Yakobus 4 - ALLAH ANE WENW KET MEKE WAROGO WOKNINAKHIKHE WENE

“Akhuni agat oba meke inobabut inikhogat dogolik hagakharek meke iti, hinom hunekhup o,” iluk yogeisasikhe wene

¹ Hit wene palhik, tugi yakhik, hagakhe lagap iti, erlo nena baga nen yakhe lagap nogo. Wim yabusak warlok inetaikenma dogolik, inakla aga dageikherek iti hak, hinakla nen yi warlok ti warlok apegethep iti nenat yakhe lagap apigi.

² Yi meke ti meke hinakla nen warlok apegethep meke ebe horligidek nen, akhuni inebe inakhe lagap iti. Hinakla nen it akhuni aperek inameke warlok apegethep mekeat he, ebe horligidek nen ua palherethep nen tugi yakhik, wim yakhik, hagakhe lagap iti o. Itithogon, yi meke ti meke waganhidek hinerlageik welagap iti, Allah kino yogokhe lagap dek iti nenat o.

³ Nen, ageikhe Allah kino yogokhe lagap mekeat he, hinekaerek hasik anek hinetaiken nen nukunem horlauwogoluk kino usak dek mekeat korlo yogokhe lagap iti nen, wokhisiliogo dek o.

⁴ Humi nen inaguni inil la'belharek iti hak, Allah il la'belogo hagakhe lagap iti re! Akhuni agat oba meke yoma inobabut inikhogat dogolik hagariogei meke iti hinom hunik welagap halok, Allah hinom wim palek hakeneat welagap iti, hinokodek a? Hit aperek nen akhuni agat oba meke yoma meke inobabut inikhogat dogolik hagariogei meke iti hinom hunesuogoluk hagakhe lagap halok he, hinekaerek nen at Allah hinom wim kagalhe lagap o.

⁵ Haganeat wene Allah ane ageikhe holal waganogo 'bekhe dogolik, men isukha, “Humi inakmurogon dogolik irlirli waganek motok welageikharek iti hak, Allah nen Agoreke ninakla 'binanhikhemo ninebe akmurogon dogolik, ninirlirli waganogo haknisik welagarek,” iluk holal waganogo 'bisukha iti, hit hinakla nen he, “We yugunat isukha,” iluk apekhe lagap a? Yugunat isukha dek o.

⁶ Itithogon mekeat he, ninebe akmurogon dogolik, kokhogon yomaknisekherek iti o. Itithogon hagakherek iti nen men isukha, “Akhuni inekaerek nen hogorakhugunem Allah nen a'it hisekherek. Meke re, inekaerek inetaiken thebekhogon dogogun halok akmurinakherek,” iluk Allah ane baga holal waganogo 'bisukha.

⁷ Iti nen he, Allah apma hinetaiken thebekhogon ukiluk ane holek dogolik, Iblis ane iti thagalogo here'isekhe dogono. Here'isaumo, at nen here'inageiluk lo liginat o.

⁸ Hit Allah oba dopokhogon welagap halok he, at meneke hit hinoba dopokhogon wisiginat o. Hit weak hagakhe lagap meke iti, hiniki bagake horogo here'isekhe dogono o. Hinetaiken pere meke yi re! Hinakla weak meke horogo la'isekhe dogono o.

⁹ Hinakla weak atluk, di ago, de ago, hagakhe dogono o. Itithogon hagakhe dogolik, eto aga lagap meke iti, de aga dogono o. Nen, hinakla arleken akhekhe lagap meke iti, hinakla weak atluk dogono o.

¹⁰ Ninoe Etagapogot apma ukiluk hinetaiken thebekhogon dogogun halok he, at nen siatdinagaginat o.

“Hit-hit hinagarlak lak hinerugi hinom hinabok pal-pal usak dek,” iluk yogeisasikhe wene

¹¹ Nagarlak lak nerugi. Hit-hit hinabok pal-pal ekhe dogosak dek o. Hinagarlak lak hinerugi aperek inabok palhik, wene inoba 'bigik, hagakhep halok he, wene Allah nen ninasuk wakhikhe wene etnogoat weak iluk u hagat, ekhe lagap iti o. Nen, wene iti weak iluk ekhe lagap halok, wene iti hinasuk hologo hagakhe lagap 'buk. Hit nen he, “Wene iti weak. Ebe hano itithogon usak meke isikhemo,” iluk u hak ekhe lagap iti o.

¹² Meke re, Allah arligat nen wene ninoba 'bigik, kokhik, hagakherek o. At nenat tilninakhik, weagatninakhik hagasusak erlok mekeat he, hit aperek nen hinagarlak lak hinerugi meke wene inoba 'bekhe lagap iti nenaluk. Hit nen itithogon hagasusak meke hagakhe lagap? Erlok dek o.

“Hubuluk hagatlasusak hinokodek dogolik, hogorakhausak dek,” iluk yogeisasikhe wene

¹³ Hit aperek nen he, “Yogotak a? Hubuluk a. O werlekmake lalok nen, tahun opakiat hakene dogolik, yi meke ti meke okokhik, thaburigik, hagakhe dogogin,” iluk ekhe lagap iti re!

¹⁴ Hubuluke nit wene ninoba itithogon hagatlasigin, iluk hinokodegat dogolik ekhe lagap iti re! Nit ninebe iti nena meke hakene welagorek nogo. O isa il opaki welagarethek nen ibat dek agarek iti hak, ninebe itithogonat welagorek iti o.

¹⁵ Hit nen mot usak he, men apigi, “Ninoe Etagapogot akla nen yigithogon tigithogon apekhe halok he, ninilugat dogolik, yi meke ti meke hagakhe dogogun,” iluk ekhe dogosak mekeat he,

¹⁶ hinekaerek nen hogorakhigik, siatdakhigik, hagarik nekhe lagap iti re! Itithogon hogorakhekhe lagap iti korloat o.

¹⁷ Hit hinakla nen he, “Mot hagasusak he, itithogon,” iluk hinilu dogoligat he, ebe hagakhidek halok he, hit weak hagatluk wene hinoba 'bakhekhe lagap o.