1 Korindut 7 - Ala Wone Peenok Peebi Mbanak

Aap kwe koloorak yoragagerak wone

¹ Kit liiru mbanogo nappani wogogutak nogo, yogondak an wone onggo ambi yokkira o. Aap nen kwe kolaga'lek we logorak ti op aret kwe,

² aap nen kumi inom ugun maluk eekwi iyo, it aap inalitak lombok nen inakuwi kologwe, ndi, kumi nen kunduk inogonggelomini kologwe, eeko logowak o.

³ Kologo logomenggaarik, imbirak nogo yugu logonet, eeriyak mbakwi nogo eeko logorak op aret o.

⁴ At kwe eebe ti, at alik unde lek at ogonggelo unde aret wonage, ndi, aap ti, eebe at alik unde lek at akwe unde wonage, eekwi me, akwe nen eeriyak mbake kagak, ogonggelo nen at eebe ili yikkolage, ndi, ogonggelo nen eeriyak mbake kagak, akwe nen at eebe ili yikkolage, eeriyak mage o.

⁵ Wone alik paga lek o. Ata, tamban mban eeko logowak nduk, ogonggelo akweegelo imbirak wone koonggo logonet, “We luulu ne ndogop paga lambungga'lek puk logowok o,” yinuk, iniki ambit a'nuk, tayoppunuk, puk logorak ti, op aret kwe, elaambirik wonogwe iinok, Ibilit nen iniki nggagangge kenok, iniki nengge kero, logonuk lek mbet-mbet aret lambunuwak o.

⁶ An wone yokkiragarak ti, noone omaawi paga lengganogo yokkirage lek o. Ata, “Togop eeriyak op ilik?” yinuk, yokkiragi o.

⁷ An wonage nogo pogom kit abok ndak-ndak togop logorak op mbake kwe, Ala nen eeriyak unde eeppinanege logonet, “Ambi yogop eeke logowak, ambi ndogop eeke logowak,” yinuk, ninalitak lombok unde eeppinaneegerak me, eeko logowok o.

⁸ It kumi tawe aap tawe inoreewi kolaga'lek inom, kumi togwe inom, nogo yorage logonet, “An wonage minggirak pogom kit ndak-ndak logorak ti op aret o,” yinuk, yorage minggirak kwe,

⁹ “Kinoreewi kolaga'lek logonet, aganggen nen kiniki nenet unggwage ti maluk, ndi, kinoreewi warak logorak ti maluk lek me, eeriyak eekkinake nogo tebenogo puurak meek kenok, kinoreewi kologo logorak op aret o,” yinuk, yorage minggirak.

^10-11 Ndi, kit kinakuwi warak nogo perak, ambi yokkira o. “Kit aap nen kinakuwi mbo piyoorak ti mage o. Ndi, kit kumi kunduk, kinogonggelomini mbo piinok, mbaganiyak ti mage mban. Kit kumi nen kinogonggelomini mbo piinok, mbaganggwi kiinok ti, tawe aret logorak ilik, kiniyokan kinogonggelomini iya woroorak a, ti op aret kwe, aap alik koloorak ti perak, mondok lek o,” yinuk, yokkirage ti, an nen lek o. Ata, ninowe nen yo'nege kenok wone lengganogo yokkiragi o.

¹² Ndi, ando yi yokkirage nogo ti, ninowe nen lek o. Ata, an nen aret yokkira. Kit aap Ala apuri ambi nen akwe iniki abet mbaka'lek mendek kolegerak imbirak wonage logonet, kwe nogo nen, “Nogonggelo nimbirak logorak obeelom,” mbake kagak, aap nogo nen, “Nakwe yi neebi o,” yinuk, mbo puurak ti mage.

¹³ Ndi, kit kumi Ala apuri mendek ambi nen ogonggelo iniki abet mbaka'lek mendek kolegerak imbirak wonage logonet, aap nogo nen, “Nakwe nimbirak logorak obeelom,” mbake kagak, akwe nogo nen, “Aap yi, neebi o,” yinuk, mbo puurak ti kunduk, mage mban o.

¹⁴ Aap iniki abet mbaka'lek nogo akwe abet mbake nogo paga Ala nen ore imbirak ale'nggen inoba piige, ndi, kwe iniki abet mbaka'lek nogo ogonggelo abet mbake paga Ala nen ore imbirak ale'nggen inoba piige, eeke menggerak. Imbirak ale'nggen inoba piyaanetak lek en, it inaagalogwe-inapuri ndarak nogo ti, we terak ndarak negen logonetak kwe, imbirak ale'nggen inoba piige ti paga Ala nen, “Yi an napuri aret o,” yinuk, inarum aret menggerak kogo o.

¹⁵ Ndi, at ambi iniki abet mbaka'lek nogo nen, ore iniki abet mbareegerak nogo mbo puurak mbake kenok ti, iniki abet mbaka'lek nen, “Mbo pikit,” koonggerak me, obaalombok koonuwak nduk mbo pinip o. Ndi, kwe ilik, aap a, mbo pugu nogo ti, Ala nen iniki ambit ale'nggen paga lambunik logorak mbareegerak kwe, lambunik logorak meek kenok, inalitak logorak op aret o.

¹⁶ Kwe Ala aput yi wae. Kogonggelo kimbirak logonet, kat eeremenggendak paga Ala nen kat kore agap ndarigin keenu me nduk, ari agandik? Ndi, aap Ala aput yi wae. Kat togop eeremenggendak paga Ala nen kakwe agap ndarigin keenu logonet, ari agandik? Lek me, inalitak logorak op aret o.

“Nonggop kiigak wiigiragagerak,” wone

¹⁷ Ala nen, “Aap ti, togop logowak o,” yinuk, koonogo pinagareegerak nogo togop aret logonet, ambi eeko logobagip nduk, unde eeppinagareegerak nogo ndak-ndak aret eeko logonip o. It Ala apuri kuwak eerit nogo menggaarak nogo, wone ambit ti mban aret lengganogo yorage minggirak.

¹⁸ At Ala nen kit kinagabolo mbanak kagak wiigiragagerak kenok, kinagabolo mbanak aret logonip. Ndi, kinagabolo mbanak lek kagak wiigiragagerak kenok, kinagabolo mbanak lek aret logonip.

¹⁹ Kinagabolo mbanak inom, kinagabolo mbanak lek inom, ti iya lek o. Ata, at Ala nen “Yogop ee'nu, ndogop ee'nu,” yo'nirage menggerak nogo eerit noorak kenok perak iya o.

²⁰ Kit aa'nduk kinalitak lombok nonggop negen wonogwe kiigak, Ala nen wiigiragagerak nogo togop aret logonet, eeko logonip o.

²¹ Aakumi inayeloman wonogwe kiigak wiigiragagerak kenok, ti wone aaninggin lek me, togop aret logonet, Ala mugurok nogo logonip o. Ndi, kinogobamini nen wondet agago wumbinagagwi iinok, “Nanonggwan yo'nirogwe me, nawi o,” yinuk, nugu logomunggup o.

²² Aap ambit-ambi aakumi inayeloman a'nuk, eeke kagak ninowe nen wiige kenok, at Ala aput wondet agago pereegerak aret wonage o. Ndi, wondet aago wonage me, wiige kenok, aap ti Keritut ayeloman aret mbako logowok.

²³ At Ala nen onggo nggwok nogo paga kinonggo mbaneegerak me, aakumi inayeloman arugup o.

²⁴ Noreewi o. Kit aa'nduk kinalitak lombok nonggop negen wonogwe kiigak, Ala nen wiigiragagerak nogo togop aret at kinom kunik logonet, eeko logonip o.

Inoreewi wogonaka'lek inom, kumi togwe inom, eeko logorak wone

²⁵ Kit komologwe tawe eeko logorak Ala nen wone ambi lengganogo yo'nirulik kwe, it aakumi Ala nen inabuwa mbake menggerak me, “Ninoone abet mban yogo logowok o,” yinuk, mbakwi nogo ndak-ndak an kunduk togop logonet, niniki mbakirak nogo ambi yokkira o.

²⁶ O yogondak aaninggin-paaninggin alik negen ninoba wonage me, an niniki nen, “Kit yogondak nonggop wonogwe nogo ti, togop aret logorak,” mbakirak o.

²⁷ Kinakuwi warak kenok, mbo piyoorak mbarugup o. Ndi, awo wagangga'lek wonogwe kenok, koloorak kiniki koonggo logogup o, yinuk, yokkirage kwe,

²⁸ kit ando kumi wogonakwi kenok ti, maluk lek o. Ndi, kit tawe nen kinogonggelomini kologwe kenok ti kunduk, maluk lek mban kwe, kinoreewi wogonako logomonggotik, kinom logonet, aaninggin-paaninggin kinoba agago pakwi kiyo nduk, yokkiragi o.

²⁹ Noreewi o. Yogondak o nggween paga yime kogo monggoorak nogo lek ariyak eyom abu koorok panggok yegerak me, yogondak nen, kit aap kinakuwi warak nogo nen kinakuwi lek negen a'nuk, wonogwe,

³⁰ ndi, kit le yogwe nogo ti, le yogolik negen a'nuk, wonogwe, kit kiniki ale'nggen wonogwe nogo ti, kiniki ale'nggen lek negen a'nuk, wonogwe, kit yi mendek ndi mendek kunggwi nogo ti, yi mendek ndi mendek unde lek negen a'nuk, wonogwe,

³¹ ndi, kit nggween paga yi mendek ndi mendek waganggwi, onggo nggerenggologwe, eekwi nogo ti, kiniki kundugu lek negen eeppunuk, wonogwe, eeko logorak kinombakirak nogo ti aret yokkiragi o.

³² Ti yokkiragarak paga kit kiniki piirik wonogwe kiyo, ambinom yokkira. Aap ambi akwe lek kenok, at iniki mbake logonet, “Nowe iniki ale'nggen nombaruwak nduk, at obaalombok mban eeke logokit,” mba'nuk, eerit nage menggerak kwe,

³³ at aap akwe warak nogo nen perak, “Nonggop togon nakwe iniki ale'nggen eeppumun?” yinuk, wone nggween paga wone mban mugurok nage logonet,

³⁴ “Ambi yi, eeppi ilik, ambi ti, eeppi a?” yinuk, iniki koonit nage menggerak. Ndi, at kolaga ogonggelo lek tawe wonage kenok perak, “Niniki inom, neebe inom, maluk eeka'lek mondok ninowe ake leenak logokit nduk, ninowe obaalombok mban eerit nage logokit,” mba'nuk, eerit nage menggerak kwe, at kwe ogonggelo warak nogo nen perak, ogonggelo iniki ale'nggen mbaruwak nduk, yi mendek ndi mendek nggween paga eeriyak mendek nogo mban iniki koonit nage menggerak o.

³⁵ An wone yokkirage yi, kit nen eeriyak mage me nduk, yokkirage ti lek o. Ata, kineebe obeelom logobagip nduk, yokkiragi o. Kit obeelom mban eerit nogo logonet, ninowe alik kinengga lolo agago punuk, mugurok nogo logobagip nduk, yokkiragi o.

³⁶ Aap ambi nen kwe yiindi pege nagaatik, “Mbet-mbet lambumbaniyak lek o,” yinuk, ari kwe, ti'nuk, kolaga nogo abu tawe age kenok, aap nogo iniki aganggen nen, “Nakwe nimbirak lambumbaniyak,” mbake kenok, ti maluk lek me, lambumbiyoorak op aret kwe,

³⁷ aap alik ambi nen yiindi pege nagaatik, iniki mondok nu'lek logonet, aganggen eeke nogo tebenogo punuk, at iniki nen, “Nakwe mbet-mbet lambumbaniyak lek o,” yinuk, mbake kenok, ti kunduk op mban aret o.

³⁸ Togop me, at aap akwe koloorak mbake nogo ti, maluk lek op aret kwe, tawe logorak mbake kenok ti perak, abu obeelom aret o.

³⁹ Kwe ogonggelo awo eenik wonage kenok ti, wone yugu paga imbirak lambunik wonage kwe, ogonggelo kangge kenok perak, nanu pemenggerak wondet aago wonage me, kwe nogo nen, “Aap alik kolaakit,” mbake kenok ti, koloorak op aret kwe, kolage logonet, Ala aput kenok mban kolage logowak o.

⁴⁰ Aap kolaga'lek we logorak mbake kenok perak, iniki ale'nggen ambik kage logogin mbake agarik o. An mbake logonet, yokkiragarak ti, Ala Aberiniki nen yo'nege kagak yokkirage mbake agarik o.