1 Korindut 2 - Ala Wone Peenok Peebi Mbanak

Keritut eyo karo-karo paga wareegwaarak wone

¹ Noreewi o. Maan aa'nduk Ala wone kote kumaarak wonagagerak nogo yokkiraakit nduk kinowagam wage nagagirik, kit kiniki ale'nggen mbarubagip nduk, “An abok neenu,” mbake logonet, noone amburu paga yokkiroolik o.

² An kinenggela'me logonet, yi wone ndi wone ugun yokkiroorak mbarulik. Ata, Yetut Keritut eeke nagagerak wone yokkirage logonet, at eyo karo-karo paga wareegwaarak wone nogo mban aberak logonet, yokkirage logokit mbareegirak.

³ An neebe lebenak aret me, nagabiti nen naganak wake kagak ninom wonagagirak.

^4-5 Kit kiniki abet mbakwi nogo, aakumi iniki koombunuk, agan nugwi paga panggombunuk logorak lek o. Ata, Ala omaawi paga eekkinabit nage nogo paga mban panggombunuk logobagip nduk, an kinenggela'me ninom wone mbangge, Ala wone yokkirage, eeke logonet, “Wone abok neenu negen,” mba'nuk, noone amburu ndik-ndik paga yokkirage logolik. Ata, kit abet mbarubagip nduk, Aberiniki omaawi paga eekkinake kagak, yokkirage nagagirak nogo o.

Ala abok eenu logonet, koongge menggerak wone

⁶ It aap iniki kole kenok perak, wone nit nineenu nogo yorogo monggoorak aret kwe, wone nit nineenu logonet, yorogwe nogo ti, nggween paga wone nogo mendek lek o. Ndi, it aap inayuk warak nggween paga yime menggaarak yogondak lek arit nogwe nogo, wone ineenu logonet, yorogwe nogo mendek lek mban.

⁷ Ata, nineenu logonet, yogo monggoorak nogo ti, wone o maan mbogut nggween wakkaga'lek logonet, Ala nen, “Nit tiyappinanikit,” mba'nuk inikime kote koonogo pereegerak nogo mban aret agan nogo monggoorak.

⁸ At Ala iniki liippunuk, kooneegerak nogo ti, it aap nggween paga yime inayuk warak wonogwe nogo nen liippulik o. It nen liippenetak nen at ninowe mondok tiyanak menggerak eyo karo-karo paga wareegwaarak nogo wa'netak lek o.

⁹ At ambi nen ari logonet, “Inigen abe nen kogwe, oone ari inaruk konenggwi, Inikime nen, Yogop eeriyak, abe lombok koonggwi, eekulik nogo mendek aret o. At Ala nen it aap at inom iniki kunik mbako menggaarak nogo, inake pipuk-papuk agago piyareegerak wonage agaarik o,” yinuk, yereegerak liiru mbanak nogo ndak-ndak

¹⁰ at Ala nen wone kote kumaarak wonagagerak nogo, it aakumi ugun wonogwe nogo ineenu eeppiyoolik o. Ata, nit mban kin kaawok nduk, at Aberiniki yoge kagak, nit yo'niragagerak. At Aberiniki nogo nen yi wone ndi wone alom abok aret liippege menggerak me, liippege logonet, Ala nen agote inikime lombok koongge menggerak wone nogo, inom aret maloppunuk, yo'nirage menggerak.

¹¹ Aap ambi iniki mbake nogo, it ando ineenggo'lek iigak, at alik eenu menggerak ti ndak-ndak, Ala mbake nogo Ala Aberiniki alik mban eenu menggerak.

¹² Ala nen onggo lek nit we wo'niragagerak nogo nineenu aruwok nduk, aakumi nggween paga mendek iniki mbakwi nogo mendek koloolik o. Ata, Ala nen Aberiniki nappinani wagagerak nogo aret kologogurak o.

¹³ Ti kenok, Ala nen wo'niragagerak yokkirogwe nogo ti, it aakumi nggween paga mendek iniki nen, “An neenu nogo yokkira o,” yinuk, yorogo mengga kwak, yokkirogwe lek o. Ata, it aakumi Aberiniki inikime wonage kenok mban, Aberiniki ninikime logonet, mamunnirage kagak, wone alom nogo liirogon mbininogo yorogo monggoorak.

¹⁴ Ala Aberiniki nen koonogo yo'nirage nogo ti, Aberiniki ninikime wonage kenok mban yelok kogo monggoorak me, it aakumi nggween paga mendek nogo, Aberiniki inikime wonage lek me, wone ti, konembunuk, ugun kobak logonet, “Yi wi wone negen aret kogo,” yinuk, mbo pogo menggaarak kwe,

¹⁵ Aberiniki ninikime wonage kenok perak, yi mendek ndi mendek eeriyak alom liippunuk, eekwi me, eerit nogwe niigak, aakumi nen, “Maluk eerit nogwe kiigo,” yinuk, yo'niraagun lek aret o.

¹⁶ “Ala iniki mbake menggerak nogo, ta nen eenu me, at mamuniriyak op mbakop? Mondok lek aret o,” yinuk, yereegerak liiru mbanak aret wonage kwe, Keritut iniki mbake nogo unde monggoorak nit aret o.