Yohanes 5 - ALLAH ANE WENW KET MEKE WAROGO WOKNINAKHIKHE WENE

Yesus nen, ap ageikhe oba u meke i Betesda yekelekma u hano hagakhikhe wene

¹ Itithogon hagatluk nen, it Yahudi meke pesta ageikhe hagakhe lagoukha meke hagakhunem Yesus yabokane o Yerusalem usasikhe.

² O Yerusalem etoma, leget horlako leget ape palekma ageikhe etaga Domba Agolak egarek meke horok horok etoma i yekelek kolam ineramen hulelogo 'bisukhama ageikhe, it Ibrani meke inane baga etaga Betesda egarek meke yekelek welageikhe. I yekelek kolam iti aik obake etoma dagak-dagak, orlisa 5 oba hano halek werekma,

^3-4 akhuni doalegat inoba u warek meke inom, inileken puk meke inom, initibagal weak meke inom, inae ut warek meke inom, etoma witita dogolik, [i yekelek etnogo hibiku-yogoku aborlok isinem therogo welagoukha. Itithogon therogo werekma, malaikat Allah meke usatluk, i etnogo aborlogothugunem, it akhuni inoba u warek meke emenogo ageikhe tak alebageik i yekelekma etnogo usekhe halok, yi u ti u inoba akin meke alhe meke tha'bokhogonat dek aga lagoukha iti nen, therogo welagoukha iti.]

⁵ Itithogon therogo welagoukha meke ap ageikhe oba u warek werek korlek 38 tahun hagatlageikhe meke inom inebe etoma witik werekma,

⁶ Yesus ileken hasikhesik nen, “Ap yi haganeat nen yigithogon welagarekma higi,” iluk ileken ekagat hasikhesik, men yogokhikhe, “Nopase. Hat hano hagathabusak warlok a? Ha'it a,” iluk yogokhikhemo,

⁷ ap etnogo nen men yogokhikhe, “Nagot o. I yekelek yi aborlok isinem, an nebe hapokhogon ima kola'anusak meke, an nagarumi yoma dek nogo nen, nabusagat nen erogat usagaluk walhasi korlek, it aperek tak alebageik usiliogei o,” iluk yogokhikhemo,

⁸ at Yesus nen, men yogokhikhe, “Nopase. Hebe melatluk nen, harlit thabuleka talek meke ithi horlalok lan o,”

⁹ iluk, yogokhe, korlek eranogoat ap etnogo oba u dek ageikhesik nen, arlit talek meke etnogo yukulogo horlalok lageikhe. At Yesus nen ap u hano hagakhikhe iti, it akhuni Yahudi meke iniki 7 baga Allah hasik werlegat welageikharek etnogo baga hagakhikhe.

¹⁰ Itithogon werlegat werek korlek hagakhikhemo lagunem, it ap koktek Yahudi meke nen inileken hasukhasik nen, ap u kerat dek ageikhe meke etnogo men yogokhukha, “Yak yi. O yogotak nen, niniki 7 baga nit Allah hasik werlegat dogolik, hat harlit eka wolok lausak dek meke wolok laga lagan,” iluk yogokhukhama,

¹¹ at ap etnogo nen, men yogeisasikhe, “Dek o. An ap u hagatnakhe meke iti nen, Harlik eka horlalok lan, iluk yoknekhemo nen horlalok waga lagei o,” iluk yogeisasikhemo,

¹² it nen hinok oba wokhekhe dogolik, “Ap iti, tha nen, Harlit eka talek horlalok lan, iluk yokhekhe,” iluk oba hinok wokhasukha mekeat he,

¹³ at Yesus akhuni inebe doalegat welagoukha meke emenogo inakla nalageikhemo, at ap oba u hano hagakhikhe meke etnogo nen, “Tha nen hagatnakhesik yoknekhe heat,” iluk obakha palageikhesik welageikhe.

¹⁴ Itithogon hagakhukhasikmo nen, yabokane at Yesus ap etnogo ipisak Allah ai halekma abuk agoukhasik nen, men yogokhikhe, “Nopase. Yogotak hat hoba u arat dek aga iti yabokane weak kok meke ageikhe hoba asunogo, weak meke ageikhe hagakhun o,” iluk yogokhikhe.

¹⁵ Itithogon yogokhikhemo, at ap etnogo it ap koktek Yahudi meke inoba lageikhesik nen, men yogeisasikhe, “Ap an u hagatnakhe igi etnogo, Yesus nenat hagatnakhemo o,” iluk yogeisasikhe.

¹⁶ Itithogon yogeisasikhemo, it akhuni Yahudi meke Allah hasik iniki 7 baga werlegat werek korlek, Yesus nen ap etnogo u hano hagakhikhe iti nen, at Yesus ebe weagatduogoluk hagakhukha,

¹⁷ Itithogon hagakhukha mekeat he, at Yesus nen wene men yogeisasikhe, “An nopase iki ageikhe thogotdigidek, o yogotak yi inomat hagarinakho motok welagarek iti hak, an itithogonat hagarinakho welagei o,” iluk yogeisasikhemo,

¹⁸ it ap koktek Yahudi meke emenogo nen iniki 7 baga Allah hasik werlegat dogolik, Yesus nen u hano hagasusak dek meke hagakhikhe iti baga anek ebe wasuogoluk isukha 'buk. At he, at nen, “An nebe Allah ninom tak-tak,” u hak he, “An nopase ebe Allah at o,” iluk isikhe iti nen, ebe wasuogoluk ebenageik abok palhe lagoukha.

At Allah nen, a'but Yesus nen akhuni oak denogo wene inoba 'bigik, kokhik, iteerek dogoagaluk ikimo 'bisikhe wene

¹⁹ Itithogon abok palhe lagoukhama, at Yesus nen, ap emenogo wene yigithogon yogeisasikhe, “Yi meke ti meke an nopase nen hagakhunem nileken higidek, an nakla nen kagalogo hagasusak erlok dek iti nen he, an nopase hagakherek meke tak-tagat hagakhe lagei o, iluk eberogonat yokhisigi o.

²⁰ An nopase nen, a'but an etaiken hunik motok dogolik, at ebe nenat yi meke ti meke hagakherek meke tha'bokhogonat yakulnukhunem yogotak ya hagakhunem hinileken neegep iti re, herlekha'bugat negen meke re, yabokane hit nen hogorasuagaluk yakulnukhunem kok meke hagakhunem hit hinileken neagun meke weregat o.

²¹ Nen, an nopase nen akhuni warek meke inilugurinakherek iti hak, a'but an nen itithogonat inilugurinabigin, iluk nakla apegerek meke inebe tomok inilugurinakherek.

^22-23 Akhuni tha'bokhogonat nen an nopase hogorakharek iti hak, an a'but itithogonat hogotnakhe dogoagaluk, at nen akhuni oak denogo wene inoba 'bigik, kokhik, hagakherek dek o. A'but an nenat, akhuni oak denogo wene inoba 'bigik, kokhik, hagasuagaluk, niki baga 'bisikhe o. Halok he, it akhuni aperek nen an hogotnabiogei dek halok he, an nopase la'ani ageikhe meke iti, hogorariogei degat o,” iluk yogeisasikhesik wene yabokane ageikhe men yogeisasikhe,

²⁴ “It akhuni tha nen, an nane waganhe dogolik, inetaiken an la'ani ageikhe meke etnogo oba hakotdugun halok, akhuni watlatluk lageikharek erlo thogotdisalok iniluk motok dogogun meke erlo baga arat wageikhasik werek o. Iniluk motok dogogun meke iteerek ageikhasik werek iti nen, yabokane wene inoba 'bigin dek o, iluk eberogonat yokhisigi.

²⁵ Nen, akhuni warek meke nen, an Allah a'but nane inasuk holugun oba aban werek mekeat he, arat asi agasik werek o. It nane inasuk holugun meke halok, iniluk atluk iniluk motok dogogun o, iluk, eberogonat yokhisigi o.

²⁶ Iniluk motok welageihkarek meke erlo an nopase ekaerek ite welagarek iti hak, a'but an niki baga 'banhikhemo iteerek welagei o.

²⁷ An nebe abat itaklasi agagi iti nen, akhuni oak denogo wene inoba 'bigik, kokhik, hagasuagaluk, nopase nen anat niki baga 'banhikhe o.

^28-29 Nen, yabokane akhuni tha'bokhogonat inoak obake tomok nen, an nane inasuk holiluk, iniluk asugun hurli itinem werek o. It akhuni nen inobabut hano hagakhe lagoukha meke halok, iniluk motok dogoagaluk meldisigik, nen, it aperek inobabut weak hagakhe lagoukha meke halok, wene inoba 'bigiluk meldisigik, hagasigin iluk yokhisigi iti nen, Wene iti nayuk e, iluk, hogorakhup o,” iluk yogeisasikhe.

³⁰ Itithogon yogeisasikhesik nen, wene ageikhe men yogeisasikhe, “An narligat nakla nen kagalogo yi meke ti meke hagasusak erlok dek iti nen, an nen nakla apalok hagakhe lagei dek o. At an la'ani ageikhe meke akla apekherek meke hagasigiluk hagakhe lagei iti nen, nopase ane mutlugat, akhuni oak denogo wene inoba 'bigik, kokhik, hagakhe lagei iti, mothogonat hagakhe lagei o,” iluk yogeisasikhe.

At Yesus abok pilinogo yogeisegarek wene

³¹ Itithogon yogeisasikhesik nen, ageikhe yogeisekhe dogolik, “An nebe hutdanuagaluk nekaerek nabok pilinogo yokhiselema, eberogonat iluk hinakla apelep dek o.

³² Itithogon mekeat he, an nebe hutdanuagaluk, at ageikhe nen nabok pilinogo yokhisiliogo iti, eberogonat yokhisiliogo iluk, an nilu o.

³³ Nen, hit nen, Yohanes oba an nobasik hinok waganuagaluk hinagarumi yoko la'isasigipmo at nen, ebe wene hasik nabok pakhogon yokhisasikhe apigi.

³⁴ An nebe hutdanuagaluk akhuni nen nabok pilinogo yogeisegarek iti warlok nen yokhisekhe lagei 'buk. Allah nen hit tilhinabuagaluk yokhisekhe lagei o.

³⁵ At Yohanes iti ebe re, isagal yibarlogo 'bisinem yakherek hak werekma, hit nen, Isagal yago ninoba 'bekhe dogoak iluk, elanma hasigat hinakla arleken akhekhe lagagip iti,

³⁶ an nebe hutdanuagaluk, at nen nabok pilinogo yokhisekhe lageikhe mekeat he, erlok dek negen. At he, an nopase nen, Nayabu ato 'bigidek tha'bokhogon hagatno, iluk nayoko 'bisikhemo hagakhe lagei iti baga anek he, akhuni nen, At ebe opase nen la'i ageikhemo, iluk nabok isinem inasuk holiluk nebe hutdanu hagat, hutdanusak o.

³⁷ An nebe hutdanuagaluk, nopase nen la'ani ageikhe meke iti nen, nabok pakhogonat yokhisasikhe mekeat he, hit nen nopase ane hinasuk holhidegat, elokhoken hinileken higidegat dogolik

³⁸ at nen nayoko 'biluk la'ani ageikhe mekeat he, hinetaiken noba hakotdekhe lagap dek iti nen, at ane hinakla werek motok dek o.

³⁹ Hit nen apekhe dogolik, Niniluk motok dogogun he, Allah ane holal waganek hago welago yi bagaat dogogun o, iluk, holal waganek iti hanorogon 'bikhegethep mekeat he, holal waganek iti, an nebe hutdanuagaluk holal waganhukhama werek korlegat,

⁴⁰ hinebe hinilugutdinaguagaluk an noba wisusak, hina'it o.

⁴¹ Itithogon hagakhethep mekeat he, an anek he, akhuni nen hogotnabuagaluk hagakherek dek o.

⁴² Hit anek he, Allah hinakmurogo welagathep motok dek iti, an hinobabut nilu o.

⁴³ An nopase nen la'ani ageikhemo wagagi mekeat he, hit nen an nebe woknakhe lagap dek o. Itithogon mekeat he, at ageikhe ekaerek akla apalok nen waga halok anek, ebe waganugun hinobabut hisekhe lagei o.

⁴⁴ Allah arligat ikhok motok welagarek iti nen hogothinabuagaluk hagakhidek dogolik, hit-hirat hat ageikhe nen hogorakhik, hat ageikhe nen hogorakhik, hogorakhekhe lagap iti nen, hinetaiken an noba nikithogon hakotdusak apegep. Erlok dek o.

⁴⁵ Meke re, an nen Allah il oba wene hinoba 'bigin iluk hinakla apugup o. At he, Musa ane iti bagaat hanotninabigin iluk hinakla arleken akhegethep mekeat he, at nenat, wene hinoba 'bigin o.

⁴⁶ An nabok hinilu asuagaluk, at Musa nen holal waganogo 'bisikhe iti nen, at nen holal waganhikhe meke iti eberogonat iluk hutdekhe dogolepma, Yesus eberogonat, iluk hutdanilebat o.

⁴⁷ Meke re, wene Musa nen holal waganogo 'bisikhe meke iti, hit nen eberogonat iluk hutdigidek dogolik, an nane iti nikithogon hutdiluk eberogonat iluk apagun. Erlok dek o,” iluk yogeisasikhe.