1 Endagembogut 21 - Ala Wone Peenok Peebi Mbanak

Aap Nabot eyabume anggur awi yarak wone

¹ Ti'nuk peebi, aap awi Yiteren mendek endage Nabot eyabume anggur awi yarak paga agagerak wone nogo yi aret. At Nabot eyabume anggur awi yarak o Yiteren aap Tamariya mendek inowe endagembogut Akap awi o nggwok abe wurik koorok wonagagerak me,

² ne ambi paga at Akap nen aap Nabot nogo yoge logonet, “Kat keyabume anggur awi yarak yi, an nawi o nggwok abe wurik koorok aret me, yi mendek ndi mendek awi yarikit nduk, wo'niru o. Wo'nege keenok, obaane'me an neyabume anggur awi yarak abe ambi wokkiriyak ilik, Wu wo'niriyak, mbake keenok, onggo ndak-ndak wu wokkiriyak a?”

³ Yoge mbareegi, at Nabot nogo nen onggo yoge logonet, “Nombomini ineyate nggween wo'nereegwaarak yi aret me, an togop eeriyak abu mbaka'lek me, Aliku ALA endage paga abet aret yokkigi o.”

⁴ Yoge mbareegi, aap Yiteren mendek Nabot nen, “Nombomini ineyate nggween wo'nereegwaarak nogo wokkirigin lek o,” yinuk, yoreegerak ti paga at Akap nogo ale'nggen lek a'nuk, iniki aagi wo agan ame nage nagagerik, nogo yege menggim winna'nuk, enete aagi wu eeppunuk logonet, mbi nengga'lek wonagagerak.

⁵ Togop aago wonage me, akwe Iteben nogo unggwi wage nagagerik, at Akap yoge logonet, “Nonggop nduk kenete aagi wu eeppunuk, mbi nengga'lek agandik?”

⁶ Yoge mbareegi, at Akap nen onggo yoge, “An nen aap Yiteren mendek Nabot nogo yoge logonet, Keyabume anggur awi yarak kunikit mbakirak me, wu wokkiriyak ilik, anggur awi yarak, Wo'niriyak, mbake keenok, obaane'me ti aret wokkiriyak a? Yogirak kwe, at nen, Neyabume anggur awi yarak ti, wokkirigin lek o, yo'nege mbaki, niniki aagi a'nuk agarik o.”

⁷ Yoge mbareegi, akwe Iteben nogo nen, “Kat aakumi Iterali inowe kendagembogut menggendak nogo lek a? Aap Titeren mendek Nabot eyabume anggur awi yarak ti, an nen waganogo wokkirigin me, mi'na'nuk, kiniki ale'nggen paga mbi nengge logot o,” yinuk, yoreegerak.

^8-10 Yoge nagagerik, kwe Iteben nogo nen aap Nabot awi kota inom menggaarak inoweewi inom, aap inendage warak inom, Akap endage paga liiru mbangge logonet, “Kinawuri inambe mage negen a'nuk logorak kuwak eeri woraawak nduk, yoramonggotak kuwak eeri wogwe iinok, aap Nabot ti, it inaame kwippunuk, aap inogogun ambik mbere at Nabot engga loolo kwippiyamonggotak nogo nen at yogo logonet, Ala inom, aap endagembogut inom, meek eerogo piigerak nogo yi aret o, yogwe iinok, wonok endekem wundi nanuk, kambuwak nduk, yugum paga togu eerogo waruwak o,” yinuk, liiru mbanogo aap endagembogut eenggi amburu pega paga eerogo nappereegerak.

¹¹ It aap Nabot awi agota inom menggaarak inoweewi inom, aap inendage warak inom, liiru mbanak nogo waganggo nogogwaarik, kwe Iteben nen, “Ndogop ee'nip o,” yinuk liiru mbanogo nappereegerak nogo ndak-ndak eeko logonet,

¹² inawuri inambe mage negen a'nuk logorak kuwak eeri woraawak nduk, yorogogwaarak kuwak eeri wogogwaarak nogo, aap Nabot it inaame kwippogo mbareegwa,

¹³ aap inogogun ambik mbere wogo nogogwaarik, Nabot engga loolo kwi'na'nuk, aakumi abok inenggaanom paga, “At Nabot yi, ndogop yegerak o,” yinuk, yogo logonet, “At aap yi, Ala inom, aap endagembogut inom, meek eerogo piigerak o,” yinuk, yogo mbareegwa, aakumi apit aret at eebe wonok o kota endekem wundi nanuk, yugum paga warogo pereegwaarak kambeegerak.

¹⁴ Warogo pogo nogogwaarik, “Aap Nabot nogo yugum paga wakkoorak kanggerak o,” yinuk, kwe Iteben paga wone eerogo nappi wogogwaarak.

¹⁵ At kwe Iteben nogo nen, “Aap Nabot yugum paga wakaarak kanggerak o,” yogwe nogo aruk konengge nagagerik, aap Akap nogo yoge, “Aap Titeren mendek Nabot eyabume anggur awi yarak onggo wogoriyak ari mbaken, Lek, yokkegerak nogo eenik wonage lek muk kanggerak me, mi'na'nuk, eyabu aago nogo kat unde eekkola nak o.”

¹⁶ Yoge mbareegi, at Akap nen, “Aap Nabot nogo muk kanggerak,” aruk konembunuk, eyabume anggur awi yarak nogo unde arikit nduk, mi'na'nuk, pekka nagagerak.

¹⁷ Pekka nagagerak wonage kagak, at Aliku ALA nen aap Titebe mendek Eliya nogo yoge,

¹⁸ “Aakumi Iterali inowe endagembogut o Tamariya logonet, inarum menggerak Akap nogo nen aap Nabot eyabume anggur awi yarak unde eekkolaakit nduk, nagaarak time wonage me, pekka nak o.

¹⁹ Pekka nage logomenggendik, wone yoriyak nogo yi o. Naliku ALA nen aap ambi warogo punuk, anggween ndinggolegerak at Akap aret nogo lek a? At togop aret eekerak me, nggeewo nen aap Nabot amiya inamili menak nunggo menggam time at amiya togop aret nagun o, yinuk, Aliku ALA nen yegerak, yori nak o.”

²⁰ Yoreegerak nage mbareegi, Akap nogo Eliya nage enegen kage nagagerik, “Kat nimbirak ogoorak monggoorak yi, o yogondak aret kwaa'naken o.” Yoge mbareegi, at Eliya nen at onggo yoge, “Abet aret kwaakkeegi o. Maluk ayeloman arikit o, yinuk, miike nagandik, Aliku ALA enegen kagak, maluk eerit nage menggendak me,

²¹ Aliku ALA nen ari logonet, At Akap ti, aaninggin oba pege logonet, at apuri paga wiganak inom pup eerogo piige, owe-awot inendage warak inom, inendage lek inom, Iterali inenggela'me wonogwe aap mban abok aret inenggaawak lek eerogo piige,

²² ndi, maluk eerit nage paga Iterali kunduk, maluk eerit nogwe iinok, nanini mbareegirak me, aap Nebat aput Yerobeyam paga wiganak inom, aap Akiya aput Mbayeta paga wiganak inom, eeppiyareegirak kokwak, Akap paga wiganak inom togop aret eeppiige, eerigin, yegerak o.

²³ Ndi, at Iteben eeppuurak Aliku ALA nen ari logonet, Kwe Iteben kunduk, o kota Yiteren yagat endekem nggeewo nen at eebe nibinogo nagun o.

²⁴ It Akap aaganapuri o kota paga kanggwi iinok, nggeewo nen nibinogo nunggwi, ndi, o kota endekenggwe kanggwi iinok, towe wiganinuk nugu menggaarak nen nunggwi, eerugun, yegerak me, yokkigi o,” yinuk, yoreegerak.

²⁵ Ti yoreegerak nogo ti, Akap akwe Iteben nen ogonggelo maluk eeruwak nduk, inikime manake kagak, Akap nen, “Maluk ayeloman arikit o,” yinuk, miike nagagerik, Aliku ALA enegen kagak maluk mban eerit nage nagagerak kokwak, aap togop ambi lek aret o.

²⁶ At obaabut maluk lombok eekulik mendek eerit nage logonet, Aliku ALA nen Iterali inaame aa'nduk a'nuk aakumi Amori mendek wumbiyareegerak inagugiwak tiyappit nogo nogogwaarak nogo ndak-ndak, agugiwak tiyappit nage kenok, eeppuurak yoreegerak.

²⁷ Eliya nen yoreegerak nogo aap Akap abu aret konengge nagagerik, ayum nibinogo patinuk, yum nibinik maluk mendek yikkolage nagagerik, mbi nengga'lek ambe mage negen logonet, yum nibinik maluk mendek nogo yirik winnage, mi'na'nuk nege logonet, iniki puru aago mbawok nege, eeke nagagerak.

²⁸ Eeke kagak, Aliku ALA nen aap Titebe mendek Eliya nogo yoge,

²⁹ “Aap Akap nogo nenggaanom paga iniki tebeppakerak kagandak ilik? Iniki tebeppakerak me, an aaninggin oba puurak yagarak nogo ti, at wonage kagak oba nappi woraagin lek o. Ata, at aput ndaremenggerak eenik wonage kagak, at paga wiganak inom inoba nappiya woraagin o,” yinuk, yoreegerak.