1 Korindut 8 - Ala Wone Peenok Peebi Mbanak

Kugi aanggo warak kenok nonggop eeko logorak wone

¹ “Wam kugi aanggo warak noorak ilik, mage a?” yinuk, wone ambi yokkira o. “Nit abok nineenu o,” yogwe ti, abet aret yogwe kwe, it aap nen “Abok nineenu,” mbakwi ti, wogoppako menggaarak. Ndi, aakumi inabuwa mbako logonet, obeelom eeppiigwi kenok perak, iniki kole eerogo piigo menggaarak o.

² Aap ambit-ambi nen, “An abok neenu,” mbake kenok, at abe liirogon eenu ariyak mendek awo eenggo'lek kagak ari me, eenggo'lek nen aret ari mbariyak o.

³ Ndi, aap ambi Ala imbirak iniki kunik wonage nogo Ala nen aap ti, eenu aret menggaarak o.

⁴ Ti kenok, “Wam kugi aanggo warak noorak ilik, mage a?” yinuk, yogwe ti, at Ala alik ambit aret menggerak me, nggween paga yime kugiwak abe mendek ambi wonage lek ti, nineenu aret o.

⁵ Mbogut paga nggween paga, “Ninagugi ambik wonogwe o,” yinuk, yogwe nogo ti, nit kunduk, “Nagugi nombo o, nowogolo o,” yinuk, ambik inowak mbanit nogwe iigo monggoorak kwe,

⁶ nit perak, ninogoba ambit Ala aret wonage o. At nen mban yi mendek ndi mendek abok aret wakkagagerak me, nit at ake aret nineenik ogoorik o. Ndi, ninowe Yetut Keritut kunduk ambit aret o. At eereegerak paga yi mendek ndi mendek warak eerogo pege nagagerik, nit nineenik logowok nduk, eeppinanege menggerak nineenu ogoorik o.

⁷ Wone ti, nit nineenu aret kwe, it ando perak, awo liippega'lek aret agaarik o. It nen maan kugi aanggo warak nonggo nogogwaarak me, yogondak iniki mari eeppunuk, wam ti, ugun noorak op aret kwe, iniki kole aga'lek me, “Inagugi aanggo wakaarak kagak, nonggo,” yinuk, abeko nagaatik, “Maluk eekkologoorak kogo,” yinuk, mbako menggaarak o.

⁸ Nit yi mendek ndi mendek nunggwi paga Ala ninom kunik wonogolik o. Nit nengga'lek puk wonogwe niinok, maluk eekkologwe, ndi, nunggwi niinok, obeelom eekkologwe, eekulik o.

⁹ Togop me, kugi aanggo warak nogo kit nen ugun nenet noorak op aret kwe, kinoreewi ambi iniki abet mbakwi awo kole aga'lek nogo nggelenogo piyookwak, liippinip o.

¹⁰ It kinoreewi ando iniki awo kole aga'lek mendek nogo nen, kugi aanggo warak kit ugun noorak kineenu me, ugun nunggwi kiinok, “It kugi aanggo warak kagak nunggwi me, nit togon nawi aret o,” yinuk, iniki maan mendek abeko logonet, nagun lek mbakop? Nunggwi aret iyoorak me,

¹¹ it kinoreewi nogo abok inake Keritut kambeegerak kwe, kit alom abu kineenu logonet, kugi aanggo warak ugun namonggotak paga nen kinoreewi iniki awo kole aga'lek nogo maluk eeppiigwi kiyoorak me, liippunuk eeko logonip o.

¹² Ti eerumonggotak paga iniki warogo piigo logonet, Keritut kunduk inom aret maluk eeppumunggup o.

¹³ Togop me, an nengge paga noreewi yigeebu wanggwi iinok, an nen aret nggelenogo piyookwak me, an wam mondok nengga'lek aret logogin o.