1 Endagembogut 14 - Ala Wone Peenok Peebi Mbanak

Ala nen Yerobeyam eeppuurak Abiya yoge kagak, yoreegerak wone

¹ Ne ti eyom paga Yerobeyam aput Abiya nogo andi eereegerak.

^2-3 Eeke mbareegi, Yerobeyam nen akwe nogo yoge, “It aakumi nen, Yi at Yerobeyam akwe, yelok kwaakkeegwi iyo, kayum-kenete nobakko'nok, oroti 10 worarak inom, kuwe inom, nggiin amburu togolowa'na toolak inom, wagangge logomenggendik, It aakumi Iterali inowe kendagembogut arumunggun o, yo'nereegerak aap Ala nen yoge kagak yoraga Akiya o Tilo wonage me, pekka nak o. Pekka nage keenok, wulaga Abiya yi nonggop arigin nogo yokkege kaamunggun o.”

⁴ Yoge mbareegi, at Yerobeyam akwe wone yoreegerak nogo ndak-ndak eeke nagagerik, at Akiya nogo, abu anggok a'nuk, enegen ogut agagerak yi mendek ndi mendek enegen koorak meek, ame o Tilo wonage me nagagerak.

⁵ Nage kagak, Aliku ALA nen aap Akiya yoge logonet, “At kwe Yerobeyam akwe ti, aagaluk wulaga andi eekerak kenok, yogop-ndogop yorenok nduk, kwe alik mbaruwak eeppunuk, keya wage agaarik o,” yoreegerak.

⁶ Yoreegerak wonage me, aap Akiya nen kwe nogo, iyok oone agan awo tungga paga ungguurak nduk eeke konengge nagagerik, kwe nogo yoge, “Yerobeyam akwe yi wae. Kat nonggop nduk, kwe alik negen eeppatinuk wagan o? Mbet unggwi omok o!” Yoreegerak unggwi wage mbareegi, yoge logonet, “Wone aaninggin mendek yoru, yo'negerak kenok, an yokkiri o.

⁷ At Aliku Iterali inogoba Ala yegerak nogo, aap Yerobeyam yori nanok nduk, yokkiri o. Aakumi Iterali inenggela'me nen an napuri Iterali inarum logowak nduk, at Yerobeyam mippege nagarik,

⁸ napuri Iterali Ndawut paga wiganak aput abu'me piinok wonagagerak nogo, An unde logokit, mbake kagak, ndinogo at Yerobeyam wogoreegirak kwe, nayeloman Ndawut iniki mondok noba panggombunuk, nenegen neegak abe mban eerit nage logonet, Yogop ee'nu ndogop ee'nu, wone yugu nogo liippunuk, mugurok nage nagagerak kokwak, at togop eeke logolik.

⁹ At endagembogut awo aga'lek kagak it aa'nduk inendagembogut ogogwaarak nogo nen maluk eeko nogogwaarak ti, nggwok aret eeko nogogwaarak kwe, at perak, abunuk maluk mondok alik negen eerit nage logonet, At iniki wakkolaawak, nombake nagagerik, ambokan mbo paninuk, nobaane'me kugi inogut mbuti paga ogobakkigippatinuk, alut eerit nage agaarik o.

¹⁰ Togop eeke kenok, at Yerobeyam apuri wiganak paga aaninggin nggwok lombok inoba kwippiyaagin me, at paga wiganak wologwe inendage warak inom, inendage lek inom, abok aret inaan ineenggi paga lenggennagaatak obari kenok niyo mbilik-mbelek koorogo nappogo mengga kwak, it togop aret lek eerogo piyaagin o.

¹¹ It Yerobeyam paga wiganak o kota kanggwi iinok, nggeewo nen ineebe nunggwi, ndi, it o kota endekem kanggwi iinok, towe wiganinuk nugu menggaarak nen nunggwi, eerugun o, yinuk, Aliku ALA nen aret yegerak me, yokkigi o.

¹² Ndi, kat perak, kiyokan kame nako. Ndi, nage logomenggendik, kawi kota kiyok awo pi unggwage keegak, kaagaluk ti, kambigin o.

¹³ Kangge kenok, it aakumi Iterali mendek abok aret aleenggu maako logomenggaarik, at eebe waganogo kanggwi piya unggwogo menggam pi unggugun o. At Aliku it Iterali inogoba Ala nen Yerobeyam paga wiganak at wulaga ti mban obeelom eeke kage nagagerak me, at mban eebe pi unggugun o.

¹⁴ At Aliku ALA nen at Yerobeyam paga wiganak inoorogo piyaakit nduk, inobaane'me aap alik ambi Iterali inowe endagembogut at ake eeke logorak mippigin o. Mippigin nogo muk panggoni wagaarak me, yogondak yi aret aga o.

¹⁵ At Aliku ALA anini mbaruwak nduk, inagugigwe Atiyera eyo arelen yinit nogogwaarak paga niyo nen mbereewak nuk-nuk eeke menggi kwak, at Aliku ALA nen it Iterali aaninggin inoba piige logonet, inombomini nggween obeelom wogoragagim yime nen nggiginogo niyo Eparat enebagan mak eerogo wumbiyaagin o.

¹⁶ At Yerobeyam nen maluk eerit nage paga it aakumi Iterali mendek maluk eerit nogwe me, Aliku ALA nen it Iterali mbo piyaagin o,” yinuk, yoreegerak.

¹⁷ Yoge mbareegi, at Yerobeyam akwe nogo mi'nage nagagerik, o Tirata agagerak. Nage nagagerik, awo arungga paga iyok pi unggwage kagak, aagaluk nogo aret kambeegerak.

¹⁸ Kangge mbareegi, nggween taambunuk, at Aliku ALA nen ayeloman Ala yoge kagak yoraga Akiya yoreegerak nogo ndak-ndak, it aakumi Iterali mendek abok aret erabun ndoombunuk, aleenggu maako nogogwaarak.

Yerobeyam kambeegerak wone

¹⁹ At Yerobeyam nogo endagembogut logonet, wone lengganogo yorage nagagerak inom, wim eeke nagagerak inom, ando abok ti, it aakumi Iterali inoweewi inendagembogut eeko nogogwaarak liiru mbanak nogo paga inom liiru mbanak wonage o.

²⁰ At Yerobeyam nogo Iterali inowe endagembogut logonet, wone lengganogo yorage kagak, tahun 22 eeke nagagerik, ombomini kambunuk nogogwam inom yonggonggola nage mbareegi, obaane'me aput Narap inowe endagembogut aret agagerak.

It Yekura inowe endagembogut Erekabeyam eeke nagagerak wone

²¹ Aap Talomo aput Erekabeyam nogo ndarak kagak tahun 41 age paga aakumi Yekura inowe endagembogut age mbareegi, at Aliku ALA nen endage ki logowam aakumi Iterali inawi kota-kota abok aret wonogwe iigak, at leenogo pereegim kota Yerutalem nogome logonet, it Yekura mendek wone lengganogo yorage kagak, tahun 17 eereegerak. At agalo ti, kwe Amon mendek endage Naama aret.

²² It aakumi Yekura mendek inombomini maluk nggwok aret eeko nogogwaarak paga Aliku ALA eebi mbake logonet, iniki laakot inombake nagagerak kwe, it inombowologwe mendek yi perak, Aliku ALA enegen kagak maluk mondok iya lombok aret eeko nogogwaarak.

²³ Eerit nogo logonet, puut-puut paga inagugi eeko menggam ogobakkigikwi, yugum paga inagugiwak ogobakkigirogo pugwi, puut-puut paga inom, eyo wiganak alome inom, abok aret kugigwe Atiyera eyo arelen yinogo mippit nogwe,

²⁴ o time inagugi eeko logonet, aap mban-mban wut-wut yogwe, eeko nogogwaarak. At Aliku ALA nen aa'nduk a'nuk, yi aakumi ndi aakumi o Kanan mugogo wumbiyareegerak nen maluk ogole warak lombok eeko nogogwaarak nogo, it Yekura togop aret eerit nogo nogogwaarak.

²⁵ Aap endagembogut Erekabeyam mi'ndak kagak, tahun 4 eeppunuk, ambi eeke paga at aap Metit mendek inowe endagembogut Titak nogo o Yerutalem inom wim eereegerak.

²⁶ Wim eeke logonet, yi mendek ndi mendek onggo iya mendek Aliku ALA awi wurik me wonage nogo inom, aap endagembogut amendek onggo iya mendek awi o nggwok abe wurik me wonage nogo inom, Talomo nen mbuti emas paga nggeemu ogobakkigireegerak inom, abok aret kugun wonok nagagerak.

²⁷ Wonok nage mbareegi, nggeemu ogobakkigirik wonok nagagerak nogo, obaane'me at endagembogut Erekabeyam nen mbuti tembaga paga ogobakkigirogo punuk, it aap inowe endagembogut awi o nggwok abe wurik tungga paga arum menggaarak inoweewi nogo nggeemu ti, unde eeppiyareegerak.

²⁸ Ndi, aap endagembogut nogo Aliku ALA awi wurik me unggwi nage kenok, it aap unde eeppiyareegerak nogo nen nggeemu nogo wonok, milininuk unggwi nogo nagaatik, wundi wage kenok, milininuk ame pi woraanuk, nggeemu nogo obaane'me wonage menggim nogome pi unggwagak eeko nogogwaarak.

²⁹ Aap Erekabeyam nogo endagembogut a'nuk wone lengganogo yorage logonet, eerit nagagerak ando abok ti, it aakumi Yekura inoweewi inendagembogut eeko nogogwaarak liiru mbanak wonage nogo paga, inom mbanak wonage nogo lek a?

³⁰ Erekabeyam Yerobeyam imbirak wim mondok-mondok kunik aret eeko nogogwaarak.

³¹ Ti eeko nogogwaarik, at Erekabeyam nogo ombomini kambunuk nogogwam inom yonggonggola nage mbareegi, ombomini kambeegwaarak Ndawut agota piya unggwogogwam nogome inom pi unggwogogwaarak. At agalo ti, kwe Amon mendek endage Naama aret. Ndi, at Erekabeyam obaane'me aput Abiyam nogo inowe endagembogut agagerak.