Yohanes 13 - ALLAH ANE WENW KET MEKE WAROGO WOKNINAKHIKHE WENE

Yesus nen agarumi inisok oba thobalhikhe wene

¹ Nen, hubenke pesta Paskah etnogo nuogoluk dogolik, at Yesus nen, o agat oba yoma thogotdiluk opase baga apuke dageigin etnogo arat horok asi ageikhemo ilu welageikhe. Nen, at ekaerek agarumi agat oba meke etaiken hunik motok welageikhesik nen, yabokane inebe a'it ageidegat ilugun hurli baga etaiken hunik motogat welageikhe.

² Dogolik, at agarumi emenogo inom o hibako hipiri opakimo nukunem, Yudas Simon Iskariot a'but etnogo, akla Iblis ukisikhesik nen, Yesus ebe wasuak nen, “Yoko lan o,” iluk akla kagalhikhe.

³ Itithogon akla kagalhikhemo, at Yesus akla nen, “Nopase nen yi meke ti meke tha'bokhogonat an niki baga 'bisikhemo werek apigi. Nen, an nebe Allah werekma nen usa'agagisik, yabokane napuke at obaat dageigin apigi,” iluk ilu welageikheat.

⁴ Itithogon ilu dogolik, hipiri neke lageikhesik ebe melageihesik nen, asu ebe ugu meke nokorlogo 'bisikhesik nen, su inoba i apusu hokharek meke waganhikhesik obakha baga pogukhogon ikhikhe.

⁵ Itithogon ikhikhesik, i loyang oba kelelogo kola'isikhesik nen, at agarumi ane waganhe lagoukha meke emenogo inisok oba thobalinakhikhesik nen, su obakha baga pogukhogon ikhikhe etnogo baga i apusu horinabik lageikhe.

⁶ Itithogon horinabik laga lageikhesik, hurli at Simon Petrus etnogo oba asi agunem, at nen, men yogokhikhe, “Noe. Hat Hetagapogot nen an nisok oba erlok thobaligiluk? Erlok dek o,” iluk yogokhe lageikhemo,

⁷ at Yesus nen, men yogokhikhe, “Nagot o. An hagakhi yi, ebe nikithogon meke, hat hokodek mekeat he, yabokane nen hilu asigin o,” iluk yogokhe lageikhemo,

⁸ at Petrus nen, men isikhe, “Noe. Hat nen an nisok oba thobalnabusak motok dek o!” iluk yogokhe lageikhemo, at Yesus nen, men yogokhikhe, “An nen hat thobalhabusak dek halok, hat hebe an iteerek dogogin dek o,” iluk yogokhe lageikhemo,

⁹ at Simon Petrus nen, men yogokhikhe, “A! Iti halok he, noe. Nisok oba anek thobalnakhun o. Niki men, nukuloak men, tha'bokhogonat thobalnabin o,” iluk yogokhikhemo,

¹⁰ at Yesus nen, men yogokhikhe, “At tha nen, ebe kume arat warek werek halok, at ebe thobalek motok werek iti nen, yabokane thobalusak dek o. Isok anek thobalusak erlok o. Hit itithogon thobalek motok welagap meke re, hinebe tha'bokhogonat thobalek welagap 'buk. Ageikhe thobalek dek werek o,” iluk yogeisasikhe. Wene itithogon yogeisasikhe iti, at Yesus akla nen,

¹¹ “At iti nen an nebe nasuagaluk yoko ligin,” iluk ilu dogolik nogo nen, men yogeisasikhe, “Hit thobalek motok welagap meke re, hinebe tha'bokhogonat thobalek welagap 'buk. Dek o,” iluk yogeisasikhe iti.

¹² Itithogon inisok obake arat thobalinakhikhesik nen, asu nokorlogo 'bisikhe meke etnogo ikhikhesik, apuke hurek welageikhemo hurek lageikhesik nen, mel yogeisasikhe, “An nen hit hagathinakhi iti hutdegep a? Dek a.

¹³ Nen, hit nen an yoknekhe dogolik, Ninoe Etagapogot wene yakulnisekherek meke, iluk yoknekhe lagap iti, an nebe hinoe Netagapogot wene yakulhisegerek meke eberogonat halogat ekhe lagap o.

¹⁴ Itithogon, an nebe hinoe Netagapogot wene yakulhisegerek meke nen hit hinisok obake thobalhinakhi halok, hit nen itithogonat hit-hit hinisok obake thobal-thobal hagakhe dogosak o.

¹⁵ Nen, an nen hit hagathinakhi iti hak, hit nen an nobabut waganogo itithogonat hagakhe dogobageik nen iluk yakulhisigi o.

¹⁶ Wene ageikhe yi yokhisak, Ap kok ageikhe inapma negen werek korlek, at atuaneke meke kok negen welagarek dek o. Iti hak, ap yoko la'ekherek meke inapma negen werek korlegat, at yoko lagarek meke iti kok negen welagarek motok dek o, iluk eberogonat yokhisigi o.

¹⁷ An nen wene yokhisigi iti hinilu atluk hagakhe dogogun halok he, hinakla arleken akhekhe dogogun o.

¹⁸ An nen wene iti hit hinebe tha'bokhogonat hasik yokhisigi 'buk. Dek o. Hit yi an nenat hinebe wenakhinakhigi meke nilu mekeat he, wene iti hasik Allah ane baga men iluk holal waganogo 'bisukha, Ap ageikhe hipiri nipisak opakimo neke lago meke yi nen weagatnabigiluk melaga o, iluk isikhemo holal waganek werek iti sugun asigin dek o. Ebeat asigin o.

¹⁹ Wene iti yabokane arat eberogonat hagatlaga halok, At ikhok motok welagarek meke etnogo arat o, iluk hutdanubageik nen iluk, yogotak wene iti aban hagatlageidek werek korlek abok yokhisigi o,” iluk yogeisasikhesik nen, wene ageikhe men yogeisasikhe,

²⁰ “At tha nen, akhuni an nen la'isagein meke woginakhe halok, anat woknabigin o. Nen, at tha nen an woknakhe halok he, at an la'ani ageikhe meke etnogoat waganigin o, iluk eberogonat yokhisigi o,” iluk yogeisasikhe.

Yesus nen Yudas hagasigin meke abok ilurogo yogokhikhe wene

²¹ At Yesus nen, wene itithogon arat yogeisasikhesik oba nen, at akla weak ageikhemo, ane pakhogonat men yogeisasikhe, “Hit ap hinebe ya meke ageikhe nen an nebe nasuagaluk yoko ligin o, iluk eberogonat yokhisigi o,” iluk yogeisasikhe.

²² Itithogon yogeisekhe lageikhemo, it nen, “Iti tha nen hagasigin meke ekhe,” iluk inobakha palagoukhasik nen, inileken ageikhe nen ageikhe lakhigik hagakhukha.

²³ Itithogon inileken lak-lak hagakhe korlek, it at Yesus ane waganhe lagoukha meke ageikhe at etaiken hunik meke alilu horok-horok hurek welageikhe.

²⁴ Itithogon hurek werekma, at Simon Petrus etnogo nen iki pilin ap etnogo yogokhe dogolik men yogokhikhe, “Ap tha hasik ekhe lagan, iluk, oba hinok waganin o,” iluk yogokhikhemo,

²⁵ ap etnogo yabokane at Yesus alilu horokhogon higilha lageikhesik nen, men yogokhikhe, “Noe, iti tha hasik egen nogo?” iluk yogokhikhemo,

²⁶ at Yesus nen, “Ebe re, an nen hipiri roti meke i mago nen wogosigin itiat o,” iluk isikhesik nen, hipiri roti etnogo i mago waganhikhesik nen, Yudas, Simon Iskariot a'but etnogo wogokhikhe.

²⁷ Itithogon wogokhikhemo, at Yudas roti etnogo ikimo waganhe korlek eranogoat akla Iblis ukisikhe. Itithogon ukisikhemo, at Yesus nen yogokhe dogolik, “Hat nen hagasigiluk apegen meke iti ibat hagasin o,” iluk yogokhunem,

²⁸ it hurek dogolik hipiri neke lagoukha meke emenogo nen, “Iti nikithogon meke hasigat at Yudas yogokhe he,” iluk hutdigidek hagakhukha.

²⁹ Itithogon hutdigidegat dogolik, at Yudas iti agarlak lak inom uang aika it mekeat hago welagarekma nogo nen, men inakla apasukha, “Yesus nen nit pesta hagasusak hasik yi meke ti meke oko pali loagaluk yogokhe a? At he, akhuni inameke dek meke uang ageikhe opakitek supurisa loagaluk yogokhe a,” iluk inakla apasukha.

³⁰ Itithogon inakla apekhe korlek, at Yudas roti ikimo waganhikhesik nen, o motok hibako ageikhemo itikmanke piokthek dukhisikhe.

At Yesus nen wene ket meke yogeisasikhe wene

³¹ At Yudas etnogo itithogon arat dukhisikhemo dogolik, at Yesus nen men yogeisasikhe, “Nagarumi. An abat itaklasi agagi etnogo Allah nen hogotnakhunem, akhuni nen Allah hogorasugun oba yogotak arat asi aga o.

³² Nen, an nen hagasigin iti baga Allah hogorakho halok, at ekaerek ebe hogorakharek iti hak, an nipisagat hogotninakhe dogoagaluk, at nen ibat hogotnabigin o.

³³ Na'buri. An niki pererlagat anek ninom dogoluk nen ligin o. Lamo, hit nen an nebe heraknakhe dogogun mekeat he, alebat an nen ap Yahudi meke yogeisasigi hak, o an liginmo etoma hit nen heraknabik lugun dek o, iluk yogotak hit yokhisigiat o,” iluk yogeisasikhe.

³⁴ Itithogon yogeisasikhesik nen, wene ageikhe men yogesasikhe, “Hit nen hagakhe dogosak meke wene ket meke ageikhe yokhisak, An nen hit nakmurogon welagarek hak, hit itithogonat, hit-hit nakmu-hakmurogon hagakhe dogono o.

³⁵ Hit-hit itithogon nakmu-hakmurogon hagakhe dogogun halok, it akhuni tha'bokhogonat inileken 'bithisalok, It yi Yesus agarumi eberogonat higi, iluk inilu asugun o,” iluk yogeisasikhe.

At Yesus nen Petrus hagasigin meke ilurogo yogokhikhe wene

³⁶ Yesus nen itithogon yogeisekhe lageikhemo, at Simon Petrus nen, “Noe. Hat o koma lagaluk nen egen,” iluk yogokhikhemo, at Yesus nen, men yogokhikhe, “An o liginmo etoma, hat noporlik dopokhogon ligin dek o. Yabokane anek noporlik wisigin o,” iluk yogokhe lageikhemo,

³⁷ at Petrus nen at oba hinok waganhe dogolik, men yogokhikhe, “Noe. Yogotak hoporlik wisusak erlok dek egen iti nenaluk. An hat hasigat watlasusak welagei o,” iluk yogokhe lageikhemo,

³⁸ at Yesus nen, men yogokhikhe, “Hat an nobasik eberogonat watlasusak welagan a? Dek o. Thue ayam ane igidek werek korlek, hat nen, An Yesus nokodek, iluk hiki henagan oba la'beldilukmo nen, ayam ane igin o, iluk eberogonat yokhikhi o,” iluk yogokhikhe.