1 Korindut 12 - Ala Wone Peenok Peebi Mbanak

Ninalitak lombok unde eeppinanege menggerak wone

¹ Noreewi o. Aberiniki nen ninalitak lombok unde eeppinanege menggerak nogo, kit kineenggo'lek wonogwe kiyo, yokkira o.

² Kit aa'nduk, Ala wone konengga'lek wonogo logonet, kugiwak nebet-ndalok ariilik mendek kagak, “Ndogop yo'nirage kogo,” yinuk, mugurok nogo nogogutak nogo, kineenu aret o.

³ Ala Aberiniki kinikime wonage logonet, “Kat Yetut yi, kugi pulunogo pagagi o,” yinuk, yoriyak op mbakop? Ndi, Aberiniki kinikime lek logonet, “Kat Yetut nowe aret o,” yinuk, yoriyak op mbakop? Togop yoriyak mondok meek me, kineenu logobagip nduk, yokkiragi.

⁴ Aberiniki nen ninalitak lombok unde eeppinanege menggerak nogo ti, ambik wonage kwe, at eebe perak, ambit nen aret tumbu'nirage menggerak.

⁵ Ndi, nit Ala eyabu eeko monggoorak ti, alitak lombok wonage kwe, ninowe eebe ambit aret ake eeko monggoorak.

⁶ Ndi, eerit nogo monggoorak nogo ti, ninalitak lombok eerit nogo monggoorak kwe, Ala eebe ambit nen mban eeppinanit nage kagak eerit nogo monggoorak.

⁷ Aberiniki nen nit-nit mban obeelom eekko'net nogo logowok nduk, ninalitak lombok unde eeppinangge menggerak me, eerit nogo logonet, unde eeppinangge nogo, yelok aret kogo logogun o.

⁸ Aberiniki ambit nogo nen aap ambi iniki warak logonet, wone koonogo yorage logowak nduk, unde eeppege, ambi, yi wone ndi wone alom neenu a'nuk, liirogon yorage logowak nduk, unde eeppege,

⁹ ambi, abet mba'nuk eeke logowak nduk, unde eeppege, ambi, aakumi andi iinok, obeelom eeginake logowak nduk, unde eeppege,

¹⁰ ambi, eerubok mendek eerit nage logowak nduk, unde eeppege, ambi, Ala wone yorage logowak nduk, unde eeppege, ambi, aakumi nen wone agan nugwi nogo abok aret, “Yi abet agan nugwi ilik, pilit agan nugwi a?” yinuk, yelok kage logowak nduk, unde eeppege, ambi, aakumi inoone nineenggo'lek kwe, lalin negen taati aret woppunuk, it inoone paga lombok yorage logowak nduk, unde eeppege, ndi, ambi, at ambi ari kagak, “Togop yigi o,” yinuk, abut laganogo yorage logowak nduk, unde eeppege, eeke menggerak o.

¹¹ Ti eeppinanege menggerak abok aret at Aberiniki eebe alik ambit nen at iniki mbaketak ndak-ndak aret ninalitak lombok unde eeppinanege menggerak.

Nineenggi-niniyok ambik kwe, nineebe ti, ambit aret wone

¹² Nineenggi-niniyok yeregerak-peregerak ti, ambik aret wonage kwe, nineebe ambit aret wonage ti kokwak, Keritut eebe ambit aret kwe, at eenggi-iyok negen nit apit aret ogoorik o.

¹³ Togop me, nit Yakuri mendek inom, kit endekem mendek inom, kit aakumi inayeloman inom, inayeloman lek we wondet aago wonogwe inom, Aberiniki nogo paga nen nit abok aret nineebe ambit kumbinaneegerak me, niyo eneeri ambit nonggo monggo kwak, at Aberiniki eebe ambiret aret nit abok ninikime mambinaneegerak.

¹⁴ Togop me, nineebe alik mban wonage lek o. Nineenggi-niniyok yeregerak-peregerak abok aret nineebe ambit paga mban kunik wonage o.

¹⁵ Ti kenok, wone ogut wakkagak ambi yokkira o. Aap ambi iyok nen ari logonet, “An ti, at eenggi mendek lek me, at eebe paga kunik lek aret agarik o,” ari kenok, at eebe paga kunik lek abet aret mbakop?

¹⁶ Ndi, aruk nen ari logonet, “An nogo, at enegen mendek lek me, at eebe paga kunik lek aret agarik o,” ari kenok, at eebe paga kunik lek abet aret mbakop?

¹⁷ Nineebe abok tigitogon ti, ninigen mban ogobakkigi'netak en nonggop togon ninaruk konenggo logonetak mbakop? Ndi, nineebe abok tigitogon ti, ninaruk mban ogobakkigi'netak en, nonggop togon yi mendek ndi mendek obari kogo logonetak mbakop? Togop logorak meek o.

¹⁸ At Ala nen iniki koombege nagagerik, nineenggi-niniyok yeregerak-peregerak alitik-alitak ninanobak me nen ndegen-ndegen aret kumbinanit ogu niniyok me wambi nagagerak.

¹⁹ Nit nineenggi-niniyok yeregerak-peregerak mban logonetak en, nano paga kunik logonetak mbakop?

²⁰ Lek o. Nineenggi-niniyok yeregerak-peregerak ti, ambik aret kwe, nineebe ambit ti paga aret kunik menggerak o.

²¹ Ti kenok, ninigen nogo nen nineenggi yoge logonet, “Kat nen ambi ee'naburak lek me, neebi o,” yoge, ndi, ninanobak nen niniyok yoge logonet, “Kat nen ambi ee'naburak lek me, neebi o,” yinuk, yoge, eeriyak op mbakop? Togop yuurak lek o, noreewi.

²² Nit nineebe iya, ndi, nineenggi-niniyok yeregerak-peregerak nogo ti, meek mbakwi kwe, lek kenok, nineebe alik nen eeke logorak meek me, ti abu iya lombok aret o.

^23-25 Nit nineenggi-niniyok yeregerak-peregerak ando etenggen abe amuni mbanak kenok, liippugwi lek kwe, ando etenggen maluk kenok, ogobakkigirogo pugwi, ando ninenggali arukwak nduk, nobakkologwe, eeko monggoorak. Nineenggi-niniyok ambi nen ambi abuwa eekak, ambi nen ambi abuwa eekak, eeko logowok nduk, at Ala nen nineebe ogobakkigirogo pinanege logonet, nineenggi-niniyok ogoorik-ogoorak logokwak, etenggen maluk kenok, ogobakkigikkologo logowok nduk, koonogo pinaneegerak.

²⁶ Togop aret kooneegerak me, kineenggi ambiriluk mbanggirage kenok, kineebe abok aret andi eek-kinake, ndi, kinetenggen abe me, aakumi nen, “Wi,” kirogwe iinok, kineebe abok aret ale'nggen mbake, eeke menggerak.

²⁷ Ti ndak-ndak, kit kineebe lambuk togon ti, Keritut eebe aret. Ndi, kit kinalitak lombok ti, Keritut eenggi-iyok aret ogotik o.

²⁸ Ndi, Ala nen at apuri kuwak eeko menggaarak inenggela'me nen aa'nduk nappiigak mendek leenogo piige, ti'nuk, it inabu'me Ala wone yorogo menggaarak mendek mippiige, ndi, it inabu'me Ala wone mamunirogo menggaarak mendek mippiige, ndi, it inabu'me eerubok mendek eekwi, aakumi andi obeelom eeginakwi, yeenggwaarogwe, wone koonogo piigwi, inoone lombok lalin yogwe, inalitak lombok eerit nogo logowak nduk, unde agago piinok mippiyareegerak me,

²⁹ it abok aret nappiigak mendek logowak nduk, mippiyareegerak mbakop? It abok aret Ala wone yorogo logowak nduk, mippiyareegerak mbakop? It abok mamunggak logowak nduk leenogo piyareegerak mbakop? Ndi, it abok eerubok mendek eeko logowak nduk, kooneegerak mbakop?

³⁰ It abok andi kenok obeelom eeginako logowak nduk, yoragagerak mbakop? It abok inoone lalin yogo logowak nduk, mippiyareegerak mbakop? Ndi, it abok aret inoone yogwe nogo, “Togop yigi o,” yinuk, yorogo logowak nduk, wogoragagerak mbakop?

³¹ Lek o, noreewi. Ala nen ninalitak lombok unde eeppinaneegerak me, yokkiragi o. “Ala nen aa'nduk iya lombok unde eeppiyareegerak nogo mendek unde eeppinagawak nduk, at yogo logonip o,” yinuk, yokkirage kwe, wone ambi mondok iya lombok eeko logorak nogo yokkira o.