1 Endagembogut 12 - Ala Wone Peenok Peebi Mbanak

Iterali ogooppunuk, inoweewi inendagembogut inalitak mippiyareegwaarak wone

¹ Ti'nuk, it aakumi Iterali nogo abok aret aap Erekabeyam inowe endagembogut logorak mippuwok nduk, o Tikem kuwak ari nogogwaarak me, aap Erekabeyam nogo o time aret nagagerak.

^2-3 Ndi, aap Nebat aput Yerobeyam nogo, aap endagembogut Talomo wonage me nen mbaganit o Metit ari nagagerak wonage me, ti kuwak eekwi nogo, aruk konembunuk wonage me, at woraawak nduk, yonggo yori nogo mbareegwa, o Metit nen iyokan wagagerak. Wage nagagerik, Iterali kuwak eerak nogo inom nen aap Erekabeyam nogo ka nogo nogogwaarik, wone yogo logonet,

⁴ “Kat kogoba Talomo nen eyo aaninggin tapi uut paga kwippunuk, wonok nogwe kwak, aaninggin ninoba pinanege nagagerak kwe, eeriyak mondok meek aaninggin lombok ninoba wonage yi, kat nen teeluk eerogo pinanege kenok, nit kayeloman mini logonet, kake eeko logowok o,” yoreegwaarak.

⁵ Yogo mbareegwa, aap Erekabeyam nogo nen wone onggo yorage logonet, “Niniki koongge neegak, nogo kenagan yinuk, ko'lu neya woraabagip nduk, nanip o,” yorage mbareegi, aret nogogwaarak.

⁶ Nogo mbareegwa, at endagembogut Erekabeyam nogo nen Iterali inoweewi at ogoba Talomo wonage kagak inom eeko nogogwaarak nogo, wone ambi at yoruwak nduk yorage logonet, “It aakumi ti, wone onggo nonggop yoroorak nogo yo'ninip o.”

⁷ Yorage mbareegi, it nen wone onggo yogo logonet, “Kat o yogondak yi paga aakumi ti, Inayeloman a'nuk inake eerikit, mba'nuk yokkugwi nogo, wone onggo obeelom yorage keenok, it nen mondok-mondok kayeloman mini aret logogun o,” yinuk, yoreegwaarak.

⁸ Yoreegwaarak kwe, it aap inoweewi nen wone aap Erekabeyam yoreegwaarak nogo, at nen mbo punuk, at inom ndak-ndak tawe ogogwaarak inom yabu eekwi nogo, yorage logonet,

⁹ “Eyo aaninggin tapi uut paga kwippunuk, wonok nugwi kokwak, kat kogoba nen yabu aaninggin ninoba pinaneegerak nogo, teeluk eerogo pinanu o, yo'nugwi yi, wone onggo ngge yoroorak mbakop? Yoroorak nogo yo'ninip o.”

¹⁰ Yorage mbareegi, it aap inom ndak-ndak tawe ogogwaarak nogo nen at yogo logonet, “Eyo aaninggin tapi uut paga kwippunuk, wonok nugwi kokwak, kogoba nen aaninggin ninoba pinaneegerak nogo, teeluk eerogo pinanu o, yinuk, yokkugwi nogo wone yogop yoret o.

¹¹ An nogoba obate ti, nggwok aret kwe, mbuuluk negen. An neenggi anopa yi perak, nggwok lombok me, eyo aaninggin tapi uut paga kwippunuk, wonok nugwi kokwak, nogoba aaninggin kinoba pinagareegerak nogo ti, teeluk negen aret kwe, an nen aaninggin abunuk nggwok lombok kinoba pinagage, nogoba nen muun ya'mbiran nggora eerogo kinooke nagagerak kwe, an nen perak, poondo alok paga ngguurik-ndaganak eerogo kinooke, eerigin, yoraanu o,” yinuk, yoreegwaarak.

¹² Ndi, aap endagembogut nen, “Nogo kenagan yinuk, ko'lu neya woraabagip o,” yoragagerak nogo ndak-ndak, nogo kenagan yinuk, ko'lu aap Yerobeyam inom, it aakumi Iterali abok aret inom, nen aap Erekabeyam ka wogo mbareegwa,

^13-14 it Iterali inoweewi nen, “Yogop yoraamunggun o,” yoreegwaarak nogo aap endagembogut Erekabeyam nogo nen mbo punuk, it aap tawe nen yoreegwaarak nogo aret oone omaawi paga yorage logonet, “Eyo aaninggin tapi uut paga kwippunuk, wonok nugwi nogo kokwak, nogoba nen aaninggin kinoba pinagareegerak nogo ti, teeluk negen aret kwe, an nen aaninggin abunuk nggwok lombok kinoba pinagage, ndi, nogoba nen muun ya'mbiran nggora eerogo kinooke nagagerak kwe, an nen perak, poondo alok paga ngguurik-ndaganak eerogo kinooke, eeke logogin o,” yinuk, yoragagerak.

¹⁵ It aakumi nen aap endagembogut wone yogwi liippega'lek wonagagerak nogo ti, Aliku ALA nen eerit nogwe nogo, ena koonogo pege logonet, aap Tilo mendek Akiya yoge mbareegi, aap Nebat aput Yerobeyam yoreegerak nogo, a'me nggelok yuwak nduk, wone ti, liippega'lek aret wonagagerak.

¹⁶ It aakumi Iterali abok aret nen aap endagembogut yoreegwaarak nogo, koneniyak eebi mbake kogo nogogwaarik, aap endagembogut nogo yogo logonet, “At Ndawut nen nit ambi eeppinanege, Aap Itayi aput nen nineyate wo'nirage, Eerigin lek aret me, Aakumi Iterali yi wae. Kinalitak lombok kinawooliyana nogwe, Ndi, kit Ndawut apuri-ombowologwe yi wae. O yogondak kinobaalombok koonggologwe, Eeko logonip o,” yinuk, it Iterali mendek iname nogogwaarak.

¹⁷ Ti nogwe iigak, aap Erekabeyam nogo aakumi Iterali mendek inawi o kota-kota Yekura wonogwe nogo mban inowe endagembogut logonet, wone lengganogo yorage nagagerak.

¹⁸ Ti'nuk, aap endagembogut Erekabeyam nogo nen aap Aroram oone omaawi paga yabu lengganinake logorak mippereegerak nogo, it Iterali iniki yanggoninabuwak nduk, nappege mbareegi, it aakumi Iterali nen yugum paga wareegwaarak aret kambeegerak. Warogo punuk, aap endagembogut Erekabeyam wariyak nduk eeko mbareegwa, mbaganit woroorak meek aret kwe, kagak, mbet-mbet aret anggweendo paga lagangge nagagerik, mbaganit o Yerutalem wagagerak.

¹⁹ Ti eyom paga nen nok, o yogondak kuli it Iterali mendek nogo nen, “Aap Ndawut ombowologwe wiganak mendek ninarum logorak nineebi o,” yinuk, yogwe wonogwe aret.

²⁰ Ndi, it Iterali mendek nogo at Yerobeyam iyokan wagagerak inaruk konenggo nogogwaarik, it Iterali wonogwe nogo abok aret inom wone mbanuwok nduk, yonggo yori wogogwaarak nage mbareegi, Iterali inowe endagembogut logowak nduk, mippereegwaarak. It aakumi Yekura mendek nen mban, “Aap Ndawut ombowologwe wiganak mendek nen ninowe endagembogut logowak o,” yinuk, mbako nogogwaarak.

Ala wone liirogon eeka Temaya nen eeriyak yereegerak wone

²¹ Aap Erekabeyam nogo o Yerutalem ari wage nagagerik, “An Talomo aput aret me, aakumi Iterali nabu'me piirogo logokit nen tebenogo piya naakit o,” yinuk, it Yekura mendek abok aret inom, inanebunu Mbeniyamin mendek inom, inawuri wim eeka kero mban ineebe seratus delapan puluh ribu aret kuwak eeginabeegerak.

^22-23 Kuwak eeginabeegerak kwe, at Ala nen aap Ala wone liirogon eeka Temaya wone yoreegerak yi aret. “Talomo aput it Yekura inowe endagembogut Erekabeyam inom, it aakumi Yekura mendek inom, Mbeniyamin mendek inom, it inanebunu ambik Iterali ando nogo inom, wone yora nanok nduk yokkiri o.

²⁴ At Aliku ALA nen ari logonet, Aakumi Iterali ando ti, it mendek aret me, inom wim namburi noorak abu mage o. Wone yi agaarak nogo ti, an nen aret eerogo piigirak me, inalitak lombok iname nawak, yegerak, yora nak o,” yinuk, yoreegerak nogo yora nage mbareegi, konembunuk, Aliku ALA nen wone lengganogo yoragagerak ndak-ndak aret iname nogogwaarak.

Aap Yerobeyam nen Ala mbo pereegerak wone

²⁵ Ti'nuk, aap Yerobeyam nogo nen o Eparayim puut nggelok-nggobok me kota Tikem nogome omaawi eerogo punuk, wonagagerik, wundi nanuk, kota Penuwen kunduk omaawi eerogo pereegerak.

^26-27 Eeke nagagerik, aap Yerobeyam nogo inikime mban mbake logonet, “O yogondak yi paga it aakumi yi, o Yerutalem Aliku ALA awi wurik me ake warogo wogori nogo logomenggaarik, it Yekura mendek inowe endagembogut Erekabeyam nogo, Ninowe endagembogut aret logowako, yinuk, an nooppunuk, at ka nogwe iinok, it aakumi an nabu'me piinok wonage minggim yi, Ndawut ombooluk abu'me ari nagun mbaki,”

²⁸ yinuk, oreewi inom wone mbambunuk, at Yerobeyam nen mbuti emas paga tapi aagalogwe inogut mbere ogobakkigippunuk, it aakumi Iterali yorage, “Kit Iterali mendek yi wae. Kit o Yerutalem Ala ake alut eeri noorak tu nda aret me, o Metit nen wokkiren wundi wagagerak nogo kinogoba Ala kwak alut eeko logorak yi aret me, kinigen pekkaanip o.”

²⁹ Yorage nagagerik, tapi ogut ogobakkigirik ambi o Mbeten pi nage, ndi, ambi o Ndan pi nage, eereegerak.

³⁰ Eeke mbareegi, aakumi o Ndan kuli nen tapi ogut ogobakkigirik nogo alut eerit nogo nogogwaarak paga maluk nggwok aret eereegwaarak.

³¹ Ndi, aap Yerobeyam nogo nen ti eeke nagagerik, inalut eeko logowam o puut-puut paga wurogo pit nage, ndi, ti unde logowak nduk, it Lewi mendek lek aakumi ugun mendek mippiige,

³² ndi, tut 6 penembunuk, ambi penenak tanggal 15 paga, it Yekura nen inale'nggen paga laago lako mengga kwak, inale'nggen nen laago lako logowak nduk, koonogo pege, eeke nagagerik, o Mbeten tapi aagalogwe ogut ogobakkigirik inake warogo wogogo menggam nogome inake warogo wogorage, o Mbeten puut paga alut eeko logowam unde logowak nduk, aap mippiige, eereegerak.

³³ “Tut yi paga eeriyak o,” yinuk, koonogo pereegerak tut 6 penembunuk, ambi penenak, tanggal 15 o Mbeten tapi aagaluk ogut wakkagak aago nogo, ake warogo wogogak ogobakkigireegerak paga, warogo wogoreegerak nogo ti, it aakumi Iterali nen inale'nggen paga eeko logorak koonogo pereegerak kenok, warogo wogogak ogobakkigireegerak ti paga ake warogo wogoreegerak.