1 Endagembogut 9 - Ala Wone Peenok Peebi Mbanak

Aliku ALA nen Talomo ambinom nikka wagagerak wone

¹ At Talomo nen Aliku ALA awi inom, at endagembogut awi o nggwok abe inom, abu aret wurogo pege, ndi, at eeriyak iniki kooneegerak nogo abu ndak-ndak aret li'luk eerogo pege, eeke mbareegi,

² at Aliku ALA nen Talomo o Nggibeyon wonage me nikka wagagerak nogo ndak-ndak ambinom aret nikka wage nagagerik,

³ yoge logonet, “Kat tamban eeke logonet, nggino yo'negendak nogo, an muk naruk konenggirak me, nendage mondok-mondok ki logorak nawi wukendak yi, nake leenogo pakirak o. Leenogo pakirak me, niniki mondok-mondok time wonage logonet, nenegen wagangge logogin o.

⁴ Togop aret me, kat perak, kogoba Ndawut iniki koonak wonage logonet, an nenggaanom abu obeelom mban eeke nagagerak nogo ndak-ndak, wone, Yogop ee'nu ndogop ee'nu, yokkege nogo abok aret eerit nage, ndi, wone lengganak inom, wone eeko logorak yugu nogo inom, liirogon porogo logonet, mugurok nage, eeke keenok,

⁵ an nen kogoba Ndawut wone abuk nggaruk togon yoge logonet, Kat kapuri ndaganabemenggendak nen mban aakumi Iterali inoweewi inendagembogut logonet, wone lengganogo yoranet wundi wogo logogun o, yinuk, yoreegirak nogo ndak-ndak, kat mondok-mondok aakumi Iterali inowe kendagembogut logonet, yorage logonok nduk, eerogo pagagin o.

⁶ Togop eeppagagin kwe, kat ilik, kapuri a, wone, Yogop ee'nu ndogop ee'nu, yugu inom, wone lengganak inom, an yokkiragagirak nogo eeka'lek taganogo mbo punuk, melak togon an Ala nalut eekwi nobaane'me kugi eerit nogo logonet, inayuk wukwi kiinok perak,

⁷ it aap Iterali inanggween wogoragagim nogome nen kineebe lek eerogo wumbinagage, ndi, an nendage ki logorak nawi wurik leenogo pakirak yi, lek eerogo mbo pege, eerigin o. Ti eeriminggirak paga yi aakumi ndi aakumi abok aret nen it Iterali in wakkagak yogwe, inagi'ndok kanggwi, eeko logogun o.

⁸ Ndi, an nawi mondok iya wurik yi, langgu-langgu aago wonage kenok, aakumi tu ti paga nogo logonet, inigen kogo logomenggaarik, inogut nanuk, yogo logonet, At Aliku ALA nen nggween yi inom, at awi wurik yi inom, nonggop nduk togop eerogo pereegerak wonage mbakop? Ha! yinuk, yogo logogun o.

⁹ Yogwe iinok, it aakumi ando nen wone onggo yorogo logonet, Lek o. It aakumi yi, inombomini o Metit nen wogoren wundi wagagerak Aliku inogoba Ala nogo, mbo punuk, obaane'me kugi eerit nogo logonet inayuk wurit nogo nogogwaarak alom ti paga at Aliku ALA nen o yi maluk eerogo pereegerak, yorogo logogun o,” yinuk, yoreegerak.

Talomo Kiram imbirak iniki ambit eeppunuk eereegwaarak wone

¹⁰ At Talomo nogo Aliku ALA awi inom, at endagembogut awi o nggwok abe inom, wuke kagak, tahun 20 aret eereegerak.

¹¹ Eeke mbareegi, aap Tirut endagembogut Kiram nogo nen eyo nggabina inom, eyo kilu-kilu inom, mbuti emas inom, at Talomo uugwe mbake ndak-ndak li'luk eerogo wogogak eeke mbareegi, at endagembogut Talomo nen o Nggalileya kota 20 kuli aap Kiram nogo wogoreegerak.

¹² Wogoge mbareegi, o kota 20 at Kiram wogoreegerak nogo enegen yomboonit naakit nduk, o Tirut nen woraanuk, kota-kota nogo enegen yomboonit nage nagagerik, inikilom lek aret kagagerak.

¹³ Kage nagagerik, at Kiram nen Talomo yoge logonet, “Nore o. O kota-kota an wo'negendak nogo enete yogobi kagak aret wo'negendak ya?” yoreegerak. Ti yoreegerak kenok, o ti endage, Abe Lek o, yinuk, tooneegerak nogo yogondak yogwe wonogwe aret o.

¹⁴ At Kiram nen mbuti emas aaninggin empat ribu Talomo nappiya wagagerak kagak eereegerak.

Talomo nen yabu ando eerit nagagerak wone

¹⁵ At endagembogut Talomo nen oone omaawi paga aakumi leenogo piige nagagerik, yorage kagak, Aliku ALA awi inom, at endagembogut awi o nggwok abe inom, o Yerutalem owa'nagat inom, wurogo pugwi, o Yerutalem wurik eraanu endekenggwe nggween pit laganggwi, ndi, o kota-kota Katot, Megiro, Nggetet omaawi eerogo pit nogwe, eereegwaarak nogo ti aret o.

¹⁶ Aap Metit mendek inowe endagembogut Pirawun nen o Nggetet tebeni unggwage logonet, aakumi o Kanan mendek time wonogwe nogo inooke, inawi kani mbelanogo piige, eereegerak me, at apuluk kolaga Talomo akwe nogo, at kolage eyom paga iniki ale'nggen nen o kota nogo apuluk kolaga ti, wogoge mbareegi,

¹⁷ at Talomo nen o Nggetet nogome obaane'me wureegerak. Wuke nagagerik, ti'nuk o Mbet-Koron peenok ogu pa'nggwe inom,

¹⁸ o Mbaalat inom, o Yekura karume kota Tamat inom,

¹⁹ yi mendek ndi mendek pegak kota-kota inom, nggweendo wim eeka logorak kota-kota inom, nikkenok nega kuda logorak inawi kota-kota inom, o Yerutalem ilik, puut Libanon paga a, at endagembogut logonet, unde menggim nogome abok aret at wuriyak mbaketak nogo aret wurogo pit nage nagagerak.

^20-21 Ndi, it aakumi Iterali mendek o Kanan tebeni unggwogo logonet, it ando inooriyak meek kenok teppiyareegwaarak inapuri wiganak Iterali mendek lek it inanebunu Amon mendek inom, Ket mendek inom, Perit mendek inom, Kewi mendek inom, Yebut mendek inom, abok aret at Talomo nen oone omaawi yorage kagak, eyabu eeko logowak nduk, ayeloman eeppiyareegerak me, o yogondak kunduk eekwi wonogwe aret.

²² Togop eeginake nagagerak kwe, it aakumi Iterali mendek perak, ayeloman eeginake logolik. It Iterali mendek nogo ti, ineegin warak logorak inom, at inom yabu eeko logorak inom, inoweewi inendage warak logorak inom, ineegin warak inoweewi logorak inom, nggweendo wim eeka unde logorak inom, nikkenok nega kuda unde logorak inom, ti mendek unde eeppiyareegerak.

²³ It unde eeppiyareegerak ineebe lambunik lima ratus lima puluh aret me, at Talomo nen yabu eeriyak mbake nogo it aakumi nen eekwi iigak, it inoweewi ti nen inarum aret wonogogwaarak.

²⁴ Kwe Pirawun apuluk nogo, Ndawut Agota nen ake awi o nggwok abe Talomo wureegim nogome ari wagagerak wonage kagak, at Talomo nogo nen o Yerutalem wurik eraanu endekenggwe nggween pit laganeegerak.

²⁵ At Talomo nen tahun ambit aago ne kenagan paga Aliku ALA ake warogo wogogo logorak ogobakkigireegerak nogo paga Aliku ALA ake warogo kani kungge, Ala inom lambunik logorak ake warogo wogoge, eeke nagagerak. Ti eeke logonet Aliku ALA enggaanom paga obari abe kaga nogo inom kani kungge nagagerak. Ti eereegerak nogo ti, Aliku ALA awi wuppunuk, eeko logorak wone yugu nogo ndak-ndak aret eereegerak.

²⁶ Aap endagembogut Talomo nen o Erom niyo kole yenggenak Laut Merah aa'nggi paga o Elot koorok kota Etiyon-Nggebet nogome yi yiiro ndi yiiro ogobakkigirogo nigake nagagerak.

²⁷ Ndi, at Kiram apuri nogo ti, laut paga yiiro wonok nugwi ineenu me, at Talomo apuri yi yiiro ndi yiiro wonok nogwe iinok, inom wonok nawok nduk, at Kiram nen apuri nappiya wage mbareegi, wogo nogogwaarik,

²⁸ Talomo apuri inom o endage Opit ari nanuk, mbuti emas aaninggin empat belas ribu lima ratus wakkagak waganggo nogogwaarik, wonok aap endagembogut Talomo nogo wogori wogogwaarak.