Titus 1 - ALLAH ANE WENW KET MEKE WAROGO WOKNINAKHIKHE WENE

Heagei wakhikhe wene

¹ Titus na'but o. An Paulus nen, Allah atuaneke dogolik, akhuni at nen wenageinakhikhe meke inetaiken at oba hakotdiluk werekma ago watdisigik, nen, nit at apma dogolik ebe wene yakulisekhe lago wene etnogo hutukhogon inilu asuagaluk yakulisigik, hagasuagaluk Yesus Kristus nen nayoko 'biluk la'ani ageikhe meke etnogo nen, wene yi holal waganogo hoba la'i agei iti o.

² At Allah nen, yi meke ti meke aban winametdigidek dogolik, nit akhuni ninobasik men isikhe, “Akhuni an nen winametdisalok nen, inebe iniluk motok dogoagaluk, hano hagarinabigin,” iluk abok isikhe iti, “Ekalat ekherek dek o,” iluk ninakla eberek dogolik, ebe wene yakulisekhe lago iti o.

³ Yogotak wene iti winam asusak tak-tagat winam asuagaluk, at Allah tilninakherek meke etnogo nen, “Hat nen wene iti akhuni yogeisekhe dogono,” iluk nayoko 'biluk, noba 'bisikhe iti baga ebe winam ariogo iti o.

⁴ Titus na'but o. Hetaiken nit ninom tak-tagat Allah oba hakotdiluk welagan iti baga, an nekaerek na'but harat agagin iti o. Ninopase Allah inom, ninoe Kristus Yesus tilninakherek meke inom, ipisak inobabut hano etnogo nen, hano meke wokhigik, hetaiken hapugutdageigik, hagakhe dogoak o.

Akhuni Allah a'buri aperek therisik dogoagaluk, inobabut palogo nen meldisausak iluk yogokhikhe wene

⁵ An nen hat o Kreta etoma 'bageiluk, wisigiluk hagakhe dogolik, wene itithogon hagakhe dogosak iluk, hoba 'bisigi iti o, “Yi meke ti meke aban morerakhidek meke, moretdigik, o yi ukul ti ukul etoma akhuni Allah a'buri aperek therisik dogoagaluk inougi tomok meldisigik, hagakhe dogono,” iluk, yokhitluk wagagi iti o.

⁶ Akhuni Allah a'buri aperek therisik dogoagaluk meldisausak iti, inobabut yi hakene meke meldisausak o. Akhuni aperek nen, “At weak,” iluk wene oba 'biliogei dek meke halok, age opakiat waganek meke halok, a'buri inetaiken Allah oba hakotdiluk welageikharek meke halok, it aperek nen ekhe dogolik, “Ap yi a'buri inasuk warek dek yugunat hagariogei iti nina'it,” iluk, abok paliogei dek meke halok, meldusak o.

⁷ Ap Allah a'buri aperek therisik dogolik, Allah hasigat hagakhe dogogin iti nen, it aperek nen wene oba 'iliogei dek meke halok, meldusak o. At nen he, “It aperek isinem weak. An igi anek he, hano,” iluk, ekherek dek meke halok, akla aga horok hakokthek dek meke halok, i anggur eken apusu oba labu'buk nekerek dek meke halok, akla aga horogot awulagam hagakherek dek meke halok, “Uang, yi meke ti meke an anek noba dogolep,” iluk, apekherek dek meke halok,

⁸ ap huso wagunem aila hanorogo woginakherek meke halok, hano hagakharek iti meke anek warlok apekherek meke halok, etaiken ekaerek nen therogo welagarek meke halok, obabut mothogon hagakherek meke halok, ebe Allah hasik karelek welagarek meke halok, ekaerek nen asuk warek welagarek meke halok, meldusak o.

⁹ Wene akhuni hanorinakherek wene yakulisekhe dogolik inasuk hanorogon wakhik, at nen ebe wene isinem, it aperek nen, at ane thagalogo hagakhunem, at nen inane erlok thagalogo 'bisigik, erlogat hagakhe dogoagaluk, wene nit nen yakulikhugumo, eberogonat iluk waganhikhesik, at obabut mothogon obatnerogon herogo welagarek meke halok meldusak o.

¹⁰ It akhuni aperek doalegat ebe wene hologo mothogon hagakhidek hagariogei iti. Itithogon hagariogei iti, inebe doalekmake, it Yahudi inoado aperlagap itithogon palek meke, hano wene waganhukhasik nen, yabokane wene ebe wene dekmaat, yugunat akhuni inawene meke ekhe dogolik, it aperek nukhetdisiliogei iti o.

¹¹ Itithogon nukhetdisekhe dogolik, yi meke ti meke inekaerek nen thaburausak dek meke thaburauwogoluk, yakulisausak dek mekeat yakulisekhe dogolik, akhuni doalegat ina'buri inomat nukhetdisiliogei iti, it inane iti thebeloso usa'isano.

¹² Akhuni o Kreta meke inekaerek meke ageikhe wene akla kagalek yakulisekhe lageikhe meke ageikhe nen, wene men isikhe, “It akhuni o Kreta meke yoma inobabut inekalat isi motok dogolik, wam helo meke obabut hakene. Wen waganu'buk dogolik, yi meke ti meke thiokhogon na'buk inamorlo muluk yi re!”

¹³ iluk, at ane eberogonat isikhe. Iti nen, it iti inetaiken Allah oba hanorogon hakotdiluk dogou hagat dogoagaluk inasuk obatnerogon wakhe dogono.

¹⁴ It akhuni Yahudi meke ineram nen wene suakane wene pilineriogei meke inom, akhuni aperek nen, ebe wene here'isalok inakla nen kagalogo, “Itithogon hagakhe dogosak,” iluk inasuk wariogei meke iti inom, wene iti herogo dogunogo iluk, inasuk obatnerogonat wakhe dogono.

¹⁵ Allah nen akhuni aperek at hasik 'bakhalok hanorinakhe meke halok, it inobasik yi meke ti meke hano anek 'bisalok werek o. Itithogonat meke re, it aperek inetaiken Allah oba hakotdigidek dogolik, inakla apiliogei meke inom, eberiogei meke inom, weagat werek iti nen, it inobasik yi meke ti meke hano dek. Weak anek werek o.

¹⁶ It iti nen he, inape baga nen, “An Allah ebe nilu o,” iluk, inane pakhogon ekhe dogoligat, “Ebe ninokodek,” iluk u hak, inasuk warek degat, Allah alilo meke hagakhe dogolik, yi meke ti meke hanorogon hagasusak it motok erlok dek werek iti.