁰ At Utiyen nen apuri aap ndaganabeegerak ti, Mika. Ndi, at ambo'me Yitiya, aret me, at Mika nogo ti, it inowe at aret wonagagerak.

Merari mendek ineyabu eeko logorak linggininabeegwaarak wone

²¹ At Merari nen apuri aap ndaganabeegerak nogo ti, Makili Muti imbirak aret. Ndi, at Makili nen apuri aap ndaganabeegerak nogo ti, Eleyatat Kiti imbirak aret.

²² At Eleyatat nogo, apuri aap ndaganabulik kumi mban ndaganabeegerak me, it iniriwi mendek aap Kiti apuri nogo nen, “Nit ninakuwi aret o,” yinuk, wogonabeegwaarak.

²³ At Muti nen apuri aap ndaganabeegerak nogo ti, ineebe kenagan aret me, inendage Makili, Eret, Yeremot aret.

²⁴ At Lewi paga wiganak ndarak logok inoweewi inendage liiru mbambunuk, it inarum wonogwe ndarak iigak tahun 20 nen agi nggwe eerak kero mban Aliku ALA awi wurik me ineyabu eeko logowak nduk, ineebe inalitak lombok ineenggi linggininakwi, inendage liiru mbanggwi, eereegwaarak ti aret.

²⁵ At Ndawut nen ari logonet, “Aliku Iterali inogoba Ala nen at apuri iniki ugun tayenak logowak nduk, eerogo piige nagagerik, o Yerutalem yime mondok-mondok ari wagagerak wonage me,

²⁶ it Lewi mendek nen at inom lambungge menggim awooliya wurik inom, inikime eeko logonet, eekak yi mendek ndi mendek inom, ambinom piyaninuk nogo logogun lek o,” yinuk, yereegerak me, ineyabu alik unde eeppiyaawak nduk, ineebe ineenggi lingginogo piyareegwaarak.

²⁷ At Ndawut nen wone irip paga lengganogo yoragagerak ndak-ndak, it Lewi mendek ndarak iigak, tahun 20 nen agi nggwe eerak kero mban, ineebe lingginogo inendage liiru mbanogo pereegwaarak.

²⁸ It Lewi mendek ti nen at Karun paga wiganak nen Aliku ALA awi wurik me eekwi nogo, yeenggwaarogo logowak nduk, ineyabu unde eeppiyareegwaarak nogo ti, Ala awi wurik oore'nggam endekem inom, akem ko ogoorik-ogoorak aago me inom, unde wonogwe, yi mendek ndi mendek Ala ake alik leenak wonage nogo, maluk age kero, liirogon ndegenggo logonet, Ala awi wurik me eeko logorak yugu nogo eekwi,

²⁹ eyo ndoonak paga puurak oroti worarak inom, Ala ake puurak gandum yigirik inom, oroti piike menggerak pugu lek worariyak nduk, amok mbanggwi, mande negen worakwi, mbuuluk a, nggwok a, worakwi, eeko logowak nduk, unde wonogwe,

³⁰ it nen mi'na'nuk, o kuubondendok inom, o kiyoma inom, Aliku ALA endage tiyappogo logonet, ndawi “Wa!” yogwe nogo mendek wakwi,

³¹ nogo 6 yippunuk, ko'lu tat yonggonggologwe paga, tut ngget penengge paga, laago lariyak age kenok, lako logorak yugu paga, Ala ake warogo kani kunggwi iinok, ndawi ti mendek mban tiyanggwi, eeko logowak nduk, unde eeppiyareegwaarak. It aap Lewi mendek ti, Aliku ALA enggaanom paga ineebe yogop nen eekwi, ndi, “Ndogop eeko logorak o,” yugu nogo ndak-ndak aret eekwi, eeko logowak nduk, unde eeppiyareegwaarak.

³² It Lewi mendek ti, Ala inom lambungge menggim awooliya wurik me inom, mage menggim inom, it inoreewi Karun paga wiganak nen inarum wonogwe iigak, Aliku ALA awi wurik me inom, eeko logorak unde eeppiyareegwaarak nogo aret eeko nogogwaarak.