Roma 6 - ALLAH ANE WENW KET MEKE WAROGO WOKNINAKHIKHE WENE

Kristus ninom watlagagusik ninomat niniluk dogogun wene

¹ Iti halok he, nit nen nikithogon ugun. Allah obabut hano iti nen, kokhogon akmutninakhe dogoagaluk, nit nen weak hagakho motok dogosak nogo?

² Motok erlok dek o. Nit weak hagakhe lagagu iti hasik he, arat watlagagusigat nen, yabokane weak hagakhe dogosak nogo? Erlok dek o.

³ Nit Kristus Yesus ninom hunisuogoluk ima usasugu meke yi re, at ebe watlageikhe hagat, ima usa'inanhunem ninom hunigat watlagagu, iluk hinokodek nogo?

⁴ Ima usa'inanhe dogolik, at ebe warek thalhukha hak, nit at ninom hunigat werekma warogo 'binanhukha. Nen, at Kristus watlageikhesikmo nen, opase obatneak hogorakharek meke etnogo nen ilugutdisikhe hak, nit yogotak ninilugutninakhikhemo ninobabut ket ninat hagakhe dogouok o.

⁵ At watlageikhe hak, nit ninom hunigat dogolik watlagagu halok he, at iluk ageikhe hak, nit itithogonat niniluk dogogun.

⁶ Nit ninobabut ninikhogat dogolik weak hagakhe lagagu meke iti erlok degetdisoagaluk, Yesus o baga meldiluk ninomat ninakhukha iti nen, nit ninobabut alep meke iti, atuaneke dogosak dek o, iluk ninilu.

⁷ Akhuni weak hagatluk watlagunem nen, wene inoba meke dek agarek iti.

⁸ “Nit he, Kristus ninom hunigat watlagagu halok, ninom hunigat niniluk dogogun o,” iluk ninetaiken at oba hakokthek welago.

⁹ At Kristus arat watlageikhesikmo nen Allah nen ilugutdisikhemo nogo nen, yabokane watlasigin dek, iluk ninilu o. Halok he, watlariogei erlo iti nen Yesus ebe yabokane apma ukusak motok dek o.

¹⁰ At Kristus watlageikhe iti, weak hagakharek iti hasik opaki hasigat watlageikhe iti arat o. Yabokane iluk ageikhesik iluk welagarek iti, Allah hasigat iluk welagarek o.

¹¹ Iti hagat, hit hinakla nen, “Weak hagakhe dogosak hasik waregat dogolik, Kristus Yesus ninom hunik dogolik, Allah hasigat niniluk dogogun,” iluk hinakla apekhe dogono o.

¹² Ninebe watlagorek meke yi werekma, weak hagakharek meke iti obatne asinogo nen, apma ukiluk dogogup o. Weak hagasuagaluk hinakla kagali aga halok he, weak meke iti ane hinasuk holhup o.

¹³ Hiniki hinisok hinebe baga welagarek meke aperek inom tha'bokhogonat, weak meke asikhe arege negen atluk nen, weak hagakhe dogoagaluk, at wogokhe dogogup. Hinebe warek hakene werekma Allah nen hiniluguthinakhemo hiniluk dogolik hagasusak mothogonat, hinebe a'birat Allah wogotni o. Hiniki hinisok hinebe baga welagarek meke inom aperek tha'bokhogonat nen, at asikhe arege negen atluk nen, mothogon hagakhe dogoagaluk Allah wogotni o.

¹⁴ Hit nen, wene Allah nen ninasuk wakhikhe wene etnogo oba hakokthek welagap dek. At he, Allah obabut hano nen akmutninakherek iti oba hakokthek welagap iti nen, weak meke apma dogosak dek o.

Allah apma ukiluk welageikharek wene

¹⁵ Halok he, wene iti ilugun oba, nikithogon usak? Nit ninebe wene Allah nen ninasuk wakhikhe wene etnogo baga hakokthek welago dek. At he, Allah obabut hano nen akmutninakherek iti baga hakokthek welago iti nen, weak hagakhe dogosak nogo? Motok dek o.

¹⁶ Hit nen, ap ageikhe atuaneke atluk nen, ane holek dogouogoluk, apma ukiluk dogolik, at ane holhe lagap halok he, at atuaneke mekeat welago iluk hinokodek nogo? Weak hagakharek meke iti apma ukiluk nen, ilugun oba watlageikharek iti. Mekeat he, at Allah ane holek dogolik, at apma ukilukmo, ilugun oba at nen wene ninoba meke korogo wokhalok at ninom yabokane ninapuke hunogo 'binanherek iti.

¹⁷ Hit alebageik nen, weak hagakharek iti apma ukiluk werekma, yabokane, wene yakulhisugunem, wene iti hinetaikenma waganhigip iti nen, Allah heagei wasuok o.

¹⁸ Hit nen, weak hagakharek iti nen hakhisik werekma, Allah nen herle hisalogo 'binageisikhesik nen, at hasik mothogon hagakhe dogoagaluk, apma 'binageisikhemo welagap.

¹⁹ Hit hinobabut wene yokhisigi iti hutdusak erlok dek hakene nen, hutdubageik nen iluk, akhuni inatuaneke dogolik hagakharek meke inoba lisogo yokhisekhe lagei iti. Hit alebageik, hiniki hinisok hinebe baga welagarek meke aperek inom tha'bokhogonat nen, weak meke atuaneke thalek wogokhik, yugunat hagakhik, hinasuk warek dek yi weak ti weak hagakhik, hagakhe lagagip iti. Iti hagat, yogotak hit hiniki hinisok hinebe baga welagarek meke aperek inom tha'bokhogonat nen, Allah ekaerek hasik 'bisalok mothogon hagakhe dogouogoluk, at wogokhe dogono o.

²⁰ Hit alep weak hagakhe lagagip meke apma dogolik, Allah akla warlok apekherek meke mothogon hagasusak erlok dek welagagip.

²¹ Meke re, itithogon hagakhe lagagip iti hasik, nena meke thaburasigip nogo? Alebat hagakhe lagagip meke iti hasik, yogotak hinekarli ariogo iti. Itithogon hagakhe dogoluk nen, ilugun oba inebe motok watlageikharek itiat o.

²² Meke re, hit weak hagakho korlek, weak meke nen hakhisik werekma, Allah nen herle hisalogo ula'inageikhemo nen, yogotakne at apma ukiluk welagap iti o. Dogolik hinebe at hasik 'binageiluk welagap iti thaburegep o. Itithogon dogoluk, ilugun oba hiniluk motok dogogunat o.

²³ Weak hagakharek iti oko re, watlageikharek iti. Nen, ninoe Etagapogot Yesus Kristus ninom hunik werekma, Allah obabut hano nen oko degat niniluk motok dogoagaluk hagatninakherek iti.