Markus 7 - ALLAH ANE WENW KET MEKE WAROGO WOKNINAKHIKHE WENE

Yesus nen, “Hinopa lak hagakhe lagoukha tak-tagat hagakhe lagap,” iluk yogeisasikhe wene

¹ Yabokane, it ap Farisi meke men, it Allah ane holal waganek iteerek meke aperek men, o Yerusalem nen Yesus oba natogosi dagei agoukha.

² Dagei agoukhasik dogolik, it Yesus agarumi ane waganhe lagoukha meke emenogo aperek, akhuni iniki bagake thuesi kokharek iti hak iniki horigidek hipiri yugunat nasinem, inileken hisasukha.

³ Inileken itithogon hisasukha iti, akhuni Farisi meke inomat, Yahudi meke inomat, inebe tha'bokhogonat, inopa lak inawene herogo dogolik, iniki bagake horigidek hipiri nausak motok dek iluk ekhe dogolik inileken hisasukha iti.

⁴ Wene itithogon herogo dogolik, yi meke ti meke pasar nen oko palogo wolok wageikharethek nen, inoba horigidek, hipiri nekarek motok dek. Ageikhe re, wene haganeat meke iti hago dogolik, isoak herlekha'bugat meke oba hokhik, kok meke oba hokhik, isoak tembaga meke hokhik, hagakharek iti.

⁵ Itithogon hagakharek iti nen, it Farisi meke inom, Allah ane holal waganek iteerek meke inom, Yesus men yogokhukha, “Yesus. It ap hat hagarumi hane waganiogei meke yoma nen, ninopa lak hagakhe lagoukha tak-tagat hagakhidek yugunat hagakhe dogolik iniki bagake horigidek hipiri yugunat niliogei iti nenaluk,” iluk yogokhukha.

⁶ Itithogon yogokhukhama, at nen men yogeisasikhe, “Hit hinoado baga anek hano thalek, hinetaiken pere dogolik hagakhethep iti hasik, at Yesaya nen Allah ane yogeisekhe dogolik, wene men isikhe iti, hit hinobasik mothogon isikhe higi, Allah nen he, It akhuni yoma inape baga nen an hogotnakhe dogolik, inetaiken an noba ebekhidek werlekma ebesi liliogei.

⁷ Wene akhuni inane mekeat he, an nen isigi meke negen yakulisiliogei iti nen, we yugunat an hogotnabiogei o, iluk isikhemo Yesaya nen holal waganogo 'bisikhemo werek iti, hit hinobasigat isikhe o.

⁸ Wene itithogon isikhe hagat, wene Allah nen ninasuk wakhikhe wene iti thagalogo thogotdisalok akhuni inawene hinobatnerogon herogo walagap o,” iluk isikhe.

⁹ Itithogon yogeisalok, wene ageikhe men yogeisasikhe, “Hit hinakla motok kagalek yi nayuk o! Hinopa lak hagakhe lagoukha meke iti hinobatnerogon herogo dogouogoluk, wene Allah nen ninasuk wakhikhe wene iti thagalogo here'isekhe lagap iti hano higi,” iluk inekarli wakhikhe.

¹⁰ Inekarli wakhikhesik wene ageikhe yogeisekhe dogolik, men isikhe, “At Musa nen, Hinagosa hinopase lak inalon halinakhe dogono o, iluk isikhesik ageikhe men isikhe, Tha nen agosa opase abok weak palhe halok he, at iti ebe motogat wasusak o, iluk ninasuk wakhikhe mekeat he,

¹¹ hit nen men yogeisekhe lagap, At ageikhe nen opase a, agosa a, yogokhe dogolik, An meke yi meke ti meke hat wokhesusak mekeat he, Allah hasik 'bisigirikmo iluk u hak, Ibrani ninane baga, korban iluk yogeisekhe dogoagaluk yakulisekhe lagap iti,

¹² yabokane inagosa inopase lak wogeisausak meke wogeisausak dek iluk wene palu hagat ekhe lagap o.

¹³ Itithogon ekhe lagap iti baga, hinopa lak hagakhe lagoukha wene waganhigisip, Allah ane thagalogo here'isekhe lagap iti. Iti hak, wene ageikhe doalegat hagakhe lagap meke weregat o,” iluk yogeisasikhe.

“Akhuni wene inakla nen kagalogo dagei agunem egarek iti, weagarinakherek ebe itiat,” iluk yogeisasikhe wene

¹⁴ At Yesus nen, wene itithogon yogeisasikhesik, yabokane akhuni doalegat emenogo waisasikhemo wagoukhama, ageikhe men yogeisasikhe, “An wene igin yi, hit tha'bokhogonat hutdubageik nen, hinasuk hanorogo holini o.

¹⁵ Akhuni yi meke ti meke inapema nen inakla usakharek meke iti nen, weagarinabusak dek anek o. Weagarinakherek iti wene inakla nen kagalogo dagei agunem egarek iti anek he, weagarinakherek o.

¹⁶ Hinasuk holusak halok he, hanorogo holhe dogoni o,” iluk yogeisasikhesik,

¹⁷ akhuni doalegat emenogo itikmanke 'bisalok, at Yesus uma ukisikhemo at agarumi ane waganhe lagoukha meke emenogo nen men isukha, “Wene oba lisogon yoknisegen iti, ebe ki meke hasik yoknisegen,” iluk oba hinok waganhukha.

¹⁸ Hinok waganhukhama, at nen men yogeisasikhe, “Hit meneke, it hinom tak-tagat wene iti hutdigidek welagap a? Yi meke ti meke inapemake kola'iluk inakla usakhunem weagarinabusak dek o, iluk hutdigidegat welagap higi.

¹⁹ Nekarek meke iti, inetaikenma ukekherek dek. Piokthek inelabutla usalok inamiso piokthegat usi lageikharek o,” iluk isikhe iti, “Yi meke ti meke yugunat neke dogosak. Usa dek o,” iluk isikhe iti.

^20-22 Wene itithogon yogeisekhe dogolik, ageikhe men yogeisasikhe, “Wene inakla nen kagalogo dagei agunem ulakharek iti nenat inebe weagarinakherek o. Itithogon inakla nen weak meke ebekhe dogolik hagakharek yi: homagarlugi yugunat ha'isigik, iniki abusak waganhik, akhuni inakhik, ap inagugi meke param ha'isigik, inakla nen, Akhuni aperek inameke an meke anek dogolep, iluk apigik, yi weak ti weak ageikhe hagakhik, inekalat nukhetdisigik, inekarli dek hagakhik, ua palhik, inabok wiik-weak palhik, inekaerek nen hogorakhigik, inetaiken dek hagakhik, hagakharek iti.

²³ Yi weak ti weak iti, tha'bokhogonat inakla nen kagalogo dagei agunem ulakharek iti nenat inebe weagarinakherek o,” iluk yogeisasikhe.

He Siria Fenisia meke etaiken Yesus oba hakotdisikhe wene

²⁴ At Yesus nen wene itithogon yogeisasikhesik o etoma nen, o Tirus dagei ageikhesik uma ukisikhesik, akhuni men yogeisasikhe, “Akhuni inokodek dogoak nen, At wagasik, ebe o etoma werek, iluk yogeisugup o. An na'it,” iluk isikhe meke re, ebe nikithogon limago dogou heat hagatlageikhe.

^25-26 Itithogon hagatlageikhemo werekma, at he ageikhe eak mokat obabut weak meke akla ukiluk werekma, Yesus abok eranogoat asuk holiluk, oba wageikhe. He iti ebe Yunani meke ai erlo Siria Fenisia etoma meke, Yesus apma itibagal yukukhogon hureklasi ageikhesik men yogokhikhe, “An neak mokat obabut weak meke akla ukiluk werek nen, hat nen mukhogo ula'inogoluk hayoko wagei o,” iluk yogokhikhe.

²⁷ Ayoko 'bisikhemo at Yesus nen, men yogokhikhe, “Hipiri yekerugi tak ina'ithogon nausak. Yekerugi inapiri meke tilogo yeke noagaluk po lagasusak erlok dek,” iluk yogokhikhe.

²⁸ Itithogon yogokhikhemo, at he etnogo nen men yogokhikhe, “I noe. Eberogonat egen. Meke re, yekerugi nen hipiri meja perlago baga neke dogolik eken pilikhogon usa'isinem, yeke meja wema baga dogolik nekeregat o,” iluk isikhemo,

²⁹ at Yesus nen men yogokhikhe, “Hane mot egen iti baga nen, mokat obabut weak meke heak akla nen arat mukhogo dukhekhemo werek iti. Halok he, haila lan o,” iluk yogokhikhe.

³⁰ Itithogon yogokhikhemo, at he etnogo aila lageikhesik ukisikhe re, mokat obabut weak meke eak akla nen mukhogo dukhisikhesikmo, noge ekherekma witik hano werekma 'bikha lageikhe.

Yesus nen ap ageikhe asuk dogou meke hano hagakhikhe wene

³¹ Itithogon hagakhikhesik nen, yabokane at Yesus o Tirus etoma nen dagakhogon o Sidon ke wageikhesik o etoma nen o etaga 10 kota halek ilike lakhigik, yike lakhigik, turlem horlokhogon i Galilea yekelekma usasikhe.

³² Usasikhemo it akhuni etoma nen he, ap ageikhe asuk dogou ane kut dek meke oba wolok wagoukhasik iki hakhoagaluk inane ina'buarek inane Yesus yogokhukha.

³³ Yogokhukhama, akhuni doalegat eta 'bisalok ap asuk dogou etnogo asokneat wolok lageikhe. Wolok lageikhesik, at Yesus iki sisik ap etnogo asuk elola tetnotdiluk wosi iki baga dabulogo 'biluk nen, ap etnogo a'bi baga 'bisikhe.

³⁴ Itithogon 'biluk ileken pogot oba liakhalok nen, etaiken ane isikhesik nit ninane baga, “Huak in,” u hak, it inane baga, “Efata,” iluk yogokhikhe.

³⁵ Itithogon yogokhe korlek eranogoat, asuk etnogo huak igik, ane kut dek etnogo ane igik, hagakhikhesik, ane hano isikhe.

³⁶ Ane hano ageikhemo at Yesus nen akhuni emenogo yogeisekhe dogolik, “Hit nen akhuni motok yogeisugup o,” iluk inasuk eran-alep wakhe korlegat, it nen yabokane inane ebenageik kokhogon yogeisekhe lagoukha.

³⁷ Itithogon yogeisugunem it nen kokhogon hogorakhe dogolik, men ekhe lagoukha, “At nen, yi meke ti meke hano anek hagakhe dogolik, akhuni hagarinakhunem inasuk dogou meke huak iluk inasuk holhik, inane dek meke inane hano igik, hagariogo iti nayuk o!” iluk motok hogorakhukha.