1 Korindut 4 - Ala Wone Peenok Peebi Mbanak

Keritut ayonggo nen eeko logorak wone

¹ Togop me, “It Ala wone kote kumaarak mendek unde eeppiyareegerak me, it at Keritut ayeloman mini aret iigo,” ninombako logonip o.

² Inogobamini nen inayeloman mini eeriyak unde eeppiinok, eerit nogwe iigak, “An yoragarak liippunuk, eekwi iyaamun ilik lek a?” yinuk, inigen wogonako menggaarak o.

³ Togop me, kit ilik, it aakumi inawone amburu mbanogo yorogo menggaarak mendek a, an eeke liippaninuk, yo'nugwi iinok, “Ti abet yaga,” mbarigin lek o. Ndi, an eeke kunduk, nawone amburu mbanogo nowak loonggolage lek mban o.

⁴ An eerit mban nage logonet, maluk eekirak ambi niniki aberak wonage lek kwe, ambi wonage kagak, “Obeelom mban eeke minggirak,” yukwak, noone yaga'lek puk wonage me, at nowe nen mban liippaninuk, yo'nirigin o.

⁵ Ti kenok, it aakumi inowak looniyak koonogo pereegerak eyom awo panggoni waga'lek kagak, kit nen aakumi maluk ugun-ugun inoba lenggenogo piigo logorak mage o. Ata, ninowe wage logomenggerik, nit aakumi ninikime kote koonggwi kumaarak wonage nogo kin paga pege, ndi, ninikime, “Alom ngge eeriyak,” mba'nuk, koonggwi nogo nggwok paga paganogo yo'nirage, eeke kenok, Ala nen ninalitik-ninalitak eeko logomonggoorak nogo ndak-ndak ale'nggen ninoba pinanigin me, waga'lek kagak aakumi ugun-ugun maluk inoba lenggenogo piigo logogup o.

⁶ Togop me noreewi o. “Wone liiru mbanak kagak, alik eekwi mage o,” yogwe nogo, Apolot nimbirak eeko monggoorak kit mamunggolaabagip nduk, an wone yokkiragi ti, nit nineebe paga wakkagak yokkiragi o. Mamunggologwe kiinok, kit nen, “At ambi iya, at ambi meek,” yogo logonet, wogoppako logomunggup lek o.

⁷ Nit aakumi tiyak-tebek logowok nduk, ta nen koonogo pinanege menggerak mbakop? At nen wokkiraga'lek kit nen mban kologogutak ambi ngge porogo ogotik? Ndi, at nen mban wokkiragagerak kagak, nonggop nduk, kinalik nen kologogutak negen eekko'nok iya-piya eekkologo ogotik?

⁸ Nit awo eeppinanega'lek kagak kit nduk obeelom aret eeppinagage, kit nduk kineenggi warak agago pinagage, kit aa'nduk kinendage nggwok agago tiyappinagage, eereegerak kenok op aret o. Kit abet aret kinendage nggwok logonetak en, nit ninom ndak-ndak ninendage tiyanak logonetak kwe, lek me, “Ao,” mbako ogoorik o.

⁹ It Ala yonggo mbogut paga nugu menggaarak inom, aakumi nggween paga mendek inom, abok aret inigen iigak, eeppinanugwi me, aakumi abok inenggaanom paga aap kambuwak nduk, inooko logonet, inendage tebenak lombok kenok irip paga lombok mbigimbiinok, inooko mengga kwak, at Ala nen nit nappiigak nogo, mondok irip paga lombok mippinaneegerak kagi o, obak!

¹⁰ Kit ti, Keritut kinom kunik me, kiniki warak wonogwe kiigak kwe, nit perak, Keritut wone yoranet nugwi paga wi negen aret ninombako agaarik o. Kit kinomaawi ambik kwe, nit perak, ninomaawi lek lebenak aret o. Kit tiyanak aret wonogwe kwe, nit perak, meek ninombako agaarik o.

¹¹ O maan nen yogondak kuli nit nggween paga yayi wonogo logonet, ninagi-ninambi abu ee'ninake, ninayum nibi-nibi aago kagak nugwi, yawi ninookwi, ninawi wurik lek me ugun ambime nogo yegak eerit nugwi, eerit nugu ogoorik o.

¹² Ti eerit nogo logonet, nineenggi paga nen mban nggik-palek eekko'net nugu monggoorak. Mbe'nirogwe iigak ninale'nggen inoba piigwi, piyak-payak eerogo pinanugwi iigak niniki yanggo yinuk, puk wonogwe,

¹³ miyuk-meya eerogo pinanugwi iigak, nit nen wone onggo obeelom mban yorogwe, eekwi niigak, aakumi nggween paga mendek inambeebuk laaguret munogo mbo nagako mengga kwak, o maan nen yogondak kuli paga togop aret eeppinanugo agaarik o.

¹⁴ An wone liiru mbanggiragi yi ti, kinenggali wappinagakit nduk, mbanggiragi lek o. Ata, kit an napuri niniki kunik me, we kinaruk wake agarik o.

¹⁵ Kinarum logonet, Keritut eeke nagagerak wone mamunggirogo logorak nogo, ineebe apit sepuluh ribu negen logorak op aret kwe, abok kinogobamini lek o. Keritut Yetut nen nappaneegerak kinenggela'me logonet, obeelom wone iyaalok yokkirage nagagirak nalik aret me, kinogoba an nalik aret o.

¹⁶ Togop me, an eeke minggirak kit ndak-ndak eeko logobagip nduk, yokkiragi o.

¹⁷ An eeke minggirak kit ndak-ndak eeko logobagip nduk, an naput niniki kunik mondok liippunuk, ninogoba wone mugurok nage menggerak Timotiyut nogo aret, kinowagam nappi wagarak kinenggela'me logonet, an Keritut Yetut nimbirak kunik logonet eeke, ndi, Ala apuri yi awi ndi awi kuwak eerit nogo menggaarak nogo yoranet nage, eeke minggirak wone nogo at nen yokkirage logogin o.

¹⁸ Kit ando nen, “At niya woraagin lek o,” yinuk, wogoppakwi kwe,

¹⁹ ninowe nen, “An kiya woroorak op,” nombake kenok, an mbet-mbet kiya woraakit mbake agarik o. Kiya wage logominggirik, it aakumi nen, “An ndogop eekirak o,” yinuk, wogoppakwi nogo, “It abet aret eeko logonet yogwe ilik, we inoone paga mban agan nugwi a?” yinuk, liippiya woraagin o.

²⁰ Ala abu'me piige menggerak nogo ti, aakumi inoone ugun agan nugwi nogo liippunuk, abu'me piigeelik o. Ata, at omaawi inikime eeppiige kagak, obeelom eerit nugwi iinok perak, abu'me piige menggerak.

²¹ Togop me, an kiya wage logonet, yawi wonok kiya woraagin ilik, niniki yanggonak kinabuwa mbake logonet, kiya woraagin a? Kit kiniki mban koonggo logonip o.