1 Korindut 5 - Ala Wone Peenok Peebi Mbanak

Ala apuri nen maluk eereegwaarak wone

¹ Noreewi o. Kit kinenggela'me time kumi ugun eeginabit nogwe konenggirak me, ambi yokkira o. Aap ambi nen at ogoba akwe kagak, “Ndinggerak,” konengge nagarik, yokkiragi. Wologo wae. It aakumi Ala wone konenggulik mendek nen kit eekotak ti, it ndak-ndak abu eekulik kagak, eekotak o.

² Kit Ala apuri nen aap nogo maluk eekerak paga kiniki wakkologo logonet, kinenggela'me nen nggiginogo wumbuurak op aret kagak, “Yi iya eekerak lek o,” yinuk, taganogo punuk, wogoppatit nugwi kiigi o.

³ An nogo, an neebe kinom lek o nda yime neegak kwe, niniki kinom aret wonage me, neebe ninom kinenggela'me wonage negen logonet, aap eekerak ti, muk owak loonogo pigirak me,

⁴ wumbubagip nduk, ninowe Yetut endage paga yokkiragi o. Ne ambi paga kit Ala apuri kuwak eekwi me, neebe kinom wonage lek kwe, niniki kinom aret kuwak eekwi me, aap ti yogo logonet,

⁵ “Ninowe Yetut woroorak eyom paga kiniki agap ndaruwak nen, yogondak keebe maluk eeppagage logowak nduk, ninowe Yetut awone kili'niragagerak nogo paga keebe apit aret Ibilit eenggi paga pagago o,” yinuk, yogo logomonggotik, mondok endekem wumbunu o.

⁶ Kit wogoppakwi ti, maluk aret o. Roti piike menggerak mendek mbuuluk roti enggela'me pugwi iinok, roti eebe abok aret piike menggerak nogo kineenggo'lek ya?

⁷ Kit time apit eeka'lek neenu aret kwe, roti piiruwak nduk enggela'me pega'lek kwak logobagip nduk, roti piike menggerak mendek kinengge-la'me wonage ti, mbo pinip o. Laago Obaga Nagagerak ndomba ninake wariyak Keritut nogo ti, muk wareegwaarak me, nit laago noorak abu pipuk eerak wonage o.

⁸ Pipuk eerak wonage me, laago nonggo logonet, roti piike menggerak mendek enggela'me punuk, larak nogo pogom, maan mendek nit abu maluk lombok ninggin-nanggin eeko nogogurak nogo kwak eeko logonet, nonggo logorak mage o. Ata, roti piike menggerak mendek pega'lek larak pogom niniki abu obeelom kikak naka'lek, Ala inikilom mbaruwak nduk eeko logonet, nonggo logowok o.

⁹ An aa'nduk liiru mbanggirage logonet, “It aap iniki kumi paga mban lunik logonet, eeginabit nugwi nogo kinom lambunik logogup o,” yinuk, mbanggiragagirak nogo ti,

¹⁰ it Ala wone konenggulik mendek nen iniki kumi paga mban lunik logonet, eeginabit nugu menggaarak mendek inom, uugwe-uugwe mbako menggaarak mendek inom, inageerok nggwok aruwak nduk, aakumi inambokan laganggo menggaarak mendek inom, kugiwak amili kunggo menggaarak mendek inom, kinom lambunik logorak lek nduk, liiru mbanggiroolik o. Aap ti mendek kinom lambunik logorak lek nduk, liiru mbanggiranetak en, o nggween paga yime aakumi ti mendek mban wonogwe me, kit nggeeme logonetak mbakop?

¹¹ An liiru mbanggiragagirak nogo ti, it nen, “Nit abok Ala apuri aret,” mba'nuk, “Ninoreewi o,” yokkirogo logonet kwe, kumi paga mban iniki lunik logonet, eeginabit nugwi, uugwe-uugwe mbakwi, kugiwak amili kunggwi, aakumi inabok mbanggwi, amburu nonggo nagaatik, kumili negen agan nugwi, yogoot waganggwi, eekwi iinok ti, “Kinom lambunik logorak lek o. Ndi, mbi makkirogwe iinok kunduk, noorak abu lek o,” yinuk, mbanggiragagirak.

^12-13 It endekem mendek inowak looninaburak nogo ti, an nobaalombok lek o. Ala nen mban inawone amburu mbanogo inowak loongge kaagun. Togop kwe, “Aap ambi maluk eeke nogo, kinenggela'me nen waganogo wumbinip o,” yinuk, liiru mbanak ndak-ndak, it Ala apuri kinom kuwak eeko monggotak mendek ambi nen maluk eeke kenok, kit nen at owak looniyak lek mbakop? Owak looniyak aret o.