1 Korindut 6 - Ala Wone Peenok Peebi Mbanak

Ambi age kenok wone amburu mbanggo logorak wone

¹ Aap kit mendek ambi nen ore imbirak wone wakwi iinok, it Ala apuri alik leenak nen alom kwaaruwak nduk, wogoren inowagam naga'lek logonet, nok-nok it Ala wone wagangga'lek mendek kagak, kinagabiti mbaka'lek inowagam piya nogo ogotik?

² Nit Ala apuri alik leenak nogo nen it aakumi nggween paga mendek peebi inowak looninaburak nogo kit kobak ogotik? Ndi, peebi inowak looninaburak nit aret unde eeppinaneegerak kagak, yogondak yime logonet, wone mbuuluk age kenok, kooniyak meek me nduk, wonogo ogotik?

³ Nit nen it malayi-kat inawone amburu mbanogo inowak looniyak nogo, kit kobak logonet, yogo ogotik? Togop kenok, nit Ala apuri nen nggween paga yime yi wone ndi wone koonggo logorak meek mbakop? Lek o.

⁴ Wone ambi age kenok, nit op aret koonggo logorak kagak kit nonggop nduk it Ala apuri kinom kuwak eekulik mendek nen koonggo logowak nduk, yorogo monggotak?

⁵ Kit kinenggali arubagip nduk, yokkiragi o, noreewi. Aap iniki warak ambi nen oreewi maluk eekwi iinok, inawone amburu mbanogo yoroorak kinenggela'me wonage lek kenok, eeko ogotik ya?

⁶ Wonage kagak kwe, it Ala wone wagangga'lek nogo mendek nen koonuwak nduk, kinoreewi wogoren piya nogo monggotak me, iya lombok kiigi o.

⁷ It aap abet mbaka'lek mendek nen inawone amburu mbanuwak nduk, kit kinoreewi aret kwe, wogoren piya nogo monggotak ti paga kit Ala apuri mendek kinayuk lek eekkologwe kiigi o. Kit maluk eerogo pinagagwi, kinamendek ineengginabut waganggwi, eekwi iigak, kinendage op logorak nduk, onggo yoraga'lek puk logorak meek mbakop?

⁸ Puk logorak op aret kwe, at ambi amendek at ambi kolagak eekwi paga kit kinoreewi kinom aret maluk eekkologo ogotik o.

^9-10 Ndi, it maluk eeko menggaarak kenok, Ala abu'me piige menggim piyaagin lek nogo, kit kineenggo'lek a? It aap kumi paga mban iniki lunik logonet, eeginabit nega inom, kugiwak amili kungga inom, mbabi eeka inom, aap-aap wut-wut yaga inom, yogoot iyagalo inom, uugwe-uugwe mbaka inom, amburu nonggo nagaatik, kumili negen agan nega inom, aakumi inabok mbangga inom, inageerok nggwok aruwak nduk, aakumi inambokan lagangga inom, aakumi ti mendek ti, Ala abu'me piige menggim piyaagin mondok lek me, aakumi nen kinambokan laganggo logonet, alik yokkirogwe iinok, inoone koneniyak mondok mage o.

¹¹ Kit maan nen aap togop aret wonogogutak kwe, ninowe Yetut Keritut eereegerak paga ninogoba Ala Aberiniki nogo nen kinomaluk koorogo pinagage, Ala ake leenogo pinagage, ndi, “Aap yi, oba lek o,” yinuk, kiniki obeelom agago pinagage, eereegerak o.

Nineebe paga obeelom mban eeko logorak wone

¹² Yi mendek ndi mendek eeriyak mage lek abok ugun eeriyak op mban aret kwe, eerit nogo logonet perak, abok obeelom eekkoloorak nduk eekwi lek o. Ando nit maluk ee'ninaburak kagak we aanom warogo aret eerit nogo monggoorak. Ndi, yi mendek ndi mendek ugun eeriyak op kwe, ti mban eeriyak ee'ninake kenok, eerit nogwe paga, ti ayeloman eerogo pinanege menggerak me, an togop eerogo paniyak mondok neebi o.

¹³ Ninambi ti, ninaanogum ake, ndi, ninaanogum ti, ninambi ake aret kwe, peebi at Ala nen, ti imbirak lek eerogo pigin o. Nineebe nogo ti, kumi ugun eeginabit nugu logorak nduk ake ti lek o. Nineebe ti, ninowe ake aret, ndi, ninowe ti, nineebe ake aret wonage o.

¹⁴ Ala nen ninowe eenik agago mippereegerak me, nit kunduk, at omaawi paga nineenik agago mippinanigin o.

¹⁵ Kit kineebe ti, Keritut eenggi-iyok kwak li'luk agago kumbinagareegerak nogo kineenggo'lek a? Kit kineebe Keritut eenggi-iyok kwak at eebe paga kunik wonage nogo, werenogo kwe ya wukak oba nabenogo patiyak op mbakop? Abu mage o.

¹⁶ At Ala nen ari logonet, “It imbirak ineebe mbere kwe, ambit aret logogun o,” yinuk, yereegerak liiru mbanak wonage me, ti kenok, aap ambi kwe ya wukak imbirak lambungge kenok, imbirak ineebe ambit aret arugun o.

¹⁷ Aap ambit-ambi ninowe imbirak kunik wonage kenok perak, imbirak iniki ambit aago wonogwe o.

¹⁸ Ti kenok, kumi ugun eeginaburak eekkinake kenok, “Eeriyak nineebi o,” yinuk, mbo pogo logonip o. Yi maluk ndi maluk ando kiniki abe'nage kenok, kinagabolo paga nen ugun eeko monggotak kwe, kumi eeginabit nugu logonet, maluk eekwi ti perak, kinikime nen mondok aberogo punuk, eekwi me, kineebe mondok maluk eekkologo monggotak aret o.

^19-20 Kit kineebe ti, Aberiniki awi wurik wonage nogo kineenggo'lek a? At Ala nen onggo nggwok paga kinonggo mbangge nagagerik, Aberiniki wokkiragagerak kinikime wonage me, kit kineebe ti, kit unde lek o. At Ala aret unde me, at endage tiyak yuwak nduk, kineebe paga obeelom mban eeko logonip o.