Roma 13 - ALLAH ANE WENW KET MEKE WAROGO WOKNINAKHIKHE WENE

Ap koktek pemerintah meke inane hologo dogosak wene

¹ Hinougi koktek pemerintah meke iti, erlo werlek meke 'buk o. Erlo at Allah at o. At nenat meldisasikhemo kok welageikharek iti nen, hit hinebe tomok it inane hologo dogono o.

² Iti nenat, tha nen it koktek pemerintah meke iti inane holhidek hagariogo halok he, at Allah meldisasikhe meke itiat ane holhidek hagariogo o. Halok he, it akhuni itithogon hagakharek meke iti, inekaerek nen ukum inoba 'bakhagun werek o.

³ It akhuni hano hagakhe dogolik, koktek pemerintah meke iti, inayuk dekhogon welageikharek. Meke re, it weak hagakhe dogoligat, inayukhogon welageikharegat. Hit nen it pemerintah meke hinayuk dekhogon dogouogoluk, hinobabut hanorogon anek hagakhe dogono. Itithogon hagakhe dogogun halok he, it nen hogothinabugunat o.

⁴ It pemerintah Allah nen meldisasikhemo, at atuaneke dogolik, hit hanorogo dogoagaluk hagariogei o. Meke re, weak hagakhep halok he, hinayukhogon dogono. It tugi wolok hagariogei iti, yugunat wolok liliogei 'buk. Akhuni weak hagakhunem nen, Allah nen akla aga dageiluk ukum inoba 'bu hak, it meldisasikhemo, it nen ukum inoba 'begarek o.

⁵ Halok he, it inane hologo hagasusak o. Thogotdusak erlok dek o. Allah akla aga dageinogo iluk, inane hologo hagasusagat meke re, iti baga anek inane hologo hagasusak 'buk. Hinakla akin dek the dogouogoluk, it inane holek hagasusagat o.

⁶ Iti nenat, uang pemerintah hasik kino isinem wogeisegethep iti. It he, Allah apma dogolik, at hasik itithogon obatnerogon hagakharek iti.

⁷ Halok he, it wogeisausak mekeat wogeisekhe dogono o. Uang pemerintah nen yi hasik ti hasik kino isinem wogeisausak tak-tagat wogeisigik, it inebe hinayukhogon dogosak mothogonat hinayukhogon welageik, inalon halusak tak-tagat inalon halinakhik, hagakhe dogono o.

“Hinagarlak lak hinerugi hinom nakmu-hakmurogo hinetaiken hunik dogosak,” iluk yogeisasikhe wene

⁸ Hit he, akhuni hinoba palegeke dogosak dek. Hinoba palegeke dogou hak, hit-hit nakmu-hakmurogon hinetaiken hunik dogosak itiat o. Wene Allah nen ninasuk wakhikhe wene etnogo tha'bokhogonat tak-tagat hagasu hak, inebe nakmu-hakmurogo inetaiken hunik dogosak itiat o.

⁹ Wene iti ninasuk wakhe dogolik, men isikhe, “Param hagasusak dek o. Akhuni inebe inasusak dek o. Hiniki abusak waganusak dek o. It aperek inameke hinakla nen, Warlok o, iluk apausak dek o,” iluk wene ninasuk wakhikhe iti inom, aperek ninasuk wakhikhe meke inomat, opakiat dapukhogon wene kok hakene, men isikhe, “Hit nen, akhuni hinom welagap meke iti, hinekaerek hinebe hakene hinakmurogon dogono o,” iluk isikhe iti.

¹⁰ Akhuni inebe hinakmurogon dogolik, inebe weagarinakharek dek. Wene Allah nen ninasuk wakhikhe wene etnogo tha'bokhogon tak-tak hagasu hak, akhuni inom nakmu-hakmurogon inetaiken hunik dogosak itiat o.

“At Kristus wisigin hurli horogat asi aga,” iluk yogeisasikhe wene

¹¹ Itithogon hagakhe dogosak iti nenaluk. Iti re, nit ebekeram ninetaiken Allah baga hakotdisugu itinem he, o hanotninabigin hurli walegat welageikhe. Meke re, yogotak horogat asi iriogo iti nen, hit noge ekhe lagap iti, hiniluk asusak mo aga iti hutdekhe lagap o.

¹² O hibako welagosik yi, horok yaat o wi asigin. Akhuni o mummo dogolik hagakharek meke iti here'isauwok. Sikhe thege waganharethek hebelogo welageikharek hak, nit o lia meke waganiluk ninobabut hebelogo dogouok.

¹³ O lia baga dogolik hagakharek hak, ninobabut mothogon hagakhe dogouok. Pesta nalok eka hagakhik, anggur apusu nalok hunu-hunu ageik, hagakharek iti hak hagasusak dek o. Yugunat param hagarinakhik, inekarli dek hagakhik, hagakharek iti hak hagasusak degat o. Wene palhik, ua palhik, hagakharek iti hak hagasusak degat o.

¹⁴ Hit hinobabut he, akhuni inobabut inikhogat dogolik, Yi waganile, ti waganile, iluk egarek iti hak hinakla kagalhidek nen, sikhe thege waganharek hak, ninoe Etagapogot Yesus Kristus obabut itiat waganino o.