1 Endagembogut 5 - Ala Wone Peenok Peebi Mbanak

Talomo Ala awi wuriyak pipuk eereegerak wone

¹ It aakumi o Tirut mendek inowe endagembogut Kiram nen Ndawut imbirak iniki kunik wonagagerak me, “At Talomo nogo ogoba Ndawut obaane'me endagembogut logowak nduk, amburu eerogo mippegaarak o,” yogwe nogo aruk konengge nagagerik, awuri inom eeko menggaarak nogo, Talomo wonage me nappiya wagagerak.

² Nappiya wagagerak at Talomo owagam wogo mbareegwa, at nen aap Kiram wone yori nawak nduk, wone eerogo nappiige logonet,

³ “An nogoba Ndawut inom wim mbanak menggerak nen tu andogon-andogon abok aret at inom wim eeriyak nduk, mugurok nugwi iinok, inom wim eeke nagagerak kwe, at Aliku ALA nen at awim tebenogo piyoolik me, Aliku ogoba Ala endage ki logowak nduk, at awi wurulik nogo kat keenu areto.

⁴ Togop aret kwe, o yogondak at Aliku nogoba Ala nen an wonage minggim nenaagan-nambokan o abolok lek ugun logowak nduk, eerogo paneegerak me, an ninom wim eekwi, aaninggin ambi noba age, eekwi lek aret o.

⁵ Togop aret me, at Aliku ALA nen an nogoba Ndawut yoge logonet, Peebi kat kobaane'me kaput nen inowe endagembogut a'nuk, wone lengganogo yorage logowak nduk, mippiminggirak nen nendage ki logowak nduk, nawi wuke logogin o, yinuk, yoreegerak nogo ndak-ndak, Aliku nogoba Ala endage ki logowak nduk, awi ti, an aret wurikit lak, ao, yinuk, niniki koonit nage agarik o.

⁶ Togop aret me, it aap o Tiron mendek eyo muukwi ineenu mengga kwak, aap nit ninenggela'me yime togop ambi muukwi ineenggo'lek nogo ti, kat keenu aret me, an nake eyo nggabina puut Libanon wonage nogo, kat kawuri nen muuppunuk, mbanogo panugo logowak nduk, yoret o. Mbanogo panugwi iinok, an nawuri nen kat kawuri yeenggwaarogo logogun me, kawuri yabu eeremenggaarak onggo, Yogop kuli wogoroorak o, yo'nege keenok, aret wokkirigin o,” yinuk, wone eerogo nappiyareegerak.

⁷ At Talomo nen wone eerogo nappiyareegerak nogo, at Kiram yori nogogwaarak konengge nagagerik, iniki ale'nggen abu alik negen age logonet, “At Aliku ALA nen aakumi ambik aret wonogwe ti, inowe endagembogut logonet, wone lengganogo yorage logowak nduk, Ndawut aput iniki warak lombok eeppegerak me, an yogondak Aliku ALA endage alut eeke agarik o.”

⁸ Ari nagagerik, at Kiram nen Talomo wonage me wone eerogo nappiya wage logonet, “Eyo nggabina inom, kilu-kilu inom, nake pipuk eeru o, yinuk, eerogo nappiya wagandak nogo, an muk konenggirak me, kat mbakendak ti, ndak-ndak aret pipuk eeke logogin o.

⁹ Pipuk eerogo punuk, nawuri puurom Libanon nen wonok niyo nggwok yenggenak laut paga pi wambi wogwe iinok, keele maarogo niyo ogombaga lumbunuk, wonok pi woroorak yo'negenom time aret keele piinogo endekem wumbi wage neenok, kat nen wonok namunggun o. Ndi, it an name ninom minggirak inake, Inambi ndogop wo'niriyak o, ari neenok, nogo aret pipuk eerogo panege logomunggun o,” yinuk, eerogo nappiya wagagerak.

¹⁰ Wone eerogo nappiya wage nagagerik, at Kiram nen Talomo uugwe mbareegerak nogo ndak-ndak eyo nggabina inom, kilu-kilu inom, abok aret nappiya wagak eeke nagagerak.

¹¹ Nappiya wagak eeke mbareegi, at Talomo nen Kiram ame menggaarak inake gandum karun kole yonggolak empat puluh empat ribu karun inom, tayitun amburu mburunogo togolowak yele-kole nderom dua ribu lima ratus me toolak inom, tahun ambi eekak paga nappiya wagak eeke nagagerak.

¹² Ndi, at Aliku ALA nen, “Kiniki warak eeppagagin o,” yinuk, Talomo yoreegerak nogo ndak-ndak aret eeppereegerak me, at Kiram Talomo imbirak iniki ambit eeppunuk, “Nit yogop aret eeko logowok o,” yinuk, wone koonogo pereegwaarak.

¹³ Ndi, aap endagembogut Talomo nen oone omaawi paga lengganogo yorage kagak, eeko logowak nduk, aakumi Iterali inanebunu abok aret inenggela'me nen ineebe tiga puluh ribu aret leenogo piyareegerak.

¹⁴ Leenogo piyareegerak nogo yabu eekwi iigak, tut ambit penengge, ndi, iname wa'nuk wonogwe iigak, tut mbere penengge, eeko logowak nduk, ineebe sepuluh ribu mban nappiigak eeke nagagerak. Ti eekwi iigak, oone omaawi paga lengganogo yorage logorak inowe Aroniram aret mippereegerak.

¹⁵ Ndi, puut nggelok-nggobok paga yugum nggaganggo logorak ineebe delapan puluh ribu leenogo piige, ndi, yi mendek ndi mendek kaganggo logorak ineebe tujuh puluh ribu leenogo piige, eeppiinok,

¹⁶ it yabu eekwi iigak inarum logonet wone lengganogo yoragak eeko logowak nduk, ineebe tiga ribu tiga ratus aret leenogo piyareegerak.

¹⁷ Ndi, Ala awi owak kwippuurak yugum yo'nggok mondok omaawi mendek loonogo punuk, wonok woraawak nduk, at endagembogut nogo nen wone lengganogo yoragagerak.

¹⁸ It o wuka at Talomo awuri inom, Kiram awuri inom, it aap o kota Nggeban mendek inom, it nogo nen Ala awi wuriyak nduk, yugum inom, eyo inom, pipuk eerogo pereegwaarak.