Titus 3 - ALLAH ANE WENW KET MEKE WAROGO WOKNINAKHIKHE WENE

“Allah a'buri inobabut mothogon hagakhe dogoagaluk, inasuk wakhe dogono,” iluk yogokhikhe wene

¹ Allah a'buri hat nen hagasik welagan meke etoma nen, inougi pemerintah meke koktek inapma werekma, it nen yi meke ti meke mothogon hagasuagaluk isinem, “I o,” iluk inane hologo hagakhe dogoagaluk inasuk wakhe dogono.

² It Allah a'buri iti nen, akhuni aperek inabok weak palhidegat, inane puk weak wenageisigidegat, it aperek nen inobabut ekagat hutdisoagaluk akhuni tha'bokhogonat inobasik inobabut enago hanorogonat hagakhe dogoagaluk inasuk wakhe dogonoat.

³ It itithogon hagakhe dogosak iti, nit alep ninetaiken dek ninobabut kepu negen, ninasuk warek degat, nil-hilhogon hagakhe dogolik, akhuni inougi koktek inapma welageikharek hak, inoba agaken dageigik, inakla nen yi meke ti meke warlok apigik, hagakharek iti meke apma negen welagagu. Itithogon dogolik, it aperek weagarinakhik, ua palhik, it aperek nit motok ina'it hisigik, nit nen it nina'it isigik, hagakhe lagagu.

⁴ Itithogon hagakhe lagagu mekeat he, at Allah ninebe tilninakherek meke etnogo obabut hano nen, nit akhuni akmutninakhikhe meke iti ekagat thelekma ageikhemo ebe hutdisugu iti.

⁵ Itithogon thelekma ageikhesik, Allah Agoreke nen ninakla thobalogo ninebe ket meke itakninakhik, ninobabut ninat hagatninakhik, hagakhikhe iti, nit ninekaerek nen ninobabut mothogon hagakhe lagagu baga hagatninakhikhe 'buk. Ninebe at nenat akmutninakhikhesik tilninakhikhe iti o.

⁶ Allah nen Agoreke woknisasikhe iti ebe, Yesus Kristus ninebe tilninakherek meke etnogo nenat kokhogon ninoba usa'i ageikhe.

⁷ At Yesus obabut hano nen wene ninoba meke korogo wokhasikhesik, Allah ninom ninapuke hunogo 'binanikhemo, nit ninakla nen, “Niniluk motok dogogun o,” iluk apekhe lago iti mothogon iteerek asuagaluk Allah Agoreke woknisasikhe iluk,

⁸ igi iti eberogonat o. Hat nen it aperek inetaiken Allah oba hakotdiluk werek meke halok, akhuni aperek inobasik hanorogon yomageisegarek iti meke kogotdiluk akilukhogon hagakhe dogoumo, akhuni tha'bokhogonat inobasik hano motok, iluk, itithogon hagakhe dogoagaluk, inasuk hobatnerogon wakhe dogonogoluk, an nakla apigi meke yokhigi iti o.

⁹ Meke re, akhuni inetaiken dek nen wenemuk yakharek iti inom, inebe itaklarik wagoukha meke erloma nen pilinekharek iti inom, Allah nen ninasuk wakhikhe wene etnogo hasik, wene yakharethek nen akhuni inom weak ageikharek iti inom, tha'bokhogonat iti baga hano asigin dekma yugunat alomarogo iliogei iluk, hat nen here'isekhe dogono.

¹⁰ It aperek nen, Allah a'buri meke it-it inom weak asuagaluk, hagariogei meke iti, inasuk alebageik watluk nen yabokane watnoat o. Itithogonat wasigin meke, inasuk holhidek halok, hinom hunik dogogup o.

¹¹ It akhuni inobabut itithogon hagariogei meke iti, akhuni holak nuk ageikharek hak, nuk akhalok, inobabut weak hagariogei iti baga, hat nen, “Inekaerek nen wene inoba 'bakhiliogei,” iluk inobabut ekagat palhe lagan iti o.

Wene ilugun oba, “Itithogon hagatno,” iluk yogeisigik, heagei warinakhik, hagakhikhe wene

¹² An o weak werek korlek, o Nikopolis etoma witluk dogogin iluk, nakla apigi iti nen, at Artemas a, Tikhikus a, hoba la'i agei halok, hat hebe ibat noba wisigiluk hobatnerogon walhekhe dogono.

¹³ Nen, at Senas wene Allah nan ninasuk wakhikhe wene etnogo motok iluk meke etnogo inom, Apolos inom, ipisak yi meke ti meke dek ageidek erlogat wolok loak nen, hat nen yomageisalok la'isano.

¹⁴ Akhuni nit Allah a'buri meke aperek, o eken hano meke ikhidek welagarek hak, it iti hano meke ite ageidek yugunat alomarogo dogunogo iluk, it aperek yi meke ti meke dek nen nuk atluk werekma, it inekaerek hano hagakhe dogolik yomageisekhe dogoagaluk, iti meke kogotdiluk yakulhe dogoak o.

¹⁵ It Allah a'buri an ninom yoma welagorek meke inebe tha'bokhogonat nen heagei wathinakha o. Nen, hat nen, Allah a'buri inetaiken at oba hakotdiluk, ninebe inakmu meke etoma, “Paulus nen heagei wathinakhe,” iluk, yogeisanoat o. Allah obabut hano etnogo nen hit tha'bokhogonat hakhisik dogoak o.