1 Korindut 1 - Ala Wone Peenok Peebi Mbanak

1 KORINDUT

PAWULUT NEN ALA APURI O KORINDUT MENDEK INAKE LIIRU AA'NDUK MBANEEGERAK WONE

¹ Ala iniki mbareegerak paga an Pawulut nappiigak mendek logonet, Keritut Yetut wone wonok nege logokit nduk, nayonggo paneegerak ninore Totenet nimbirak nen

² kit Ala apuri o Korindut kuwak eeko monggotak nogo, wone ambi yokkiraawi o. Kit Ala apuri logobagip nduk, kinayonggo pinaganuk, Keritut Yetut kinom kunik logobagip nduk, eerogo pinagage nagagerik, leenogo pinagareegerak inom, it yi awi ndi awi, “Ninowe Yetut Keritut aret o,” yinuk, yogo menggaarak inom, kit abok aret wone yokkirogo o. Yetut Keritut ti, nit inom, it inom, abok ninowe aret me,

³ at ninogoba Ala ninowe Yetut Keritut imbirak iniki kunik nen wokkirogwe, kiniki ugun tayenak ale'nggen aret logobagip nduk, eeppinagagwi, eeko logogun o.

“Wa,” yinuk, keyage wareegerak wone

⁴ Keritut Yetut eereegerak paga Ala iniki kunik nen obeelom mban eeppinagage me, an nen ko'lu-kii'me, Ala, “Wa,” yinuk, keyage mban wake minggirak.

^5-6 Keritut nit ninake eereegerak wone yokkirogogurak ndak-ndak, kinikime nu'lek eerogo pinagareegerak me, kit Keritut kinom kunik logonet, yi wone ndi wone yuurak inom, yi eekwi ndi eekwi kineenu ariyak inom, abok aret unde eeppinagareegerak kenok, Ala, “Wa,” yinuk, yoge minggirak.

⁷ At ninowe Yetut Keritut wage kero tokkogwe kiigak, Ala nen obeelom mban eeppinanege menggerak nogo, eeppinagage logonet, ambi yoboppega'lek mondok ndak-ndak eeppinagage kage agarik o.

⁸ At ninowe Yetut Keritut woroorak eyom paga kit maluk kinoba lenggenak lek wonogwe me kiya woraawak nduk, yogondak nen nok, peebi at woroorak kuli paga kiniki mondok nu'lek logobagip nduk, eeppinagage logogin o.

⁹ At aput ninowe Yetut Keritut kinom kunik logowok nduk, yonggo pinagareegerak Ala nogo nen mondok liirogon aret eeke menggerak me, kiniki at oba panggombunuk, mondok nu'lek logonip o.

Ala apuri iniki ogoorak me yoragagerak wone

¹⁰ Noreewi o. Kit ogoorik-ogoorak eekkologwe nogo mbo punuk, kiniki-kinoone ambit eeppunuk, mondok lambunik logonet, eerit nogo logobagip nduk, “At ambi ari konen-konen yogo logonip o,” yinuk, ninowe Yetut Keritut endage paga yokkiragi o.

¹¹ Noreewi o. “Kit kinenggela'me time wone wakwi o,” yinuk, at kwe Kelowe ogoni-aagi mendek nen yo'niri wagaarak kenok, yokkiragi o.

¹² Kit nen yogo logonet, “An nogoba Pawulut. An nogoba Apolot. An nogoba Kepat. An nogoba Keritut,” yogo logonet, kinalitak mogonggologwe konengge nagagirik, yokkiragi o.

¹³ Kit togop yogwe ti, at Keritut eebe mbere-kenagan wonage me nduk, yogo ogotik? An Pawulut kinake eyo karo-karo paga nooreegwaarak mbakop? Ndi, kit an nendage paga niyome wambeegutak mbakop? Mondok lek o.

^14-15 Kit ando nen yogo logonet, “Nit Pawulut endage paga yiime wambeegurak o,” yinuk, yogwe kiyo, an nen kit abok yiime wuppinagagulik o. Ata, it aap Keriput Nggayut imbirak nogo mban yiime wuppiyareegirak me, “Wa,” mbake minggirak.

¹⁶ Ndi, at Tepanut apurilogwe inom ti kunduk, niyome wuppiyareegirak kwe, it ando yogwe nogo perak, an kobak o.

¹⁷ At Keritut nen aakumi niyome wuppiinet nege logokit nduk, an nappani woroolik o. Ata, wone obeelom wone yoranet nege logokit nduk nappani wagagerak me, Keritut eyo karo-karo paga wareegwaarak nogo, we aanom warogo kambeegerak mbakwi iyo, it aap iniki ngget paga inoone amburu ndik-ndik yogo mengga kwak, an togop yoranet negeelik o.

“Ala omaawi inom, iniki warak inom, ti Keritut aret,” yoragagerak wone

¹⁸ It aakumi kanggo menggaarak nogo nen Yetut eyo karo-karo paga kambeegerak wone nogo konembunuk, “Yi wi inoone negen agan nugwi o,” yinuk, i'ndok kanggo menggaarak kwe, nit ninagap nda'ninake nogo nen perak, wone ti, waganggwi paga, Ala ninagap nda'ninake me, “Wone ti, Ala omaawi aret kogo o,” yinuk, mbako monggoorak.

¹⁹ At Ala nen ari logonet, “It aap iniki warak nen iniki warak logonet, agan nugwi nogo, an nen lek eerogo pege, Ndi, it aap ineenu nen ineenu logonet, yorogwe nogo, kobak aganaburak nduk, eerogo piige, Eerigin o,” yinuk, yereegerak liiru mbanak wonage me,

²⁰ it aakumi iniki warak nogo ti, taani mbakop? It Ala wone unde ti, taani iigo ogotik? Ndi, wone alom kibingga ambi wonage nduk, yogo ogotik? Abu lek aret o. It nggween paga mendek nen, “Niniki warak logonet, koonggo o,” yinuk, yogo menggaarak nogo, at Ala nen, “It wi negen koombunuk, eekwi,” inombake kagak, yogo menggaarak nogo lek a?

²¹ At Ala iniki warak nen ari logonet, “It aakumi nggween paga mendek iniki koonit nugwi paga, an yelok neyaagun lek o. Ata, it an noone yorogo menggaarak nogo, aakumi nen, Ti aap wi inoone negen aret o, yinuk, mbakwi iigak kwe, wone nogo abet mbakwi iinok inagap ndarigin o,” yinuk, kooneegerak me, yokkiragi o.

²² It aap Yakuri mendek nen, “Niniki liippatuwok nduk, ninagabiti warak mendek ambi eeru o,” yinuk, yogwe, ndi, it Yunani mendek nogo nen, “It aakumi iniki warak mendek inoone yogwe liippuwok o,” yinuk, yogwe, eeko menggaarak kwe,

²³ nit perak, Keritut eyo karo-karo paga wareegwaarak wone nogo mban paganogo yorogo monggoorak. Wone ti, it Yakuri nen konembunuk, “Wone yi yogwe paga yilunogo pinanege me, woorak nineebi o,” yinuk, yogwe, ndi, it endekem konenggulik mendek nen konembunuk, “Ti wi wone negen aret kogo,” yinuk, yogwe, eeko menggaarak kwe,

²⁴ nit Ala yonggo pinaneegerak Yakuri mendek inom, Yunani mendek inom, nogo nen perak, wone ti konembunuk, “Ala iniki warak logonet omaawi paga ninagap ndariyak kooneegerak nogo ti, Keritut ninake kambeegerak paga aret ee'ninabigin o,” mba'nuk, yorogo monggoorak.

²⁵ Aakumi nen wone aaninggin ambik me, iniki mondok kwippunuk togon kooniyak mbakwi nogo ti, Ala nen kooniyak teeluk aret kage, ndi, aakumi nen, “Aaninggin ambik me, nit apit ninomaawi paga eeriyak op,” mbakwi nogo ti, at Ala nen eeriyak teeluk aret mbake, eeke menggerak.

²⁶ Noreewi o. Ala nen awo yonggo pinagaga'lek kagak aa'nduk wonogogutak nogo kiniki abe'nip o. It aap iniki warak menggaarak inom, inayuk warak menggaarak inom, inendage tiyanak menggaarak nen ndarak inom, it aap nggween paga mendek nen, “Ia!” inombako menggaarak nogo abok aret kit aap togoti mendek kiinok, kinayonggo pinagulik o.

²⁷ It aap, “An neenu,” mbakak nugwi nogo, inenggali aruwak nduk, at Ala nen it aakumi iniki yunduurak mendek nogo miirinake, ndi, it inayuk warak tiyanak menggaarak nogo inenggali aruwak nduk, it aakumi tebenak mendek aret miirinake, eeke menggerak.

^28-29 It aakumi nen Ala enggaanom paga wogoppakwi iyo, it o nggween paga yime menggaarak mondok iya mbakwi nogo, lek eerogo puwak nduk, Ala nen inendage lek mendek inom, ineebe meek inombakwi mendek inom, meek mba'nuk mbo piigwi mendek inom, aap ti mendek kenok mban miirinake menggerak.

³⁰ Ti kenok, at Ala nen Keritut Yetut ninom kunogo pinaneegerak me, ninom kunik logonet, at Keritut eereegerak paga yi wone ndi wone nineenu eeppinanege agaarik o. Niniki obeelom eerogo pinanege, Ala apuri at ake logowok nduk, leenogo pinanege, ndi, nit keele maarak negen wonogogurak nogo, ninonggo mbanogo punuk, wondet agago pinanege, eereegerak nogo ti, Keritut aret o.

³¹ Togop me, “Aap ambi nen wone tiyappuurak mbake kenok, ninowe eeppinanege menggerak wone nogo mban tiyappogo logowok o,” yinuk, yereegerak liiru mbanak ndak-ndak at mban wogoppogo logonip o.