La'isasikhe 24 - ALLAH ANE WENW KET MEKE WAROGO WOKNINAKHIKHE WENE

Ap Yahudi meke nen wene Paulus oba 'bisukha wene

¹ Itithogon yogeisasikhesik, iniki 4 hari nen welagoukhasik ageikhe werekma, it ap Allah iteerek meke inoe kok Ananias men, inarluetek emenogo aperek men, ap ageikhe wene hano anek ekhe lageikhe meke etaga Tertulus men, inom o Kaisarea wagoukha. Wagoukhasik nen, ap kok gubernur Feliks etnogo baga ukisukhasik, ukum Paulus oba 'buogoluk yogokhukha.

² Itithogon yogokhukhasik, Paulus ebe wakhukhasik nen, Tertulus nen ukum oba 'buagaluk, yogokhukhama, at nen Feliks men yogokhikhe, “Gubernur Feliks noe. Hat nen haknisik werek korlek, nit yoma haganeat nen wim dek hano dapukhogon welago. Akhuni nit meke hasik hakla kagalek mothogon hagakhe lagan iti baga yi meke ti meke hano ariogo.

³ Hat nen o yi ai ti ai hibiku-yogoku hanorogon hagakhe lagan iti, nit nen, Hano, iluk, heagei motok wathakhe lago. Noe.

⁴ Itithogon meke re, an nen wene uanat yokhekhunem ha'it asinogo iluk, wene 'beroat yokhesigin yi, hobabut hano etnogo nen, hasuk holinok nen, wene ebe yokhesik.

⁵ Ap yi nen, akhuni weagarinabik nukhunem, obabut palho. It akhuni ap Nazaret meke etnogo oporlik liliogei meke inoe kok dogolik, akhuni Yahudi meke o yi ai ti ai welageikharek meke tha'bokhogonat inakla kagalik liliogo.

⁶ Itithogon inakla kagalik nekhe lagasik nen, o Allah ai halek weagatdigiluk hagakhunem ebe hakhogo. [Hakhogosik nen, wene nit akhuni Yahudi meke hagakhorek meke baga itema waganuogoluk hagakho.

⁷ Itithogon mekeat, at Lisias ap tentara meke inoe kok etnogo wagasik nen, ebe ninikimo nen tilogo wolok lagasik yoma la'i aga iti.

⁸ Itithogon la'i agasik, ukum ap yi oba 'bogo meke ninebe hat hoba wisuagaluk yoknisekhemo wago yi.] Nit nen wene oba 'bogo meke iti, hat nen itema waganhe dogolik, hilu asiginat o,” iluk yogokhikhe.

⁹ Itithogon yogokhikhemo, it ap Yahudi meke ebetlake emenogo nen meneke, ukum at oba 'bekhe dogolik, “At Tertulus nen ekhe iti, eberogonat ekhe o,” iluk yogokhukha.

Paulus ebe irlirlirogo, at Feliks yogokhikhe wene

¹⁰ It nen wene itithogon isukhama at kok gubernur etnogo nen wene Paulus nen ageikhe uagaluk iki pilin yogokhikhe. Yogokhikhemo, at nen, “Noe. Akhuni nit meke, yi ukum ti ukum inoba 'bisinem, haganeat nen yi tahun ti tahun hat nen initema waganogo ukum inoba 'bigik, kokhik, hagakhetek iti an nilu o. Iti nen, wene an noba 'bega iti, dekmaat, iluk, nebe nirlirlirogo harat yokhesigin yi nen, nakla arleken akhekhe lagei.

¹¹ An Allah hogorasigiluk o Yerusalem kerat dagagirik oba nen, niniki 12 hari anek welago, meke re, hat nen, Eberogonat a? dek a, iluk it hinok wogeisaumo hilu asiginat o.

¹² An o Allah ai halekma ukiluk men, o akhuni Yahudi meke sembayan egarekma ukiluk men, o ukul werlekma dukhi lalok men, akhuni aperek ninom ninane thagalhik, nen, it aperek inane kogat thagaluagaluk inakla kagalhik, hagakhidek. Itithogon hagakhunem it ap Yahudi meke nen inileken niigidegat o.

¹³ It ap yi nen ukum noba 'biliogei iti, Eberogonat hagakhemo, iluk nena meke inugutheagun. Inugutheasak degat asigin o.

¹⁴ Meke re, wene eberogonat hagakhe lagei meke ebe yi pakhogon yokhesik. It nen, Akhuni Yesus oporlik liliogei iti weka, iluk egarek. Meke re, an anek, it nen, weak egarek meke iti ane holiluk, Allah nit ninopa lak apma ukiluk welagoukha meke itiat ebe hogorakhe lagei iti anek, eberogonat hagakhe lageiat o. Hogorakhe dogolik, wene Allah nen ninasuk wakhikhe wene iti men, ap at ane yogeisekhe lagoukha meke inane men, tha'bokhogonat holal waganogo 'bisukha meke werek iti, eberogonat iluk hago welagei.

¹⁵ It ap yi nen, Akhuni hano hagariogei meke men, weak hagariogei meke men, inebe watlatluk werekma eberogonat Allah nen inilugurinabigin, iluk, inetaiken Allah oba hakotdiluk werek iti hak, an itithogonat welagei o.

¹⁶ Itithogon dogolik, nakla nen, Weak ageikhe hagakhi, iluk nakla weak dogunogo iluk, Allah hasik men, akhuni inobasik men, hano hagakhe lagei iluk, nakla thelek dogeigiluk, nobatnerogon hagakhe lagei o.

¹⁷ An mo dageigik, usigik, tahun doalegat o Yerusalem lageidek welagarik nen, nagarlak lak nerugi ninebe opakiat meke iluk, uang ageikhe yomageisigik, Allah hasik ageikhe 'bisigik, hagasigiluk lagei.

¹⁸ Lagarik nen, itithogon hagakhe dogolik, o Allah ai halekma ukuogoluk inoba horegarek iti hagat, itithogon hotdiluk nen ukigi. Itithogon hagakhi iti, akhuni doalegat ninom ukigidek. It aperek ninom ninane thagalhidegat werekma it Yahudi meke nen inileken neegaat.

¹⁹ Meke re, it ap Yahudi meke aperek o propinsi Asia nen lageikhasik etoma welageikha. Itithogon welageikha nileken hisigirikmo nen, it nenat wene noba 'busak halok he, hat hoba ya witluk nen ukum noba 'busak meke.

²⁰ It inebe dek halok he, it ap yoma werek meke nen uak. Akhuni nen it ap Yahudi Allah hasik wene erlo pilinekharek meke inoba 'bani lageikhasik, etoma metek werek korlek wene erlo herakha. Itithogon herakhunem, an weak hagakhi meke ageikhe eberogonat inasuk holha meke nenat uak o.

²¹ An etoma metek dogolik, wene opakiat yi anek nane kokhogon yogeisigi iti, Akhuni watlageikharek meke Allah nen eberogonat inilugurinabigin, iluk hutdekhe lagei iti nen, ukum noba 'bekhe lagap yi, iluk yogeisugunem anek inasuk holha iti,” iluk yogokhikhe.

²² Itithogon yogokhikhemo, at Feliks akhuni Yesus oporlik lageikharek wene iti ilu etnogo nen, Paulus men yogokhikhe, “Yogotak wene arat ogo. Yabokane ap tentara inoe kok Lisias etnogo ebe waga halok nen, ukum hoba 'bega meke iti, an nen wene erlo herago ilokon wasigin o,” iluk yogokhikhe.

²³ Itithogon yogokhikhesik, at agarumi tentara kok ageikhe nen Paulus ebe therogo dogoagaluk men yogokhikhe, “Hat nen Paulus hago dogolik, yugunat nekhe dogoagaluk here'in o. Nen, akhuni at meke nen yi meke ti meke at warlok meke yomakhuogoluk hagakho halok he, wenageisagun o. here'isekhe dogono,” iluk asuk wakhikhe.

Paulus ap Feliks men, he Drusila men, inoba wolok lagoukhama yogeisasikhe wene

²⁴ At Feliks nen, “Therogo dogono,” iluk yogokhikhemo, iniki pererlagat welagoukhasik nen, at Feliks age etaga Drusila, he ebe Yahudi meke. Wolok wageikhesik nen, agarumi nen Paulus wagani loagaluk yogeisasikhemo lagoukhasik ebe wolok wagoukhama nen, at Paulus nen akhuni inetaiken Kristus Yesus oba hakotdiluk welageikharek wene iti yogeisugunem, Feliks asuk holek welageikhe.

²⁵ Itithogon holek werek korlek, mothogon hagakhe dogosak wene iti men, inetaiken thebekhogon dogosak wene iti men, yabokane Allah nen akhuni ninitema waganiluk ukum ninoba 'bigik,kokhik, hagasigin wene iti men, yogeisugunem, Feliks ayuk ageikhe. Ayuk atluk nen, “Yogotak wene arat egen o. Yabokane usak mot aga halok he, wahesigin o,” iluk apuke la'isikhe.

²⁶ Itithogon la'isikhesik, at akla nen, “Paulus nen uang ageikhe woknesigin he a,” iluk apekhe dogolik, hibiku-yogokuat wakhikhesik nen, wenekak ipisak ekhe lagoukha.

²⁷ Itithogon isi korlek, mo dageigik usigik 2 tahun welagoukhasik nen, yabokane Feliks obolukmo ap ageikhe etaga Perkius Festus gubernur asuagaluk meldisukha. Melduogoluk hagakhunem, at Feliks nen, “It akhuni Yahudi meke inakla hanorogo,” iluk Paulus iki herle waregat here'isikhe.