Matius 15 - ALLAH ANE WENW KET MEKE WAROGO WOKNINAKHIKHE WENE

Yesus nen, “Hinopa lak hagakhe lagoukha tak-tagat hagakhe lagap,” iluk yogeisasikhe wene

¹ Itithogon hagakho werekma, it ap Farisi meke aperek inom, it ap Allah ane holal waganek iteerek meke aperek inom, o Yerusalem nen Yesus oba wagoukhasik nen, wene yigithogon yogokhukha,

² “It ap hat hagarumi hane waganiogei meke yoma nen, ninopa lak hagakhe lagoukha tak-tagat hagakhidek thagalogo thogotdisalok iniki bagake hokhidek hipiri niliogei iti nenaluk,” iluk yogokhukha.

³ Itithogon yogokhukhama, at Yesus nen he, “Halok he, hit meneke, Allah nen, Yigithogon hagatno, tigithogon hagatno, iluk ninasuk wakhikhe wene thagalogo thogotdiluk, hinopa lak hagakhe lagoukha tak-tagat hagakhe lagap iti nenaluk.

⁴ At Allah nen ekhe dogolik, Hinagosa hinopase inalon halinakhe dogono o, iluk isikhesik, ageikhe men isikhe, Tha nen agosa opase abok weak palhe halok he, at iti ebe motok wasusak o,

⁵ iluk ninasuk wakhikhe mekeat he, hit nen, men yogeisekhe lagap, Tha nen opase he a, agosa he a, yogokhe dogolik, An meke yi meke ti meke hat wokhesusak mekeat he, Allah hasik 'bisigirikmo o, iluk yogeisekhe dogoagaluk yakulisekhe lagap iti.

⁶ Itithogon yakulisekhe lagap iti nen, it itithogon hagakhunem, it inopase inagosa lak inalon halinabiogei dek iti o. Itithogon hagakhe lagap iti baga, hit hinopa lak hagakhe lagoukha wene iti hago dogolik, Allah ane thagalogo thogotdekhe lagap iti.

⁷ Hit hinoado baga anek hano thalek dogolik hinetaiken pere yi re! At Yesaya nen Allah ane yogeisekhe dogolik wene men isikhe iti, hit hinobasik mothogon isikhe higi,

⁸ Allah nen, It akhuni yoma, inape baga nen an hogotnakhe dogolik, inetaiken noba ebekhidek werlekma ebesi liliogei.

⁹ Wene akhuni inane mekeat he, an nen isigi meke negen yakulisiliogei iti nen he, we yugunat hogotnabiogei o, iluk isikhemo, Yesaya nen holal waganogo 'bisikhemo werek iti, hit hinobasigat isikhe o,” iluk yogeisasikhe.

“Akhuni wene inakla nen kagalogo dagei agunem egarek iti, weagarinakherek ebe itiat,” iluk yogeisasikhe wene

¹⁰ Itithogon yogeisasikhesik nen, yabokane at Yesus nen akhuni doalegat emenogo waisasikhemo wagoukhama, ageikhe men yogeisasikhe,

¹¹ “Wene igin yi hit hutdubageik nen, hinasuk hanorogo holini o. Yi meke ti meke inapema kola'egarek iti nen inebe weagarinakherek dek o. Meke re, inape baga nen wene egarek iti bagaat weagarinakherek o,” iluk yogeisasikhe.

¹² Itithogon yogeisasikhemo, at agarumi ane waganhe lagoukha meke emenogo oba wagoukhasik nen, men yogokhukha, “Wene yoknisegen etnogo, it ap Farisi meke nen inasuk holhasik nen, ua palha iluk, hat nen ekagat hutdisegen a? Dek a,” iluk yogokhukha.

¹³ Itithogon yogokhukhama at Yesus nen, “Yi oka ti oka an nopase pogot oba meke nen ai yakhidek meke halok he, motok henogo la'isageinat o.

¹⁴ Inileken puk dogoligat he, holak lirisiliogei iti thogotdisani o. At ageikhe ileken puk meke nen, at ageikhe itithogon ileken puk meke yogokhe dogolik, Holak yike lu! iluk iki hago wolok ligin halok he, ipisagat hurlugu Karluk waganekma usagun o,” iluk yogeisasikhe.

¹⁵ Itithogon yogeisasikhemo, at Petrus nen he, men yogokhikhe, “Noe. Wene oba lisogon yoknisegen iti ebe pakhogon yoknisan o,” iluk yogokhikhe.

¹⁶ Itithogon yogokhikhemo, at Yesus nen, “Hit meneke re, it hinom tak-tagat wene iti aban hutdigidek welagap a?

¹⁷ Yi meke ti meke nasinem nen, inapemake nen, piokthek inelabutla usalok nen, yabokane inamiso usi lageikharek etnogo hinokodek a?

¹⁸ Meke re, wene inape baga nen dukhekherek iti re, inetaikenma nen kagalogo dagei agarek iti nenat inebe weagarinakherek o.

¹⁹ Inetaikenma nen weak meke ebekhik, akhuni inakhik, humi ap inagugi meke param ha'isigik, homagarlugi yugunat hagarinakhik, iniki abusak waganhik, it akhuni aperek inoba inekalat wene 'bisigik, inabok wiik-weak palhik, hagakharek iti inetaikenma nenat kagalogo dagei agunem dukhi agarek o.

²⁰ Wene inetaikenma nen kagalogo dagei agarek iti nen inebe weagarinakherek. Meke re, iniki baga hokhidek hipiri nekarek iti baga weagarinakherek dek o,” iluk yogeisasikhe.

He o Kanaan meke nen etaiken Yesus oba hakotdisikhe wene

²¹ At Yesus nen wene itithogon yogeisasikhesik nen, o etoma thogotdiluk o Tirus Sidon etoma dagei ageikhe.

²² Dagei agunem, he ageikhe o Kanaan etoma aierek meke Yesus oba wageikhesik ane kokhogon men yogokhikhe, “Daud nen itago meke noe. An neak horlak meke mokat obabut weak meke akla ukekhesik weak werek. Halok he, hakmu nean o,” iluk yogokhikhe mekeat he,

²³ at Yesus nen oko motok yogokhidek huk ageikhemo, it ap at ane waganhe lagoukha meke emenogo wagoukhasik nen, “He yi ninoporlik waga dogolik ane motok apik ninoba wiriogo yi re, werlekma horla loak nen la'isan o,” iluk yogokhukha.

²⁴ Itithogon yogokhukhama, at Yesus nen, men yogeisasikhe, “Allah nen, It ap Israel meke inebe re, domba nalageikharek iti hak werek iti nen, it anek 'birisa lan, iluk la'ani agama o,” iluk yogeisasikhe.

²⁵ Itithogon yogeisasikhemo werek korlek, at he etnogo Yesus oba wageikhesik nen, itibagal yukukhogon heagei wakhe dogolik, men yogokhikhe, “Eiye! Noe. Hano hagatnetnok o,” iluk ane a'buarek ane yogokhikhemo,

²⁶ at Yesus nen he, “Yekerugi inapiri tilogo, yeke noagaluk po lagasumo erlok dek o,” iluk yogokhikhe.

²⁷ Itithogon yogokhikhemo, at he etnogo nen, “I, noe. Eberogonat egen mekeat he, at ayeke iteerek iti hipiri o meja perlago baga nukunem, eken pilikhogon agat oba usekhe halok he, yeke iti nen nekeregat o,” yogokhikhe.

²⁸ Itithogon yogokhikhemo, at Yesus nen, “He yi neru o. Hat nen, At nen hagasigin, iluk hetaiken noba motok hakotdegen iti nen, hakla apegen iti tak-tagat hagathisigin o,” iluk isi korlek eranogoat, eak etnogo hano ageikhe.

At Yesus nen akhuni doalegat u hano hagarinakhikhe wene

²⁹ Yesus nen itithogon hagatluk, o etoma nen usasikhesik, i Galilea yekelek etnogo aik obake laga lageikhesik nen, tom oba dageisikhesik etoma hurek lageikhe.

³⁰ Hurek lageikhesik werekma, it akhuni initibagal weak meke inom, inileken puk meke inom, iniki inisok ut warek meke inom, inane dek meke inom, inebe motok doalegat inom, wogosik Yesus oba 'bi agoukhama, at nen motok hano hagarinakhikhe.

³¹ Itithogon hagarinakhikhemo, it akhuni emenogo inane dek meke inane huak igik, iniki inisok lapelek meke hano ageik, inisok ut warek meke hano atluk holak lageik, inileken puk meke hano atluk lageisigik, hagakhunem inileken hasukhasik nen, “Eiye! Nit akhuni Israel meke ninopase Allah nayuk e,” iluk hogorakhukha.

Yesus nen akhuni doalegat ap anek inebe 4.000 meke hipiri roti doalegat titu herle hagarogo melageisasikhe wene

³² Itithogon hogorakhukhama, at Yesus nen at ane waganhe lagoukha meke emenogo waisasikhe. Waisasikhemo wagoukhama nen, at nen he, “Nagarumi. It akhuni doalegat yoma ninom motok dogolik niniki henagan oba noge ogosikmo nogo nen, inapiri motok dek agama, nena meke nugun heat werek iti nen, nakmu lak nen nakla weak aga. Hipiri motok nikidekma iti nen he, holagarlem lagunem ya kuak ta kuak launogo iluk, an nen la'isausak na'it hakene,” iluk yogeisasikhemo,

³³ at agarumi ane waganhe lagoukha meke emenogo nen, men yogokhukha, “O limo akhuni inai ukul motok dekma yoma akhuni doalegat natogorlek yoma hipiri ina'ithogon noagaluk, ebe koma meke erlok nausak?” iluk yogokhukha.

³⁴ Itithogon yogokhukhama at Yesus nen he, “Hit hipiri roti werago meke meren hago welagap,” iluk hinok waganhikhemo, it nen, “Ebe 7 werek. Nen ikan herlekha'buktek pere anek werek o,” iluk yogokhukha.

³⁵ Itithogon yogokhukhama at nen, akhuni doalegat natogorlek welagoukha meke emenogo agat oba hurek lasuagaluk yogeisasikhe.

³⁶ Yogeisasikhesik nen, hipiri roti meke 7 baga eranogo inom, ikan eranogo inom, ikimo waganhikhesik nen, Allah heagei warogo, at agarumi ane waganhe lagoukha meke emenogo nen supurisoagaluk, kusogo wogeisasikhemo, it nen supurisasukha.

³⁷ Supurisasukhama hipiri ina'ithogon nasukhasik nen, titurogon 'bisukhama, mul yago 7 baga apem hethokhogon ukharlogo 'bisukha.

³⁸ Nen, it hipiri nasukha iti, humi yekerugi inom iniki wenageinakhidek. It ap inarluetek anek he, inebe 4.000 wenageinakhukha.

³⁹ Nen, hipiri nasukhasik nen, at Yesus etnogo akhuni doalegat natogorlek emenogo inailake tomok la'isalok nen, at ebe ku akla ukiluk warogo imake o Magadan itali lageikhe.