Roma 8 - ALLAH ANE WENW KET MEKE WAROGO WOKNINAKHIKHE WENE

Allah Agoreke ninakla dogolik ninobabut ninat hagakhorek wene

¹ Yogotak nit Kristus Yesus ninom hunik welago meke Allah nen wene ninoba 'biluk weagatninabigin dek o.

² An alep he, weak hagakharethek ilugun oba inebe motok watlageikharek iti meke nen herle warogo negen haknarek welageikhe. Itithogon werekma, yabokane Allah Agoreke nen Kristus Yesus ninom hunogo 'binanhe dogolik ninilugutninakherek etnogo nen herle hisalogo 'banhikhemo welagei.

³ Alep he, wene Allah nen ninasuk wakhikhe wene etnogo, nit akhuni ninobabut ninobatne dek iti nen, hano hagatninabusak erlok dek ageikhe. Erlok dek ageikhemo, nit akhuni ninobabut weak hagakho werekma, Allah ekaerek a'but nit hakene hagatlatluk, nit weak hagakhorek meke iti wene oba 'biluk obatne degetdisoagaluk la'i ageikhemo obatne degetdisikhe iti.

⁴ Alep he, nit mothogon hagakhe dogoagaluk, wene Allah nen ninasuk wakhikhe mekeat he, weak hagakhe lagagu iti. Weak hagakhe lagagusikmo, yabokane nit akhuni inobabut waganhidek dogolik Allah Agoreke obabut waganogo mot hagakhe lago meke at isikhe hak hagakhe dogoagaluk, weak hagakharek iti arat obatne degetdisikhe iti.

⁵ It aperek nen akhuni inobabut inikhogat dogolik hagakharek meke inobabut waganiogei meke iti, inakla wene akhuni mekeat oba ebekharek o. Nen, it aperek nen Allah Agoreke obabut waganiogei meke re, inakla wene at mekeat oba ebekharek.

⁶ Akhuni inobabut inikhogat dogolik hagakharek meke oba ebekhe dogogun halok, ilugun oba inebe motok watlasugun iti. Mekeat he, Allah Agoreke inakla kagalhunem hagakharek meke oba ebekhe dogogun halok, inetaiken hapukhogon iniluk motok dogogun iti.

⁷ Akhuni inobabut inikhogat dogolik hagakharek meke etnogo oba ebekhe dogolik, Allah apma ukiluk ane holek dogosak erlok dek nen holek welageikharek dek iti nen, at inom weak werek o.

⁸ Akhuni inobabut inikhok dogolik hagakharek meke iti hagakhoat dogolik, Allah akla hanorogo hagasusak erlok dek welageikharek iti.

⁹ Itithogon mekeat he, hit anek Allah Agoreke eberogonat hinakla werek halok he, hinobabut akhuni inobabut inikhogat dogolik hagakharek hak hagakhidek. Allah Agoreke obabut waganogo hagakhethep iti. Nen, tha nen Kristus Agoreke akla dek halok he, at iti ebe Kristus meke dek o.

¹⁰ Itithogon mekeat he, hit Kristus hinakla werek halok he, hinobabut weak hagakhethep iti nen, hinebe itikmanke yi watlasugun mekeat he, Allah nen wene hinoba meke korogo wokhalok yabokane hinapuke hinom hunogo 'binageikhe iti nen, at Agoreke nen hiniluguthinabigin iti.

¹¹ At Allah nen, Kristus Yesus watlageikhesikmo ilugutdisikhemo, at Agoreke hinakla dogolik, hinebe itikmanke watlagathep meke yi hiniluguthinabiginat. Iti re, at Agoreke nen Kristus ebe watlageikhesikmo ilugutdisikhe etnogo hinakla welagarek iti nen hiniluguthinabigin o.

¹² Nagarlak lak nerugi. Nit nen hagakhe dogosak meke werek o. Iti re, ninobabut akhuni inobabut inikhogat dogolik hagakharek hak hagakhe dogosak iluk igi 'buk. Dek o.

¹³ Hit hinobabut akhuni hinobabut hinikhogat dogolik hagakhe dogogun halok, hinebe motok watlasugun iti. Meke re, hinobabut itithogon hagasusak hagathinakhunem, Allah Agoreke ayoko 'biluk, at obatne baga watdisekhe dogogun halok he, hiniluk motok dogogun o.

^14-15 Allah nen Agoreke wokhisekherek iti, akhuni inebe it aperek inatuaneke dogolik inobabut inayukhogo hagakharek iti hak, hagathinakhe dogoagaluk wokhisekherek 'buk. Meke re, at Allah ekaerek a'buri hagathinabiluk, erlathinabuagaluk wokhisekherek. Iti nen, it akhuni Allah Agoreke nen wogosik nekherek meke, inebe dopok nen, inebe Allah a'buriat werek o. Itithogon dogolik ninebe allah Agoreke baga hakotdiluk dogolik, men ekhe lago, “Nopase Allah, nopase Allah,” iluk ninane pakhogon ekhe lago iti.

¹⁶ Itithogon ekhe lago iti, at Allah Agoreke nen, “Hinebe Allah a'buri o,” iluk yoknisugunem, nit ninetaiken oba nen ogorek iti.

¹⁷ Nit ninebe Allah a'buri halok he, at Kristus yi aik ti aik hasikhe hak, hugun halok, Allah nen nit Kristus ninomat hogotninabigin iti nen, Allah nen yi meke ti meke at a'buri wogeisagaluk abok yogeisasikhe meke iti, at Kristus ninomat woknisaumo, iteerek dogogun o.

Hanotninabigin wene

¹⁸ Nit o yogotak welago ya baga re, yi aik ti aik hekhe lago iti, herlekha'bugat negen. Meke re, yabokane, Allah nen ninebe ninat meke hagatninakhunem hogotninabugun iti anek he, kogat o. Halok he, ipisak walhaumo ipisak tak-tak dek, nakla apekhe lagei o.

¹⁹ Pogot agat yi meke ti meke Allah nen walhasikhe meke yoma nen, “Allah a'buri inebe ninat hagarinakhunem thelekma hogorinabugun iti mera hagatlasigin,” iluk, arlik haliogei.

²⁰ Pogot agat yi meke ti meke tha'bokhogonat abusak alomarogo dogeigiluk apalok nen, alomatlageikhesik welagarek 'buk. At Allah nen, “Yabokane hanotdigin nen, elanma hasik itithogon dogoak o,” iluk akla apasikhe baga werek o.

²¹ Itithogon werek mekeat he, yabokane Allah nen hanotdigin oba weregat o. Itinem nen, akhuni herle warek weak werekma, herle hisalogo tilinakharek hak, pogot agat yi meke ti meke tha'bokhogonat alomatdekherek meke nen obatne baga hagasik werekma, Allah nen herle hisalogo tilogo 'bisagein o. Itithogon 'bisagein iti, at a'buri inebe ninat hagarogo 'bisugunem hogorinabugun iti hak, pogot agat yi meke ti meke itithogonat ninat hagarogo 'bisugunem hogorasugunat o.

²² Humi nen, ineagei itaginakhe dogolik, ineagei hinet weak wakhe dogolik inetaiken ane egarek hak, pogot agat yi meke ti meke Allah nen walhasikhe meke yoma tha'bokhogonat o haganeat nen hinet wakhe dogolik inetaiken ane iliogeiat o.

²³ Pogot agat yi meke ti meke iti anek hinet wakhe dogolik, inetaiken ane iliogei 'buk. Allah nen, “Hinebe an na'buri. Arat wokhinakhi o,” iluk ninebe ninetaiken ninoado tha'bokhogonat hanotninabigin meke aban dogolik, hipiri yukuk alebageik meke itakharek hak, at Agoreke alebageik woknisasikhe mekeat, ebe yabokane hagatninabigin meke iti therogo dogolik, hinet wakhe dogolik ninetaiken ane ekhe lago.

²⁴ Itithogon hagatninabigin o, iluk ninakla apasinem, Allah nen tilninakhikhemo welago. Meke re, tha hak nen “Yabokane itithogon hagatlasigin,” iluk akla apasi werekma, ebe arat hagatlagunem ileken halok nen, yabokane akla apasiat dogosak nogo? Itithogon aperek welageikharek dek iti nen, nit nen, “Yabokane itithogon hagatlasigin,” iluk apekhe lago meke iti, ebe arat hagatlagunem nen, ninileken hogo halok he, ninakla apasi motogat dogosak dek o.

²⁵ Meke re, ninakla nen, “Yabokane eberogonat itithogon hagatlasigin o,” iluk apekhe lago meke ninileken higidek dogolik ninobakhanini hapugutdiluk therogo welago.

²⁶ Itithogon therogo dogolik, nit ninebe ninobatne dek werekma, Allah Agoreke nen yomaknisiliogo. Nit Allah ayoko 'buogoluk ninane nikithogon u heat ninobakha palek werekma, Allah Agoreke nen akhuni inane baga usak erlok dek meke, etaiken ane baga Allah ayoko 'biliogo.

²⁷ Itithogon ayoko 'bisinem nen, at Allah nen ninetaikenma motok penakherethekma nen, at ekaerek akla apekherek meke tak-tagat, at Agoreke nen at a'buri inobasik ayoko 'bisinem hutdekherek.

²⁸ At Allah akla apalok nit ninayoko 'bisikhemo, nit at ebe ninakmu welago meke, at ninom dogolik, yi meke ti meke hano asuagaluk, hagatnisiliogo nit ninilu.

²⁹ Haganeat, at Allah nen nit ninebe ilu dogolik, at a'but hakene asuagaluk wenakninakhikhe. At Yesus ebe makusa meke, agarumi doalegat at inom dogoagaluk wenakninakhikhe iti.

³⁰ Alebat Allah nen ninebe wenakninakhikhe meke, ninayoko 'bisikhe. Itithogon ninayoko 'bisikhe meke, wene ninoba meke korogo wokhasikhesik nen, yabokane ninom ninapuke hunogo 'binanhikhemo welago. Ninebe itithogon hunogo 'binanhikhe meke at ebe hogorakho motok welageikharek meke iti hakene asuagaluk wokninakhikhe.

Allah nen ninebe akmutninakherek wene

³¹ Wene tha'bokhogonat iti hasik, nit nen nikithogon ugun. Allah nit werekmake aga halok, tha nen erlok degetdinanusak nogo. Erlok dek o.

³² At ekaerek a'but akmu nen hakhigidek nit tha'bokhogonat hasik watlasuagaluk la'i ageikhe. At obabut hano nen itithogon woknisasikhesik nen, yi meke ti meke oba duk-duk woknisagein dek nogo? Woknisageinat o.

³³ Allah nen ninebe wenago wokninakhikhe meke, wene ninoba meke korogo wokhekherethek nen, at ane pakhogon, “It inoba wene motok dek,” iluk ekherethekma, yabokane wene tha nen ninoba 'busak nogo. Erlok dek o.

³⁴ Nen, wene ninoba 'biluk nen, tha nen weagatninabusak nogo. At Kristus Yesus watlageikhesikmo Allah nen ilugutdisikhemo, pogot oba dageiluk, at alilu iki ebeke ebe kok dogolik, nit hasik Allah ayoko 'biliogo.

³⁵ At Kristus ninebe akmu nen ninom hunik werekma, tha nen agotninabusak. Yi weak ti weak ninoba hagatlageik, akin meke ninoba ageik, hagasumo iti nen agotninabusak a? Erlok dek o. Akhuni nen, “Hinebe Allah a'buri,” iluk weagatninabumo iti nen agotninabusak a? Hipiri no ageik, ninasu yi meke ti meke dek ageik, hagatlasumo iti nen agotninabusak a? Yuk ageik, ninebe ninakhik, hagatlasumo, iti nen agotninabusak a? Erlok dek o.

³⁶ Wene iti mothogon Allah ane baga holal waganhe dogolik, men isukha, “Hat hasigat, akhuni nen dikene hunik, hibako hunik, ninasuogoluk hagatninakho motogat werek o. Akhuni nen domba wasuogoluk abok palharek iti hak, ninabok palhoat werek o,” iluk holal waganogo 'bisukhama werek.

^37-39 Itithogon mekeat he, Allah ninebe akmu nen ninoe Etagapogot Kristus Yesus woknisasikhemo ebe watlageikhe iti baga ninom hunik werekma ninebe watlasumo inom, niniluk dogoumo inom, iti nen agotninabusak erlok dek o. Malaikat pogot oba yoko nekharek meke iti inom, pogot oba inobatne werek meke aperek iti inom nen, agotninabusak erlok dek o. Yi meke ti meke yogotak hagatlagarek meke inom, yabokane hagatlasigin meke inom, iti nen agotninabusak erlok dek o. Nen, obatne werek meke aperek nen agotninabusak erlok dek o. Nen, yi meke ti meke pogot oba welagarek meke men, wema baga welagarek meke men, agotninabusak erlok dek o. Nen, Allah nen walhasikhe meke ninat meke aperek nen agotninabusak erlok dek o. At Allah nen ninebe akmutninakhikhemo, Kristus Yesus hagakhikhe iti baga, tha'bokhogonat itithogon weak hagatninakhunem nit agotninabusak erlok dek o. Mekeat he, akhuni wuleleken tiologo inatluk inobatne ageikharek hak, nit ninobatne agorek iluk hutdekhe lagei o.