Yakobus 3 - ALLAH ANE WENW KET MEKE WAROGO WOKNINAKHIKHE WENE

“Akhuni ina'bi iti nenat inebe weagarinakherek,” iluk yogeisasikhe wene

¹ Nagarlak lak nerugi. Nit akhuni yakulisogorek meke weak hagakho halok he, Allah nen yabokane akhuni aperek initema waganogo inoba wene herlekha'bugat negen 'bigin mekeat he, nit anek he, wene kogat ninoba 'bigin o, hinilu iti nen, hinebe doalegat akhuni yakulisegarek meke asuogoluk apugup o.

² Nit akhuni tha'bokhogonat hano hagakhe lago thalek yi meke ti meke hasik, weagat hagakhorek iti. Mekeat he, tha nen ane baga nen wene weak meke ageikhe igidek hanorogo anek ekherek haok he, iki isok ebe tha'bokhogonat dopokhogon herogo dogolik etaiken 'bogokhogon horleat werek o.

³ Iti hakene, nit nen kuda ape kutmo herle kildiluk, nit nen holak itike lausak iluk, apogo halok, herle etnogo likhugunem, ebe itike lagarek iti.

⁴ Nen, ku i yekelekma lagarek meke, iti ebe kok meke, hisakne nen obatnerogon wolok lagarek mekeat he, ap ku wolok lagarek meke iti akla nen, “Holak itike ligin,” iluk akla apalok, ukul morerakherek meke 'bugurlagat iti nomothekhe halok, itikeat mot wolok lagarek iti hutdini o.

⁵ Iti hakene, nina'bi ebe 'bugurlagat mekeat he, akhuni inekaerek nen hogorakhegarek hak, nina'bi iti nen wene husupi anek kogotdakhekherek iti. Nen, hetu eken herlekha'bugat meke thelokhogon usa'isinem okama o koktek meke inom nilik lagarek iti hutdiniat o.

⁶ Nina'bi iti, ebe hetu hakeneat o. Nit akhuni agat oba yoma yi weak ti weak hagakhorek iti hak, niniki ninisok yi werek korlegat, nina'bi yi nen ninebe abisake weagatninakherek iti o. Itithogon weagatninakherek iti, hetu iti erlo, weakma hetu aikmo dogogunmo iti mekeatma nina'bi baga mokalatluk, ninebe welagorek yi abisakeat hali nasi welagarek iti.

⁷ Akhuni nen, yi 'bagei ti 'bagei, yi thue ti thue, yi warlo ti warlo, yi ikan ti ikan, ilhige weak meke erlok il wasumo il watlagarek iti.

⁸ Itithogon mekeat he, nina'bi iti tha nen il wasusak apegep. Motok erlok dek o. Nina'bi iti asuk warek degat o. Waro aik nen akhuni li'bilinakhunem watlageikharek hak, nina'bi iti baga weak meke kerlekhogon dogolik, inebe inakherek iti.

⁹ Nina'bi iti baga ninopase Etagapogot Allah hogorakhik, akhuni at ebe hakene winametdinanhikhe meke homan 'bisigik, hagakhorek iti o.

¹⁰ Erlo ninape opakiat iti nenat, Allah hogorakhik, akhuni homan 'bisigik, hagakhorek iti. Nagarlak lak nerugi. Itithogon hagasusak dek mekeat hagakhorek o.

¹¹ I elesi opakiat meke nen hano meke inom, arle meke inom, dapukhogon dukhusak nogo? Erlok dek o.

¹² Nagarlak lak nerugi. O ara meke nen o zaitun eken isusak a? Nen, o anggur meke nen o ara eken isusak a? Iti hakeneat, i ilueagei elesimo nen, i werlek agei meke ageikhe dukhusak a? Motok erlok degat o.

“Allah nen inakla kagalhunem, inakla kagoukhogon hagakharek,” iluk yogeisasikhe wene

¹³ Hit aperek hinakla kagalek dogolik, yi wene ti wene hutdekhe lagap halok he, akhuni nen ekagat hutdinagouagaluk hinobabut thebekhogo dogolik, hinakla kagalogo hanorogon hagakhe dogono o.

¹⁴ Meke re, hinakla korlo atluk ua palhik, hinekaerek hasik anek ebekhik, hagakhe dogolik, hinekaerek nen, “An hano,” iluk hogorakhekhe dogogup o. Itithogon hagasugun halok, Allah ane ebe wene iti meke thagalogo hinekalat nen ugun iti usak degat o.

¹⁵ Itithogon hagakharek iti Allah nen inakla kagalhunem hagakharek 'buk. Erlo at Iblis nenat inakla kagalhunem akhuni agat oba meke inobabut inikhogat dogolik, warlok apegarek meke hagakharek o.

¹⁶ Inakla korlo atluk ua palhik, inekaerek hasik anek oba ebekhik, hagakhunem inaneak kogat thagalhik, yi weak ti weak hagakhik, hagakharek iti o.

¹⁷ Itithogon mekeat he, Allah nen akhuni inakla kagalhunem, inobabut kok hagakharek he, weak ageikhe hagakhidek inilaga isonhogo welageikharek iti. Itithogon dogolik, akhuni inom hanorogo welageik, inobabut enago welageik, inane hologo hagakhik, akhuni inakmurogon motok welageik, o eken hano meke ikherek iti hak, hanorogon hagakhik, akhuni aperek inelokhomake 'bisigik, aperek inoporlike 'bisigik, hagakhidegat inetaiken pere welageidegat, hanorogo hagakharek iti.

¹⁸ O hano meke ai yakhunem, eken hano ikherek iti hak, akhuni inobabut hanorogo dogolik, it akhuni aperek inom hanorogon dogoagaluk dapulinakhunem inobabut mothogon hano hagakharek iti.