La'isasikhe 27 - ALLAH ANE WENW KET MEKE WAROGO WOKNINAKHIKHE WENE

At Paulus imake ku baga Roma wisuogoluk wolok wagoukha wene

¹ It nen nit imake ku baga o Italia la'inanisuogoluk, wene arat palhukhasik nen, ap tentara doalegat Kaisar agarumi opaki doalhe lagoukha meke inoe kok etaga Yulius nen Paulus men, akhuni iniki herle warek meke aperek men, wogosik wisuagaluk iki baga 'bisukha.

² Itithogon inebe at iki baga 'bisukhama, ku ebe o Adramitium nen wolok wagoukhasik werekma, akhuni o propinsi Asia ku ukekherek obake dopok usa'isilik wisuogoluk hagakhunem, ap Aristarkhus, ai o propinsi Makedonia o kota etaga Tesalonika meke ninom, ku iti akla ukisugusik wagagu.

³ Ukisugusik waga dogolik, hubenke o Sidon wagagu. Wagagusik, at Yulius etnogo nen, Paulus ebe akmutdisikhesik men yogokhikhe, “Hat yi meke ti meke aperek dek halok he, hagarlak lak nen wokhesuagaluk inoba ukilik lan o,” iluk yogokhikhemo lageikhe.

⁴ Lageikhesik wageikhesik nen, o etoma nen, imake ku baga waga dogolik, hisakne ninelokhomake nen laga lageikhemo, i eken palekma etaga Siprus iti abel ebelake nen, hisakne laberogo iluk itike wagagu.

⁵ Etoma nen wagagusik nen, o propinsi Kilikia nen piokhogon propinsi Pamfilia mot etoma i uan iti aik yi baga italitluk nen, o propinsi Likia kota etaga Mira iti wagagu.

⁶ Etoma nen ap tentara meke inoe kok etnogo nen ku ageikhe o Aleksandria meke o Italia wisuogoluk hagakhunem, herakhikhesik nen, ku nit wagagu etnogo baga nen, ku iti baga woknisik ukisikhe.

⁷ Woknisik ukisikhesik, niniki ageikhe noge igik, ageikhe noge igik, erogat waga lagagusik, wisusak erlok dek hakene hagatlageikhe mekeat, o etaga Knidus mot-mot wagagu. Wagagusik, hisakne nen mothogon wisusak dek ageikhemo nen, nomokhogon, i eken palekma etaga Kreta iti abel ebelake hisakne laberogo iluk, Salmone agouwakma iti thogotdiluk piokthek wagagu.

⁸ Ninoba wiik-weakhogon waga lagagusik, o kota Lasea nen horogat etoma o ageikhe etaga, “Ku hano hol kilogo hagarekma,” iluk egarek oba etoma wagagu.

⁹ Etoma wagagusik, niniki doalegat welagagu. Dogolik, akhuni Yahudi meke nen, “Nit weak hagakhorek meke Allah nen thagalogo degetdisalok yabokane ninom hano ago,” iluk inakla eberogo hipiri nikidek werlegat welageikharek oba tak-tagat welagagusik nenat, imake ku baga hanorogo wisusak degat, i lausak hakene hagatlageikhemo, at Paulus nen,

¹⁰ “Nagarlak lak. An nakla nen, Nit ku baga piokhogon lugun halok, motogat alomatlasugun o. Iti re, yi meke ti meke ku akla ukharlek meke anek weak ageik, ku ebe weak ageik, hagasigin 'buk. At he, akhuni ninebe inomat i lageik, hagasugun apekhe lagei o,” iluk yogeisasikhe.

¹¹ Itithogon yogeisasikhe mekeat he, ap tentara inoe kok etnogo nen Paulus ane thagalogo thogotdisalok, it ap yabu ku baga hagakhe lagoukha meke inoe kok iti men, ku ilu meke wolok nekherek meke iti men, ipisak inane holhikhe.

¹² O weak oba ku hol etoma kilogo 'biluk motok dogosak erlok dek iti nen, it ap yabu ku baga hagakhe lagoukha meke inebe doalegat hak nen, “O kota etaga Feniks lausak halok he, lalok, o weak oba o etoma hano dogosak,” iluk wene palhukha. Wene itithogon palhukha iti, i eken palekma etaga Kreta etoma, o Feniks i alukutla etoma o mo korokhogon ukekherek mot abel upuke ape palegat, wemake ape palegat werekma, ku hol kilogo 'biluk hano welageikharek iti nen isukha.

Hisakne aninirogon i laut oba hubetha ageikhe wene

¹³ Nit etoma werekma, hisakne i laut mot-mot nen erogat hubetha ageikhemo, it ap yabu ku baga hagakhe lagoukha meke nen, “Nit luogoluk ogo etnogo arat lausak hagatlaga,” iluk ku hol kilik meke hisalogo wolok nen, i eken palekma etaga Kreta aliluke horokhogon wagagu.

¹⁴ Meke re, horogat wagagu hakene, hisakne etaga werek meke o mo dagei agarek mot abel upuke i aik oba mothogon nen aninirogo motok hubetha ageikhe.

¹⁵ Hubetha ageikhemo nen, ku ukul hisakne aninirogo wageikhemoke mothogon wolok wisusak erlok dek ageikhemo nen, itike mothogon wolok wageidek thogotdisalok werekma, hisakne nen nomokhogon woknisik wageikhe.

¹⁶ Woknisik wageikhemo nen, ku eagarlak meke ku kok meke nen lisogo wolok lagarek meke iti a'bethogon nikithogon herle thomasusak heat hagatlageikhemo nen, i eken palekma 'bugurlagat meke etaga Kauda iti hisakne laberogo negen abel wemake nomokhogon waga dogolik, ku eagarlak meke etnogo herle lisogo erlok thomakhukha.

¹⁷ Itithogon thomakhukhasik, ku kok meke oba 'bisukha. Oba 'biluk nen, ku kok meke etnogo ebe a'bethogon iluk kupi ku abel akmanke legerogo herle thomakhukha. Thomakhukhasik, o Libia mot-mot etoma i etoatma hisakne nen i al etaga Sirtis oba kekethogon 'binani launogo iluk, inayuk nen, su hisakne nen wogosik loagaluk liakharek meke iti usa'i agoukhama nen, hisakne nen yugunat woknisik wageikhe.

¹⁸ Itithogon wagunem, hisakne nen motok hulalek-dekalek woknisik wagunem, hubenke ku ebe alhe asuagaluk yi meke ti meke akla ukharlek welageikhe meke aperek hiselogo ima ula'isekhe lagoukha.

¹⁹ Ula'isekhe lagoukhasik, hubenke, it ap yabu ku baga hagakhe lagoukha meke nen, ku hol men, yi meke ti meke aperek men, inekaerek iniki nen hiselogo ula'isasukhaat.

²⁰ Itithogon ula'isasukhasik, niniki doalegat hisakne aninirogo hulalek-dekalek hubetha ago motogat hagakhe lageikhemo, mo men, husagal men, ninileken liakhigidegat dogolik, nit ninakla nen, “Nit alebat hano woknisik lugun apekhe lago etnogo, yogotak i lugun higi,” iluk ninakla weak atluk huk agagu.

²¹ Itithogon ninakla weak atluk hipiri haganeat nen nikidek werlegat werekma, at Paulus ebe inakerlekla melageikhesik nen, men yogeisasikhe, “Nagarlak lak. O eken palekma Kreta nen, Luok dek, iluk hinasuk wakhi etnogo, an nane holilepma, yi meke ti meke weak ageik, nuk ageik, hagakho iti, hagatlo dek o.

^22-24 Meke re, nagarlak lak. An nebe iteerek Allah atma, an nen at hogorakherek meke nen, malaikat ageikhe yogotak hibako noba la'i agama nen, nalilu melasi aga. Melasi agasik, men yoknekhe, Paulus. Hayuk dekhogon dogono o. Hat yabokane Kaisar elokhoma melasi lausak iti nen, akhuni ethoma tha'bokhogonat hinom ku baga laga lagap meke, at Allah obabut hano nen hat akmurogo hinomat tilhinabigin o, iluk yoknekhe iti nen, nagarlak lak. Hinetaiken hapukhogon dogobageik iluk, wene yi yokhisak. Ninebe ageikhe i lugun motok dek o. meke re, ku ebe anek alomatlasigin o.

²⁵ Halok he, nagarlak lak. Allah nen yoknekhe iti hagat, eberogonat hagatlasigin iluk, netaiken at oba hakotdiluk welagei iti nen, hit hinetaiken hapukhogon dogono o.

²⁶ Meke re, i eken palekma ageikhe aik oba kekethogon 'binani ligin o,” iluk yoknisasikhe.

²⁷ I Adria yekelek agoum obake hisakne nen woknisik waga korlek, niniki 13 hari nen noge isugusik, hari ageikhe baga o eketurlem hakene it ap yabu ku baga hagakhe lagoukha meke emenogo inakla nen, “I aik oba horogat asi ago higi,” iluk apasukha.

²⁸ Itithogon apasukhasik nen, “I agouk werek a? Eto a,” iluk walegeke helekit kilogo usa'isukhama nen, 40 meter uanat welageikhe. Itithogon usa'isukhama, horok etoma wagagusik nen, walegeke yabokane usa'isukha meke re, 30 meter herlekha'bugat etoat hakene welageikhe.

²⁹ Itithogon welageikhe iti nen, it nen, “Ku helekit oba dikhogon hagatlasinogo,” iluk, hol kilogo dogoagaluk, ku hago akin meke 4 oba ku agamake nen herle kilogo i akla i al oba tunhogo usa'isukha. Usa'iluk nen, “O ibat wi atnek e,” iluk ekhe lagoukha.

³⁰ Itithogon ekhe dogolik, it ap yabu ku baga hagakhe lagoukha meke emenogo ku here'isalok lo dukhuogoluk he, it akhuni aperek yogeisasukha, “Nit nen ku akin meke ku ukulmoke nen herle kilogo usa'i lugun,” iluk inekalat isukhasik, ku eagarlak meke etnogo herle kilogo ima usa'isukha.

³¹ Ima usa'isukhama, at Paulus nen, ap tentara meke inoe kok etnogo men, agarumi emenogo men, yogeisekhe dogolik, “It ap yoma ku kok yi baga dogogun dek halok he, hit hinebe tha'bokhogonat tilagun dek higi,” iluk yogeisasikhe.

³² Itithogon yogeisasikhemo, it nen, ku eagarlak etnogo hol kilogo welageikhe meke 'bogokhogon la'isukhama i lageikhe.

³³ O wi asigiluk hagakhe korlek, Paulus nen it tha'bokhogonat hipiri noagaluk men yogeisasikhe, “Hit hinakla nen, Nit nikithogon hagatlasugun, iluk hinakla munini ebekhe dogolik hiniki 14 hari oba hipiri nikidek welagap iti.

³⁴ Meke re, hit hinebe opakiat i lageik, hinoba hemurlugat halok ageikhe weak ageik, hagatlasigin motok dek o. Halok he, hano tilobageik nen, hipiri ageikhe nobageik iluk yokhisigi,” iluk yogeisasikhe.

³⁵ Itithogon yogeisasikhesik, roti ageikhe ikimo waganhikhesik nen, it tha'bokhogonat inil oba Allah heagei warogo, at tak kusogo nasikhe.

³⁶ At tak nasikhemo, it inetaiken hapuk iluk nen, inebe tha'bokhogonat hipiri nilik lagoukha.

³⁷ Ku iti baga, ninebe doalegat 276 wagagu.

³⁸ Ninelabut nina'ithogon nasugusik, ku ebe alhe asuagaluk gandum eken ku akla ukharlek welageikhe meke hiselogo ima usa'isukha.

Ku i aik oba kekethogon holan ekhe lageikhesik nen weak ageikhe wene

³⁹ O wi ageikhemo nen, it ap yabu ku baga hagakhe lagoukha meke emenogo nen, i aik oba inileken lakhasukha mekeat, o koma heat inobakha palageikhe. Inobakha palageikhesik inileken lakhasukha nen, i alukutla lelaga talek werekma lakhasukhasik, men isukha, “Ku ebe ethoma thekekhogon warik lausak erlok a? Erlok dek a. Walhauwok,” iluk isukha.

⁴⁰ Itithogon isukhasik, ku ebe eta huk dogoagaluk ku akin meke usakhukha meke etnogo kupi tirliphogon ima usa'isukha. Usa'isukhasik ku thoat ageikhe, ku ukul hebelhe lagoukha meke iti kupi hisalogo nen, hisakne nen ku ukulmoke mothogon i aik obake wolok loagaluk, su ku ukulmoke meke lia'isukha.

⁴¹ Lia'isukhama, hisakne nen wolok i etoat lelagama etoma ku dikhogon hagatlageikhe. Dikhogon hagatlageikhemo, ku ukulmoke obatnerogon wakhe lageikhemo nen, agamake, i hoklabu nen wakhe dogolik hemurlugat weagatdigik, hemurlugat weagatdigik, motok weagatdisikhe.

⁴² Itithogon hagatlageikhemo nen, it ap tentara emenogo nen, it iniki herle warek meke emenogo lo kume dukhinogo iluk nen, inebe inasuogoluk hagakhukha.

⁴³ Itithogon inasuogoluk hagakhukha mekeat, it inoe kok etnogo nen Paulus tiligiluk nen, “Itithogon hagasusak dek o,” iluk wene palhikhe. Wene palhikhesik nen, “Kume hinilu meke tak pok hayokhogon ima usalok i aik oba dukhi lani o.

⁴⁴ Nen, hit ato o kagalek yoma men, ku misalek meke yoma men, hiniki hakhigik, wolok, inoporlik dukhi lani o,” iluk yoknisasikhe. Yoknisasikhemo, itithogonat ninebe tha'bokhogonat tilogo i aik obake hano dukhisugu.