1 Endagembogut 4 - Ala Wone Peenok Peebi Mbanak

Talomo awuri inom eeko nogogwaarak wone

¹ At Talomo nogo aakumi Iterali mendek abok aret inowe endagembogut age nagagerik, wone lengganogo yorage kagak,

² it aap inendage tiyanak at inom eeko nogogwaarak nogo yi aret. At Tarok aput Atariya nogo ti, Ala unde wonage,

³ At aap Tita apuri Elikorep Akiya imbirak ti, o nogome wone ambi age kenok, liiru mbangga wonogwe, Akilut aput Yotapat ti, o nogome ake wu pugwi nogo porogo wonage,

⁴ At Yoyara aput Mbenaya nogo ineegin warak inowe wonage, It Tarok Abiyatat imbirak nogo Ala unde wonogwe,

⁵ At Natan aput Atariya ti, it aap o alitik-alitak unde menggaarak nogo inowe wonage, Natan aput Tabut ti, Ala unde logonet, aap endagembogut imbirak wone koongga wonage,

⁶ At Akitat ti, aap endagembogut awi o nggwok abe wurik arum wonage, Ndi, at Abara aput Aroniram ti, it aap yabu eekwi oone omaawi paga wone lengganogo yoraga wonage, eeko nogogwaarak.

⁷ It aakumi Iterali wonogo menggam unde menggaarak abok aret nen, aap endagembogut ake inom, at ame yabu eeko menggaarak inake inom, tahun ambi tut ambit penengge paga at ambi nen mbi kuwak eerogo pi wagak, at ambi nen mbi kuwak eerogo pi wagak, eeko logowak nduk, at Talomo nen aap o unde ineebe 12 leenogo mippiyareegerak.

⁸ It aap ti inendage yi aret o. Aap Mben-Kut nen puut nggelok-nggobok o Eparayim nogome wone lengganogo yorage,

⁹ Aap Mben-Ndeket nen o Makat inom, Taalibim inom, Mbet-Temet inom, Elon-Mbet-Kanan inom, wone lengganogo yorage,

¹⁰ Aap Mben-Ketet nen o Arubot logonet, o Toko inom, nggween Kepet abok aret unde me, wone lengganogo yorage,

¹¹ Aap Mben-Abinarap Talomo apuluk kolaga Tapat kolagagerak nogo nen o Ndot puut-puut nogome wone lengganogo yorage,

¹² Aap Akilut aput Mbaana nen o Taanak inom, o Megiro inom, o Yiteren ogu o Taratan peenok nggwe o Mbet-Teyan nen nok, Aben-Mekola nen nok, ene nggwe o Yokemeyan time inom, apit aret wone lengganogo yorage,

¹³ Aap Mben-Nggebet nen o kota Aramot-Nggileyat inom, aap Manate aput Yayit mendek yi awi ndi awi o Nggileyat wonogo menggam inom, o nggwok Mbatan o mbuuluk Aregop kota 60 mondok nggwok yugum yagat wurik, pak ambe mbuti tembaga paga mban mbanak wonagagerak nogome inom, wone lengganogo yorage,

¹⁴ Aap Indo aput Akinarap nen o Makanayim nogome wone lengganogo yorage,

¹⁵ Aap Akimaat Talomo apuluk kolaga endage Mbatamat kolagagerak nogo nen o Natali wone lengganogo yorage,

¹⁶ Aap Kutayi aput Mbaana nen o Atet inom, Alot inom, wone lengganogo yorage,

¹⁷ Aap Paruwa aput Yotapat nen o Itakat wone lengganogo yorage,

¹⁸ Aap Ela aput Timeyi nen o Mbeniyamin wone lengganogo yorage,

¹⁹ At Uri aput Nggebet nen it aap Amori mendek inowe endagembogut Tikon arum wonagagim inom, it o Mbatan mendek inowe endagembogut Ok arum wonagagim inom, o Nggileyat nogome alik aret wone lengganogo yorage, eeko nogogwaarak nogo ti aret o.

Talomo endage tiyak yereegerak wone

²⁰ It aakumi Yekura mendek inom, Iterali mendek inom, ineebe lambunik mbini-kale'ngga niyo aa'nggi paga wonage nogo kokwak wonogo logonet, inambi inom, inagi inom, iniki ale'nggen paga nonggo nogogwaarak.

²¹ Ndi, at Talomo nogo, niyo Eparat wappunuk nok, aap Pilitin wonogo menggam nen, o Metit kuli, yi aap ndi aap inabu'me piinok wonogo menggam abok aret inowe endagembogut logonet wone lengganogo yorage nagagerak. At Talomo kangga'lek eenik wonage kagak, it aakumi o time wonogwe apit aret nen at Talomo abu'me logonet, at oone mban konenggwi, inarum wonage onggo wogori wogwe, eeko nogogwaarak.

²² At Talomo nogo, nogo ambit paga nenggak ake wonagagerak nogo yi aret. Tepung abe yigirik mendek karun kole me yonggolak seratus tiga puluh karun inom, tepung abe yigirik lek mendek karun kole me yonggolak dua ratus enam puluh karun inom,

²³ tapi inanggenogona menggaarak inamok warak 10 inom, tapi inigen wogoren nugu menggaarak 20 inom, kambin-ndomba 100 inom, rusa inom, rusa owak nggorek nogo mendek inom, owak kuwagaluk inom, uuni enggaanok nggorek amok warak inom, ti mendek abok aret ne ambi paga mban nengge nagagerak.

²⁴ At Talomo nogo niyo Eparat oonegen kilu yi nage menggim pa'nggwe yibagan o Tipata panggombunuk nok, Nggata kuli, yi aap ndi aap inabu'me piinok wonogo menggam abok aret inowe endagembogut logonet, wone lengganogo yorage kagak, o time abok aret abolok lek obeelom aret wonagagerak.

²⁵ Abolok lek obeelom aret wonagagerak me, at Talomo kangga'lek eenik wonage kagak, it aakumi Yekura mendek inom, it Iterali mendek inom, o Ndan nen nok, o Mberetiyeba kuli, eyo anggur inom, eyo wuli inom, inalitik-inalitak unde wonogo logonet, iniki tayenak inale'nggen paga aret wonogogwaarak.

²⁶ At Talomo aguda nggweendo nikkenok nega inanggenogo empat ribu wurik wonage, ndi, awuri ineegin warak kuda paga nega ineebe dua belas ribu aret wonogwe, eeko nogogwaarak.

²⁷ It aap inoweewi wone lengganogo yorogo menggam lombok nen aap endagembogut Talomo ake inom, at awuri inom mbi nonggo menggaarak inake inom, “Tut ambit, ndi penenak paga wonok ira wogo logorak,” yugu nogo, yi mendek ndi mendek ambi yobonogo wuppogo logolik abok aret li'luk ee'nuk ira wogo nogogwaarak.

²⁸ At Talomo aanggumi kuda kwi'na'nuk nega inake inom, kuda nggweendo nikkenok nega inake inom, “Iri'ngga yogop mbaninuk wogo logonu o,” yugu nogo ndak-ndak aret waabuk negen jelai anggen inom, owak inom, wonok,“Ndime pi wogo logonu o,” yugu nogome aret pi wogo nogogwaarak.

Talomo iniki warak logonet, eeke nagagerak wone

²⁹ At Talomo nogo iniki warak inom, yi wone ndi wone mbet-mbet yelok koorak inom, ndi, mbini niyo aa'nggi paga neyanak menggi kwak, yi wone ndi wone alom abok eenu ariyak inom, Ala nen eeppereegerak me,

^30-31 it aap oonegen lagi wage menggim pa'nggwe inom, it aap Metit mendek abok aret inom, at Eteraki mendek Etan inom, at Makon apuri Keman inom, Kalikon inom, Ndarara inom, it yi aap ndi aap abok aret iniki warak yi wone ndi wone abok aret ineenu kwe, at Talomo kwak ambi wonogo logolik o. At Talomo nogo ti, iniki warak yi wone ndi wone abu iya negen eenu wonagagerak me, endage yi aakumi ndi aakumi enaagan-ambokan wonogwe me nogome wiganinuk nage nagagerak.

³² Wone eegu elaarogo ari nagagerak alom nogo ti, ambik lombok tiga ribu aret. Ndi, ndawi pereegerak nogo ti, seribu lima aret wonagagerak.

³³ Ndi, eyo-kale eeke menggerak inom, iri'ngga-kale'ngga mbuulogwe-mbaalogwe wungge menggerak inom, abok aret eenu me, eyo kole nggabina puut Libanon paga wonage nogo kuli nen nugwa wumokot yugum paga lenggenak abok aret inawone mbiningge, wam inom, towe-pagi inom, yi mendek ndi mendek inaanogum paga nugu menggaarak inom, yi yikwe ndi yikwe inom, abok aret inawone mbiningge, eeke nagagerak me,

³⁴ yi aap ndi aap inendagembogut o nggween paga menggaarak abok aret, Talomo iniki warak nen ari nogo konembunuk, at Talomo yi wone ndi wone ari nogo inaruk liirogon konenuwak nduk, inawuri nappiya wogo nogogwaarak.