Lukas 4 - ALLAH ANE WENW KET MEKE WAROGO WOKNINAKHIKHE WENE

Iblis nen Yesus akla kagaligiluk oba waga lageikhe wene

¹ At Yesus i Yordan ima usasinem, Allah Agoreke akla kerlekhogon ukisikhemo dukhi ageikhesik lagunem, at Allah Agoreke nen ebe wolok, o limo akhuni dekma etoma lageikhe.

² Lageikhesik etoma werekma iki 40 hari Iblis nen akla kagaligiluk oba waga lageikhe. Wago werek korlek, iki 40 hari eta hipiri motok nikidek welageikhesikmo nogo nen, hipiri motok abu ageikhe.

³ Abu ageikhemo, at Iblis oba wageikhesik, men yogokhikhe, “Hat Allah a'but eberogonat halok he, helekit ethoma hipiri roti meke hagalasuak nen yogosin o,” iluk yogokhikhemo,

⁴ at Yesus nen, men yogokhikhe, “Allah nen, Akhuni hipiri anek neke dogolik, iniluk motok welageikharek dek o, iluk isikhemo holal waganogo 'bisukhama werek o,” iluk yogokhikhe.

⁵ Itithogon yogokhikhemo, yabokane Iblis nen Yesus wolok, tom upu baga 'bi dageisikhesik etoma nen o agat oba yi ai ti ai koktek inetagapogot welageikharek obake tha'bokhogonat yegekhogon winametdiluk opaki hasik ileken lakhoagaluk yakulikhikhe.

⁶ Yakulekhe dogolik, men yogokhikhe, “Koktek inetagapogot welageikharekma inane holek dogolik hogorinakharek iti tha'bokhogonat an ite dogoagaluk woknikhukhama an nakla nen ebetdiluk nen, Ap iti wogosigin, iluk wogeisegerethekma,

⁷ hat hitibagal yukukhogon napma ukitluk hogotnabigin halok he, tha'bokhogonat hat ite dogonogoluk wokhesigin o,” iluk yogokhikhemo,

⁸ at Yesus nen, men yogokhikhe, “Allah nen ekhe dogolik, Hit nen, hinopase Allah Netagapogot anat hinitibagal yukukhogon napma ukitluk hogotnakhe dogolik, an nobasik anek hagakhe dogono o, iluk isikhemo holal waganogo 'bisukhama werek o,” iluk, itithogon yogokhikhemo,

^9-11 yabokane Iblis nen Yesus wolok, o Yerusalem lageikhesik nen, Yesus ebe o Allah ai halekma uanat upu warleke thalek isiken obaat wolok dageisikhesik nen, men yogokhikhe, “At Allah nen, An nagarumi malaikat emenogo nen thekharek dogoagaluk inayoko 'bigin o, iluk isikhemo werek. Nen, ageikhe men isikhemo werek, Hat hisok helekit oba waraunogo iluk, it malaikat iti iniki talek werekma wokhabugun o, iluk holal waganek weregat apigi. Halok he, hat eberogonat Allah a'but halok he, ya nen pok wema eloma usan o,” iluk yogokhikhemo,

¹² at Yesus nen men yogokhikhe, “Allah nen ekhe dogolik, Hit nen, an nobasik, Ninopase Allah Etagapogot anini werek a? Dek a, iluk, nobabut palusak motok dek o, iluk isikhemo holal waganogo 'bisukhama werek,” iluk yogokhikhe.

¹³ Itithogon yogokhikhemo, at Iblis nen Yesus obabut paligiluk yi walhigik, ti walhigik, walhalok erlok dek ageikhemo nen, yabokane walhugunem erlok asigin he a, iluk, elanma thogotdiluk horla lageikhe.

Yesus apuke o Galilea dagei ageikhe wene

¹⁴ At Iblis etnogo arat lageikhemo nen, at Yesus Allah Agoreke obatnerogon akla werek korlek, apuke o Galilea eloke dagei ageikhe. Dagei ageikhemo, at abok aliluke o etoma motok thak-pak isikhe.

¹⁵ Itithogon thak-pak isi korlek, at ebe etoma dogolik, it akhuni Yahudi meke o sembayan egarekma ukiluk wene yakulisugunem akhuni etoma meke tha'bokhogonat nen hogorakhe lagoukha.

Akhuni o Nazaret meke nen, “Yesus iti nina'it,” iluk inakla meanetdisukha wene

¹⁶ Itithogon hogorakhe korlek, at Yesus o Nazaret ebe arlue ageikhe baga lageikhe. Lageikhesik, at hagakhe lageikhe hagat, iniki 7 baga Allah hasik werlegat dogolik, sembayan uogoluk o akhuni Yahudi meke sembayan egarekma ukisikhesik, Allah ane holal waganek meke etaga thalhe dogolik yakulisagaluk melageikhe.

¹⁷ Melageikhemo nen, ap ageikhe nen Allah ane yakulisekhe lageikhe meke Yesaya etnogo nen holal waganhikhe meke dikilik meke etnogo Yesus wogokhukhama 'bukalogo ileken 'bikhasikhe meke, wene men isikhe meke holal waganek werekma etaga thalogo yakulisasikhe,

¹⁸ “It akhuni inameke motok dek inerlageik meke iti hano wene yi yakulisekhe dogoagaluk meldanhikhemo nogo nen, nopase Etagapogot Agoreke usa'i agama an noba dukthek werek o. Nen, nayoko 'bekhe dogolik men yoknikhikhe, It akhuni iniki herle warek werek meke herle hisalinabigin wene inom, inileken puk meke inileken 'bekelasuagaluk hanorinabigin wene inom, yogeisigik, it akhuni inapma negen thebelogo 'bisiliogei make tilogo inasokneat 'bisigik,

¹⁹ ninopase Etagapogot nen hanotninabigin meke arat horok asi aga o, iluk yogeisigik, hagakhe dogono, iluk la'ani agama wagei yi o,” iluk isikhemo,, holal waganek meke etnogo etaga thalhe dogolik yakulisasikhe.

²⁰ Arat yakulisalok nen, buku holal waganek meke etnogo dikilogo ap iteerek meke etnogo wogokhikhesik nen, ebe hurek lageikhe. Hurek lageikhemo, it akhuni tha'bokhogonat sembayan uogoluk inom ukisukha meke emenogo inileken at oba 'birogo motok welagoukha.

²¹ Itithogon inileken 'birogo werekma, at Yesus nen, “Allah ane holal waganek meke yi baga, Itithogon hagasugun, iluk isukha meke etnogo yogotak yakulhisugunem hinasuk holhe korlek yaat ipisak higit aga o,” iluk isikhemo

²² it akhuni emenogo nen men isukha, “At yi ap Yusuf a'but etnogo dek a? Arat o. Mekeat he, at nen wene hano motok yakulnisekhe iti nayuk o,” iluk hogorakhukha.

²³ Itithogon hogorakhukhama, at Yesus nen, men yogeisasikhe, “Akhuni nen hibiku-yogokuat ekhe dogolik, Hat hebe ap dokter hakene ethoma re, hoba u iti hekaerek nen hagaran o, iluk egarek meke, hit nen dagakhogon an yoknesugun higi. Itithogon yoknetluk, O Kapernaum hagakhe lagan meke holhe lago iti hak, yogotak hekaerek hai yoma itithogonat ageikhe hagasin o, iluk, yoknesuogoluk ekhe lagap higi,” iluk itithogon yogeisasikhesik nen, ageikhe men yogeisasikhe,

²⁴ “It ap Allah ane yogeisegarek meke iti inekaerek inaila etoma inougi, inagarumi nen inalon halogo woginakharek dek o, iluk, eberogonat yokhisigi.

²⁵ Nen, ap Elia welageikhe eta mot-mot he, miso usa'ageidek 3 tahun ageikhesik, yabokane dagakhogon thut 6 bulan holelhikhemo o etoma yi ai ti ai hipiri motok no ageikhe. Eta mot-mot, akhuni Israel meke werekma humi thoge doalegat welagoukha meke re,

²⁶ humi thoge meke etoma ageikhe 'birisa loagaluk Allah nen Elia la'isikhe 'buk. Dek o. At he, he thoge meke opakiat ageikhe o werlekma Sidon ukul etaga Sarfat etoma werekma oba la'isikhe.

²⁷ Nen, ap Elisa nen Allah ane yogeisekhe lageikhe eta mot-mot, o akhuni Israel meke werekma etoma u henako hakene etnogo meke doalegat welagoukha mekeat he, ageikhe hagarinakhe lageikhe motok dek o. Ap Naaman ai Siria meke iti anek hagakhikhe o, iluk, eberogonat yokhisigi,” iluk itithogon yogeisasikhemo,

²⁸ it Yahudi meke sembayan egarekma welagoukha meke inasuk holhukhasik nen, inakla aga apik dageisukha.

²⁹ Itithogon inakla aga apik dageiluk, inebe melagoukhasik at ebe iki korlo hago itikmanke ula'iluk, o Nazaret alilu etoma tom oba halekma emenogo wolok lagoukhasik hokokhogon usa'i luogoluk hagakhukha.

³⁰ Itithogon hagakhukha mekeat he, at Yesus it emenogo here'isalok inakerlekla nen lelokhogon dukhisikhe.

At Yesus nen ap ageikhe mokat obabut weak meke akla ukisikhesikmo ula'isikhe wene

³¹ Inakerleklake nen lelokhogon dukhisikhesik o Galilea eloke ukul etaga Kapernaum lageikhe. Lageikhesik, iniki 7 baga Allah hasik werlegat dogolik, wene yakulisekhe lageikhe.

³² Yakulisekhe dogolik wene ebe iteerek meke nen egarek hak isinem, it emenogo nen, “Nayuk o!” iluk hogorakhe lagoukha.

³³ O sembayan egarekma emenogo werekma, ap ageikhe mokat obabut weak meke akla ukisikhemo dogolik, ane kokhogon men yogokhikhe,

³⁴ “Yesus Nazaret meke yi ra! Hat nen nikithogon hagatninabigiluk wagan! Nit weagatninabigiluk wagan a? Hat hebe, Allah ekaerek hasik meldageikhesik la'agei agama wagan iti, an nen hutdagagi o,” iluk ane kokhogon yogokhikhemo,

³⁵ at Yesus nen wenagakhe dogolik, “Hane. Ap yi akla nen dukhi lan o,” iluk yogokhikhemo mokat obabut weak meke etnogo nen ap etnogo ebe tunhogo akhuni doalek etnogo inakerlekla la'isalok nen, ap ebe weagatdigidek dukhisikhe.

³⁶ Itithogon dukhisinem akhuni doalegat emenogo inayuk agoukhasik, it-it ekhe dogolik, men isukha, “At ane ekhe iti nikithogon. At nen mokat inobabut weak meke, Dukhi lani, iluk usagat iti iteerek dogolik, ane obatnerogon wenageisugunem dukhegarek iti nayuk o,” iluk hogorakhukha.

³⁷ Itithogon hogorakhukhasik, at Yesus abok o ya ta etoma motok thak-pakhogon hagatlageikhe.

Yesus nen Simon akhoan inom, akhuni aperek inom, u hano hagarinakhikhe wene

³⁸ Abok itithogon wolok dukhisukhama, at Yesus o sembayan egarekma etnogo thogotdiluk nen, ap Simon aila lageikhe. Lageikhemo, ap Simon iti akhoan oba u agaken weak werekma, Yesus nen hano hagasuagaluk ayoko 'bisukhama,

³⁹ at nen, he etnogo alilu lageikhesik metek dogolik, “U yi dek asin o,” iluk, yogokhe korlek eranogoat, u etnogo dek ageikhe. Dek ageikhemo, he etnogo melageikhesik nen, it yomageisekhe lageikhe.

⁴⁰ Yomageisekho werekma, o arat hiamaganekeke mo kobokhogon lageikhesikmo, akhuni nen it aperek inoba yi u ti u werek meke tha'bokhogonat wogosik Yesus oba wagoukhama, at nen inebe tomok iki hageisalok hano hagarinakhikhe.

⁴¹ Itithogon hano hagarinakhikhemo, it aperek inebe doalegat, mokat inobabut weak meke inakla ukiluk welagoukha meke nen men yogokhukha, “Allah a'but harat o,” iluk inane naik ilik ilik dukhisukha mekeat, it inakla nen, “Kristus Allah nen, tilninabuagaluk meldiluk la'isigin isikhe etnogo ebe yiat o,” iluk, inilu werekma, Yesus nen inane degat dogoagaluk wenageisasikhe.

Yesus nen o ukul tomok wene yakulisilik lageikhe wene

⁴² Itithogon wenageikhikhesik, noge iluk huben o arat wi ageikhemo, at Yesus o akhuni motok dekma etoma lageikhe. Lageikhemo, akhuni motok doalegat, at herarik lagoukhasik nen, ebe arat herakhukhasik, werlekmake launogo iluk, iniki hakhasukha.

⁴³ Hakhasukhama, at Yesus nen, “Hano wene Allah apma 'bisekherek wene etnogo o ukul aperek etoma inomat yakulisilik nekhe dogoagaluk la'ani ageikhemo wagagisikmo nen, an o etomaat yakulisilik nekhe dogogin o,” iluk yogeisasikhe.

⁴⁴ Itithogon yogeisalok nen, o Yudea eloke akhuni Yahudi meke sembayan egarekma ukiluk, wene iti yakulisilik nekhe lageikhe.