Roma 1 - ALLAH ANE WENW KET MEKE WAROGO WOKNINAKHIKHE WENE

Heagei warinakhikhe wene

¹ Hit Allah a'buri o Roma welagap meke nagarlak lak nerugi. At Allah hinebe akmu meke tha'bokhogonat an Paulus Kristus Yesus atuaneke meke etnogo nen wene holal waganogo hinoba la'i agei iti o. An nen hano wene etnogo akhuni yogeisilik nekhe dogoagaluk Allah nen wenago meldanhikhesik la'ani ageikhe o.

² Muk haganeat Allah nen, “Wene hano wene iti, yabokane winam asigin o,” iluk abok it ap at ane yogeisekhe lagoukha meke emenogo yogeisugunem, it nen Allah ane waganek etnogo baga holal waganogo 'bekhe lagoukha.

^3-4 Wene holal waganogo 'bisukha iti, ebe re, Allah a'but ninoe Etagapogot Yesus Kristus hasigat o. Akhuni itaklageikharek hak, ebe Daud nen itago meke nen itaklageikhe. Mekeat he, ebe watlageikhesikmo nen, Allah Agoreke obatne baga ilugutdisikhe iti baga, Allah a'burat o, iluk ekagat ageikhe iti.

⁵ At watlageikhesikmo nen Allah Agoreke nen ilugutdisikhe iti baga, an nen yi akhuni ti akhuni inukuloak etaga tomok inetaiken at Yesus oba hakotdiluk ane hologo hagakhe dogosak meke yakulisugunem, at etaga kok asuagaluk Allah obabut hano nen nayoko 'biluk la'ani ageikhe o.

⁶ Akhuni yi akhuni ti akhuni inukuloak etaga tomok iti, hit akhuni o Roma meke hinom hasigat o. Hit hinebe Yesus Kristus agarumi asuagaluk hinayoko 'bisikheat o.

⁷ Hinebe at ekaerek 'binageiluk hinayoko 'bisikhemo welagap o. Iti nen, an nen wene holal waganogo hinoba la'i aga dogolik, Ninopase Allah men, ninoe Etagapogot Yesus Kristus men, ipisak inobabut hano etnogo nen hano meke wokhisigik, hinetaiken hapugutdinagagik, hagakhe dogoak o iluk, igi o.

Paulus nen akhuni Roma meke inoba lagaluk isikhe wene

⁸ Nagarlak lak nerugi. Wene ebe yokhisak nen, alebageik yi tak yokhisak. Akhuni o yi ai ti ai eloma nen, hit tha'bokhogonat hinabok hano ekhe dogolik, “It akhuni o Roma meke inetaiken Yesus oba hakotdiluk welageikharek o,” iluk egarek iti nen, Yesus Kristus oba, “Nopase Allah,” iluk heagei wakhe lagei.

⁹ Itithogon heagei wakhe dogolik, hit hinobasik kamotdigidek sembayan isi motok welagei meke, at Allah ilu o. An Allah apma dogolik, hano wene at a'but hagakhe lageikhe wene iti akhuni yogeisilik nekherek iti, netaiken oba nen, at Allah hasik hagatdisekhe lagei o.

¹⁰ Sembayan itithogon ekhe dogolik, at Allah nen hano apalok, “It inoba lano,” iluk yoknetluk woknarik wisuagaluk kino yogokho motok welagei o.

¹¹ Hit hinetaiken horle asuagaluk, Allah Agoreke nen wogeisekherek meke iti, hit ageikhe wokhisagaluk 'bithisa etle, apekhe lagei o.

¹² An wokhisa etle apekhe lagei iti, hit men, an men, ninetaiken Yesus Kristus oba hakotdisugu meke iti baga, ninetaiken ago wat-wat hagasuogoluk wisigiluk apekhe lagei o.

¹³ Nagarlak lak nerugi. An nen, akhuni itikmanke meke aperek o yi ai ti ai eloma wene yogeisekhe lagagimo waganhukha hak, hit meneke, itithogonat waganubageik iluk niki doalegat oba hinoba wisigiluk apekhe lagei mekeat he, nagolak palek nen huk aga lagei iti hinilu asubageik nen iluk yokhisigi o.

¹⁴ Akhuni wene hutdega meke men, hutdigidek meke men, sekolah yakulha meke men, yakulhidek meke men, tha'bokhogonat hano wene yogeisausak iluk an noba palegeke hakene welagei o.

¹⁵ Iti nenat, hano wene iti hit akhuni o Roma welagathep meke etoma yokhisa isusak warlok apekhe lagei o.

“Hano wene iti, Allah obatneat o,” iluk yogeisasikhe wene

¹⁶ Hano wene iti Allah obatneatma, ebekeram akhuni Yahudi meke, nen yabokane, akhuni itikmanke meke, inetaiken Yesus Kristus oba hakotdegarek meke tha'bokhogonat tilinakherek iti nen, an nekarli degat hano wene iti yogeisilik nekherek iti.

¹⁷ Allah nen men isikhemo holal waganogo 'bekhe dogolik, “Akhuni inetaiken an noba hakotdisinem nen, an nen wene inoba meke korogo wokhalok yabokane inapuke an ninom hunetlatluk iniluk motok dogogun o,” iluk isikhemo holal waganogo 'bisukha hagat, Allah ninom yabokane ninapukhe itithogon hunetlasusak, iluk, hano wene iti baga thelekmatdisikhe. Allah ninom yabokane ninapuke hunetlasusak wene iti ebe re, ninat ageikhe hagasugun oba nen 'buk. Ninetaiken at oba hakotdiluk erlo baga nen piokhogon hurli ekapul oba dogogun iti baga, Allah ninom yabokane ninapuke hunetlatluk dogogun o.

Allah nen akhuni wene inoba 'bekherek wene

¹⁸ Akhuni nen, Allah ebe inobakhanini here'isalok, inobabut korloat hagakhe dogolik, ebe wene akhuni inilu asinogo iluk thebeliogei iti nen, Allah akla aga dageiluk pogot oba nen thelekmatdisikhe.

¹⁹ At Allah akla aga dageiluk thelekmatdisikhe iti, at ekaerek nen, “An nobabut itigirlik,” iluk abok thelekmatdisikhemo hutdusak meke werek korlegat hagakharek iti nen akla aga dageisikhe iti.

²⁰ Allah ebe ninileken hogorek dek mekeat he, at nen pogot agat walhasikhemo inileken hekhe dogolik, at ebe walhasikhe mekeatma, obatne ikhok motok welagarek, iluk, obabut thekhekhogon hutdusak mekeat welageikharek iti. Welageikharek iti hasik, it nen, “Allah ninokodek dogolik weak hagakhorek,” iluk usak dek asigin o.

²¹ Allah ebe itithogon inilu dogoligat, it nen, “Allah ebe walhasikhe mekeat o,” iluk, ebe hogorakhidek, heagei wakhidek, welagoukha. Itithogon dogolik, ninat meke ebeat meke dek mekeat he, wene munini we yugunat inakla ebekhe lagoukha iti nen, inetaiken abit ageikhe.

²² It inetaiken itithogon motok abit hagatlatluk dogoligat, “Nit ninetaiken motok kagalek o,” iluk egarek iti.

²³ Inetaiken abit agaikhesik nen, Allah ebe hirli agarek dek meke, hogorasusak meke iti here'isalok nen, obolukmo hirli agarek meke iniki nen akhuni-akhuni inalino hagarogo 'bigik, thue-thue inalino hagarogo 'bigik, wam-wam, 'bagei-'bagei, yeke-yeke, inalino hagarogo 'bigik, warlo-warlo inalino hagarogo 'bigik, hagatluk nen, hogorakharek.

²⁴ Hogarakharek iti nen, Allah nen, “It inekaerek inetaiken nen nukunem, it-it inekarli dek inebe weagararekhe dogoak,” iluk inebe here'isasikhe iti.

²⁵ At Allah walhasikhe meke hogorakho motok dogosak, iluk isinem, Eberogonat, iluk u hak, “Amin,” iluk ekhe dogosak mekeat he, it nen Allah ane ebeat wene iti here'isalok, akhuni inekalat nukhetdisasukha wene iti waganhukha. Itithogon waganhukhasik, Allah nen yi meke ti meke walhasikhe meke iti ebe hogorakhidek nen, yi meke ti meke walhasikhe meke iti iniki nen inalino hagarogo 'biluk, hogorakhik, at hasik hagakhik, hagakharek iti.

²⁶ It itithogon hagakharek iti nen, at Allah nen, it inetaiken nen nukunem inekarli dek hagakhe dogoagaluk, “Inoba dopok,” iluk here'isasikhe. It humi nen, ap inom noge egarek hagat, noge usak mekeat he, it humi-humi noge usak dek mekeat noge egarek iti.

²⁷ Iti hak, it ap nen meneke, ap nen humi inom nobe egarek hagat, noge igidek mekeat he, ap-ap noge egarek. It ap-ap inoba agaken dageisinem inekarli dek korloat hagakharethek nen, wene inekaerek nen ukum inoba 'bakhegarethek nen, inebe weak ageikharek.

²⁸ It nen, “Allah ebe ninilu dogosak nina'it o” iluk at ebe it inakla meanetdisukhama, at nen, “It inakla apiliogei iti korlo o. Na'it. It nen weak mekeat he, hano iluk apegarek iti, itithogon inoba tomok apekhe dogolik hagasusak dek meke hagarekhe dogonek,” iluk inebe here'isekherek.

²⁹ Itithogon hagarekhe dogolik, it inakla nen yi weak ti weak, yi korlo ti korlo, kerlekhogon dogolik, inamikmak weak hagakhik, akhuni weagarinakhik, hagakharek. Hagakhe dogolik, akhuni inoba ua palhik, inebe inakhik, wene tauk ageik, akhuni dalinakhik, wene eken 'biluk welageik, hagakharek iti mekeat inakla motok kerlek welageikharek. Inabok limago nabok-habok igik,

³⁰ thelekma igik, Allah ebe ina'it motok welageik, inayuk dek negen welageik, inekaerek nen hogorakhigik, inakeke 'bakhigik, weak meke aperek hagasuogoluk inekaerek inakla kagalhik, inagosa inopase inane holhidek hagakhik, hagakharek iti.

³¹ Inetaiken dek weak hagakhik, wene warisegarethek nen thogotdigik, akhuni ina'it anek welageik, inakmu dek welageik, hagakharek.

³² Itithogon hagakharek iti nen, at Allah nen, “Akhuni inobabut itithogon hagakharek meke halok he, an nen ukum inoba 'biluk inebe motok inasusak mothogonat inasigin o,” iluk isikhe meke inilu dogoligat, it inekaerek nen itithogon hagakhoat welageikharek iti. It itithogon hagakhe dogolik, it akhuni aperek nen itithogonat hagakhunem nen, “Erlok hagakhe lagap,” iluk yogeisegaregat.