Yohanes 20 - ALLAH ANE WENW KET MEKE WAROGO WOKNINAKHIKHE WENE

Yesus ebe iluk ageikhe wene

¹ Warek itithogon 'bisukhasikmo nen, o hari Minggu baga, at he Maria ai o Magdala meke etnogo o hi werek korlek huben siakhogon oila warek 'bisukhama etnogo wageikhesik ileken 'bikhasikhe meke, thu helekit meke larogo 'bisukha meke etnogo, arat dipilogo la'isukhama thu hualek werekma hasikhe.

² Itithogon werekma ileken halok nen, pirlirli motok ap Simon Petrus etnogo inom, Yesus agarumi ane waganhe lagoukha meke ageikhe at etaiken hunik meke etnogo inom, inoba lageikhesik men yogeisasikhe, “Ninoe Etagapogot ebe warek akhuni oila nen wolok dukhegasik koma 'bi lageikha heat, nit ninobakha palaga o, nerugi,” iluk yogeisasikhemo,

³ at Petrus men, Yesus agot ageikhe etnogo men, ipisak oila warek 'bisukhama etnogo lagoukha.

⁴ Itithogon ipisak tak-tak pirlikha lagoukha meke re, at Yesus agot ageikhe etnogo nen, at Petrus yabokane diluk, at tak ibat oila warek 'bisukhama etnogo wageikhe.

⁵ Itithogon arat wageikhesik, oila warek 'bisukhama etnogo uroak thoma iluk ileken thok-thok kolakhasikhe meke, kain etaga lenan meke yilogo 'bisukha meke etnogo anek nokorlek agat oba werekma ileken hasikhesik nen, ebe oila akla ukigidek huk ageikhe.

⁶ Itithogon ukigidek werekma, at Simon Petrus etnogo yabokaneat at oporlik waga lageikhesik piokthegat warek 'bisukhama akla ukisikhesik nen ileken 'bikhasikhe meke re, kain etaga lenan meke etnogo anek nokorlek agat oba werekma hasikhe.

⁷ Itithogon mekeat, kain Yesus ukuloak yilik welageikhe meke nokorlek anek he, su kain meke nokorlek welageikhemo eranogo inom opakimo dek. Asokneat ponhogo negen dikilik werekma ileken hasikhe.

⁸ Itithogon hasikhesikmo nen, at Yesus ane waganhe lagoukha meke ageikhe alebageik warek 'bisukhama wageikhe meke etnogo yabokane akla ukisikhesik nen ileken 'bikhasikhe meke, tha'bokhogonat itithogon werekma ileken hasikhesik nen, eberogonat iluk hutdisikhe.

⁹ At itithogon ileken higidekma, alebat it aperek nen Allah ane holal waganogo 'bekhe dogolik, “At ebe watlatluk nen yabokane iluk asiginat o,” iluk isukhama holal waganek werek meke iti it hutdigidek welagoukhasik nen, itinem at ileken hasikhesik nen hutdisikhe iti.

¹⁰ Itithogon hutdisikhesik nen, it Yesus agarumi ane waganhe lagoukha meke ipisak etnogo inapuke uma lagoukha.

At Yesus ebe he Maria ai o Magdala meke etnogo ileken hoagaluk elokhoma wisam ageikhe wene

¹¹ It itithogon lagoukha mekeat he, at he Maria anek, yabokane wageikhesik warek 'bisukhama etnogo alilu metek dogolik, ileken kolageik de ago welageikhe.

¹² Itithogon de aga dogolik, ileken kolakhasikhe meke, at Yesus warek 'bisukhama etnogo malaikat inebe pere inasu kut meke ugu, at ageikhe Yesus warek 'bisukhama ukuloakmake mot-mot, nen, at ageikhe alokoke mot-mot, hurek werekma ileken hisasikhe.

¹³ Itithogon hisasikhemo, it nen men yogokhukha, “He yi neru o. Hat nenaluk de aga lagan,” iluk ugun apasukha, at Maria nen, men yogeisasikhe, “An noe Etagapogot warek akhuni nen wolok o koma 'bi lageikhama heat, an nokodek nen de aga lagei o, nerugi,” iluk yogeisasikhesik nen,

¹⁴ ileken apuke dagakhogon lak lageikhe meke re, at Yesus ebe metek werekma ileken hasikhe mekeat, “Iti Yesus ebeat,” iluk hutdigidek.

¹⁵ Hutdigidek werekma, at Yesus nen men yogokhikhe, “He yi neru o. Hat nenaluk de aga lagan. Nen, hat tha herakhe lagan,” iluk yogokhikhemo, he Maria akla nen, “Ap yi yabu therogo welagarek meke higi,” iluk akla apasikhe. Itithogon akla apasikhesik men yogokhikhe, “Noe. At ebe warek hat nen waganhetik wolok werlekmake 'bi laganma halok he, ebe o koma 'bi laganma. An wagani lak nen, yoknom o,” iluk yogosigin apasikhe,

¹⁶ at Yesus nen yogokhe dogolik, “He Maria,” iluk yogokhunem, Maria elokhoken dagakhogon Yesus wogotluk, nit ninane baga, “Guru noe,” u hak, it Ibrani meke inane baga, “Rabuni,” iluk heagei wakhikhe.

¹⁷ Itithogon heagei wakhikhemo, at Yesus nen, men yogokhikhe, “An nebe nopase oba aban dageigidek welagei iti re, hiki abiak haknarik dogogun o. An men, hit men, ninopase Allah oba hakotdiluk welagorek meke etnogo oba dageigiluk hagakhe lagei, ekhe iluk nagarumi yogeisa lan o,” iluk yogokhikhemo,

¹⁸ at he Maria ai o Magdala meke etnogo Yesus agarumi ane waganhe lagoukha meke emenogo inoba lageikhesik nen, men yogeisasikhe, “Nerugi! Ninoe Etagapogot an nileken arat halok nen wagei o,” iluk, yogeisekhe dogolik wene yogokhikhe meke etnogo pilinerogo yogeisa lageikhe.

At Yesus ebe agarumi ane waganhe lagoukha meke emenogo inileken hoagaluk inelokhoma wisam ageikhe wene

¹⁹ Itithogon yogeisa ageikhesikmo nen, o hari Minggu itinem hibako at Yesus agarumi ane waganhe lagoukha meke emenogo, it ap Yahudi meke inayuk nen o ageikhela opakimo thu tha'bokhogonat kunci larogo ukisukhasik werekma, at Yesus lageikhesik inalilu wisam ageikhesik nen, men yogeisasikhe, “Nagarumi. Hinagorakma,” iluk itithogon yogeisasikhesik nen,

²⁰ iki inom, abelekenma inom, wakhukha meke etnogo o'ban emenogo inugurisasikhe. Itithogon inugurisugunem, inileken hasukhasik nen, “Ninoe ebeat o,” iluk inakla arleken motok akhasukha.

²¹ Itithogon inakla arleken akhasukhama, at Yesus nen wene ageikhe inom yabokane men yogeisasikhe, “Nagarumi. Hinagorakma. An nopase nen la'ani ageikhe iti hak, an nen hit itithogonat la'inagagin o,” iluk yogeisasikhe.

²² Itithogon yogeisasikhesik nen, apelaga inoba huphogon la'ekhe dogolik men yogeisasikhe, “Allah Agoreke horlani o.

²³ Nen, hit nen akhuni weak hagakharek meke thagalogo degetdisegep halok, at Allah nen thagalogo degetdisageinat o. Nen, it akhuni aperek weak hagakharek meke, hit nen thagalogo degetdisegep dek halok he, at Allah nen thagalogo degetdisagein degat o,” iluk yogeisasikhe.

Yesus nen ebe wakhukha meke thege elo ap Tomas inuguthasikhe wene

²⁴ At Yesus ebe agarumi inelokhoma wisam ageikhe itinem, inebe 12 emenogo meke it ebetlake anek werekma. Nen, at Tomas etaga ageikhe Hulupmio Meke ekhe lagoukha etnogo ebe it inom dekma wageikhe.

²⁵ Itithogon ebe dekma nogo nen, it Yesus agarumi ebetlake nen, men yogokhukha, “Tomas nagarlak. Nit ninoe Etagapogot etnogo arat ninileken hogo,” iluk yogokhukha mekeat at nen, men yogeisasikhe, “An nen at iki baga pisuemaken wakha meke elo nileken hutukhogon higidek, nen o'ban niki hakhigidek, abelekenma thege elo niki kolakhigidek halok, eberogonat iluk apagein motok dek o,” iluk yogeisasikhe.

²⁶ Itithogon yogeisasikhesik oba nen, iniki 7 baga welagoukhasik nen ageikhe baga it Yesus agarumi ane waganhe lagoukha meke emenogo Tomas inomat, o etnogolaat natogokhukhasik, thu tha'bokhogonat kunci latdiluk welagoukha mekeat he, at Yesus wageikhesik inakla wisam ageikhesik nen, men yogeisasikhe, “Nagarumi. Hinagorakma,” iluk yogeisasikhesik nen,

²⁷ yabokane at Tomas men yogokhikhe, “Hat hakla nen eberogonat iluk hetaiken noba hakotdigidek welagan itithogon dogogun o. Eberogonat iluk hakla apanok nen he, hiki haknealok, niki baga hileken niigik, nabelekenma thege elo hiki kola'igik, hagatluk nen, hetaiken noba hakotdino o,” iluk yogokhikhe.

²⁸ Itithogon yogokhikhemo, at Tomas nen, “Eiye! Noe, hebe Hetagapogot Allah at hiigi o,” iluk yogokhikhemo,

²⁹ at Yesus nen, men yogokhikhe, “Hat he, hileken arat neegetik nen eberogonat iluk hetaiken noba hakotdegen. Itithogon meke re, it akhuni aperek inileken niigidek mekeat he, inetaiken noba hakotdugun halok he, inakla arleken akhagun o, iluk eberogonat yokhikhi o,” iluk yogokhikhe.

Buku yi ebe yigithogon hasik iluk holal waganhikhe wene

³⁰ At Yesus nen it agarumi ane waganhe lagoukha meke nen at ebe hutduagaluk inil oba elalin hagakhe lageikhe meke aperek doalegat hagakhikhe meke re, buku yi baga holal waganhidek.

³¹ Itithogon meke re, holal waganek werek yi tha'bokhogonat, hit nen, Yesus iti Allah a'but, nit akhuni tilninabuagaluk wenago la'i ageikhe etnogo eberogonat, iluk hutdiluk hinetaiken at oba hakotdiluk, at etaga palhunem hiniluk dogobageik iluk, holal waganogo 'bigi o.