Roma 10 - ALLAH ANE WENW KET MEKE WAROGO WOKNINAKHIKHE WENE

¹ Nagarlak lak nerugi. Allah nen it nagarlak lak nerugi ninukuloak etaga opakiat meke iti, tilinabilep e, iluk nakla nen wene munini ebekhik, Allah ayoko 'bigik, hagakhe lagei.

² It nen Allah hasik inobatnerogon hagariogei mekeat he, inobabut nilu. Eberogonat hagasusak meke inilu dogolik hagariogei 'buk.

³ It he, Allah nen wene inoba meke korogo wokhalok yabokane inapuke inom hunobo 'bisoagaluk, at apma ukiluk dogolik hagasusak meke inokodek nen hagakhidek welagoukha. Inekaerek inakla nen apalok inobatnerogon hagakhe lagoukha iti.

⁴ At Kristus ebe agat oba usageikhe iti baga, wene Allah nen ninasuk wakhikhe wene etnogo tha'bokhogonat mothogon anek hagakhikhe. Akhuni inetaiken at Kristus oba hakotdegarek meke inebe dopok, wene inoba meke korogo wokhalok, yabokane inapuke Allah inom hunogo 'bisekherek.

Allah nen akhuni ninebe tha'bokhogonat tilninabusak wene

⁵ At Musa nen wene Allah nen ninasuk wakhikhe wene etnogo baga, Allah nen wene ninoba meke korogo wokhalok yabokane ninapuke at ninom hunogo 'binanherek iti hasik men isikhe, “Akhuni wene iti holek dogolik, mothogon hagakhe dogogun meke inebe dopok, wene iti baga iniluk motok dogogun o,” iluk holal waganogo 'bisikhe.

⁶ Itithogon mekeat he, akhuni inetaiken Allah oba hakotdisinem nen, at nen wene inoba meke korogo wokhalok yabokane inapuke at inom hunogo 'bisekherek iti hasik, Allah ane baga holal yigithogon waganogo 'bisukha, “Hakla nen, Pogot oba tha dageigin, iluk apugun o,” iluk isikhe iti ebe re, Kristus ebe wolok usa'isuagaluk usak dek iluk isikhe iti.

⁷ Nen, “Wema baga tha usasigin, iluk apugun o,” iluk isikhe iti ebe re, Kristus watlageikhesikmo nit nen ilugutdiluk wolok dagei isuagaluk usak dek iluk isikhe iti.

⁸ Halok he, wene iti men apalok isikhe, “Allah ane iti ebe horogat werek o. Iti hape baga men, hetaikenma men, werek o,” iluk isikhe iti, akhuni nen inetaiken Allah oba hakotdusak wene nit nen yokhisekhe lago iti hasigat isikhe o.

⁹ Hape baga nen, “Ninoe Etagapogot Yesus at o,” iluk pakhogon igik, nen, hakla nen, “Yesus ebe watlageikhesikmo, Allah nen ilugutdisikhemo werek o,” iluk eberogonat apigik, hagasumo, tilhabiginat o.

¹⁰ Akhuni inetaiken Allah oba hakotdisinem nen, at nen wene inoba meke korogo wokhalok,, yabokane inapuke at inom hunogo 'bisekherek. Nen, inape baga nen, at abok pakhogon isinem nen, tilinakherek iti.

¹¹ Allah ane baga holal waganogo 'bekhe dogolik men isukha, “Akhuni inetaiken at oba hakotdiliogei meke inekarli asugun motok dek o,” iluk holal waganogo 'bisukha.

¹² It akhuni Yahudi meke ninat, nen, akhuni itikmanke meke ninat, usak dek. Nit tha'bokhogonat ninopase Etagapogot, Allah opakiat o. Nen, at nen wogeisoagaluk ayoko 'begarek meke inebe tha'bokhogonat kokhogonat wogeisekherek o.

¹³ At nen ekhe dogolik, “It aperek nen an hinopase Netagapogot Allah netaga palharek meke, tha'bokhogonat tilinabigin anek o,” iluk isikhemo holal waganogo 'bisukha.

^14-15 Allah nen wene ageikhe men isikhe, “Akhuni hano wene wolok yogeisa lageikharek meke iti, hano motok o,” iluk isikhemo holal waganogo 'bisukhama werek mekeat he, hano wene iti wolok loagaluk inayoko 'biluk la'isigidek halok, nikithogon nen yogeisa lausak. Nen, it aperek nen wene ebe yogeisa lageidek werek korlek, at abok nikithogon nen inasuk holusak. Nen, at abok holhidek dogolik, nikithogon nen inetaiken at oba hakotdusak. Akhuni inetaiken at oba hakotdigidek dogolik, etga nikithogon palusak.

¹⁶ Meke re, akhuni inebe tha'bokhogonat hano wene itiat waganusak meke re, it aperek waganhidek werek o. At Yesaya nen, Allah men yogokhikhe, “Ninopase. Nit wene yogeisugunem nen, tha nen wene iti hutdekhe. Hutdigidek anek werek o,” iluk yogokhikhe.

¹⁷ Meke re, hano wene iti, Kristus abok yogeisa lagunemat inasuk holharek o. Nen, wene inasuk holilugat, inetaiken at oba hakotdegarek o.

¹⁸ Meke re, an nen hinok ageikhe waganusak. It he, hano wene iti inasuk holhidek werek a? Dek o. Inasuk arat holha. Allah ane baga, “It inane iti o yi ai ti ai tha'bokhogonat wialageikhesikmo re, o ilugun ilugun eloma tha'bokhogonat inasuk holhukha o,” iluk isikhemo holal waganek werek iti nen igi o.

¹⁹ Hinok ageikhe waganik. It akhuni Israel meke hano wene iti inokodek a? Iniluat o. Keramat, at Allah nen ane isikhemo, at Musa nen men yogeisasikhe, “An nen, it akhuni an na'buri meke 'buk. Akhuni werlek meke an nen inayoko 'bumo, hit nen ua palubageik nen iluk hagathinakhik, nen it inetaiken dek meke inayoko 'bumo, hit hinakla aga dagouak nen iluk hagathinakhik, hagasigin o,” iluk yogeisasikhe.

²⁰ Nen, yabokane Allah nen, wene ageikhe men isikhe, “Akhuni an nebe heraknabiogei dek meke nen, heraknakha o. Nen, akhuni an noba nitema waganhidek meke nen, nebe neoagaluk nekaerek nen inelokhoma winam agei o,” iluk isikhemo, Yesaya nen ayuk motok degat yogeisasikhe.

²¹ Nen, Allah nen akhuni Israel meke men yogeisasikhe, “An hubenke nen, dikene nen, hiamaganekeke nen, akhuni yoma woginabigiluk niki lanhek motogat welagei mekeat he, inasuk holu'buk inasikanok weak werek o,” iluk yogeisasikhemo, Yesaya nen yogeisasikheat.