1 Endagembogut 16 - Ala Wone Peenok Peebi Mbanak

Iterali inowe endagembogut Mbayeta eeke nagagerak wone

¹ Maluk mban aret eeke me, at Aliku ALA nen aap endagembogut Mbayeta eeppuurak aap Kanani aput Yeku yoge logonet,

² “Napuri Iterali mendek inarum logonet ndegeninake logowak nduk, an nen aap Mbayeta liirubu enggela'me nen pilanogo mippereegirak kwe, aap Yerobeyam maluk eeke nagagerak ndak-ndak eerit nage logonet, it an napuri Iterali mendek maluk eekwi paga nanini aruwak nduk, kini wuppiinet nage nagagerak me,

³ an nen at Mbayeta paga wiganak inom apit aret inenggaawak lek eerogo piyaakit mbakirak me, aap Nebat aput Yerobeyam paga wiganak inom lek eerogo piyareegirak kokwak, it togop aret inenggaawak lek eerogo piyaagin o.

⁴ At Mbayeta aap at mendek o kota paga kambemenggaarak nogo nggeewo nen nunggwi, ndi, o kota endekem kambemenggaarak ti, towe wiganinuk nugu menggaarak nen nunggwi, eerugun, yegerak, yoru o,” yinuk, yoreegerak.

⁵ At Mbayeta endagembogut a'nuk wone lengganogo yorage logonet, eeke nagagerak inom, eerit nage paga endage nggwok agagerak inom, ando abok ti, it Iterali inoweewi inendagembogut eeko nogogwaarak liiru mbanak paga, inom liiru mbanak wonage nogo lek a?

⁶ At Mbayeta nogo, ombomini kambunuk nogogwam inom yonggonggola nage mbareegi, at eebe o Tirata kanggwi piya unggwogo menggam nogome pi unggwogogwaarak. Pi unggwogo mbareegwa, obaane'me aput Ela endagembogut aret agagerak.

⁷ At Mbayeta nen Aliku ALA enegen kagak maluk ambik eerit nage paga Aliku ALA anini mbaruwak nduk, eeppereegerak kenok, aap Yerobeyam paga wiganak inom maluk eerit nogwe iinok, Aliku ALA nen inenggaawak lek eerogo piyareegerak nogo ndak-ndak, aap Mbayeta paga wiganak inom eeppiyoorak Aliku ALA nen aap Kanani aput Yeku yoreegerak nogo ndak-ndak, inenggaawak lek eerogo piyareegerak ti aret.

Iterali inowe endagembogut Ela nen eeke nagagerak wone

⁸ At Ata nogo aakumi Yekura inowe endagembogut wonage kagak, tahun 25 eeppunuk, ambi age paga at Mbayeta aput Ela nogo, aakumi Iterali inowe endagembogut a'nuk, o Tirata logonet, wone lengganogo yorage kagak, tahun mbere eereegerak.

⁹ Yorage wonage me, aap at inom yabu eeke menggerak anggweendo wim eeka ando unde wonagagerak endage Timini nogo nen at Ela wariyak nduk, oreewi inom wone mbaneegwaarak. Wone mbambunuk, wonogwe iigak, at Ela nogo aap endagembogut awi o nggwok abe wurik o Tirata wonage unde aap Arata ame nogome, amburu kumili aganaka mendek nengge me,

¹⁰ at Timiri nogo wage nagagerik, oome nogome unggunuk, aap Ela nogo warogo punuk, at obaane'me endagembogut aret agagerak. Ti wareegwaarak nogo ti, aap Ata aakumi Yekura inowe endagembogut wonage kagak, tahun 26 eeppunuk, ambi age paga aret wareegerak.

¹¹ At Timiri nogo abu aret endagembogut age nagagerik, wone lengganogo yorage menggim ari laganuk, aap Mbayeta owe-awot inom, oreewi inom, aap ambi yumbunogo teppiyoolik abok wundugun-naagun aret inoorogo piyareegerak.

^12-13 Aap Mbayeta aput Ela imbirak maluk eerit nogwe iinok, it aakumi Iterali kunduk, maluk eerit nogo logonet, it obeelom eeginaburak lek mendek inagugiwak tiyappugwi paga Aliku inogoba Ala anini mbareegerak me, aap Mbayeta eeppuurak Ala nen yoge kagak yoraga Yeku yoreegerak nogo ndak-ndak, at Timiri nen aap Mbayeta owe-awot abok aret pup eerogo piyareegerak.

¹⁴ Ndi, at Ela endagembogut a'nuk wone lengganogo yorage logonet, eeke nagagerak ando abok ti, it Iterali inoweewi inendagembogut eeko nogogwaarak liiru mbanak paga, inom liiru mbanak wonage nogo lek a?

Iterali inowe endagembogut Timiri nen eeke nagagerak wone

¹⁵ Aap Ata nogo aakumi Yekura inowe endagembogut wonage kagak, tahun 26 abu eeppunuk, ambi age paga at Timiri nogo, Iterali inowe endagembogut a'nuk, o Tirata logonet, wone lengganogo yorage kagak, nogo 7 aret yereegerak. Ndi, ne ti eyom paga it Iterali ineegin warak nen aap Pilitin inawi kota Nggibeton nogome oonda mbaninabi ungguwok nduk, o Nggibeton koorok inawooliya wuppunuk, wonogogwaarak.

¹⁶ Inawooliya wuppunuk wonogwe me, “Aap Timiri nogo nen aap endagembogut wariyak wone mbambunuk, wakerak o,” yogwe nogo konembunuk, it ineegin warak inowe Omiri nogo aakumi Iterali inowe endagembogut logowak nduk, ne ti eyom paga time nen aret mippereegwaarak.

¹⁷ Mippogo mbareegwa, aap Omiri nogo aakumi Iterali inom abok aret o Nggibeton mbo punuk, o Tirata nogome oonda mbaninabi unggwogogwaarak.

¹⁸ O Tirata nogo abu aret tebeneegwaarak aap Timiri nen enegen kage nagagerik, aap endagembogut awi o nggwok abe wurik ko ogoorak ambi akem time unggunuk, awi kani inom pateegerak.

¹⁹ Aap Yerobeyam obaabut maluk logonet, eerit nage nagagerak paga it Iterali mendek abok maluk eeko nogogwaarak nogo ndak-ndak, at Timiri nen Aliku ALA enegen kagak maluk togop aret eerit nage nagagerik, o kani inom pateegerak ti aret.

²⁰ Ndi, at Timiri nogo aap endagembogut a'nuk wone lengganogo yorage logonet, eeke nagagerak ando inom, ndi, aap Ela wariyak nduk, oreewi inom wone mbambunuk eereegerak inom, ando abok it Iterali inoweewi inendagembogut eeko nogogwaarak liiru mbanak paga, inom liiru mbanak wonage nogo lek a?

Iterali inowe endagembogut Omiri nen eeke nagagerak wone

²¹ Ne ti eyom paga it aakumi ando nen aap Ngginat aput Tibini mippuurak yogwe, ndi, it ando nen Omiri mippuurak yogwe, eeko logonet, Iterali oolo mogonggologogwaarak.

²² Mogonggologo nogogwaarik, at Omiri inom ogogwaarak nogo inomaawi tiyak yogo logonet, it Ngginat aput Tibini inom ogogwaarak nogo tebenogo piyareegwaarak aap Tibini nogo kangge mbareegi, aap Omiri nogo inowe endagembogut agagerak.

²³ Ti agagerak nogo ti, aap Ata nogo it Yekura inowe endagembogut wonage kagak, tahun 30 abu eeppunuk, ambi age paga at Omiri nogo it Iterali inowe endagembogut age nagagerik, wone lengganogo yorage kagak, tahun 6 eeke, ndi, ame Tirata logonet, Iterali wone lengganogo yorage kagak, tahun 6 eeke, eereegerak. Ndi, lambuk togon ti, tahun 12 aret Iterali wone lengganogo yorage nagagerak.

²⁴ Wone lengganogo yorage logonet, puut endage Tamariya aap Temet abuut me, wu mbuti perak aaninggin 70 wakkaanuk nogo paga kumbege nagagerik, puut nogo paga o tini nggwok nappunuk, at aap abuut unde Temet endage toonak ndak-ndak, O kota Tamariya aret o, yinuk, tooneegerak.

²⁵ Omiri nogo endagembogut awo aga'lek kagak, it inaa'nduk inendagembogut ogogwaarak maluk eeko nogogwaarak ti, nggwok aret eeko nogogwaarak kwe, at Omiri perak, Aliku ALA enegen kagak, abunuk maluk mondok iya lombok eeke nagagerak.

²⁶ At Nebat aput Yerobeyam nogo, yi maluk ndi maluk eeke nagagerak paga it Iterali kunduk maluk eerit nogo logonet, obeelom eeginaburak lek mendek inagugiwak tiyappugwi paga at Aliku inogoba Ala anini mbareegerak nogo kokwak, at Omiri nogo togop aret eerit nage nagagerak paga Aliku Ala anini mbareegerak.

²⁷ Ndi, at Omiri endagembogut a'nuk wone lengganogo yorage logonet, eeke nagagerak inom, eerit nage paga endage nggwok agagerak inom, ando abok ti, it Iterali inoweewi inendagembogut eeko nogogwaarak mbuku paga liiru mbanak wonage nogo paga, inom liiru mbanak wonage nogo lek a?

²⁸ At Omiri nogo, ombomini kambunuk nogogwam inom yonggonggola nage mbareegi, o Tamariya kanggwi piya unggwogo menggam eebe pi unggwogogwaarak. Pi unggwogo mbareegwa, obaane'me aput Akap inowe endagembogut aret agagerak.

Iterali inowe endagembogut Akap nen eeke nagagerak wone

²⁹ Aap Ata nogo aakumi Yekura inowe endagembogut wonage kagak tahun 37 eeppunuk, ambi age paga aap Omiri aput Akap nogo aakumi Iterali inowe endagembogut a'nuk, o Tamariya logonet, Iterali wone lengganogo yorage kagak tahun 22 aret eereegerak.

³⁰ Aap Omiri aput Akap endagembogut aga'lek kagak it aakumi Iterali inoweewi inendagembogut maluk eeko nogogwaarak nogo ti, nggwok aret eeko nogogwaarak kwe, aap Omiri aput Akap perak, Aliku ALA enegen kagak maluk mondok iya lombok eeke nagagerak.

³¹ At Omiri aput Akap nen aap Nebat aput Yerobeyam maluk eeke nagagerak nogo, eerit nage logonet, “Abu eeki,” mbaka'lek aakumi Tiron mendek inowe endagembogut Etebaan aput kolaga Iteben nogo wagangge, kugi Mba'an mugurok nage logonet alut eeke, eeke nagagerak.

³² Eeke logonet, kugi Mba'an awi wureegim o Tamariya nogome kugi Mba'an aanggo warogo wogogak ogobakkigike,

³³ kugigwe Atiyera agago arelen yinit nage, eeke logonet, at endagembogut aga'lek kagak, it aakumi Iterali inoweewi inendagembogut nen maluk eeko nogogwaarak ti, nggwok aret kwe, at Akap perak, mondok iya lombok maluk eerit nage nagagerak paga Aliku Iterali inogoba Ala anini ambik mbareegerak.

³⁴ Aap Akap wonage eyom paga aap awi Mbeten mendek Kiyen nogo nen o Yeriko obaane'me wuriyak nduk, eyak wurake logonet, o onggo mbanogo aput manggu Abiram aret wake, ndi, abu wuppunuk, tu unggwogo logorak ogobakkigike logonet, onggo mbanogo aput enabooluk Tegup aret wake, eereegerak. Ti eereegerak nogo ti, at Aliku ALA nen aap Nun aput Yotuwa yoge kagak yoragagerak nogo aret eereegerak.