1 Endagembogut 15 - Ala Wone Peenok Peebi Mbanak

It Yekura inowe endagembogut Abiya nen eeke nagagerak wone

¹ At Nebat aput Yerobeyam nogo Iterali inowe endagembogut logonet, wone lengganogo yorage kagak, tahun 17 eeppunuk, ambi age paga at Abiya nogo it Yekura inowe endagembogut age nagagerik,

² o Yerutalem logonet, it Yekura wone lengganogo yorage kagak, tahun kenagan aret eereegerak. Ndi, at Abiya agalo ti, aap Abitalom apuluk kwe Maaka aret.

³ At Abiya nogo, ombo Ndawut ogoba Aliku ALA iniki oba panggombunuk, abu liirogon eeke nagagerak ndak-ndak, at togop eeke logolik. At mi'naga'lek kagak, ogoba yi maluk ndi maluk eerit nage nagagerak kokwak, at maluk togop aret eerit nage nagagerak.

⁴ Togop aret eeke nagagerak kwe, at Ndawut eerit nage nagagerak paga, Ndawut ogoba Aliku ALA nen ndi wuninik kwak Ndawut endage o Yerutalem time ki logowak nduk, obaane'me aput wiganak mendek ambi mippege, ndi, o Yerutalem omaawi eerogo pege, eereegerak.

⁵ At Ndawut nogo kangga'lek eenik wonage logonet, Aliku ALA nen, “Yogop ee'nu ndogop ee'nu,” yoge nogo, ambi taganogo pege logolik Aliku ALA enegen kagak, abok ndak-ndak aret eeke nagagerak kwe, ambiriluk maluk eereegerak ti, aap Ket mendek Uriya akwe paga maluk eereegerak.

⁶ Aap Abiya endagembogut wonage kagak, it Erekabeyam Yerobeyam imbirak wim mondok kunik aret eeko nogogwaarak.

⁷ At Abiya endagembogut a'nuk wone lengganogo yorage logonet eeke nagagerak ando abok ti, it Yekura inoweewi inendagembogut eeko nogogwaarak liiru mbanak nogo paga, inom mbanak wonage nogo lek a? Aap Abiya Yerobeyam imbirak wim nambuko nogogwaarak.

⁸ Ndi, at Abiya nogo, ombomini kambunuk nogogwam inom yonggonggola nage mbareegi, ombomini kambunuk, piya unggwogogwam ogoba Ndawut agota nogome eebe pi unggwogo mbareegwa, obaane'me aput Ata inowe endagembogut agagerak.

It Yekura inowe endagembogut Ata nen eeke nagagerak wone

⁹ At Yerobeyam nogo Iterali inowe endagembogut wonage kagak, tahun 19 eeppunuk, ambi age paga at Ata nogo Yekura inowe endagembogut age nagagerik,

¹⁰ o Yerutalem logonet it Yekura wone lengganogo yorage kagak, tahun 41 aret eereegerak. Ndi, at owogolo ti, at aap Abitalom apuluk kwe Maaka nogo aret.

¹¹ At Ata nogo, ombo Ndawut obeelom mban eeke nagagerak kokwak, Aliku ALA enegen kagak, at togop aret obeelom mban eeke nagagerak.

¹² Eeke logonet, it aap mban-mban wut-wut yogo logonet, inagugi eeko nogogwaarak nogo o time nen wumbiige, at mi'naga'lek kagak ombomini nen kugiwak ogobakkigirogo pit nogogwaarak nogo, mondok lek eerogo pege,

¹³ at owogolo Maaka nen ogole warak mendek kugigwe Atiyera ageyo arelen ogobakkigirogo mippereegerak paga owogolo aret kagak, “Kat kwe nggwok logorak lek o,” yinuk, eyo arelen yinik nogo mbanogo niyo Kiriron aa'nggi paga time kani kungge, eereegerak.

¹⁴ At Ata nogo puut-puut paga kugi inake warogo wogogo menggam ogobakkigirik ando abok lek eerogo puulik kagak kwe, kangga'lek eenik wonage logonet, iniki mondok Aliku ALA oba panggombunuk, liirogon aret eerit wundi wage nagagerak.

¹⁵ Ti eeke logonet, at inom, at ogoba inom nen, Ala ake leenogo pereegwaarak mbuti emas inom, mbuti perak inom, yi mendek ndi mendek ogobakkigirik ando alik mendek inom, wonok Aliku ALA awi wurik me pi unggwagagerak.

¹⁶ Ndi, it Yekura inowe endagembogut Ata inom, Iterali inowe endagembogut Mbayeta inom, inendagembogut logonet, imbirak wim mbanak aret wonogogwaarak me,

¹⁷ it Iterali inowe endagembogut Mbayeta nogo nen it Yekura inom wim eerikit nduk, Yekura inowe endagembogut Ata inarum menggim nogome yinggwi-unggwogwe eekwi iyo, o Arama nogome omaawi eerogo pereegerak.

¹⁸ Ndi, at Ata nogo nen mbuti perak-emas Aliku ALA awi wurik me pogo menggam wonage nogo inom, at endagembogut ame o nggwok abe wurik me wonage nogo inom, waganogo at inom eeko menggaarak nen wonok aap Tabirimon aput Mben-Karat, Ketiyon ombooluk nogo, it Aram mendek inowe endagembogut o Ndamitik logonet, inarum wonage nogo, wogori nawak nduk, wone eerogo nappiige logonet,

¹⁹ “An nogoba inom, kat kogoba inom, imbirak nen yogo logonet, Nimbirak ogoorak logorak lek o, yinuk, wone koonogo pereegwaarak nogo ndak-ndak, kat nimbirak wone togop aret koonogo punuk, it Iterali inowe endagembogut Mbayeta kimbirak wone koonogo pogotak nogo, woronogo punuk, an wonage me nen wundi noorak onggo mbuti emas inom, perak inom, kake nappi wagarak ti kolet o,” yinuk, eerogo nappiyareegerak.

²⁰ At Ata nen eerogo nappiyareegerak nogo, aap Mben-Karat konengge nagagerik, “Op aret,” mba'nuk, awuri wim eeka ineegin warak inoweewi o kota-kota Iterali wonogwe nogo, tebenogo piyaawak nduk, nappiya wagagerak wogo logonet, o Iyon inom, Ndan inom, Aben-Mbet-Maaka inom, o Kineret abok aret inom, o Natali abok aret inom, tebenogo piinet wogogwaarak.

²¹ Tebenogo piinet wogogwaarak nogo, at Mbayeta nen konengge nagagerik, o Arama omaawi eerogo pit nage nogo teppunuk, o Tirata ari nanuk, time aret wonagagerak.

²² Ari nagagerak wonage nogo at Ata konengge nagagerik, it aakumi Yekura wonogwe nogo, “Kit ambi puk ariyak lek abok aret aap Mbayeta nen yugum inom, eyo inom, nogo paga o Arama omaawi eerogo pereegerak nogo wa nanip,” yoragagerak wonok wogo mbareegwa, at endagembogut Ata nogo nen o Mbeniyamin kota Nggeba inom, Mitapa inom, omaawi eerogo pereegerak.

²³ At Ata endagembogut a'nuk wone lengganogo yorage logonet, eeke nagagerak inom, eerit nage paga endage nggwok agagerak inom, kota-kota omaawi eerogo pit nagagerak inom, ando abok nogo ti, it Yekura inoweewi inendagembogut eeko nogogwaarak liiru mbanak nogo paga, inom liiru mbanak wonage nogo lek a? Ti eerit nage nagagerak kwe, anggok ari nage eyom paga iyok imbirak andi eereegerak wonagagerak.

²⁴ Ndi, Ata nogo, ombomini kambunuk nogogwam inom yonggonggola nage mbareegi, eebe nogo, ombomini kambeegwaarak ombo Ndawut Agota piya unggwogogwam nogome inom pi unggwogo mbareegwa, obaane'me aput Yotapat inowe endagembogut agagerak.

It Iterali inowe endagembogut Narap nen eeke nagagerak wone

²⁵ At Ata nogo aakumi Yekura inowe endagembogut wonage kagak, tahun ambiret eeppunuk, ambi age paga at Yerobeyam aput Narap nogo, Iterali inowe endagembogut age nagagerik, Iterali wone lengganogo yorage kagak, tahun mbere eereegerak.

²⁶ At Narap nogo ogoba eerit nage logonet, maluk eeke nagagerak paga Iterali maluk eeko nogogwaarak nogo ndak-ndak, at Narap nogo togop aret Aliku ALA enegen kagak, maluk aret eerit nage nagagerak.

²⁷ Maluk eerit nage kagak, aap Itakat paga wiganak mendek Akiya aput Mbayeta nogo nen at Narap wariyak oreewi inom wone mbangge nagagerik, aap Narap nogo it Iterali mendek abok aret inom aakumi Pilitin inawi kota Nggibeton oonda mbani unggwogwe me, at Mbayeta nen Narap nogo warogo pereegerak.

²⁸ At Mbayeta nen Narap warogo pereegerak nogo ti, aap Ata Yekura inowe endagembogut wonage kagak, tahun mbere eeppunuk, ambi age paga warogo pereegerak. Warogo punuk, obaane'me at Mbayeta aret inowe endagembogut agagerak.

^29-30 Endagembogut a'nuk, wone lengganogo awo yorage logonet, at Yerobeyam maluk eeke nagagerak paga it aakumi Iterali abok aret maluk eeruwak nduk, eeke, ndi, Aliku Iterali inogoba Ala anini wunduwak nduk, eeke, eereegerak nogo paga, Aliku ALA nen ayeloman aap o Tilo mendek endage Akiya yoreegerak nogo ndak-ndak, aap Mbayeta nen at Yerobeyam owe-awot inapuri wiganak inom ambiriluk ambi ineenik logowak nduk teppiyoolik tigitogon lek eerogo piyareegerak.

³¹ At Narap endagembogut a'nuk wone lengganogo yorage logonet, eeke nagagerak ando abok ti, it Iterali inoweewi inendagembogut eeko nogogwaarak liiru mbanak nogo paga, inom liiru mbanak wonage nogo lek a?

³² It Yekura inowe endagembogut Ata inom, Iterali inowe endagembogut Mbayeta inom, inoweewi inendagembogut wonogo logonet, imbirak wim mondok kunik aret eeko nogogwaarak.

Iterali inowe endagembogut Mbayeta nen eeke nagagerak wone

³³ At Ata nogo aakumi Yekura inowe endagembogut wonage kagak, tahun mbere eeppunuk, ambi age paga at Akiya aput Mbayeta nogo o Tirata time Iterali inowe endagembogut age nagagerik, wone lengganogo yorage kagak, tahun 24 eereegerak.

³⁴ Inarum wonage logonet, aap Yerobeyam eerit nage nagagerak paga Iterali maluk eeko nogogwaarak nogo ndak-ndak, at Mbayeta kunduk, Aliku ALA enegen kagak, maluk mban aret eeke nagagerak.