Lukas 2 - ALLAH ANE WENW KET MEKE WAROGO WOKNINAKHIKHE WENE

Yesus itaklageikhe wene

¹ Eta mot-mot, ap kok Kaisar Agustus iti nen akhuni o yi ai ti ai tha'bokhogonat inetaga holal waganuagaluk wene ula'isikhe.

² Inetaga alebageik holal waganhukha iti, ap etaga Kirenius iti, o propinsi Siria etoma gubernur werek korlek waganhukha.

³ Itithogon inetaga holal waganuagaluk, akhuni tha'bokhogonat inekaerek inaila tomogat uki lagoukha.

^4-5 Nen, at Yusuf meneke, Daud opa meke nogo nen, o Galilea eloke ukul etaga Nazaret iti nen, o Yudea ap Daud itaklageikhemo, o ukul etaga Betlehem usagaluk, at Maria ipisak wene warek welagoukha etnogo eak akma werekma, ipisagat inetaga holal waganuagaluk usasukha.

⁶ Usasukhasik etoma werekma eak etnogo itakhausak horogat ageikhemo,

⁷ eak makusa abat itakhasikhe. Itakhasikhesik, o akhuni huso meke noge egarekma motok kerlek ageikhemo, su kain meke baga yilogo, o sapi inapiri nekerekma ebe 'bisikhe.

It ap domba hagasik werekma, malaikat inoba usa'agoukha wene

⁸ Eta mot-mot, o Betlehem aliluke etoma, it ap domba hagasik welageikharek meke aperek hibako inadomba hagasik welagoukha.

⁹ Itithogon werekma eranogo, ninopase Etagapogot agot malaikat pogot oba nen yoko la'isa agarek meke ageikhe ka nen heat wageikhesik inaliluke melagunem, ninopase Etagapogot hogorakharek meke a'bi'bal inoba yago 'bisasikhemo, it inayuk motok weak agoukha.

¹⁰ Inayuk agoukhama, at malaikat etnogo nen, men yogeisasikhe, “Hinayuk agup o. Lakhani, hano wene akhuni tha'bokhogonat inakla arleken akhagun meke, yokhisa wagei o.

¹¹ Yogotak tilhinabigin meke kok Etagapogot Kristus etnogo o ap Daud ai welageikhemo etnogo itaklagasik werek o.

¹² Ebe ekagat hinileken halok, hutdubageik nen, elege ket itago meke su kain meke baga yilogo o sapi inapiri nekarekma 'begasik werek etnaga 'bikha lani o,” yogeisasikhe,

¹³ Itithogon yogeisasi korlek eranogoat, malaikat pogot oba meke inebe motok doalegat ka nen heat winam agoukhasik, at malaikat ageikhe etnogo inomat Allah hogorakhe dogolik men isukha,

¹⁴ “It pogot oba upuke welageikharek meke nen, ninopase Allah itiat hogorakhe dogoak o. Nen, it akhuni agat oba yoma inebe Alla oba hotok ekherek meke inetaiken hapukhogon dogoak o,” iluk isukha.

¹⁵ Itithogon yogeisalok nen, it emenogo thogotdisalok inapuke pogot oba dageikhe korlek it ap domba hagasik welagoukha meke emenogo it-it ekhe dogolik, “Itithogon hagatlagama o, iluk ninopase Etagapogot nen yoknisekhe iti, o Betlehem 'bikha luok o,” iluk isukhasik,

¹⁶ ibat lagoukha meke, Maria Yusuf ipisak elege ket itago etnogo o sapi inapiri nekarekma wildiluk werekma 'bikha lagoukha.

¹⁷ 'Bikha lagoukhasik inileken hekhe dogolik, wene elege etnogo hasik malaikat nen yogeisasukha meke emenogo pilinogo yogeisasukha.

¹⁸ Itithogon yogeisasukhama, it akhuni etoma inasuk holhukha meke tha'bokhogonat nen, men isukha, “Eiya! Nayuk o,” iluk hogorakhukha.

¹⁹ Meke re, at he Maria etnogo anek, wene isukha meke etnogo etaikenma waganhikhesik ebekho motok welageikhe.

²⁰ Nen, it ap domba hagasik weelagoukha meke emenogo inileken halok yabokane inapuke waga dogolik, “Wene malaikat nen yoknisega etnogo tak-tagat hagatlagama ninileken higik, ninasuk holhik, hagakho o,” iluk, Allah hogorakhik, heagei wakhik, hagarik wagoukha.

Yesus etaga thalhukha wene

²¹ Itithogon wagoukhama welagoukhasik nen, iniki 7 baga noge iluk hubuluke, elege etnogo oado aperlagap palusak obaat palhukhasik nen, ebe aban agosa akla ageidek werek korlek malaikat nen isukha tak-tagat, etaga Yesus thalhukha.

Yesus ket itago baga ebe Allah wogokhukha wene

²² Etaga arat thalhukhasik, Allah nen haganeat Musa yogokhikhemo, at nen ekhe dogolik, “Humi ineagei itaginabiluk nen, noge iniki itithogon iluk nen holak dukhusak,” iluk isikhe etnogo tak-tagat, noge itithogon isukhasik, elege ket itago etnogo ninopase Etagapogot wogosuogoluk wolok o Yerusalem wagoukha.

²³ Itithogon wolok wagoukha iti, ninopase Etagapogot nen alebat ninasuk wakhikhe wene etnogo baga ekhe dogolik, men isikhe, “Elege makusa meke ap halok he, an hinopase Allah hasik 'banusak o” iluk isikhe.

²⁴ Nen, “Thue merpati hakene iti meke kulok ageikhe a? Horli ageikhe a. E a, at he, thue yogeik haken iti pere halok a, an hinopase Netagapogot hasik woknesusak o,” iluk isikhe etnogo tak-tagat wogosuogoluk wolok wagoukha.

²⁵ Etanem ap o Yerusalem meke ageikhe etaga Simeon welageikhe. At obabut hano, Allah ayukhogon dogolik, motok mothogon hagakhe lageikhe. Itithogon hagakhe dogolik, akhuni Israel meke inakla hanorinabi wisigin meke iti therogo werekma, Allah Agoreke oba duk isikhemo welageikhe.

²⁶ Itithogon oba duk i ageikhesik, men yogokhikhe, “Hat hebe watlageidek werek korlek, ap kok ageikhe ninopase Etagapogot nen meldiluk la'isigin isikhe etnogo wagunem hileken halok nen watlasigin o” iluk, abok yogokhikhesik nen,

²⁷ at Simeon etnogo Allah Agoreke oba motok dogolik, Allah ai halekma ukiluk werekma, Yesus agosa opase ipisak Allah nen isikhe meke holal waganek welageikhe meke etnogo tak-tagat hagasuogoluk, Yesus itago etnogo wolok ukisukha.

²⁸ Ukisukhama, Yesus itago etnogo Simeon agamo waganhikhesik nen, Allah etaga hogorakhe dogolik men isikhe,

^29-32 “Nopase o. Akhuni yi ai ti ai inebe tha'bokhogonat inileken hoagaluk, tilinabigin meke arat la'i aganma higi. At nen, it itikmanke meke hoba wisuagaluk liarinakhik, hat ha'buri Israel meke hogorinabuagaluk liarogon welageik, hagasigin meke nileken arat higi. Halok he, hat nen yoknekhen tak-tagat, yogotak an hatuaneke netaiken hapukhogon yoma here'isalok hoba wisik nen woknabumo hano o,” iluk, Allah hogorakhikhe.

³³ Elege iti abok itithogon isikhemo, agosa men, opase men, inasuk holhukhasik nen, “Eiya!” iluk hogorakhukha.

³⁴ Nen, at Simeon etnogo nen, “Allah nen hanothinabuak o,” iluk, ane hanorogon yogeisalok, elege etnogo agosa Maria oba men yogokhikhe, “Allah nen he, elege yi baga, it ap Israel meke inebe doalegat, aperek usa'isigik, aperek meldisigik, hagasuagaluk meldisikhe o. At yi akhuni tha'bokhogonat hutduagaluk meldisikhe mekeat he, it akhuni tha'bokhogonat nen, Nina'it o, iluk iliogei etnogo,

³⁵ inakla apiliogei meke iti ekagat asigin o. Nen, hat meneke, karok elak mago nen hetaikenma taukhogon hasu hagat, hakla motok weak asigin o,” iluk yogokhikhe.

³⁶ Nen, o etoma he ageikhe Allah ane yogeisekhe lageikhe meke etaga Hana ap Fanuel a'but, ukuloak etaga Asyer meke welageikhe. He iti agun waganhikhesik oba nen, 7 tahun ipisak welagoukhasik,

³⁷ yabokane thoge ageikhesik nen, at ebe umur 84 tahun motok yaman ageikhesik welageikhe. Dogolik iki ageikhe hipiri nikidek hean negen 'bakhalok Allah ai halekma etoma dikene hibako a'it ageidek sembayan isi motok welageikhe.

³⁸ Itithogon isi werekma, at Yesus agosa opase inom ukiluk welagoukha etanem inoba wageikhesik, men isikhe, “Allah nopase o!” iluk heagei wakhikhesik, it akhuni o Yerusalem meke inakla nen, Allah nen yabokane tilninabigin iluk therogo welagoukha meke tha'bokhogonat yogeisekhe dogolik, “Ebe waga yi,” iluk yekerek etnogo abok yogeisekhe lageikhe.

Yesus wolok o Nazaret wagoukha wene

³⁹ Ninopase Etagapogot nen ninasuk wakhikhe meke holal waganhukha etnogo tak-tagat Yesus agosa opase itithogonat arat hagakhukhasik nen, inaila i Galilea ima o ukul etaga Nazaret etnogo dagei agoukha.

⁴⁰ Dagei agoukhasik werekma, elege etnogo arlue aga dogolik, ebe obatne ageik, etaiken motok kagalek hagatlageik, aga lageikhemo, Allah obabut hano nen, hanorakhe lageikhe.

Yesus yekerek oba Allah ai halekma ukiluk hagakhikhe wene

⁴¹ Tahun ebe tomok mo dageigik, usigik, hagakhe korlek, Yesus agosa opase ipisak, domba warogo pesta Paskah isago nuogoluk o Yerusalem usa lagoukha.

⁴² Itithogon usegarethekma nogo nen, it etoma elege itaklageikharekma 12 tahun arat hagatdiluk thini kok isago nuogoluk natogosi ukegarethekma nogo nen, at Yesus etnogo 12 tahun arat asi ageikhemo, isago nuogoluk wolok usasukha.

⁴³ Usasukhasik pesta etnogo arat hagakhukhasik Yesus agosa opase ipisagat Yesus o Yerusalem etoma huk ageikhemo it inokodegat inapuke inaila dagei agoukha.

⁴⁴ It agosa opase inakla nen, Yesus etnogo akhuni ebetlake inom wagoukha meke emenogo inom wiriogei, apalok waga lagoukhasik nen, noge uogoluk nen inileken 'bikhasukha meke, ebe dek nen, “Oe agot inom werek a? E a, at he, agarlak lak inom werek a,” iluk inoba hinok waganhukha.

⁴⁵ Hinok waganhukha meke ebe dek nen he, yabokane o Yerusalem inapuke at herasi usasukha.

⁴⁶ Usasukhasik herarik nekhe lagoukhasik, noge iniki pere iluk nen, yabokane iniki ageikhe nen 'bikhasukha meke, at ebe Allah ai halekma ukisikhesik, it ap Allah ane yakulisekhe lagoukha meke emenogo inom inakla hurek dogolik, it emenogo inane isinem asuk holhik, it nen isinem at nen hinok waganhik, hagakhunem herakhukha.

⁴⁷ Itithogon hagakhe dogolik, it nen hinok waganhunem, at wene motok ilu dogolik oko yogeisasikhemo iti nen, it ap natogorlek welagoukha meke emenogo tha'bokhogonat ane inasuk holhukhasik, “Nayuk e!” iluk hogorakhukha.

⁴⁸ Itithogon hogorakhunem, it at agosa opase ipisak nen ebe arat herakhukhasik nen, “Nayuk o!” iluk hogorakhukhasik, at agosa nen, “Neak, hat yigithogon hagatninakhen nenaluk. Hopase nipisak ninobakha palatluk herakhabik nekhe lago yi hileken nisan o,” iluk itithogon yogokhikhemo

⁴⁹ at Yesus nen, “Hit an heraknabik nekhe lagap nenaluk. An nopase ai halekma dogosak iluk hinokodek a?” iluk yogeisasikhe meke re,

⁵⁰ it ipisak hutdigidek welagoukha.

⁵¹ Itithogon iluk, at Yesus agosa opase inom o Nazaret dagei agoukhasik dogolik, at agosa opase inane hanorogon hologo hagakhe lageikhe. Nen, agosa nen, wene emenogo tha'bokhogon etaikenma waganhikhesik eberek motok welageikhe.

⁵² Nen, at Yesus itithogon dogolik, be arlue ageik, etaiken kagalek motok hagatlageik, hagakhe korlek, opase Allah men, akhuni men, at hasik inoba hotok ekhe lagoukha.