1 Korindut 11 - Ala Wone Peenok Peebi Mbanak

¹ At Keritut eeke menggerak an liippunuk, eeke minggirak pogom, kit nen an eeke nogo liippaninuk eeko logonip o.

Kumi inayum inomba langgunik logonet, tamban eeko logorak wone

² Kit nen kulinik-kalinik noba aberak logonet, yi wone ndi wone yokkirage nagagirak nogo, liippunuk eerit nogwe me, “Kit iya lombok,” kinombake agarik o.

³ At Ala abu'me ti, Keritut. Ndi, Keritut abu'me ti, aap. Ndi, aap inabu'me ti, kumi, togop aret monggoorak me, wone ti, liippubagip nduk, yokkiragi.

⁴ Togop me, nit Ala apuri kuwak eeppunuk, ninabetagi yirik kagak tamban eekwi, Ala wone yorogwe, eekwi niinok, nit ninirimbaga wonage Keritut nogo aret enggali eerogo pogo monggoorak me, nggoorogo punuk, eeko logowok o.

⁵ Ndi, it kumi nogo nen inayum inomba nggoorak logonet, tamban eekwi, Ala wone yorogwe, eekwi iinok ti, we inagap mbelanak negen logonet eekwi me, it inirimbaga wonogwe inogonggelomini nogo inenggali eeppiigo menggerak me, inayum inomba langgunik logonet, eeko logowak o.

⁶ It kumi inayum inomba langguniyak ineebi mbakwi kenok, it ineeruwak mbanogo pogo logowak o. Ndi, it ineeruwak mbanggwi, inanobak puluk ko eerogo pugwi, eeremenggerak paga inenggali mbakwi kenok, inayum inomba langgunik logonet, tamban eeko logowak o.

^7-9 Ala nen aap ti, kumi inake wakkoolik o. Kumi ti, aap inake wakkagagerak me, aap inalom ti, kumi lek o. It kumi inalom ti, aap aret me, inayum langgunik logonet, inogonggelomini inabu'me tebe yinuk, inayuk wuko logowak o. Ndi, aap perak, Ala nen, “An tiyappanugo logowak o,” yinuk, at etenggen pogom aret wakkagagerak me, aap ti, Ala abu'me tebe yinuk, inabetagi nggoorogo punuk, tamban eeko logowak o.

¹⁰ Togop me, malayikat nogo nen it kumi liippiigwi me, aap inayuk wuko menggaarak iyaawak nduk, inayum inomba langgunik aret logowak o.

^11-12 Yi mendek ndi mendek wo'nirage menggerak alom ti, Ala aret o. Ndi, it kumi inalom ti, aap aret kwe, it aap perak, kumi nen aret ndaganako menggaarak me, it kumi lek nen it aap wigannariyak lek o. Ndi, it aap lek nen it kumi kunduk wigannariyak lek mban me, ninowe ninom kunik me, kumi aap ndak-ndak aret wonogo monggoorak o.

¹³ Togop me, tamban nggwok paga eeko logonet, it kumi inayum nggoorogo punuk, tamban eeriyak op mbakop? Kit nen mban kiniki kooninip.

^14-15 Ndi, it kumi nogo inanobak naberak logowak nduk, ineeruwak wogoragagerak me, ineeruwak nggorek kenok, “Nineeruwak nggorek ti, op aret kogo,” yinuk, inale'nggen mbako menggaarak nogo lek a? Ndi, nit aap nen, “Nineeruwak nggorek kenok, ninobam lek o,” yinuk, mbaniyak ee'ninake menggerak nogo lek a?

¹⁶ Ti eekwi nogo paga it aap ando kinenggela'me nen, “Yogop eeriyak lek o,” yinuk, inoone nabenak mban yogwe iinok, “Nit yime inom, it Ala apuri ando yi awi ndi awi kuwak eerit nogo menggaarak inom, alik eekulik ti mban aret eeko monggoorak o,” yinuk, yoraanip o.

Mbi iloolinggen amburu nonggo logorak wone

¹⁷ Noreewi o. Kit kuwak eeri wogo nogootik, “Obeelom eekwi lek, maluk eekwi o,” yinuk, yogwe konenggirak me, an wone yi yokkiraakit mbakirak nogo ti, wogoppinagage logonet, yokkiraagin lek o. Mbekkirage negen logonet aret yokkiraagin o.

¹⁸ Wone aa'nduk koonogo yokkiraakit mbakirak nogo yi o. Kit Ala apuri kuwak eeko monggotak nogo, kuwak eeri wogo logonet, kit-kit aret ogoorik-ogoorak eekkologwe nogo naruk konengge nagarik, “Yi abet aret yogwe ilik?” mbakirak o.

¹⁹ Kit wone-wone yogo logonetak lek en, taani nen wone liippunuk agan nugwi nogo, alom kin a'netak lek kwe, wone-wone yogo monggotak nogo paga alom kenom aga o.

^20-21 Kit kuwak eeppunuk, kinambi kinalitak lombok nonggo logonet, it ando nengga'lek abu wonogwe iigak, kit ando mban tiyaaket nunggwi, ndi, amburu nenok, kumili-kumili agan nugwi, eekwi konenggirak me, ninowe ambi inom, amburu inom, abe noorak nduk, kuwak eekwi lek ugun-ugun eeriyak nduk kuwak eekwi kiigi o.

²² Wologwe! Kinagi-kinambi nonggo logorak kinawi wurik lek kenok, Ala awi wurik me ugun-ugun eeri unggwogo ogotik? Ndi, Ala apuri kuwak eeko menggaarak meek eerogo piigo logonet, it inamendek lek nogo inenggali kaawak nduk, eeginakwi lek mba'nuk yogo ogotik? Kit togop aret eekwi me, an nonggop yokkira? “Kit op aret eekwi o,” yinuk, yokkiroorak mbakop? Mondok lek o.

²³ At ninowe nen eeko logorak yo'nereegerak wagangge nagagirik, yokkiragagirak nogo eebe yi aret. At ninowe Yetut waruwok nduk awo pigagangga'lek iigak, ne ti eyom oonikiya paga roti mbi eenggime wagangge nagagerik,

²⁴ “Ala wa,” yinuk, karerogo wogorage logonet, “Yi an neebe negen aret me, kit kinake aret o. An noba abeko logonet, nonggo logonip o,” yinuk, yorage mbareegi, nunggugwaarak.

²⁵ Nonggo nogogwaarik, ti'nuk, mbi weelek larak ando nenok, amburu toolak togop aret eenggime wagangge nagagerik, “Ala nen kinom lambumbinagarak wone ngget mendek koonogo pereegerak nawoneninu kilikkirage nogo, kit abet mbarubagip nduk, namiya kinake wundigin amburu toolak yi kwak aret me, kiniki noba abeko logonet, nonggo logonip o,” yinuk, wogorage mbareegi, nunggugwaarak.

²⁶ Nit Yetut woroorak tokkogo logonet, roti inom, amburu toolak inom, ne ambi nenggak, ne ambi nenggak eeko logonet, “Ninowe Yetut ninake abet aret kambeegerak kagi,” yinuk, nggwok paga paganggo monggoorak.

²⁷ Togop me, kit ninowe ambi larak inom, amburu toolak inom, we wuppagagi-perambagagi nunggwi kiinok, ninowe eebe inom, amiya inom, maluk eerogo pogo logonet, aret nonggo monggotak kiigo o.

²⁸ Kit aa'nduk kiniki liippatinuk, mbi inom, amburu inom, nonggo logorak ti op o.

²⁹ “Yi ninowe eebe negen aret o,” yinuk, liippega'lek logonet, kit mbi inom, amburu inom, nunggwi kiinok perak, “Ala anini ninoba pinanuwak,” mba'nuk, nonggo monggotak kiigi o.

³⁰ Kit ti eekwi paga kinenggela'me time kineebe ambik andi eekkinake, ndeyak eerogo pinagage, ndi, ando kambit nogwe, eeko ogotik o.

³¹ Nit aa'nduk, niniki liippatinuk maluk paganggwi niinok, peebi Ala nen nit eekwi liippinaninuk, maluk onggo ninoba pinanigin lek o.

³² Peebi it aakumi nggween paga mendek abok aret inowak loonogo maluk onggo inoba piige logonet, nit ninom ninoba pinanege kero, yogondak at ninowe nen nit eekwi liippinaninuk, niniki koonogo pinanege menggerak.

³³ Togop me, noreewi o. Mbi amburu noorak nduk, kuwak eeri wogwe kiinok, ambugwi aret nabagip nduk, toginako logonip o.

³⁴ Ndi, mbi-amburu noorak nduk, kuwak eeko logonet, mbi abu nen ndonggok togon nunggwi kiinok, Ala nen maluk eerogo pinagage kero, kinambi weelek kiname nen mondok ndonggok togon nenok, wogo logonu o. Wone ando ti, an pekkiya wage logominggirik, ninom logonet, yokkiraagin o.