La'isasikhe 19 - ALLAH ANE WENW KET MEKE WAROGO WOKNINAKHIKHE WENE

Paulus o Efesus wageikhesik hagakhikhe wene

¹ At Apolos o Korintus etomaat werek korlek, at Paulus etnogo holak upuke dagak-pagak waga lageikhesik, o kota Efesus wageikhe. Wageikhesik, akhuni Yesus ane waganhukha meke aperek werekma inoba ukisikhe.

² Inoba ukisikhesik men yogeisasikhe, “Hit hinetaiken Yesus oba hakotdisigip iti, Allah Agoreke waganhigisip welagap a? Dek a,” iluk yogeisasikhe. Yogeisasikhemo, it nen, “Allah Agoreke werek iluk isinem, ninasuk holhidek nen waganhidek welago,” iluk yogokhukha.

³ Itithogon yogokhukhama, at Paulus nen yogeisekhe dogolik, “Halok he, hit ima usa'inageisukha iti, wene ki wene yakulhigipmo usa'inageisukha,” iluk yogeisasikhemo, it nen, “Yohanes nen ima usa'isekhe lageikhe etnogo wene yakulhugumo ima usa'inanhukha,” iluk yogokhukha.

⁴ Itithogon yogokhukhama, at Paulus nen, “Yohanes nen ima usa'inakhe lageikhe iti, it akhuni nen, Weak hagakhe lago meke arat thogotdogosik ninobabut hebelago, iluk isi halok usa'inakhe lageikhe. Itithogon usa'inakhe dogolik, men yogeisekhe lageikhe, An noporlik ap ageikhe wisigin. Halok he, hinetaiken at oba hakotdiluk dogono o, iluk ebe Yesus hasigat yogeisekhe lageikhe iti,” iluk yogeisasikhe.

⁵ Itithogon yogeisasikhemo it inasuk holhukhama, ninoe Etagapogot Yesus etaga palogo yabokane ima usa'isasukhaat.

⁶ Usa'isasukhama, at Paulus nen iki inukuloak thebelhunem, Allah Agoreke inoba usa'ageikhemo, it nen, wene it akhuni ninat inane inokodek meke baga elalinat igik, Allah ane it yogeisigik, ekhe lagoukha.

⁷ It itithogon ekhe lagoukha iti, ap inebe 12 hakene nen ekhe lagoukha.

⁸ Itithogon isukhama, at Paulus o akhuni Yahudi meke sembayan ekhe lagoukhama ukiluk ayuk dekhogon dogolik, wene Allah nen apma 'bisekherek wene etnogo hutdiluk waganuagaluk, inakla kagalogo, wene at nen yogeisigik, it nen oko at yogokhik, hagakhe dogolik, thut henagan welageikhe.

⁹ Dogolik, itithogon yogeisekhe lageikhe mekeat, it iti ebetlake inetaiken a'bet atluk, wene iti inakla meanetdiluk nen, akhuni aperek doalegat inil obaat, Yesus oporlik lageikharek wene iti abok weak palhukha. Abok weak palhukhama, at Paulus, it thogotdisalok, it ebetlake Yesus ane waganhukha meke anek wogosik dukhisikhe. Wogosik dukhiluk, o kok halekma ap Tiranus nen yi wene ti wene yakulisekhe lageikhemo iti ukiluk, hibiku-yogoku iki ageikhe huk ageidek wene at nen yogeisigik, it nen oko yogokhik, hagakhe lageikhe.

¹⁰ Itithogon isi motok 2 tahun werekma nen, it akhuni o propinsi Asia etoma, Yahudi meke dek, Yunani meke dek, tha'bokhogonat wene ninoe Etagapogot ane etnogo inasuk holhukha.

Ap etaga Skewa a'buri nen hagakhukha wene

¹¹ At Paulus nen akhuni nen hagasusak dek meke elalinat hagarinakhe lageikhe iti, ebe Allah nenat hagarinakhe lageikhe.

¹² Hagarinakhunem, su at Paulus dikak hokherek meke he a, asu ebe meke elokhoken weak asinogo iluk itikmanke ikhe lageikha meke he a, akhuni nen wolok, it u waganhe lagoukha meke inoba 'bi lagunem nen, u hano ageik, mokat inobabut weak meke inakla ukiluk welageikhe meke mukhogo dukhigik, hagakhe lageikhe.

¹³ Itithogon hagakhe korlek, it akhuni Yahudi meke aperek inebe hathale dogolik, mokat inobabut weak meke akhuni inakla ukiluk werekma mukhogo ula'isilik nekhe lagoukha meke nen, ninoe Etagapogot Yesus etaga palogo ula'isuogoluk walhasukhaat. Walhekhe dogolik, it nen, mokat obabut weak meke yogokhe dogolik, “At Yesus, Paulus nen yogeisilik liliogo meke iti etaga palogo, dukhi lan o, iluk yokhekhe lago,” iluk yogokhukha.

¹⁴ Itithogon hagakhe dogolik, ap Yahudi meke ebe ap Allah iteerek meke inoe kok etaga Skewa iti, a'buri ap inebe 7 nen welagoukha meke nen itithogonat walhasukha.

¹⁵ Walhasinem, at mokat obabut weak meke nen, “Yesus iti ebe, an nilu. Nen, Paulus iti ebe, abok nasuk holhi mekeat. Meke re, hit yi hinebe thani he. An nokodek,” iluk yogeisasikhesik nen,

¹⁶ ap mokat obabut weak meke akla ukiluk welageikhe meke etnogo inoba pok hayokhogon thagali lageikhesik nen,obatne atluk it inobatne degetdisasikhe. Inobatne degetdisekhe dogolik, inasu li'bik-la'bakhogon tugi mep wulukhogonat inakhikhe. Inakhikhemo at aila nen inal wurlugat lo dukhisukha.

¹⁷ Lo dukhisukhama, akhuni nen, “It itithogon hagakha o,” iluk isukhama, it akhuni Yahudi meke men, Yunani meke men, o kota Efesus welagoukha meke tha'bokhogonat inasuk holhukha. Holhukhasik, inayuk atluk, Yesus etaga ebenageik hogorakhe lagoukha.

¹⁸ Nen, it akhuni inetaiken Yesus oba hakotdisukha meke inebe wagoukhasik nen, weak hagakhe lagoukha meke akhuni doalegat inil oba 'bualhe lagoukha.

¹⁹ Nen, it ap hathale dogolik usa hagakhe lagoukha meke inebe doalegat nen ina'buku usa meke uang perak kok meke 50.000 hakene baga oko palhukhasik hago welagoukha meke natogorlogo akhuni tha'bokhogonat inil oba hetu hunhukha iti.

²⁰ Itithogon hagakhukhama, ninoe Etagapogot ane iti kok ageik, obatne ageik, hagakhe lageikhe.

Akhuni o Efesus meke nen, inane kok thagalhukha wene

²¹ Itithogon hagakhukhama, at Paulus akla nen apekhe dogolik, “O propinsi Makedonia lalok nen, o propinsi Akhaya witluk nen piokhogon, o Yerusalem ligin,” iluk akla apasikhesik, “Lalok, yabokane napuke witluk, o kota Roma nileken 'bikha liginat o,” iluk isikhe.

²² Itithogon iluk nen, at yomakhiliogei meke inebe pere, Timotius men, Erastus men, ipisak o propinsi Makedonia la'isa itluk, at arligat anek o propinsi Asia welageikhe.

^23-24 Itinem, o kota Efesus etoma tukang perak ageikhe etaga Demetrius. Yi meke ti meke perak meke hagakhe lageikhe. Hagakhe dogolik kaneke ebe he meke etaga Artemis. Ebe ai kok etoma halek werek korlek, o 'bugurlagat at ai halek tak-tagat perak meke doalegat alino hagarogo 'bekhe lageikhe. Itithogon hagarogo 'bisinem, akhuni nen oko palhe lagoukhama, it Demetrius agarumi tukang perak inikimo horleak hagakhe lagoukha meke inomat kokhogon oko thaburekhe lagoukha iti nen, akhuni Yesus ane waganiluk oporlik lageikharek wene iti hasik o Efesus etoma inane kogat thagalhukha.

²⁵ Itithogon hagatlageikhe iti, at Demetrius nen, agarumi tukang perak men, it aperek perak meke itithogon inikimo horleak hagakhe lagoukha meke men, inayoko 'bisikhe. Inayoko 'bisikhemo natogokhukhama, at nen, “Nagarlak lak. Nit niniki nen hagakhe lago iti baga hano oko thaburekhe lago, iluk hinilu.

²⁶ Meke re, yogotak at Paulus iti hagariogo meke, hinileken tomok higik, hinasuk holhik, hagakhe lagap. At nen, Akhuni iniki nen kaneke hagakharek iti, ebe walhenak meke dek o, iluk yogeisugunem, akhuni doalegat nen, Wene iti eberogonat, iluk waganha iti, horok o kota Efesus yoma meke anek 'buk. O propinsi Asia meke akhuni tha'bokhogonat waganhamaat o.

²⁷ Iti nen, nit niniki nen itithogon hagakhe lago meke yi ninabok weak palugun o. Meke re, nit ninabok anek weak palugun 'buk. Ninagona kok Artemis ai kok halek yi, hogorasusak dek iluk inakla apekhe dogolik, Artemis akhuni o propinsi Asia meke tha'bokhogonat men, o yi ai ti ai meke men, inomat at apma ukiluk dogolik hogorariogei meke thagalogo degetdugun iti!” iluk yogeisasikhe.

²⁸ Yogeisasikhemo inakla aga dageiluk nen, “Nit akhuni o Efesus meke ninagona Artemis kok itiat o,” iluk inane kokhogon isi motok welagoukha.

²⁹ Itithogon isi dogolik, inane thagalhunem, akhuni o kota Efesus etoma meke pirlirli natogosi aga dogolik, ap o propinsi Makedonia meke inebe pere, Paulus inom nekhe lagoukha meke, inetaga Gayus men, Aristarkhus men, inebe hageinakhukhasik o silimo wene kok palharekma wogosik ukisukha.

³⁰ Wogosik ukisukhama, Paulus ebe yabokane inoporlik akhuni inebe doalegat natogorlekma etoma ukigiluk hagakhikhe meke re, it akhuni Yesus ane waganhukha meke nen, “Hat ukugun o,” iluk wene palhukha.

³¹ Nen, ap koktek o propinsi Asia meke ageikhe Paulus inom hunik welagoukha meke nen, “Etai sili kok waganekma etoma hilhaoak 'bi kugun o” iluk it aperek nen etaiken thebeluagaluk yoko oba la'isukhaat.

³² Nen, akhuni natogokhukha meke emenogo, inebe doalegat wene ebe inokodegat natogosi agoukha iti nen, “Nenaluk natogosi ago heat,” iluk it aperek nen inane yigithogon igik, it aperek nen itithogon igik, inane kogat thagalhukha.

³³ Inane itithogon thagalhe korlek, it ap Yahudi meke nen, ap Aleksander akhuni doalegat inil oba meldi agoukhama, it akhuni doalegat emenogo nen, “Wene erlo, at higi,” iluk inakla apasukha. Itithogon inakla apugunem, at Aleksander nen, “An wene noba dekma o,” iluk akhuni emenogo yogeisagaluk iki la'isikhe mekeat, it inakla nen,

³⁴ “Ap yi Yahudi meke,” iluk ebe hutdiluk nen, inane opakiat dapukhogon, kokhogonat men isukha, “Nit akhuni o Efesus meke yoma kogat he, ninagona Artemis itiat o,” iluk inane hunik-hunigat 2 jam naik isi motogat welagoukha.

³⁵ Itithogon isi lagoukhama nen, at ap wene palhunem holal waganhe lageikhe meke nen, it akhuni doalegat emenogo inane degetdisikhe. Degetdisikhesik nen, men yogeisasikhe, “Hit akhuni o Efesus meke yirani. Ninagona Artemis kok iti ai halek iti men, akhuni-akhuni at ekaerek ebe hakene alino hagarek pogot oba nen usageikhe meke iti men, nit akhuni o Efesus meke yoma hago welagorek iti tha okodek. Akhuni o yi ai ti ai tha'bokhogonat inilu anek.

³⁶ Akhuni aperek nen, Wene iti dek mekeat o, iluk thagalusak dek. Halok he, hit yoma nen hinetaiken dek negen yigithogon tigithogon ageikhe hagakhidek, hinaborlok degat dogosak o.

³⁷ It ap yi nen, yi meke ti meke ninagona kaneke aila meke aperek iniki abusak wagani ukigidegat, ninagona ebe iti abok palhidegat, werek korlegat, wogosik wagap yi re!

³⁸ At ap Demetrius ebe men, agarumi tukang perak inikimo horleak meke hagakharek meke men, inom nen, wene ap ageikhe oba 'busak werek halok he, iniki itinem wene inoba 'bigik, kokhik, hagakharek oba nen, it gubernur lak inil oba wene inoba 'busak werek o. Halok he, at ageikhe nen wene at ageikhe oba 'bigik, at ageikhe nen wene at ageikhe oba 'bigik, etoma nenat usak werek o.

^39-40 Hinebe natogosi agasip hinane kogat thagalhep yi, it aperek nen, Nena wene hasik natogosi agasip ekhe lagap, iluk wene hinoba 'bekhe halok he, hit nen nikithogon ugun. Wene erlo dekma yi re! It nen, Weak hagasuagaluk inakla kagalhe lagap, iluk wene hinoba 'busak o. Iti nen, hit nen ageikhe hagasuagaluk hinakla apegep halok he, akhuni tha'bokhogonat inayoko 'biluk natogotdiluk, wene inoba 'bigik, kokhik, iniki hagakharek hari iti baga wene moretdusak o,” iluk yogeisasikhe.

⁴¹ Itithogon yogeisasikhesik nen, akhuni natogokhukha meke emenogo kikil warogo la'isasikhe.