La'isasikhe 2 - ALLAH ANE WENW KET MEKE WAROGO WOKNINAKHIKHE WENE

Allah nen Agoreke pogot oba nen inoba usa'i ageikhe wene

¹ Akhuni Yahudi meke hari Pentakosta hagasusak mot-mot asi ageikhemo, it akhuni inetaiken Yesus oba hakotdiluk welagoukha meke inebe tha'bokhogonat opakimo natogorlogo werekma

² eranogoat, o hisakne ane hubetha aga dogolik ekherek iti hak, Allah nen pogot oba nen usa'i ageikhemo, ane huak isinem, it akhuni uma hurek welagoukha meke emenogo tha'bokhogonat ane inasuk holhukha.

³ Inasuk holhukhasik inileken 'bikhasukha nen, hetu amulok negen melanethasinem inebe tomok inoba usa'i agunem, inileken hasukha.

⁴ Inileken itithogon hekhe korlek, Allah Agoreke it tha'bokhogonat inakla kerlekhogon ukisikhe. Ukiluk, Allah Agoreke nen, “At iti ane itithogon ekhe dogoak,” iluk akla apasikhe tak-tagat, it akhuni ninat meke inane baga uagaluk yakulisekhe korlek elalinat ekhe lagoukha iti.

⁵ Itinem, akhuni Yahudi meke Allah ane hologo hagakhe lagoukha meke, o yi ai ti ai tha'bokhogonat nen Yerusalem natogosi agoukhasik welagoukha.

⁶ Werekma, ane wuwu isikhe etnogo inasuk holiluk akhuni inebe doalegat natogosi agoukha. Natogosi agoukhasik werekma, it Yesus agarumi emenogo nen it akhuni yi ai ti ai nen wagoukha meke emenogo inane baga tomok ugunem, inasuk holhukhasik inakmaken lageikhe.

⁷ Inakmaken lageikhesik hogorakhe dogolik, “It wene yoknisiliogei meke yoma inebe tha'bokhogonat, inai o Galilea meke dek nogo? Galilea mekeat o.

⁸ Meke re, nikithogon hagatlagama nen nit akhuni ninai eloma ninane baga tomok ugunem ninasuk holhe lago apegep.

⁹ Nit ninebe ninai o Partia meke men, Media meke men, Elam meke men, Mesopotamia meke men, Yudea meke men, Kapadokia meke men, Pontus meke men, Asia meke men,

¹⁰ Pergia meke men, Pamfilia meke men, Mesir meke men, o Libia Kirene mot-mot eloma meke inom men, o Roma eloma lagosik ninebe huso negenat welagosik wago meke men, ninom welago yi.

¹¹ Nit ebetlake ebe Yahudi meke, nen it ebetlake werlek meke Yahudi meke ninoba ukitluk Allah ane waganhukhasik, Yahudi meke thalek ninom welagoat. Nen, akhuni o Kreta meke men, akhuni Arab meke men, ninom werekma, it ap yi nen Allah obatne baga elalinat hagakherek meke yoknisugunem, ninekaerek ninane baga tomok ninasuk holhe lago yi,” iluk,

¹² inobakha palatluk it-it hogorakhe dogolik, “Iti hagatlaga iti, ebe nikithogon meke he,” iluk isukha.

¹³ Meke re, it aperek nen, “Dek o. It yoma anggur eken apusu nekasik nen hunu-hunu palhasik iliogei yi,” iluk inobato aga lagoukha.

Allah ane Petrus nen yogeisasikhe wene

¹⁴ Inane itithogon ekhe korlek, at Petrus etnogo Yesus agarumi inebe 11 meke emenogo inomat dogolik, metokhogon melageikhe. Melageikhesik ane pakhogon men yogeisasikhe, “Hit Yahudi meke men, hit aperek yogotak ya o Yerusalem welagap meke tha'bokhogonat men, nagarlak lak nerugi. An wene igin yi hinilu asuak nen hinasuk holini o.

¹⁵ Yogotak o huben jam 9 agama welago yi. Jam iti hakene baga anggur eken apusu nalok hunu-hunu palharek dek iti nen, hit nen, It yi re, anggur eken apusu nekasik nen hunu-hunu palhasik iliogei, iluk apekhe lagap iti, dekmaat o.

¹⁶ Mekeat he, at Yoel nen Allah ane yogeisekhe lageikhe meke Allah nen yogokhikhemo isikhe hagat, arat hagatlaga o.

¹⁷ At nen, men isikhe, At Allah nen ekhe dogolik, O ilugun oba an Nagoreke iti, kokhogonat akhuni tha'bokhogonat inoba usa'isigin o. Usa'i agunem, hina'buri elege men, homagarlugi men, it nen an nane akhuni yogeisigik, hinagarumi elege thue negen nen ina'bikaka higik, hinopase lak yaman meke nen ina'bi higik, hagakhe dogogun o.

¹⁸ Itinem, an natuaneke meke, ap dek, humi dek, an Nagoreke kokhogon inoba usa'isigin o. Usa'i agunem it nen an nane yogeisekhe dogogun o.

¹⁹ Nen, akhuni nen hogorakhe dogoagaluk, elalin meke pogot oba upu yi baga hagakhik, wene hutduagaluk agat oba wema yoma hagakhik, hagakhe dogolik, yi meke ti meke oba, mep inom, hetu inom, hetu thode kogat dageikherek hakene inom, hagasigin.

²⁰ An hinopase Netagapogot nen kokhogon hagakhunem akhuni nen hogotnakhe korlek wisigin itinem aban wageidek werek korlek, o mulikin elokhoken ninat hi ageik, thut elokhoken mep ageik, iti tak hagatlasigin o.

²¹ Itithogon hagatlaga korlek, hit akhuni nen an hinopase Netagapogot netaga palogo nayoko 'bugun meke inebe tomok tilinabigin o, iluk Yoel nen isikhe iti.

²² Meke re, hit akhuni Israel meke nagarlak lak nerugi. An nane igin yi holini. Yesus ai Nazaret meke etnogo Allah nen ayoko 'bisikhemo, ninom dogolik, wene hutduagaluk hagasusak dek meke Allah nen iki obatnerogon elalinat hagakhe lageikhe iti nen, ebe Yesus nenat hagakhe lageikhe. Halok he, Yesus Allah nen la'i ageikhemo, iluk thelekmaat hagatlageikhe iti hinilu.

²³ Meke re, at Allah ilu dogolik, akla nen, Itithogon hagasuak o, iluk akla apasikhe bagaat, Yesus ebe hinikimo 'bisikhemo, hit nen ap inobabut weak meke iniki waganogo, at ebe o baga menogo 'biluk wakhepma iti.

²⁴ Wakhepma, at ebe hinet wakhe dogolik watlaga mekeat, akhuni iniki herle warogo 'bisegarekma welageikharek iti hak, at itithogon warek motok dogosak dek iti nen, iniki herle hisalogo ula'isegarek iti hak, Allah nen ilugutdekhemo iti.

²⁵ At Yesus hasik Daud nen men isikhe, An yi meke ti meke nen naborlogotneanogo iluk nopase Etagapogot ebe nalilu werekma, hibiku-yogoku nileken hasi motok welagarek.

²⁶ Iti nen, nakla arleken akhigik, nane baga hogorakhik, hagakhe lagarek. An nasumo nebe warek yabokane hano asigin, iluk nakla nen wene munini sikiphogon dogogin.

²⁷ Itithogon dogogin iti, an nebe akhuni watlatluk lageikharekma etoma motok dogoagaluk, hat nen here'anhik, An hat ha'but hekaerek meke nebe yi hirli asuagaluk kolelogo thogotdanhik, hagasigin dek iti nenat o.

²⁸ Hat nen niniluk dogogun iti meke holak yakulnekhik, hat hebe nipisak motok welago iti nen inakla arleken akhegarek meke nakla motok kerlekhogon woknekhik, hagakhe lagan o, iluk Daud nen Yesus hasik isikhe iti.

²⁹ Meke re, nagarlak lak nerugi. At ninopa Daud abok pakhogon yokhisak. At ebe watlageikhemo, nit welagoma yoma agat hulelogo thalhukha meke, obolukmo alep welageikhesik yogotak werek iti.

³⁰ At Daud ebe Allah ane yogeisekhe lageikhe meke etnogo nen, Allah nen hupuk palogo abok yogokhikhe meke iluat welageikhe, Hat kok welagatek iti hak dogoagaluk, ap hat nen itago meke ageikhe hobolukmo meldigin o, iluk abok yogokhikhe.

³¹ Itithogon abok yogokhikhe meke iti ebe aban meldigidek werek korlek, at Daud Allah nen hagasigin meke ilu dogolik nen, Kristus watlasumo, Allah nen ilugutdigin o, iluk wene at nen men isikhe, Allah nen at ebe akhuni watlatluk lageikharekma etoma motok dogoagaluk thogotdigin dek o. Nen, at ebe hirli atluk, dek asuagaluk thogotdigin degat o, iluk isikhe iti.

³² Itithogon isikhe tak-tagat, at Yesus Allah nenat ilugutdekhemo, nit ya tha'bokhogonat ninileken hogosik niniluat welago iti.

³³ At ebe Allah nen ilugutdekhesik, alilu kok dogoagaluk meldekhemo werek o. Dogolik, Allah nen, Nagoreke wokhisagein, iluk abok yoknisasikhe hagat Yesus wogokhemo, at nen kokhogonat nit ninoba usa'i agama nen, nti hagakhunem hinileken nisigik, hinasuk holhik, hagakhe lagap iti.

^34-35 Meke re, at Daud ebe pogot oba dageigidek. Meke re, at nen men isikhe, Ninopase Etagapogot nen, an noe Etagapogot yogokhe dogolik, Hat hathili meke emenogo, hisok nen al debelogo 'bisanok nen, an nen hoba 'bisa ageidek werek korlek, hat hebe an nalilu niki ebeke kok hurek dogono, iluk at Allah nen yogokhikhe, iluk, at Daud ekaerek nen isikhe iti.

³⁶ At Yesus ebe hit nen o baga meldiluk wakhepma, at Allah nen, Hinoe Etagapogot Kristus ebe yiat, iluk meldekhemo iti. Halok he, hit akhuni Israel meke tha'bokhogonat nen, Wene iti eberogonat, iluk hinilurogon dogono,” iluk yogeisasikhe.

³⁷ Itithogon yogeisasikhemo, inasuk holhukhasik, wene iti baga inetaiken warekhe dogolik,it nen Petrus men, it aperek Yesus nen inayoko 'biluk la'isasikhe meke emenogo men, yogeisekhe dogolik, “Nagarlak lak. Nit ninobabut nikithogon hagasu heat,” iluk yogeisasukha.

³⁸ Itithogon yogeisasukhama at Petrus nen, “Weak hagakhe lagap meke iti here'isalok hinobabut hebelatni o. Itithogon hinobabut hebelasumo nen, weak hagakhe lagap meke iti, Allah nen thagalogo degetduagaluk hinebe tomok Yesus Kristus etaga palogo ima usa'inaguak. Itithogon hagasumo nen, Allah Agoreke iti wokhisagein o.

³⁹ At Allah nen itithogon wokhisagein iluk wene watnisasikhe iti, hit hinebe men, hina'buri men, it aperek inai walegat meke etoma men, hinebe ninopase Etagapogot Allah nen, Witni o, iluk wahisiliogo meke, tha'bokhogonat inobasik wene hit hinoba wathisasikhe,” iluk yogeisasikhe.

⁴⁰ Wene ebe itithogon uanat ekhe dogolik, “Akhuni inobabut korlo hagariogei meke yoma, Allah nen ukum inoba 'bigin meke iti, here'isalok hinekaerek nen tilano o,” iluk inasuk wakhikhe.

⁴¹ Inasuk itithogon wakhikhemo, it wene waganhukha meke ima usa'isasukha. Itinem inebe 3.000 hakene ima usa'isasukhasik nen, yabokane inom dapukhogon welagoukha.

⁴² Inom dapukhogon hanoat dogolik, it ap Yesus nen inayoko 'biluk la'isasikhe meke emenogo nen wene yakulisugunem hunik-hunigat inasuk holhik, hipiri inom kusogo nikik, sembayan inom igik, hagakhe lagoukha.

Allah a'buri inetaiken Yesus oba hakotdiluk hagakhe lagoukha wene

⁴³ Akhuni nen wene hutduagaluk, it ap Yesus nen inebe inayoko 'biluk la'isasikhe meke emenogo nen hagasusak dek meke elalinat doalegat hagakhunem, akhuni inebe tomok inayuk aga lagoukha.

⁴⁴ It akhuni aperek wene eberogonat iluk waganhukha meke inom opakimo hano dogolik, inameke yi meke ti meke hasik, “Nit ninom opakiat ninameke meke,” iluk dapukhogon hago welagoukha.

⁴⁵ Itithogon dogolik, it aperek nen, inagat men, inameke men, oko uang waganiluk, uang iti it Allah a'buri meke emenogo inebe tomok supurisekhe dogolik, it aperek inameke dek meke erlok supurisekhe lagoukha.

⁴⁶ Itithogon hagakhe dogolik, iniki ageikhe huk ageidek hunik-hunigat Allah ai halekma natogokhik, inakla arleken akhekhe dogolik, inobabut thebekhogonat inaila hipiri inom kusogo nikik, hagakhe lagoukha.

⁴⁷ Itithogon hagakhe dogolik, it nen Allah hogorakho werekma, it akhuni tha'bokhogonat nen, “It hano,” iluk hogorinakhe lagoukha. Hogorinakho werekma, ninoe Etagapogot nen, iki ageikhe huk ageidegat, akhuni aperek tilogo Allah a'buri inom opakiat dapukhogon 'bisekhe lageikhe.